ol pipol oli stap lego siti we i smas gud

Taem we Ol Prisena Oli Ronwe, i kam long James Tissot mo ol narawan

11–17 Julae

2 King 17–25

“Hae God I God blong Ol Laen blong Isrel, Mo King Ia I Trastem Hem”

Taem yu stap mekem ol plan blong ol aktiviti blong stap lanem samting, tingbaot se aktiviti blong ol yangfala pikinini long aotlaen blong wik ia oli save stretem blong folem ol bigfala pikinini mo semmak long ol yangfala pikinini.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Raetem nem blong wanwan pikinini long wan pis pepa mo putum pepa insaed long wan kontena. Long stat blong klas, letem ol pikinini blong gat janis blong jusum wan nem. Taem oli pulum nem blong wan pikinini, invaetem pikinini ia blong serem wan samting we hem i jes lanem abaot gospel o abaot Jisas Kraes. Ripitim olsem kasem evri pikinini i gat janis blong serem wan samting.

tijing pikja bokis

Tijim Doktrin: Ol Smol Pikinini

2 King 18:3, 5

Mi save trastem Papa long Heven mo Jisas Kraes.

Eksampol blong Hesekia insaed long 2 King 18:3, 5 i save helpem ol pikinini we yu tijim blong putum tras blong olgeta long God.

Samfala Aktiviti we Yu Save Mekem

• Talem nem blong sam samting we wan gudfala king i save mekem mo sam samting we wan rabis king i save mekem. Askem ol pikinini blong stanap mo singaot wetem glad from ol gudfala samting mo blong sidaon from ol rabis samting. Eksplenem long ol pikinini se Isrel i gat plante king, sam oli stret mo gud, mo sam oli nogud. Invaetem ol pikinini blong lisin long wanem we i bin mekem Hesekia i wan gudfala king taem yu stap ridim 2 King 18:3, 5. Helpem olgeta blong tingting long ol wei we yumi save soem se yumi trastem Lod olsem we Hesekia i bin mekem.

• Helpem ol pikinini blong andastanem wanem i minim blong trastem wan man. Tokbaot ol pipol we yu trastem, mo letem ol pikinini oli mekem semmak tu. Soem wan pikja blong Jisas Kraes. ?From wanem yumi save trastem Jisas Kraes? Talemaot tras blong yu se Jisas Kraes i lavem yumi mo bae i helpem yumi blong gobak stap wetem Papa long Heven blong oltaem.

2 King 22:8–11; 23:2

Ol skripja oli wan blesing.

I nomata ol pikinini we oli moa yang bae oli no save rid o andastanem evri samting, oli save kasem blesing tru long paoa blong ol skripja. ?Olsem wanem nao yu save helpem olgeta blong gat filing ia blong wantem blong kasem blesing tru long toktok blong God?

Samfala Aktiviti we Yu Save Mekem

• Haedem wan kopi blong ol skripja long wan ples insaed long rum, mo invaetem ol pikinini blong faenem. Eksplenem se, long ol dei blong King Josaea, plante long ol pipol oli no stap lan long ol skripja kasem taem we wan pris i faenem olgeta insaed long tempol (luk long 2 King 22:8–11). ?Wanem i ol skripja? ?From wanem yumi nidim ol skripja? Talem long ol pikinini from wanem yu glad se yumi gat ol skripja tedei, mo letem olgeta oli serem ol filing blong olgeta abaot ol skripja.

• Ridim 2 King 23:2 long ol pikinini, mo askem olgeta blong lisin long wanem we king i mekem wetem ol skripja. ?From wanem i impoten blong yumi evriwan i harem wanem we oli bin raetem long ol skripja? Singsing wan singsing abaot ol skripja olsem: “Search, Ponder, and Pray” (Children’s Songbook, 109), mo askem ol pikinini blong tokbaot wanem oli filim taem oli harem ol tijing mo ol stori aot long ol skripja.

  famli we i stap stadi long ol skripja

  Ol skripja oli save helpem yumi blong tanem hat blong yumi i go long Lod.

tijing pikja bokis

Stap Tijim Doktrin: Ol Bigfala Pikinini

2 King 18:3–6; 19:14–19

Mi save putum tras blong mi long Papa long Heven mo Jisas Kraes.

Taem Ol Man Siria oli wantem spolem Jerusalem, King Hesekia, we i stret mo gud, i tanem hem i go long Lod long fet. Eksampol blong Hesekia i save helpem yu mo ol pikinini blong tokbaot olsem wanem yumi save soem fet blong yumi long Lod, iven taem fet ia i go tru long jalenj.

Samfala Aktiviti we Yu Save Mekem

• Yusum map 3 blong Ol Map blong Baebol, “Mak blong Ol Twelef Traeb,” mo long wan sot toktok, eksplenem long ol pikinini se ol pipol blong Siria oli bin winim Not Kingdom blong Isrel. Eksplenesen se, biaen, ol pipol blong Siria oli traem blong winim Saot Kingdom blong Juda. Invaetem ol pikinini blong pikjarem olsem wanem bae oli filim sapos oli bin stap laef long Juda mo oli bin save se ol pipol blong Siria oli stap kam blong smasem gud siti. Askem ol pikinini blong ridim 2 King 18:3, 5–6 blong faenemaot from wanem Hesekia, king blong Juda i no gat fraet taem oli pipol blong Siria oli bin kam.

• Invaetem ol pikinini blong ridim 2 King 19:14–19, mo stap lukaotem wanem we Hesekia i bin mekem taem ol pipol blong Siria oli stap tok nogud long olgeta. ?Olsem wanem nao, ol samting ia we hem i stap mekem, i soem se hem i trastem Lod? ?Wanem nao yumi save mekem blong soem tras blong yumi long Lod taem yumi nidim help?

2 King 22:8–13; 23:2–3

Ol skripja oli tijim mi olsem wanem blong folem Jisas Kraes.

Afta plante yia blong tudak long saed blong spirit, Ol Jiu oli riniu komitmen blong olgeta long Lod. Hemia i hapen from se King Josaea i faenemaot bakegen buk blong loa mo i ridim long ol pipol. Stori ia i save helpem ol pikinini blong andastanem from wanem ol skripja oli gat bigfala valiu.

Samfala Aktiviti we Yu Save Mekem

• Talem long ol pikinini se King Josaea i bin talem long ol pipol blong hem blong bildimap bakegen tempol, mo taem oli bin mekem, oli faenem wan samting we i gat bigfala valiu. Invaetem ol pikinini blong ridim 2 King 22:8–11 blong faenemaot se hem i wanem. Eksplenem se, buk we oli faenem, insaed i gat ol kavenan mo ol komanmen we ol pikinini blong Isrel oli no bin save. ?Wanem i save hapen long yumi sapos yumi no gat ol skripja? Askem long ol pikinini from wanem oli glad blong gat ol skripja. ?From wanem bae i moa had blong folem Sevya sapos yumi no bin gat ol skripja?

• Givim long wanwan pikinini wan pis pepa mo askem olgeta blong terem. Eksplenem se long dei blong King Josaea, samtaem ol pipol oli “terem,” ol klos blong olgeta taem oli harem nogud. Askem ol pikinini blong lukaotem toktok ia “terem” insaed long 2 King 22:11. ?From wanem nao Josaea i bin harem nogud? Helpem ol pikinini blong faenem wan ansa insaed long ves 13. ?From wanem hem i impoten blong yumi mas ridim ol skripja evri dei?

• Ridim 2 King 23:2–3 tugeta mo askem ol pikinini blong luk olsem wanem ol skripja oli helpem Josaea mo ol pipol blong hem. Serem, wetem ol pikinini, wan skripja we i givim insperesen long yu blong “[yu] obei long hem” (ves 3), mo invaetem ol pikinini blong serem ol skripja we i bin helpem olgeta. Singsing tugeta “Bae Mi Wokbaot Wetem Jisas” (https://media.ldscdn.org/pdf/music/additional-songs-for-children/bislama/2019-01-0010-i-will-walk-with-jesus-bis.pdf?download=true).

2 King 23:3

Bae mi kipim ol kavenan blong mi wetem Lod.

Taem we Josaea mo ol pipol blong hem oli bin lanem ol komanmen blong God, oli mekem wan kavenan blong laef folem olgeta. Yu save helpem ol pikinini we yu tijim blong oli gat filing ia blong wantem stap fetful oltaem long ol kavenan we oli mekem long taem we oli baptaes.

Samfala Aktiviti we Yu Save Mekem

• Invaetem ol pikinini blong ridim 2 King 23:3 mo blong faenem ol toktok o ol sentens we i soem wanem ol pipol oli filim abaot ol komanmen blong Lod. Invaetem olgeta blong stanap mo toktok abaot wanem i minim blong “holem ol loa blong hem mo ol tok blong hem.” Invaetem olgeta blong wokbaot long ples mo tokbaot wanem i minim blong “obei long hem (Lod).” Invaetem olgeta blong putum han blong olgeta long hat blong olgeta mo blong talem sam wei we yumi save kipim ol komanmen “wetem ful hat blong [yumi].”

• Helpem ol pikinini blong mekem wan lis blong ol promes we oli bin mekem long taem oli baptaes (luk long Mosaea 18:10; Doktrin mo Ol Kavenan 20:37, 77, 79). ?Wanem nao God promesem blong givim long yumi sapos yumi kipim ol kavenan blong yumi? ?Wanem nao yu lanem long 2 King 23:3 abaot olsem wanem yumi mas kipim ol kavenan blong yumi?

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong serem wetem wan memba blong famli wan ves long skripja we i bin blesem olgeta.

Kam Antap long Fasin blong Yumi blong Stap Tij

Bildimap tras long ol pikinini. Wan wei blong bildim tras long olgetawan i blong presem olgeta taem oli tekpat insaed long klas. Promesem ol pikinini se bae Tabu Spirit i helpem olgeta taem oli stap lanem samting.

aktiviti pej: Ol skripja oli wan blesing