Pikja blong Elisa i stap soem long wokman blong hem ol hos wetem ol kat blong faet we faea i laet long ol, © Review & Herald Publishing/oli karem laesens long goodsalt.com

4–10 Julae

2 King 2–7

“I Gat Wan Profet I Stap long Isrel”

Ol aktiviti insaed long aotlaen ia oli stap blong wekemap yu blong krietem ol aedia yuwan. Tru long stadi wetem plante prea, yu save kasem insperesen blong stretem ol nid blong ol pikinini we yu tijim.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Blong leftemap tingting blong ol pikinini blong serem wanem we oli save abaot profet Elisa, invaetem olgeta blong droem wan pikja blong wan samting we hem i bin mekem.

Tijim Doktrin: Ol Smol Pikinini

2 King 4–5

God i save mekem ol merikel oli hapen insaed long laef blong mi.

Tru long profet Elisa, Lod i blesem plante pipol long ol merikel wei. Helpem ol pikinini blong luksave ol merikel long laef blong olgeta.

Samfala Aktiviti we Yu Save Mekem

• Serem wan o moa merikel we oli rekodem insaed long 2 King 4–5 (luk long “Profet Elisa” mo “Elisa I Hilim Neman” insaed long Ol Stori long OlTesteman). Letem ol pikinini blong serem wanem oli laekem abaot ol stori ia. Invaetem olgeta blong talem bakegen ol stori long wanwan long olgeta.

• Testifae se Lod i save yusum paoa blong Hem blong mekem ol bigfala samting blong helpem yumi. Yumi singaotem ol samting ia, ol merikel. Serem olsem wanem Lod i bin soem lav blong Hem long yu long ol wei we i bigbigwan o smol. Singsing tugeta wan singsing abaot lav blong God olsem “My Heavenly Father Loves Me” (Children’s Songbook, 228–29). Askem ol pikinini blong serem olsem wanem oli save se Papa long Heven i lavem olgeta.

2 King 5:1–15

Mi save jusum blong mekem wanem we God i komandem mi blong mekem tru long profet blong Hem.

Neman i gat wan hadtaem blong stap obei taem we profet Elisa i bin talem long hem olsem wanem blong hilim leprosi. Tingting hevi long olsem wanem yu save helpem ol pikinini blong andastanem ol blesing we i kam tru long fasin blong stap obei.

Samfala Aktiviti we Yu Save Mekem

• Talem stori blong Neman (luk long 2 King 5:9–14; “Elisa I Hilim Neman” insaed long Ol Stori long OlTesteman; luk tu long pikja blong Neman insaed long aotlaen blong wik ia long Kam Folem Mi—Blong Wanwan Man, Woman mo Famli). Tokbaot moa se, long fas ples, Neman i no bin wantem blong wasem hem long Reva Jodan, nomata Elisa i talem long hem se hemia bae i hilim hem long sik blong hem. Talem abaot wan taem we yu no sua blong mekem wan raet samting, mo helpem ol pikinini blong tingting long wan eksampol blong olgetawan. Afta serem olsem wanem Neman i kasem blesing taem hem i mekem raet joes.

• Ridim 2 King 5:13 long ol pikinini mo eksplenem se wokman blong Neman i helpem hem blong disaed blong obei long profet Elisa. Helpem ol pikinini blong tingting long ol wei we oli save helpem ol fren o memba blong famli blong olgeta blong lisin mo obei long profet.

2 King 6:8–17

Lod i stap lukaotem mi.

Taem we Elisa i luk ol ami blong Siria oli raonem olgeta, hem i fraet tumas. Be, Elisa i talem long hem blong “ no fraet” from se Lod i stap wetem olgeta (2 King 6:16).

Samfala Aktiviti we Yu Save Mekem

• Ridim 2 King 6:15 long ol pikinini o talem long toktok blong yuwan blong mekem se bae oli save andastanem. Invaetem ol pikinini blong pikjarem se wan bigfala ami i stap raonem olgeta wetem ol hos mo ol kat blong olgeta, semmak long Elisa. ?Oli bin filim olsem wanem? ?Wanem nao bae oli mekem? Askem olgeta blong sarem ae blong olgeta taem yu ridim 2 King 6:16–17 long olgeta. Taem yu kasem toktok ia “yu openem ae blong man ya,” askem ol pikinini blong openem ae blong olgeta. Tokbaot long olgeta wanem we wokman i bin luk we i stap protektem hem mo Elisa. Serem olsem wanem yu save se Lod i stap lukaot gud long yumi.

• Singsing tugeta wan singsing abaot kea blong God long yumi olsem: “Dearest Children, God Is Near You” (Hymns, namba 96). Putum nem blong ol pikinini insaed long ol toktok blong singsing blong save tokbaot moa se God i stap lukaot gud long yumi.

Stap Tijim Doktrin: Ol Bigfala Pikinini

2 King 4–5

God i save mekem ol merikel oli hapen insaed long laef blong mi.

Long taem blong seves blong hem, Elisa i bin hilim mo blesem plante pipol. ?Olsem wanem ol merikel insaed long 2 King 4–5 oli helpem ol pikinini blong luksave han blong Papa long Heven long laef blong olgeta?

Samfala Aktiviti we Yu Save Mekem

• Invaetem ol pikinini blong raetem long bod plante merikel we oli save tingbaot we oli stap long ol skripja. Afta givim long olgeta taem blong luklukbak long 2 King 4–5 mo ademap long lis blong olgeta (luk long 2 King 4:1–7, 14–17, 32–35, 38–41, 42–44; 5:10–14). ?Ol merikel, oli stap tijim wanem abaot wei we Papa long Heven i filim abaot yumi?

• Askem ol pikinini blong tokbaot wanem i wan merikel. Sapos oli nidim help, oli save luklukbak long “Merikel” insaed long Gaed blong Ol Skripja (olskripja.ChurchofJesusChrist.org). Invaetem olgeta blong serem sam merikel we Jisas i bin mekem. Tokbaot olsem wanem yu bin luk paoa blong God insaed long laef blong yu. Yu save talem tu ol merikel we oli stap hapen long yu evri dei olsem, blong filim pis, presen blong evri dei laef, o blong stap helpem yu long evri dei wok blong yu. Invaetem ol pikinini blong tokbaot ol merikel long laef blong olgeta, tugeta ol bigbigwan mo ol smolsmol wan.

2 King 5:1–15

Mi save jusum blong stap fetful, gat tingting we i stap daon, mo stap obei.

Neman i wantem blong kasem hiling from leprosi, be hem i no tingting se bae i wan simpol instraksen olsem we Elisa i givim long hem: “Yu go swim seven taem long Jodan Reva” (2 King 5:10). Tingting long olsem wanem blong yusum stori ia blong tij abaot fet long Jisas Kraes, fasin blong gat tingting we i stap daon mo blong stap obei.

Samfala Aktiviti we Yu Save Mekem

• Raetem toktok ia, fet, tingting we i stap daon, mo fasin blong stap obei long bod, mo askem long ol pikinini wanem nao ol toktok ia i minim (luk long Blong Stap Tru long Fet, 54–56, 86–87, 108–9). Invaetem ol pikinini blong ridim 2 King 5:9–14. Mo tu, yu save soem samfala pat blong vidio ia “Naaman and Elisha” (ChurchofJesusChrist.org). ?Olsem wanem nao Neman i soem fet long Lod, tingting we i stap daon mo fasin blong stap obei? ?From wanem hem i impoten blong yumi mas gat ol kwaliti ia?

• Askem ol pikinini blong talem abaot wan taem we wan fren i bin helpem olgeta blong jusum raet. Mo tu, serem wan eksperiens blong yuwan. Ridim tugeta 2 King 5:10–13 blong lanem olsem wanem ol wokman blong Neman oli bin helpem hem blong jusum blong obei long profet. ?Wanem nao yumi save mekem blong helpem wanwan long yumi blong folem profet blong yumi tedei?

• Invaetem ol pikinini blong komplitim aktiviti mo serem wetem wan memba blong famli o fren wan samting we oli bin lanem aot long stori blong Neman insaed long 2 King 5:1–15.

2 King 6:8–17

Mi no stap miwan.

Ol pikinini we yu tijim samtaem bae oli filim olsem wokman blong Elisa—oli no sua long olsem wanem blong fesem ol jalenj we oli stap long fored blong olgeta. Yu save yusum stori ia long 2 King 6:8–17 blong tijim olgeta blong “no fraet” from se Lod i no bin lego olgeta blong stap olgetawan.

Samfala Aktiviti we Yu Save Mekem

• Ridim tugeta 2 King 6:15–17. Invaetem wan long ol pikinini blong mekem olsem se hem i wokman blong Elisa, mo ol narafala pikinini bae oli stap askem ol kwestin abaot eksperiens blong hem, olsem: olsem wanem hem i filim taem ol ami blong Siria oli raonem siti,o oli bin filim olsem wanem blong luk ami blong God. Toktok wetem ol pikinini, abaot ol taem we oli filim se oli stap olgetawan, blong traem blong stap laef folem gospel. ?Olsem wanem Lod i helpem yumi blong save se yumi no stap yumiwan?

• Singsing wan singsing abaot fasin blong stap dipen long Lod olsem: “When Faith Endures” (Hymns, namba 128). ?Wanem nao singsing ia i tijim long yumi abaot fasin blong stap trastem Lod?

Stap Leftemap Tingting blong Lanem Samting long Hom

Invaetem ol pikinini blong serem ol eksperiens wetem famli blong olgeta taem oli luksave han blong God long laef blong olgeta. Leftemap tingting blong olgeta blong askem long ol memba blong famli blong olgeta blong serem ol semmak eksperiens olsem.

Stap Kam Antap long Fasin blong Yumi blong Stap Tij

Ol pikinini oli stap lanem samting long plante wei. “Ol traehad blong yu blong tijim ol pikinini bae i gat moa paoa taem yu yusum ol defren wei blong tij,” we i gat tu ol stori, ol pikja blong stap soem, mo miusik (Teaching in the Savior’s Way, 25).