“9–15 Mei. Namba 11–14; 20–24: ‘!Yufala i no mas girap agens long hem! !Yufala i no fraet long olgeta ya longwe!,’” Kam Folem Mi—Blong Wanwan Man, Woman mo Famli: OlTesteman 2022 (2021)

“9–15 Mei. Namba 11–14; 20–24,” Kam Folem Mi—Blong Wanwan Man, Woman mo Famli: 2022

Pikja

vale we i wan draeples

9–15 Mei

Namba 11–14; 20–24

“!Yufala I No Mas Girap Agens long Hem! !Yufala I No Fraet long Olgeta Ya Longwe!”

Aotlaen ia i haelaetem plante prinsipol we i impoten long Buk blong Namba. Gat open tingting tu long ol narawan we Spirit i save helpem yu blong luk.

Raetemdaon Ol Filing mo Tingting blong Yu

Iven sapos oli wokbaot, bae i no tekem 40 yia blong oli wokbaot long draeples blong Saenae go kasem promes graon blong Kenan. Be hemia i hamas longfala taem we ol pikinini blong Isrel i nidim, i no blong kavremap i longfala ples we oli wokbaot long hem long graon be i blong kavremap hamas longfala ples oli wokbaot long saed blong spirit: longfala ples bitwin huia olgeta long pas mo huia Lod i nidim olgeta blong oli kam olsem ol kavenan pipol blong Hem.

Buk blong Namba i talemaot sam long ol samting we i hapen long ol 40 yia ia, we i tekem tu ol lesen blong ol pikinini blong Isrel oli bin nidim blong lanem bifo oli go insaed long promes graon. Oli lanem olsem wanem blong oli stap fetful long ol wokman blong Lod we oli jusum olgeta (luk long Namba 12). Oli lanem blong trastem paoa blong Lod, iven taem we fiuja i luk olsem se i no gat hop nomo long hem (luk long Namba 13–14). Mo oli lanem se blong no gat fet, o blong no gat tras i prapa spolem gud yu long saed blong spirit, be oli save sakem sin mo lukaotem hiling blong Sevya (luk long Namba 21:4–9).

Yumi evriwan i olsem Ol Man Isrel long sam wei. Yumi evriwan i save se i olsem wanem blong save stap long waelples long saed blong spirit, mo ol semmak lesen we oli lanem oli helpem yumi blong rere blong go long promes graon blong yumi.

Blong gat wan bigfala lukluk long Buk blong Namba, luk long “Numbers” insaed long Bible Dictionary.

Pikja

stadi blong yuwan pikja aekon

Ol Aedia blong Skripja Stadi blong Yuwan

Namba 11:11–17, 24–29; 12

Revelesen i blong evriwan, be God nao i lidim Jos blong Hem tru long profet blong Hem.

Long Namba 11:11–17, 24–29, luk problem we Moses i fesem mo ansa we God i givim. ?Wanem yu ting se Moses i minim taem hem i talem se hem i wantem tumas ”blong Hae God i givim spirit blong hem long olgeta man, i mekem olgeta evriwan i toktok olsem ol profet?” (ves 29). Taem yu stap tingting hevi long ol ves ia, tingting long ol toktok ia blong Presiden Russell M. Nelson: “?Yu ting se God i rili wantem blong toktok wetem yu? !Yes! … “O, i gat plante moa samting we Papa blong yu we i stap long Heven i wantem yu blong save.” (“Revelesen blong Jos, Revelesen blong Laef blong Yumi,” Liahona Mei 2018, 93).

Be, blong talem se evri man i save kam wan profet i no minim se bae evriwan i save lidim ol pipol blong God olsem we Moses i bin mekem. Ol samting we oli hapen long Namba 12 i mekem hemia i klia. Taem yu stap ridim japta ia, ?wanem ol woning nao yu faenem? ?Wanem nao yu filim se Lod i wantem yu blong andastanem abaot revelesen blong yuwan mo blong folem profet?

Luk long 1 Nifae 10:17; Doktrin mo Ol Kavenan 28:1–7; Dallin H. Oaks, “Two Lines of Communication,” Liahona, Nov. 2010, 83–86.

Namba 13– 14

Wetem fet long Lod, mi save gat hop long fiuja.

Taem yu stap rid long 8Namba 13–14, traem blong putum yuwan long ples blong Ol Man Isrel. ?From wanem yu ting se oli bin wantem “gobak long Ijip” (Namba 14:3). ?Bae yu kam olsem olgeta we oli nogat hop blong go long promes lan? ?Hao nao bae yu tokbaot narafala “spirit” Keleb i bin gat? (Namba 14:24). ?Wanem nao i tajem yu abaot fet blong Keleb mo Josua, mo olsem wanem yu yusum ol eksampol blong olgeta long ol situesen we yu stap fesem?

Luk tu long Teachings of Presidents of the Church: Gordon B. Hinckley (2016), 75–76.

Namba 21:4– 9

Sapos mi lukluk long Jisas Kraes wetem fet, Hem bae i save hilim mi long saed blong spirit.

Ol profet long Buk blong Momon oli save stori we oli rekodem long Namba 21:4–9 mo oli andastanem mining blong hem long saed blong spirit. ?Wanem nao 1 Nifae 17:40–41; Alma 33:18–22; mo Hileman 8:13–15 i ademap i go long save blong yu long stori ia? Taem yu stap stadi long ol skripja ia, tingbaot hiling long saed blong spirit we yu hop from. Ol Man Isrel oli mas “[luk] pikja blong snek” (Namba 21:9) blong oli kam gud bakegen. ?Wanem nao insperesen we yu kasem blong lukluk moa “long pikinini blong God wetem fet”?(Hileman 8:15).

Luk tu long Jon 3:14–15; Doktrin mo Ol Kavenan 6:36; Dale G. Renlund, “Glad long Fulap Blesing Tumas,” Liahona, Mei 2019, 70–73.

Ol Man Isrel oli kam gud bakegen taem oli lukluk i go long snek we oli wokem long bras.

Namba 22– 24

Bae mi folem tingting blong God, iven sapos ol narafalawan oli traem blong fosem mi blong no mekem.

Taem we Balak, king blong Moab, i lanem se Ol Man Isrel oli stap kam, hem i singaotem Balam, wan man we oli save long hem olsem man blong talemaot ol blesing mo ol strong nogud toktok. Balak i wantem hem blong mekem Ol Man Isrel oli nomo strong, sapos hem i talem ol nogud strong toktok ia long olgeta. Luk olsem wanem Balak i traem blong mekem Balam i foldaon long sin (luk long Namba 22:5–7, 15–17), mo tingbaot ol temtesen we yu stap fesem we oli go agensem wanem we God i wantem. ?Wanem nao i tajem yu abaot ansa blong Balam long Namba 22:18, 38; 23:8, 12, 26; 24:13?

Be sore nomo, i luk olsem Balam i givap long fos ia mo i tanem baksaed long Isrel (luk long Namba 31:16; Jud 1:11). Tingting hevi long wanem yu save mekem blong gohed blong stap fetful long Lod iven sapos ol narafala oli stap fos.

Pikja

famli stadi pikja aekon

Ol Aedia blong Famli Skripja Stadi mo Haos Naet

Namba 11:4–6.?Olsem wanem, fasin blong yumi i semmak long fasin blong Ol Man Isrel, olsem we oli tokbaot long Namba 11:4–6? Olsem wanem nao, kaonsel we i stap long Doktrin mo Ol Kavenan 46:7–33 i save help?

Namba 12:3.?Olsem wanem nao Moses i soem se hem i “putum tingting blong hem i stap daon” long Namba 12 o long ol narafala skripja we yu ridim? Yu maet wantem luklukbak long eksplenesen blong Elda David A. Bednar long mesej blong hem “Hem I No Stap Flas mo Tingting blong Hat blong Hem I Stap Daon” (Liahona, Mei 2018, 30–33) o long “Flas, No Stap Flas, Fasin blong No Stap Flas” long Gaed long Ol Skripja (olskripja.ChurchofJesusChrist.org). ?Wanem nao yumi lanem abaot wei we bae yumi save putum tingting i stap daon mo no stap flas? ?Wanem blesing i save kam taem yumi mekem olsem?

Namba 13–14.Tu (o moa long tu) memba blong famli oli save priten blong oli “spae” (Namba 13:17) long wan narafala pat blong hom blong yu olsem we hem i promes graon. Afta bae oli save givim ripot we i dipen long Namba 13:27–33 o Namba 14:6–9. ?Wanem nao yumi lanem abaot fet long tufala defren ripot long ol ves ia? ?Olsem wanem nao yumi save stap olsem Keleb mo Josua?

Namba 21:4–9.Afta ridim Namba 21:4–9, wetem 1 Nifae 17:40–41; Alma 33:18–22; mo Hileman 8:13–15, famli blong yu i save mekem wan snek we oli wokem long pepa o plastasin mo raet long hem o long pepa sam simpol samting yu save mekem blong “lukluk long pikinini blong God wetem fet” (Hileman 8:15).

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Jesus, the Very Thought of Thee,” Hymns, no. 141.

Kam Antap long Fasin blong Yumi blong Stap Tij

Helpem olgeta famli blong yu blong oli developem fasin blong stap dipen long olgetawan long saed blong spirit. “Yu no stap givimaot infomesen nomo, be helpem [ol memba blong famli blong yu] blong oli faenemaot ol trutok blong gospel olgetawan insaed long ol skripja, mo tu insaed long ol toktok blong ol profet” (Teaching in the Savior’s Way, 28).