tempol blong Serubabel

Pikja droing blong tempol blong Serubabel, i kam long Sam Lawlor

18–24 Julae

Esra 1; 3–7; Nehemaea 2; 4–6; 8

“Mi Mi Stap Mekem Wan Bigfala Wok”

Taem yu stadi, lukluk wijwan mesej, insaed long Esra mo Nehemaea, ol pikinini we yu tijim oli nidim moa. Krietem wan plan blong stap tij we i gat tu ol filing mo ol tingting we yu kasem long Tabu Spirit.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Raetem long bod Serubabel, Esra, mo Nehemaea. Droem o soem sam pikja we i go wetem ol pipol ia, olsem wan tempol, ol skripja mo ol wol blong Jerusalem. Helpem ol pikinini blong majem ol nem wetem ol pikja mo letem olgeta oli serem wanem oli save abaot ol pipol ia.

tijing pikja bokis

Tijim Doktrin: Ol Smol Pikinini

Esra 3:8–13

Tempol i save mekem mi glad.

Stori blong Serubabel mo Ol Jiu we oli stap bildimap bakegen tempol i save helpem ol pikinini we yu tijim blong oli glad long ol blesing we i kam from haos ia blong Lod.

Samfala Aktiviti we Yu Save Mekem

• Invaetem ol pikinini blong tokbaot wan samting we i mekem olgeta i stap glad. Soem wan pikja blong wan man we i stap smael long fored long tempol (olsem pikja long aotlaen blong wik ia), mo askem ol pikinini from wanem man i glad tumas. Testifae se tempol i haos blong Lod, mo talemaot wan taem we yu bin filim glad from tempol.

• Ridim long ol pikinini las pat blong Esra 3:12, eksplenem se, taem we Ol Jiu oli putum fandesen blong tempol, “plante man oli stap singsingaot bigwan from we oli glad tumas.” Invaetem ol pikinini blong singsingaot from we oli glad tumas. Helpem olgeta blong tingting long ol risen we yumi stap glad from abaot tempol. Eksampol: insaed long tempol, yumi mekem ol promes wetem God, we i letem ol famli blong yumi blong stap tugeta blong oltaem.

• Wetem ol pikinini, singsing wan singsing abaot tempol olsem: “I Love to See the Temple” (Children’s Songbook, 95). Afta evri laen, stop mo askem wan pikinini blong serem wan samting we hem i laekem tumas abaot tempol.

  famli oli stap wokbaot long tempol graon

  Tempol i save stap olsem wan stamba blong glad long laef blong yumi.

Nehemaea 2:17–20; 6:1–9

Lod bae i helpem mi blong mekem wok blong Hem.

Taem we Nehemaea i stap riperem ol wolfanis we i raonem Jerusalem, ol enemi blong hem oli traem blong stopem hem be hem i gohed blong stap fetful long wok oli bin givim long hem. ?Wanem samfala impoten samting we Lod i wantem ol pikinini blong mekem, mo olsem wanem yu save helpem olgeta blong stap fetful long wok blong olgeta ia?

Samfala Aktiviti we Yu Save Mekem

• Serem wetem ol pikinini stori blong Nehemaea (luk long Nehemaea 2:17–20; 6:1–9; Dieter F. Uchtdorf, “We Are Doing a Great Work and Cannot Come Down,” Liahona, Mei 2009, 59–62). Talem long ol pikinini wanem we Nehemaea i bin talem taem ol pipol oli bin jikim hem from se hem i wantem blong fiksim ol wol blong Jerusalem: “God ya blong heven, hem bambae i givhan long mifala; Mifala i man blong wok blong hem, mo bambae mifala i statem wok ya blong stanemap bigfala stonwol blong taon ya bakegen” (Nehemaea 2:20). Invaetem ol pikinini blong stanap mo mekem olsem se oli help blong fiksim ol wol blong Jerusalem.

• Karem sam pleplei brikis i kam long klas mo letem ol pikinini blong yusum olgeta blong helpem yu blong bildimap wan wol (o droem wan wol long bod). Helpem ol pikinini blong tingting long ol impoten samting we ating Papa long Heven i save askem olgeta blong mekem, olsem blong lanem olsem wanem blong ridim ol skripja. Wetem wanwan tingting we oli serem, invaetem olgeta blong ademap wan brikis i go long wol. Eksplenem se, taem Nehemaea i stap mekem impoten wok blong hem blong stap riperem ol wolfanis blong Jerusalem, pipol oli stap traem blong stopem hem. Ridim Nehemaea 6:9, mo invaetem ol pikinini blong leftemap han blong olgeta taem bae yu singaotem “God, plis yu mekem mi mi strong.” Talem long ol pikinini abaot wan taem we yu bin filim se God i givim paoa long ol han blong yu blong mekem wok blong hem.

Nehemaea 8:1–12

Ol skripja oli wan blesing.

Yu save yusum stori blong Esra we i stap ridim loa blong helpem ol pikinini tingbaot se yumi gat blesing ia blong save gat ol skripja.

Samfala Aktiviti we Yu Save Mekem

• Talem long ol pikinini se Esra i ridim ol skripja long ol pipol. Ridim laod sam sentens aot long Nehemaea 8:2–3, 5–6, 8–9, 12 we i tokbaot wanem ol pipol oli bin mekem taem oli harem ol skripja, mo invaetem ol pikinini blong aktem ol sentens ia. ?From wanem yumi glad tumas blong yumi pat blong Jos?

• Invaetem ol pikinini blong finisim aktiviti pej blong wik ia. Taem oli stap mekem, serem wetem ol pikinini olsem wanem we, taem yu bin stap ridim ol skripja, i bin tekem yu i kam kolosap long Sevya.

tijing pikja bokis

Stap Tijim Doktrin: Ol Bigfala Pikinini

Esra 3:8–13; 6:16–22

Tempol i givim mi risen blong stap glad.

Taem yu luklukbak long stori blong Serubabel mo Ol Jiu blong stap bildimap tempol bakegen, faenem ol wei blong testifae long glad we i kam from we yumi gat ol tempol tedei.

Samfala Aktiviti we Yu Save Mekem

• Invaetem ol pikinini blong wok tugeta blong faenem ol sentens insaed long Esra 3:10–13 we i soem wanem Ol Jiu oli bin filim taem we oli bildimap bakegen tempol long Jerusalem. ?Olsem wanem nao bae yumi soem glad blong yumi blong gat ol tempol long wol tedei? Helpem ol pikinini blong oli tingting long ol wei we oli save rere blong go long tempol.

• Serem wetem ol pikinini ol filing blong yu abaot tempol. ?Olsem wanem nao tempol i helpem yu blong filim moa kolosap long Papa long Heven mo Jisas Kraes? ?From wanem yumi selebret taem we oli dediketem wan tempol? Givim taem long ol pikinini blong raetemdaon wanem oli filim abaot tempol, mo leftemap tingting blong olgeta blong serem wanem oli bin raetem wetem ol famli blong olgeta.

Nehemaea 2; 4; 6

Lod bae i givim paoa long mi blong mekem “wan bigfala wok .”

Lod i gat wan impoten wok blong ol pikinini we yu tijim. ?Wanem nao oli save lanem aot long Nehemaea abaot fasin blong gohed i nomata wok ia i had, iven taem oli fesem fasin blong go agens?

Samfala Aktiviti we Yu Save Mekem

• Luklukbak, wetem ol pikinini, long stori blong Nehemaea we i stap bildimap bakegen ol wolfanis raonem Jerusalem, mo tu, ol fasin blong go agens we hem i bin fesem. Ridim tugeta Nehemaea 2:19, mo askem ol pikinini blong serem ol situesen blong wan taem we wan man i maet laf long yumi taem yumi stap mekem raet samting. Folem wanem we i stap long Nehemaea 2:20, ?wanem nao ansa blong Nehemaea? ?Olsem wanem nao yumi ansa taem ol pipol oli stap jikim yumi o talem nogud yumi from we yumi stap mekem raet samting?

• Ridim tugeta Nehemaea 6:1–9. ?Olsem wanem nao ol enemi blong Nehemaea oli ripriptim blong traem blong stopem Nehemaea blong stop blong wokem ol wolfanis, mo wanem nao ansa blong hem? ?Wanem wok nao God i wantem yumi blong mekem? (eksampol, luk long Mosaea 18:8–10). ?Olsem wanem nao yumi save folem eksampol blong Nehemaea insaed long ves 9 taem we i had blong mekem wanem we God i askem yumi blong mekem?

Nehemaea 8:1–12

Mi kasem blesing taem mi stadi ol skripja.

Ol pipol long Jerusalem oli no bin harem ol toktok blong God blong wan longfala taem bifo we Esra i ridim long ol pipol. Stori blong Esra i rimaenem yumi long olsem wanem ol skripja oli sapos blong oli wan impoten samting long yumi.

Samfala Aktiviti we Yu Save Mekem

• Invaetem ol pikinini blong luklukgud long Nehemaea 8:1–12 mo faenem ol toktok mo sentens we oli soem olsem wanem ol pipol ol bin filim taem oli stap harem ol toktok blong God. Askem ol pikinini blong serem olsem wanem oli filim taem oli ridim ol skripja, mo serem ol filing blong yu tu.

• Invaetem wan pikinini blong ridim Nehemaea 8:8, mo askem ol pikinini wanem nao i helpem olgeta blong andastanem ol skripja. Soem long olgeta ol tul blong skripja stadi olsem: Gaed long Ol Skripja mo Gospel Topik (churchofjesuschrist.org/study?lang=bis). Invaetem ol pikinini blong serem wan samting we oli bin lanem abaot Sevya aot long ol skripja.

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong jusum wan samting we oli bin lanem tedei we oli wantem blong serem wetem ol famli blong olgeta.

Kam Antap long Fasin blong Yumi blong Stap Tij

Rere long saed blong spirit. “Gospel tijing we i gat paoa i no minim blong jes rere long wan lesen nomo, be i minim blong mekem yumiwan i rere. … Ol gospel tija we oli tij gud—oli no tingting blong mekem samting blong fulumap taem blong klas—be oli lukluk stret blong fulumap hat blong olgetawan wetem Tabu Spirit” (Teaching in the Savior’s Way, 12).

aktiviti pej: Ol skripja oli wan blesing