Esta, i kam long James Johnson

25–31 Julae

Esta

“Yu Yu Kam blong Bambae Yu Save Givhan long Yumi long Hadtaem Ia”

Evri skripja oli testifae long Jisas Kraes. Tingting hevi long olsem wanem bae yu helpem ol pikinini blong luk paoa blong Sevya insaed long stori blong Esta.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Pasem wan pikja blong Esta i go raon (luk long aotlaen blong wik ia long Kam Folem Mi—Blong Wanwan Man, Woman mo Famli). Taem ol pikinini oli holem ol pikja, invaetem olgeta blong serem wan samting we oli save abaot stori blong Esta.

Tijim Doktrin: Ol Smol Pikinini

Esta 2:5–7

Mi save givim seves long famli blong mi.

Taem papa mo mama blong Esta tufala i ded, kasen blong hem, Modekae i tekem kea long hem. Yu save yusum eksperiens blong olgeta olsem wan janis blong tokbaot olsem wanem blong givim seves.

Samfala Aktiviti we Yu Save Mekem

• Long bod, droem sam pikja we i soem Esta, papa mo mama blong hem mo kasen blong hem Modekae. Eksplenem se papa mo mama blong Esta i bin ded, mekem se Esta i nidim wan man blong kea long hem. Ridim Esta 2:7 long ol pikinini mo askem ol pikinini blong lisin long wanem we Modekae i bin mekem. Helpem ol pikinini blong tingbaot ol nid we ol memba blong famli blong olgeta i maet gat we bae ol pikinini oli save helpem olgeta wetem.

• Invaetem ol pikinini blong aktem wan samting we oli save mekem, blong soem fasin blong stap kaen, we oli save mekem blong givim seves long wan insaed long famli blong olgeta, mo askem ol narafala pikinini blong talemaot wanem aksen ia oli stap mekem. Invaetem olgeta blong tokbaot ol samting we oli mekem blong blesem ol famli blong olgeta, mo talemaot sam samting we yu mekem.

• Singsing wan singsing blong stap helpem ol famli blong yumi olsem: “When We’re Helping” (Children’s Songbook, 198). Serem testemoni blong yu se taem yumi stap helpem ol famli blong yumi i mekem yumi glad.

Esta 4:15–16

Mi save gat strong paoa long tingting.

Ol pikinini we yu tijim, bae oli fesem ol situesen we bae oli nidim Lod i helpem olgeta blong gat stap strong. ?Olsem wanem nao yu save helpem olgeta blong lanem samting aot long eksampol blong Esta we i bin gat strong paoa long tingting?

Samfala Aktiviti we Yu Save Mekem

• ?Olsem wanem long ol pikinini we yu stap tijim? ?Oli save wanem i minim blong gat stap strong? Serem wan simpol mining olsem hemia: “Blong gat strong paoa long tingting i minim blong mekem samting we i raet i nomata sapos yu fraet.” Serem stori blong Esta (luk long “Kwin Esta” long Ol Stori long OlTesteman), mo helpem ol pikinini blong luk olsem wanem Esta i gat strong tingting mo i stap strong. Letem ol pikinini oli yusum ol pikja insaed long aktiviti pej blong wik ia blong talem stori ia bakegen.

• Soem wan pikja blong Esta (luk long aotlaen blong wik ia insaed long Kam Folem Mi—Blong Wanwan Man, Woman mo Famli). Singsing wetem ol pikinini wan singsing abaot olsem wanem blong gat strong tingting mo stap strong, olsem: “I Will Be Valiant” (Children’s Songbook, 162). Poenemaot ol toktok mo sentens long singsing ia we i tokbaot Esta mo testifae se Sevya i save helpem ol pikinini blong gat strong paoa long tingting.

• Talem long pikinini abaot ol taem we Jisas Kraes i bin gat strong tingting mo i stap strong; eksampol, taem Hem i bin safa from ol sin blong yumi, tugeta long Getsemane mo antap long kros (luk long Matiu 26:36–39; 27:33–35). Askem ol pikinini blong talem wan taem we oli bin gat strong tingting mo stap strong (lukluk blong kondaktem famli blong olgeta bifo, blong askem olgeta long sam eksampol). ?Wanem nao i helpem olgeta blong gat strong tingting? Talem long pikinini olsem wanem Lod i bin helpem yu blong gat strong tingting taem we yu bin fraet.

  

  Esta long fored blong King, i kam long Minerva K. Teichert

Stap Tijim Doktrin: Ol Bigfala Pikinini

Esta 4:14

Mi save stap wan tul long han blong God.

Taem we Esta i bin fulap long fraet, Modekae i leftemap tingting blong hem se ating Lod i mekem yu kwin “blong bambae yu save givhan long hadtaem ya” (Esta 4:14). Tingting hevi long olsem wanem Lod i stap mekem rere ol pikinini we yu tijim from ol spesel janis blong olgeta blong blesem ol narawan.

Samfala Aktiviti we Yu Save Mekem

• Invaetem wan blong plei wan singsing blong ol pikinini long wan miusik tul, o soem wan pikja blong wan we i stap plei wan tul blong miusik. Tokbaot wanem i minim blong stap olsem wan tul long han blong God. Luklukbak long stori blong Esta wetem ol pikinini (luk long “Kwin Esta” insaed long Ol Stori long OlTesteman), mo invaetem olgeta blong tokbaot olsem wanem Esta i bin stap wan tul blong Lod blong mekem ol stamba tingting blong Hem oli hapen. ?Olsem wanem nao yumi save stap olsem wan tul blong Lod?

• Afta we yufala i luklukbak long stori blong Esta, stikim wan kad we i gat nem blong wan long ol man we oli stap long stori ia long baksaed blong wanwan pikinini. Invaetem ol pikinini blong oli traem blong faenemaot nem blong huia i stap long baksaed blong olgeta taem bae oli askem ol narafala pikinini ol kwestin olsem: “?Man ia i gat fasin blong stap stret mo gud?” o “?Nem ia i blong wan woman?” Mo toktok raon long olsem wanem Modekae mo Esta, tufala i bin stap ol tul blong Lod blong sevem Ol Jiu.

Esta 3:1–11; 4:10–17

Papa long Heven i helpem mi blong gat strong tingting taem mi stap fraet.

?Wetaem nao yu bin luk ol pikinini we yu tijim oli gat strong paoa long tingting? ?Wanem eksperiens nao yu save serem abaot wan taem we yu bin nidim help blong Lod blong gat strong tingting?

Samfala Aktiviti we Yu Save Mekem

• Raetem long bod Modekae i bin soem strong paoa long tingting taem … mo Esta i soem strong paoa long tingting taem … Invaetem sam long ol pikinini blong ridim Esta 3:1–11 mo ol narawan blong ridim Esta 4:10–17. Askem olgeta blong yusum wanem we oli bin ridim blong komplitim ol sentens long bod. Afta raetem Bae mi soem strong paoa long tingting taem … mo invaetem ol pikinini blong mekem lis blong ol samting we Papa long Heven i nidim olgeta blong mekem, we i nidim blong gat strong paoa long tingting blong mekem. ?Olsem wanem nao yumi save stap olsem Modekae mo Esta?

• Invaetem ol pikinini blong tingting long ol situesen we oli bin fesem taem we i bin had blong mekem raet samting. Raetem long bod ol toktok blong Esta: “Bambae mi mas go luk king, … sapos i min se mi mi mas ded from, be bambae i mas olsem” (Esta 4:16). Helpem ol pikinini blong praktisim ol toktok blong Esta long olgetawan taem oli stap riplesem toktok ia “go luk king” wetem wan stret mo gud joes be yet i had blong oli mekem. Afta invaetem olgeta blong riplesem toktok ia “ded” wetem wan samting we i nogud we i save kam long olgeta from oli stap mekem wan raet samting. ?From wanem i moa gud blong mekem samting we i raet, iven sapos i gat ol risal we i nogud?

• Soem vidio ia “Choose the Harder Right” (ChurchofJesusChrist.org), mo invaetem ol pikinini blong disaed long wan “raet samting blong mekem” long laef blong olgeta we bae oli jusum. Toktok raon long olsem wanem Jisas Kraes i wan eksampol blong prinsipol ia.

Esta 4:1–3, 10–17

Fasin blong livim kaekae i save helpem mi mo blesem laef blong ol narafala man.

Long wan taem blong nid, Esta mo Ol Jiu oli bin livim kaekae. ?Olsem wanem nao yu save helpem ol pikinini we yu tijim blong andastanem ol blesing long saed blong spirit abaot fasin blong livim kaekae?

Samfala Aktiviti we Yu Save Mekem

• Invaetem ol pikinini blong mekem wan lis blong ol samting we oli save livim kakae from (sapos i gat nid, oli save lukluk long “Livim Kakae mo Ol Fast Ofring” insaed long Stap Tru long Fet, 110–113). Afta askem olgeta blong ridim Esta 4:1–3, 10–17 blong faenemaot from wanem Ol Jiu mo Esta oli bin livim kaekae. Leftemap tingting blong ol pikinini blong tingting long wan risen we maet bae oli nidim wan spesel help long Lod, mo talem wan tingting se bae oli mekem risen ia i kam pat blong taem blong olgeta blong livim kakae long nekis Sandei blong livim kakae.

• Invaetem ol pikinini blong stap mekem olsem se oli stap eksplenem long wan fren from wanem oli livim kakae. ?Wanem nao bae oli talem? Poenem olgeta i long Gaed blong Ol Skripja, “Livim Kakae, Fasin blong Livim Kakae” (olskripja.ChurchofJesusChrist.org) sapos oli nidim help. Serem wan eksperiens abaot taem we yu bin livim kakae blong kasem ol blesing blong Lod. Invaetem ol pikinini blong serem ol eksperiens we oli bin gat wetem fasin blong livim kakae.

Stap Leftemap Tingting blong Lanem Samting long Hom

Singsing wan singsing tugeta abaot wan prinsipol we yu bin lanem long klas tedei (luk long topic index insaed long Children’s Songbook blong gat sam aedia). Invaetem ol pikinini blong singsing long singsing ia wetem ol famli blong olgeta.

Stap Kam Antap long Fasin blong Yumi blong Stap Tij

Laef folem wanem yu stap tijim. Tijing blong yu bae i gat moa paoa sapos yu save testifae, aot long eksperiens blong yuwan, abaot ol blesing blong stap laef folem gospel. Taem yu stap jusum olgeta prinsipol we bae yu tijim long ol pikinini, tingting hevi long wei we yu save laef folem olgeta prinsipol ia moa fulwan. (Luk long Teaching in the Savior’s Way, 13–14.)