“9–15 Mei. Ol Namba 11–14; 20–24: ‘Yufala I No Mas Girap Agensem Lod, Mo Yufala I No Mas Fraet,’” Kam Folem Mi—Blong Praemeri: OlTesteman 2022 (2021)
“9–15 Mei. Ol Namba 11–14; 20–24,” Kam Folem Mi—Blong Praemeri: OlTesteman 2022
9–15 Mei.
Ol Namba 11–14; 20–24
“Yufala I No Mas Girap Agensem Lod, Mo Yufala I No Mas Fraet”
Aotlaen ia i no wan pepa we oli raetem we yu mas folem stret olsem we i stap. Be, i blong yusum blong kasem ol aedia mo insperesen blong ol aktiviti blong lanem samting, we bae i blesem ol pikinini long klas blong yu.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Soem long ol pikinini wan long ol pikja long aotlaen ia o long aotlaen blong wik ia insaed long Kam Folem Mi—Blong Wanwan Man, Woman mo Famli. Letem olgeta oli serem wetem yu eni samting we oli save abaot wanem we i stap hapen insaed long pikja.
Tijim Doktrin: Ol Smol Pikinini
Mi save stap talem tangkyu from wanem we God i bin givim long mi.
I nomata se Lod i bin mekem ol naesfala samting long ol pikinini blong Isrel, be oltaem oli stap lukluk nomo long wanem we oli no gat. Helpem ol pikinini blong lanem blong stap talem tangkyu long wanem we God i bin givim long olgeta.
Samfala Aktiviti we Yu Save Mekem
-
Askem ol pikinini sapos oli tingbaot sam merikel we Lod i bin mekem blong blesem ol laen blong Isrel long waelples. (Sapos ol pikinini oli nidim help, soem long olgeta ol pikja aot long aotlaen blong 4–10 Epril insaed long Kam Folem Mi—Blong Wanwan Man, Woman mo Famli; luk tu long Eksodas 14:21–22; 15:23–25; 16:4.) Afta, talem sot long olgeta wanem i stap long Ol Namba 11:4–10, mo tokbaot bigwan se Lod i no glad from se ol laen blong Isrel oli stap komplen. Helpem ol pikinini blong oli tingting long sam wei we oli save soem fasin blong talem tangkyu blong olgeta i go long Lod.
-
Sing tugeta long wan singsing abaot fasin blong talem tangkyu olsem hemia “Yu Gat Blesing Kaontem Evriwan” (STSP, pej 8). Invaetem ol pikinini blong droem ol pikja blong ol blesing we Lod i bin givim long olgeta o famli blong olgeta. Leftemap tingting blong olgeta blong tingbaot o luk long pikja blong olgeta long enitaem we oli kasem temtesen blong komplen abaot wan samting we oli no gat.
Fet i save helpem mi blong no stap fraet.
Taem Moses i sendem 12 man blong faenemaot abaot promes graon, 10 long olgeta oli kambak from oli fraet long ol pipol we oli gat strong paoa we oli stap longwe. Tu long olgeta, Keleb mo Josua, oli not bin fraet from se oli bin gat fet long Lod.
Samfala Aktiviti we Yu Save Mekem
-
Yusum ol pikja o ol grep frut we oli droem, hani, ol bigbigfala man, mo ol grasopa mo talem long wan sot toktok long ol pikinini abaot ol 12 man we Moses i bin sendem blong faenemaot promes graon (luk long Ol Namba 13:17–33; luk tu long “Foti Yia long Waelples” insaed long Ol Stori long OlTesteman). Eksplenem se oli bin faenem plante frut mo ol narafala kaekae (invaetem ol pikinini blong mekem olsem se oli stap kakae ol kaekae), be tu, oli stap fraet from se ol pipol longwe oli bigbigwan mo strong (invaetem ol pikinini blong mekem olsem se oli stap fraet). Soem wan pikja blong Jisas, mo poenemaot se tufala laen blong Isrel, Keleb mo Josua, tufala i no bin fraet from se tufala i gat fet long Jisas Kraes.
-
Ridim Ol Namba 14:9 long ol pikinini mo tokbaot wan taem we yu bin fraet be fet blong yu long Jisas Kraes i helpem yu blong gat paoa long tingting. Helpem ol pikinini blong tingbaot wan semmak taem olsem we olgeta i bin go tru long hem.
Pikjaol man oli stap soem ol frut long MosesTen aot long ol laen blong Isrel we oli ol spae, oli bin fraet; Josua mo Keleb, tufala i bin gat fet. © Lifeway Collection/oli karem laesens long goodsalt.com
Mi save lukluk i go long Jisas Kraes.
Semmak olsem we ol pikinini blong Isrel oli bin kasem hiling taem oli stap lukluk long snek we oli wokem long bras, ol pikinini long klas blong yu oli kasem fasin blong sevem man tru long Sevya.
Samfala Aktiviti we Yu Save Mekem
-
Yusum aktiviti pej blong wik ia o ol pikja long aotlaen blong wik ia insaed long Kam Folem Mi—Blong Wanwan Man, Woman mo Famli, mo talem long ol pikinini wanem i bin hapen taem ol “snek blong faea” oli kam long ol laen blong Isrel long kamp (luk long Ol Namba 21:6–9). Helpem olgeta luk olsem wanem snek we oli bin wokem wetem bras, i olsem Jisas Kraes (luk long Jon 3:14–15). Afta letem ol pikinini oli gat janis blong yusum ol pikja blong talem stori long wanwan long olgeta.
-
Askem ol pikinini blong oli sarem ae blong olgeta taem yu stap putum wan pikja blong Jisas samples insaed long rum ia. Afta, talem long olgeta oli openem ae blong olgeta, faenem pikja, mo luk long hem. Letem olgeta wanwan i gat janis blong putum pikja samples long rum. Evri taem we ol pikinini oli faenem pikja, helpem olgeta tingting long wan samting we oli save mekem blong luk i go long Sevya.
Stap Tijim Doktrin: Ol Bigfala Pikinini
Lod i wantem mi blong mi folem profet blong Hem.
Ol Namba 12 i gat insaed sam lesen we i gat valiu we i save helpem ol pikinini long taem we oli harem ol pipol oli stap talem ol toktok we i no kaen abaot profet blong Lod o ol narafala lida blong Jos.
Samfala Aktiviti we Yu Save Mekem
-
Talem long ol pikinini se, long wan taem, Lod i no bin glad long Eron mo Miriam, brata mo sista blong Moses. Invaetem olgeta blong ridim Ol Namba 12:1–2 blong faenemaot se from wanem. Folem ol ves 5–8, ?olsem wanem Lod i filim abaot Eron mo Miriam taem tufala i stap toktok agensem ol profet blong Hem?
-
Helpem ol pikinini blong tingting long sam eksampol blong ol pipol insaed long ol skripja we oli bin folem ol profet mo oli kasem blesing (eksampol, luk long Jenesis 7:7; 1 Nifae 3:7). ?Wanem nao sam long olgeta samting we profet blong yumi we i stap laef i bin tijim long yumi? ?Olsem wanem nao yumi kasem blesing taem yumi folem ol tijing blong hem?
Jisas Kraes i gat paoa blong hilim mi long long saed blong spirit.
Plante laen blong Isrel oli bin ded from oli no gat fet se bae Lod i hilim olgeta sapos oli lukluk long snek we oli wokem long bras (luk long Alma 33:18–20). ?Olsem wanem nao yu save helpem ol pikinini we yu stap tijim blong oli gat fet long paoa blong Jisas Kraes blong sevem man.
Samfala Aktiviti we Yu Save Mekem
-
Invaetem ol pikinini blong droem ol pikja blong wanem oli ridim insaed long Ol Namba 21:4–9. Letem olgeta yusum ol pikja blong olgeta blong talem stori. Askem wanwan long ol pikinini blong jusum wan long ol skripja ia mo serem wanem we skripja i ademap long save blong yumi long stori ia: Jon 3:14–15; 1 Nifae 17:41; Alma 33:18–20; Hileman 8:13–15; Doktrin mo Ol Kavenan 6:36.
-
Raetem long bod wan kwestin olsem ?Wanem nao yumi save mekem blong “lukluk long Pikinini blong God wetem fet? (Hileman 8:15). Givim wan pis blong pepa long wanwan pikinini, mo invaetem olgeta blong raetem plante we plante ansa blong kwestin ia we oli save tingting long hem. Karembak ol pepa, ridim sam ansa laod, mo invaetem ol pikinini blong tokbaot olsem wanem, taem yumi stap mekem ol samting ia, i save helpem yumi taem yumi nidim paoa blong Sevya blong hilim man.
Mi save folem tingting blong God, iven sapos ol narafala man oli traem blong winim tingting blong mi blong no folem.
Balak i traem blong winim tingting blong Balam blong putum wan strong toktok long ol laen blong Isrel, be Balam i bin save se hemia i agensem tingting blong God. Eksampol blong Balam i save helpem ol pikinini taem oli fesem fos blong no obei long God.
Samfala Aktiviti we Yu Save Mekem
-
Tokbaot long wan sot toktok Ol Namba 22:1–18 long ol pikinini, mo tokbaot bigwan olsem wanem Balam i no wantem blong talem wan strong toktok long ol pipol blong God, i nomata Balak, king blong Moab i givim hem ona mo ol rij samting. Askem ol pikinini blong lukaotem long ol ves ia sam sentens we oli filim se i soem strong tingting we Balam i gat blong folem God: Ol Namba 22:18; 23:26; 24:13. Invaetem ol pikinini blong jusum wan sentens we oli laekem mo raetem long wan kad blong helpem olgeta blong tingbaot blong obei Lod.
-
Tokbaot wetem ol pikinini abaot ol situesen taem ol fren o ol narawan oli traem blong winim tingting blong olgeta blong mekem wan samting we i rong olsem Balak i bin mekem. ?Olsem wanem nao komitmen blong Balam long Lod i helpem hem blong stopem fos blong Balak. Invaetem ol pikinini blong praktis blong fesem ol situesen olsem mo yusum ol toktok olsem Balam.
Stap Leftemap Tingting blong Lanem Samting long Hom
Invaetem ol pikinini blong serem wan samting wetem ol famli blong olgeta olsem wan pikja, wan skripja o wan singsing we i soem wanem we oli bin lanem long Praemeri.
Kam Antap long Fasin blong Yumi blong Stap Tij
Mekem maen blong yu i open long ol kwaet toktok blong Spirit. “Plante taem ol gudgudfala taem blong tij i stap hapen taem yumi no ting se bae i hapen olsem—eksampol, taem wan i serem wan eksperiens o askem wan kwestin we i lidim yumi i go long wan taem blong toktokraon we i gat plante mining. … Gat tingting blong wantem blong jenisim ol plan blong yu sapos i nid blong save folem ol kwaet toktok we yu kasem long Spirit” (Teaching in the Savior’s Way, 10).