Grup blong Ol Prisena, i kam long James Tissot mo ol narawan

11–17 Julae

2 King 17–25

“Hae God I God blong Ol Laen blong Isrel, Mo King Ia I Trastem Hem”

Taem we Josaea i harem ol toktok long buk blong loa, hem i ansa wetem fet. ?Olsem wanem nao bae yu ansa wetem fet long wanem yu ridim long 2 King 17–25?

Raetemdaon Ol Filing mo Tingting blong Yu

I nomata we gudfala seves blong profet Elaeja, laef long saed blong spirit blong Not Kingdom blong Isrel i gohed blong stap go daon. Ol rabis king oli pusum strong fasin blong wosipim aedol, mo wo, mo apostasi i bin fulap. Mo laswan, Kingdom blong Asiria i winim mo seraotem olgeta ten traeb blong Isrel.

Be yet, Saot Kingdom blong Juda, olgeta tu, oli no mekem gud; fasin blong wosipim aedol i gro kwiktaem long ples blong olgeta. Be wetem evri samting ia long saed blong spirit we i stap roten, ol histri long skripja oli tokbaot tu (2) king we tufala i stret mo gud, mo blong wan taem, oli tanem pipol blong olgeta i gobak long Lod. Wan hem i Hesekia. Long taem blong rul blong hem, Ol Man Asiria, we oli jes winim olgeta long Not, oli winim plante long olgeta pat long Saot. Be Hesekia mo ol pipol blong hem oli soem fet long Lod, we i mekem olgeta long Jerusalem oli go fri long wan merikel wei. Afta, wan narafala taem blong apostasi, Josaea i stat blong rul. Tru long buk blong loa we oli faenem, i mekem Josaea i karem bak ol loa we i lukluk bak long laef blong ol pipol blong hem long saed blong relijin.

?Wanem nao yumi lanem long tufala mak ia long ol yia blong tudak long histri blong Juda? Wetem ol narafala samting, yu maet tingting hevi long paoa blong fet mo tok blong God long laef blong yu. Olsem Isrel mo Juda, yumi evriwan i mekem tugeta ol gudfala mo rabis joes. Mo taem yumi luksave jenis we i nidim long laef blong yumi, ating ol eksampol blong Hesekia mo Josaea i save givim long yumi insperesen blong “[trastem Lod God blong yumi]” (2 King 18:22).

Luk tu long 2 Kronikel 29–35; “Ol Tingting blong Kipim long Maen” seksen “Mo Jisas I Se, Ol Man blong Isrel ‘Kam Hom’.’”

Ol Aedia blong Skripja Stadi blong Yuwan

2 King 18–19

Mi save stap tru long Lod long ol hadtaem ia.

Plante long yumi i gotru ol taem we oli jalenjem fet blong yumi. Blong Hesekia mo ol pipol blong hem, wan long ol taem ia i we taem we ami blong Asiria i tekova long Juda, mo prapa spolem gud plante taon, mo oli stap kam kolosap long Jerusalem. Taem yu stap ridim 2 King 18–19, pikjarem se yu stap long Jerusalem long taem ia. ?Hao bae yu filim, eksampol, blong harem ol kros blong Ol Man Asiria we oli rekodem long 2 King 18:28–37 mo 19:10–13? ?Wanem yu lanem long ansa blong Hesekia? (luk long 2 King 19:1–7, 14–19). ?Hao nao Lod i sastenem Hesekia? (luk long 2 King 19:35–37). Tingting hevi long olsem wanem Hem i sastenem yu long ol hadtaem blong yu.

Yu maet wantem blong tingting hevi long wanem oli tokbaot long Hesekia long 2 King 18:5–7. ?Wanem nao ol ves ia i givim abaot from wanem nao Hesekia i save gogohed blong stap fetful taem ol jalenj oli kam? ?Olsem wanem nao yumi save folem eksampol blong hem?

Luk tu long 3 Nifae 3–4; D. Todd Christofferson, “Stap Strong Gud mo Stanap Strong long Fet long Kraes,” https://www.churchofjesuschrist.org/study/liahona/2018/11?lang=bis .

2 King 19:20–37

Evri samting oli stap long han blong Lod.

Senakerib, king blong Asiria, oli gat wan risen from wanem oli bilif se ami blong hem bae i winim Jerusalem. Asiria i winim plante nesen, wetem Isrel—?from wanem bae Jerusalem bae i defren? (Luk long 2 King 17; 18:33–34; 19:11–13). Be Lod i gat wan mesej blong Senakerib, tru long profet Aesea, mo oli rekodem long 2 King 19:20–34. ?Olsem wanem nao bae yu talemaot mein mesej blong sot stori ia? ?Wanem trutok nao yu faenem long ol ves ia we bae i save helpem yu gat fet long Lod mo plan blong Hem?

Luk tu long Hileman 12:4–23; Doktrin mo Ol Kavenan 101:16.

2 King 21–23

Ol skripja oli save tanem hat blong mi i go long Lod.

?Yu yu no bin stap filim olsem se yu stap lusum wan samting long saed blong spirit? Maet yu filim se rilesensip blong yu wetem God bae i kam moa strong. ?Wanem nao i helpem yu blong yu gobak long Hem? Tingting hevi long ol kwestin ia abaot olsem wanem Kingdom blong Juda i kamaot long Lod long han blong King Manase (luk long 2 King 21) mo olsem wanem King Josaea i helpem olgeta blong komitim olgeta bakegen wetem Lod(luk long 2 King 22–23). ?Wanem nao i givim insperesen long Josaea mo ol pipol blong hem? Sot storian ia maet bae i givim yu insperesen blong riniu komitmen blong yu blong “obei long Lod… ol tok blong Hem long olgeta tingting blong [yufala] mo long evri haf blong [yufala] ” (2 King 23:3).

Taem yu stap ridim ol japta ia, tingting blong stadi tu long japta 6 long Teachings of Presidents of the Church: Spencer W. Kimball ([2006], 59–68), long hemia we Presiden Kimball i talem stori blong King Josaea “i wan long ol naesfala stori long ol skripja” (pej 62). ?From wanem yu ting se Presiden Kimball i filim olsem ia? ?Wanem nao yu faenem long ol toktok blong Presiden Kimball, speseli abaot ol komen blong hem abaot King Josaea, we i helpem yu blong putum long praktis 2 King 22–23 long laef blong yu?

Luk tu long Alma 31:5; Takashi Wada, “Stap Kakae Gud long Ol Toktok blong Kraes,” Liahona, Mei 2019, 38–40; “Josiah and the Book of the Law” (video), ChurchofJesusChrist.org.

Ol skripja oli save tanem hat blong yumi i go long Lod.

Ol Aedia blong Famli Skripja Stadi mo Haos Naet

2 King 19:14–19.?Wanem nao yumi save lanem long eksampol blong Hesekia we i save helpem yumi taem yumi gat ol had problem o kwestin? ?Olsem wanem nao Lod i ansarem ol prea blong help blong yumi? Maet wanwan memba blong famli i save mekem wan samting blong hangem long hom we i rimaenem olgeta blong oli tanem olgeta i go long Lod.

2 King 22:3–7.Ol wokman we oli talem olgeta long 2 King 22:3–7 oli trastem olgeta wetem mane blong yusum blong bildimbak tempol “from we fasin blong olgeta i stret mo gud” (ves 7). Afta we yufala i ridim olgeta ves ia, yu save askem wanwan memba blong famli blong talem ol samting we oli trastem olgeta wetem. ?Olsem wanem nao bae yumi save kam blong oli trastem yumi, semmak olsem ol wokman long ol ves ia?

2 King 22:8–11, 19; 23:1–3.?Wanem nao i tajem yumi abaot wei we Josaea mo ol pipol blong hem oli mekem folem toktok blong God? ?Olsem wanem nao yumi mekem folem toktok blong God we oli stap long olgeta skripja? Ol memba blong famli blong yu oli save serem ol skripja, o ol stori we oli save leftemap ol tingting blong olgeta blong wantem blong folem Papa long Heven mo Jisas Kraes.

2 King 23:25.?Wanem nao i kamaot klia long yu abaot Josaea long ves ia? Famli blong yu i save dro, insaed long ol pepa hat, ol samting we oli save mekem long wik ia blong tanem olgeta i go long Lod wetem ful hat blong olgeta.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “As I Search the Holy Scriptures,” Hymns, no. 277.

Stap Kam Antap long Stadi blong Yuwan

Lukaotem ol toktok mo ol sentens we oli givim insperesen. Taem yu stap rid i go, Spirit bae i tekem samfala toktok o sentens i kam long maen blong yu. Oli save givim yu insperesen mo pusum yu, maet oli raetem blong yu nomo.

Pikja droing blong man we i raet i karem wan skrol blong skripja i go long King Josaea , i kam long Robert T. Barrett