“Ol Tingting blong Kipim long Maen: “Mo Jisas I Se, Ol Man blong Isrel ‘Kam Hom’” Kam Folem Mi—Blong Wanwan Man, Woman mo Famli: OlTesteman 2022 (2021)
“Ol Tingting blong Kipim long Maen: ‘Mo Jisas I Se, Ol Man blong Isrel, “Kam Hom,”’” Kam Folem Mi—Blong Wanwan Man, Woman mo Famli: OlTesteman 2022
Ol Tingting blong Kipim long Maen
“Mo Jisas I Se, Ol Man blong Isrel ‘Kam Hom’”
Long draeples long Saenae, Moses i karem i kam tugeta ol pikinini blong Isrel daon long wan stamba blong wan hil. Long ples ia, Lod i talem se Hem i wantem jenisim ol grup blong pipol ia we oli jes kamaot long slef blong oli kam wan pipol we i gat paoa. Hem i talem: “Be yufala bambae i tabu, yufala i man blong mi nomo, mo bambae yufala i pris” (Eksodas 19:6). Hem i promes se bae pipol ia i kam wan gudfala pipol mo bae oli kam rij, iven sapos ol enemi oli plante mo oli raonem olgeta (luk long Dutronome 28: 1–14).
Evri samting ia bae i hapen i no from se Ol Man Isrel oli gat bigfala namba, o oli strong o oli gat skil. Bae i hapen, Lod i eksplenem, “sapos yufala i obei long mi, mo yufala i holem gud promes ya we mi mekem wetem ol bubu blong yufala long bifo” (Eksodas 19:5). Hem i paoa blong God, i no blong olgeta, we bae i mekem olgeta i kam strong.
Yet Ol Man Isrel oli no bin obei oltaem long voes blong Hem, mo afta sam taem, oli stop blong kipim ol kavenan blong Hem. Plante oli stat blong wosip long ol narafala god mo stat blong karem ol defren kastom raon long olgeta. Oli sakemaot wanem nao i mekem olgeta blong kam wan nesen, seperet long evri nara nesen —rilesensip blong kavenan blong olgeta wetem Lod. Taem i no gat paoa blong God blong protektem olgeta (luk long 2 King 17:6–7), i nogat wan samting blong stopem enemi blong olgeta (luk long 2 Kronikel 36:12–20).
Seraot Ia
Samtaem bitwin 735 mo 720 B.K.B., Ol Man Asiria oli tekova Not Kingdom blong Isrel, hom blong olgeta ten traeb blong ol twelef traeb, mo karem taosen blong Ol Man Isrel oli kam ol prisena long defren pat Kingdom blong Asiria (luk long 2 King 17:1–7).1 Ol Man Isrel ia oli save olgeta olsem “laen blong Isrel we oli bin lus,” long wan wei, from se oli bin karemaot olgeta long graon blong olgeta mo seraotem olgeta long ol narafala nesen. Be oli lus long impoten wei ia: afta samtaem oli lusum save ia abaot aedentiti blong olgeta olsem ol kavenan pipol blong God.
From se Saot Kingdom blong Juda, long sam taem ia, oli ol man we oli moa stret mo gud bitim olgeta long Not Kingdom, nao hem i bin stap blong wan longfala taem moa.2 Long en, ol pipol ia oli tanem olgeta oli go agensem Lod. Ol Man Asiria oli atakem mo oli winim kolosap ful Kingdom blong Saot; be i wan merikel we Jerusalem i sef (luk long 2 King 19; Aesea 10:12–13). Afta, bitwin 597 mo 580 B.K.B, Ol Man Babilonia oli prapa spolemgud Jerusalem, wetem tempol, mo karem plante long olgeta oli kam ol prisena (luk long 2 King 24–25; 2 Kronikel 36; Jeremaea 39; 52). Samples 70 yia afta, oli letem haf blong traeb blong Juda we i stap blong oli gobak long Jerusalem mo oli bildimbak tempol. Be, plante oli stap long Babilon3
Plante jeneresen i pas, Ol Man Isrel long evri traeb “[Lod] i kam olsem hariken, i ronemaot olgeta oli go stap long narafala kantri.(Sekaraea 7:14; luk tu long Amos 9:8–9). Sam long olgeta, Lod i bin ronemaot olgeta i go long ol narafala kantri (luk long 2 Nifae 1:1–5; Omnae 1:15–16). Ol narafalawan oli ronwe long Isrel blong mekem se oli no holemtaet olgeta (luk long 2 King 25:22–26; Jeremaea 42:13–19; 43:1–7), o from politik o ekonomi risen.4
Yumi singaotem ol taem ia blong seraot blong Isrel. Mo hem i impoten blong save abaot seraot ia from plante risen. Wan samting, hem i stamba topik blong OlTesteman: Plante profet long OlTesteman oli ol witnes long hadtaem ia we i lid i go long seraot ia blong Isrel. Oli bin luk finis seraot ia mo wonem ol man abaot hemia, mo sam long olgeta oli stap blong luk hemia i hapen.5 Hemia bae i helpem yu tingbaot taem yu stap rid long ol buk blong Aesea, Jeremaea, Amos, mo plante moa narafala buk long OlTesteman. Wetem tingting ia i stap long maen, taem yu rid abaot ol profesi blong olgeta abaot Asiria mo Babilon, fasin blong wosipim aedol mo blong kam olsem ol prisena, harem nogud mo restoresen, bae yu save wanem oli stap tokbaot.
Blong andastanem seraot ia blong Isrel bae i helpem yu andastanem Buk blong Momon tu, from se Buk blong Momon hem i wan rekod blong wan branj blong Isrel we i seraot (luk long 1 Nifae 15:12). Rekod ia i stat wetem famli blong Lihae we i ronwe long Jerusalem samples long 600 B.K.B., bifo we Babilonia i faet agensem Jerusalem. Lihae i wan long ol profet we i profesae abaot seraot ia blong Isrel.6 Mo ol famli blong hem i helpem hem blong mekem profesi ia i kamtru, I tekem branj blong olgeta Blong haos blong Isrel mo planem olgeta long narasaed blong wol, long Ol Amerika.
Nebusa-adan i prapa spolem gud Jerusalem, i kam long William Brassey Hole, © Providence Collection/oli karem laesens long goodsalt.com
Kam Tugeta Ia
Be, seraot ia blong Isrel, i haf blong storian ia nomo. Lod i no fogetem ol pipol blong Hem, o Hem i no save fogetem olgeta, iven sapos oli fogetem Hem. Plante profesi we i talem se bae Isrel i seraot i kam wetem plante promes we wan dei God bae i karembak olgeta i kambak tugeta.7
Dei ia hem i tedei—dei blong yumi. Kam tugeta ia i stat finis. Long 1836 taosen yia afta we Moses i karem Isrel i kam tugeta long stamba blong Hil ia Saenae, Moses i kamaot long Ketlan Tempol blong givim long Josef Smit “ol ki blong wok blong karem Isrel i kam wanples aot long ol fo pat blong wol” (Doktrin mo Ol Kavenan 110:11). Naoia, anda long daereksen blong olgeta we oli holem ol ki ia, ol traeb blong Isrel oli stap karembak olgeta long evri nesen long ples we ol wok man blong Lod i save go long hem.
Presiden Russel M. Nelson i singaotem kam tugeta ia—“samting ia we i moa impoten we i stap tekples long wol tedei. I nogat samting we yu save komperem, we i bigwan tumas olsem, we i impoten tumas olsem, mo i hae mo i tabu tumas olsem. Mo sapos yu jusum, sapos yu wantem, yu save tekpat bigwan long hem.”8
?Olsem wanem nao yu mekem samting ia? ?I minim wanem blong karem Isrel i kam tugeta? ?I minim se bae i karembak ol twelef traeb ia i go long kantri we oli stap long hem fastaem? Be, hemia i minim wan samting we i moa bigwan, we i bigwan moa we i no save finis. Olsem we Presiden Nelson i eksplenem:
“Taem yumi stap tokbaot, kam tugeta, yumi stap talem stamba trutok ia nomo: evriwan long ol pikinini blong Papa blong yumi long Heven, long tugeta saed blong vel, i nidim blong harem mesej blong gospel Jisas Kraes we i kambak. …
“Eni taem yu mekem eni samting we i helpem eniwan—long eni saed blong vel—evri taem yu tekem wan step fored blong stap mekem ol kavenan wetem God mo stap kasem baptaes mo tempol odinens we i nid long bihaf blong olgeta, yu stap help blong karem Isrel i kam tugeta. Hem i simpol olsem ia nao”9
Hemia i hapen, olsem we Aesea i talem, “Bambae hem i tekem olgeta olsem wan we i tekemaot kakae blong wit” (Aesea 27:12) o, olsem we Jeremaea i talem, wan man long wan taon, mo long evri famli blong yufala, bambae mi tekemaot tu man long wan famli” (Jeremaea 3:14).
Kambak blong Isrel o Karembak Isrel, i minim blong karembak ol pikinini blong God oli gobak long Hem. Hem i minim blong putumbak kavenan rilesensip blong olgeta wetem Hem. Hem i minim blong putumbak bakegen “[tabu nesen]” we Hem i bin proposem blong putumbak longtaem finis (Eksodas 19:6).
Kam Hom
Olsem wan we i stap kipim olgeta kavenan, yu yu pat long haos blong Isrel.10 Oli karembak yu finis, mo wok blong yu i blong karembak ol narawan. Impoten stori ia, we i blong bifo, i stat wetem wan kavenan wetem God mo Ebraham, naoia i stap kam long ful paoa blong hem, mo yu yu wan long ol stamba wokman insaed ia. Naoia hem i taem blong “Jisas i se, Ol Man blong Isrel ‘Kam Hom.’”11
Mesej ia i blong ol olgeta ia we oli stap karem ol pipol oli kam tugeta: Kam hom long kavenan. Kam hom long Saeon. Kam hom long Jisas Kraes, Tabu Wan blong Isrel, mo bae Hem i karem yu i go long hom long God, Papa blong yu.