2–8 Mei

Eksodas 35–40; Levitikas 1; 16; 19

“Tabu Fasin long Lod”

Taem yu stap stadi olgeta skripja ia, lisin gud long ol filing mo tingting blong yu long saed blong spirit we yu kasem abaot ol wei we yu save kam moa olsem Papa long Heven mo Jisas Kraes.

Raetemdaon Ol Filing mo Tingting blong Yu

Blong lego Ijip—hemia i impoten mo i wan merikel—be hemia i no winim stamba tingting we God i gat long ol pikinini blong ol pikinini blong Isrel. Iven long gudfala fiuja long graon blong promes i no stamba tingting blong God long olgeta. Hemia i ol step ia nomo blong wanem we God i wantem blong ol pipol blong Hem: “Mi mi Hae God, mi God blong yufala, mo yufala i mas tabu” (Levitikas 19:2). ?Olsem wanem nao Lod i mekem ol pipol blong Hem oli tabu taem oli no save wan nara samting moa be blong stap olsem ol prisena blong plante jeneresen? Hem i givim komanmen long olgeta blong krietem wan ples blong tabu fasin long Lod—wan tabenakol long waelples. Hem i givim long olgeta ol kavenan mo ol loa blong gaedem ol aksen blong olgeta, mo tu, blong oli jenisim hat blong olgeta. Mo taem oli no mekem wan efot blong kipim ol loa ia, Hem i givim komanmen long olgeta blong mekem animol sakrifaes we i saen blong atonmen from ol sin blong olgeta. Evri samting ia i blong poenem maen, hat mo laef blong olgeta i go long Sevya mo fasin blong pemaot man we Hem i givim. Hem nao i tru rod long tabu fasin, blong Ol Man Isrel mo blong yumi. Yumi spendem sam taem olsem ol prisena blong sin, mo oli invaetem yumi evriwan blong sakem sin—blong lego sin biaen mo folem Jisas Kraes, we i promesem “From we mi save mekem yufala i tabu” (Doktrin mo Ol Kavenan 60:7).

Blong gat wan bigfala lukluk long buk blong Levitikas, luk long “Levitikas” insaed long Bible Dictionary.

Ol Aedia blong Skripja Stadi blong Yuwan

Eksodas 35–40; Levitikas 19

Lod i wantem mi blong kam tabu olsem we Hem i tabu.

Eksodas 25–31 i givim histri blong ol instraksen blong Lod long Ol Man Isrel abaot wei blong oli bildim wan tabenakol, long ples ia we ol tabu odinens bae oli save helpem olgeta blong kam tabu. Eksodas 35–40 i talem olsem wanem Ol Man Isrel oli mekem efot blong oli obei long ol instraksen ia. Taem yu stap rid long ol japta ia 35–40, lukaotem ol samting we Lod i askem ol pipol blong Hem blong putum insaed long tabenakol, mo tingting hevi long wanem nao ol samting ia oli save ripresentem, mo wanem tingting oli givim long yu abaot wei we yu save kam moa tabu. Speseli tingting long olsem wanem ol aetem ia i save tanem tingting blong yu i go long Sevya. Maet wan tebol olsem hemia ia bae i save helpem yu:

?Wanem samting yu faenem?	?Wanem nao samting ia i save ripresentem?
?Wanem samting yu faenem? Ak blong Kavenan (Eksodas 37:1–9; 40:20–21)	?Wanem nao samting ia i save ripresentem? Ples we God i stap long hem; ol kavenan mo ol komanmen blong Hem
?Wanem samting yu faenem? Olta blong Insens (Eksodas 40:26–27; luk tu long Eksodas 30:1, 6–8)	?Wanem nao samting ia i save ripresentem? Prea i stap go antap long Lod
?Wanem samting yu faenem? Ples blong putum laet (Eksodas 37:17–24)
?Wanem samting yu faenem? Olta blong sakrifaes (Eksodas 38:1–7; luk tu long Eksodas 27:1; 29:10–14)
?Wanem samting yu faenem? Besin blong wota (Eksodas 30:17–21)

Sapos yu bin tekpat long ol odinens long tempol, ?wanem nao yu lanem abaot tabenakol long Eksodas 35–40 we i rimaenem yu abaot eksperiens blong yu long tempol? (luk tu long “Ol Tingting blong Kipim long Maen: Tabenakol mo Sakrifaes”). Tingting hevi long olsem ol tempol kavenan blong yu bae i helpem yu kam moa olsem Papa long Heven mo Jisas Kraes.

I tru, blong stap nomo long ol ples i tabu i no mekem yumi i kam tabu. Levitikas 19 i tokbaot ol loa mo komanmen we Lod i givim blong helpem Ol Man Isrel oli kam tabu. ?Wanem nao yu faenem long ol komanmen ia we i save helpem yu i kam moa tabu? ?Wanem nao yu filim blong mekem blong save laef fulwan wetem ol prinsipol ia?

Luk tu long Carol F. McConkie, “The Beauty of Holiness,” Liahona, May 2017, 9–12; “The Tabernacle” (vidio), ChurchofJesusChrist.org; Bible Dictionary, “Holiness”; temples.ChurchofJesusChrist.org.

Eksodas 35:4–36:7

Lod i askem mi blong mekem wan ofring wetem wan hat we i wantem mekem ofring.

Long yia we oli livim Ijip, rilesensip blong ol pikinini blong Isrel wetem Jehova, oli save tokbaot se i no semmak. Be yet, taem yu rid long Eksodas 35:4–36:7, luksave olsem wanem Ol Man Isrel oli ansa long komanmen ia blong bildim wan tabenakol. ?Wanem nao yu lanem long Ol Man Isrel we i save helpem yu blong givim wan seves we i moa gud?

Presiden Bonnie L. Oscarson i tijim: “Wanwan memba i mas save hamas oli nidim olgeta. Wanwan i gat wan samting impoten blong givim mo i gat talen mo paoa we i blong hemwan, blong help blong muvum impoten wok ia i go fored.” (“Ol Yang Woman Insaed long Wok,” Liahona, May 2018, 37). Taem yu stap ridim Eksodas 36:1–4, tingting hevi long wanem Lod i “putum” long yu. Tingting blong askem Papa long Heven wanem nao Hem i givim yu, mekem se yu save tekpat long wok blong Hem.

Ol pikinini blong Isrel oli bin givim ofring blong tabenakol wetem hat we i wantem (Eksodas 35:5). Pikja droing i kam long Corbert Gauthier, © Lifeway Collection/we oli karem laesens long goodsalt.com

Levitikas 1:1–9; 16

Tru long Atonmen blong Jisas Kraes, yumi save kasem fogivnes.

Fulap long buk blong Levitikas bae i defren long yumi—ol animol sakrifaes, ol kastom we i tekem blad mo wota, mo ol loa we i rulum smol taem blong laef blong yu. Be ol kastom mo ol loa ia oli stap blong tijim ol prinsipol we i semmak—fasin blong sakem sin, tabu fasin, mo Atonmen blong Sevya. Blong faenem ol prinsipol ia taem yu stap rid long Levitikas 1:1–9; 16, tingting blong askem ol kwestin olsem : ?Wanem nao mi save lanem long ol sakrifaes ia abaot Jisas Kraes mo sakrifaes we Hem i pem praes blong sin? ?Hao nao mi, mi olsem olgeta we oli stap mekem ol sakrifaes ia? Maet yu wantem blong luklukbak “Ol Tingting blong Kipim long Maen: Tabenakol mo Sakrifaes” long risos ia mo “Sakrifaes”long Gaed long Ol Skripja(https://www.churchofjesuschrist.org/study/scriptures?lang=bis).

Ol Aedia blong Famli Skripja Stadi mo Haos Naet

Eksodas 36:1–7.Long Eksodas 36:1–7, ?wanem nao yumi lanem long wei we Ol Man Isrel oli ansa long komanmen blong bildim wan tabenakol? Olsem wan famli, yu save tingting long ol wei we Lod i invaetem yu blong tekpat long wok blong Hem. ?Olsem wanem nao yumi save folem eksampol blong Ol Man Isrel?

Eksodas 40.Taem yu stap rid long Eksodas 40 tugeta, yu save invaetem wan memba blong famli blong yu blong leftemap han blong olgeta i go antap evri taem oli harem toktok ia “olsem we Hae God i talem.” ?Wanem nao yumi lanem aot long japta ia abaot fasin blong stap obei long Lod?

Eksodas 40:1–34.Taem yu stap rid abaot olsem wanem oli putum tugeta tabenakol long Eksodas 40, yu save wok tugeta blong luksave ol defren pat blong tabenakol, yusum pikja we i kam wetem aotlaen ia. Blong stap konek wetem storian ia wetem tempol wosip long dei blong yumi, yu save lukluk tugeta “Why Latter-day Saints Build Temples” (temples.ChurchofJesusChrist.org) o wajem vidio ia “Temples” (ChurchofJesusChrist.org).

Levitikas 19.Wanwan memba blong famli oli save faenem wan ves long japta ia we oli filim se bae i save helpem olgeta “i kam tabu” (Levitikas 19:2) mo serem wetem famli blong yu.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “More Holiness Give Me,” Hymns, no. 131.

Stap Kam Antap long Stadi blong Yuwan

Lukaotem Jisas Kraes. Evri skripja, iven OlTesteman, i testifae abaot Jisas Kraes. Taem yu stap ridim OlTesteman, tingting long wanem ol saen ia, pipol, mo taem i save tijim yu abaot Sevya.

Tabenakol blong Bifo, i kam long Bradley Clark