“31 Oktoba–6 Novemba. Daniel 1–6: ‘I No Gat Wan Narafala God Nating we I Save Sevem Man Olsem God Ya,’” Kam Folem Mi—Blong Wanwan Man, Woman mo Famli: OlTesteman 2022 (2021)

“31 Oktoba–6 Novemba. Daniel 1–6,” Kam Folem Mi—Blong Wanwan Man, Woman mo Famli: 2022

Pikja

Daniel i talem mining blong drim blong king

Daniel I Talemaot Mining blong Drim blong Nebukadnesa, i kam long Grant Romney Clawson

31 Oktoba–6 Novemba

Daniel 1–6

“I No Gat Wan Narafala God Nating we I Save Sevem Man Olsem God Ya”

Elda Richard G Scott i eksplenem se, blong raetemdaon wan insperesen, “i soem long God se toktok blong Hem we i kam stret long yumi, yumi tekem se i tabu. Blong raetemdaon revelesen, bambae i mekem tu se yu save kam antap long paoa blong yu blong tingbaot revelesen we yu kasem” (“How to Obtain Revelation and Inspiration for Your Personal Life,” Ensign o Liahona, May 2012,46).

Raetemdaon Ol Filing mo Tingting blong Yu

Bae i no hapen se bae oli tok se bae oli sakem yu long wan faea, o hol wetem ol laeon insaed from bilif blong yu long Jisas Kraes. Be i no gat wan long yumi we bae i gotru long laef ia, mo no gat wan tes blong fet. Yumi evriwan i save lanem samting aot long eksampol blong ol pipol olsem Daniel, Sadrak, Mesak, mo Abednego, we Rul blong Babilon i bin tekem olgeta oli prisena (Luk long 2 King 24:10–16). Ol yang pipol ia, oli stap fesem wan kalja we oli no save gud, we i gat defren samting i impoten, mo oli bin fesem ol bigfala temtesen blong oli lego ol bilif mo ol stret mo gud kastom. Be yet, oli bin stap tru long ol kavenan blong olgeta. Semmak olsem Josef long Ijip, mo Esta long Pesia, Daniel mo ol fren blong hem long Babilon, oli bin holemtaet bilif blong olgeta long God, mo God i wokem ol merikel we i stap givim insperesen yet long olgeta we oli stap biliv tedei.

?Olsem wanem nao oli bin faenem paoa blong gohed blong stap fetful? Oli bin mekem olgeta smol mo simpol samting ia we God i bin askem long yumi evriwan blong mekem—stap prea, stap livim kakae, stap jusum ol gudfala fren, stap trastem God, mo stap olsem wan laet long ol narawan. Taem yumi stap kam strong tru long ol semfala smol mo simpol samting, yumi save fesem ol laeon, mo ol bigfala faea insaed long laef blong yumi, wetem fet.

Blong gat wan bigfala lukluk long Buk blong Daniel, luk long “Daniel” insaed long Gaed long Ol Skripja.

Pikja

stadi blong yuwan pikja aekon

Ol Aedia blong Skripja Stadi blong Yuwan

Daniel 1; 3; 6

Mi save trastem Lod taem fet blong mi i fesem tes.

Long wan wei, yumi evriwan i stap laef long Babilon. Wol we i stap raon long yumi i fulap wetem plante temtesen blong salem ol standet blong yumi, mo gat kwestin long bilif blong yumi long Jisas Kraes. Taem yu stap ridim Daniel 1, 3, mo 6, teknot long wei we Daniel, Sadrak, Mesak, mo Abednego, oli bin fosem olgeta blong oli mekem ol samting we oli bin save se i rong. ?Yu bin filim se oli fosem yu gogo bae yu salem, o lego ol bilif blong yu? ?Wanem nao yu lanem aot long ol man ia, we i save helpem yu blong trastem Lod taem yu fesem agens?

Buk ia blong Daniel, mo plante nara skripja, oli rekodem ol eksperiens blong ol taem we bigfala fet o bilif, i lidim man i go long ol bigfala merikel. ?Be olsem wanem nao sapos bilif blong yu i no lidim yu long ol merikel we yu stap lukaotem? (Eksampol, luk long Alma 14:8–13). Folem wanem yu ridim long Daniel 3:13–18, long tingting blong yu, ?olsem wanem nao bae Sadrak, Mesak, mo Abednego oli ansarem kwestin ia? ?Olsem wanem eksampol blong olgeta i save jenisim wei we yu yu kam blong fesem ol tes blong fet blong yu? Blong kasem moa abaot ol ves ia, luk long mesej blong Elda Dennis E. Simmons, “But If Not…” (Ensign o Liahona, May 2004, 73–75).

Buk blong Daniel i soem tu olsem wanem ol stret mo gud joes blong wanwan man o woman, i save lidim ol narawan blong gat moa bigfala fet o bilif long Lod. ?Wanem eksampol long saed ia yu yu faenem long ol japta 1, 3, mo 6? Tingting long wanem samting nao bae ol joes blong yu i save mekem long ol narawan (luk long Matiu 5:16).

Luk tu long DieterF. Uchtdorf, Nov. 2015, 76–79; David R. Stone, “Be Not Afraid, Only Believe,” Ensign o May 2006, 90–93.Liahona,Zion in the Midst of BabylonEnsign o Liahona,

Pikja droing we i soem Daniel mo ol fren blong hem we oli no wantem kakae kaekae blong king, i kam long Brian Call

Daniel 2

Jos Ia blong Jisas Kraes blong Ol Lata-dei Sent i kingdom blong God long wol ia.

Tru long revelesen, Daniel i bin luk se drim blong Nebukadnesa i stap talem finis fiuja blong ol kingdom blong wol ia, mo tu, fiuja blong kingdom blong God, we bae “rul blong hem bambae i no save finis samtaem” (Daniel 2:44). “Jos ia, i lata-dei kingdom ia we oli bin talem profesi blong hem,” Elda D.Todd Christofferson i bin tijim, “we man i no krietem, be God blong heven i stanemap mo i rolem olsem wan ston, we i no gat han i katemaot long maonten, blong i fulumap wol ia” (“Why the Church,” Ensign o Liahona, Nov 2015,111). Tingabaot kingdom blong God long ol las dei ia taem yu stap ridim hao oli tokbaot ston ia long Daniel 2:34–35, 44–45. ?Wanem semmak samting yu yu luk bitwin ston ia mo kingdom? ?Olsem wanem yu yu luk kingdom blong God i stap fulumap wol ia tedei?

Luk tu long Gordon B. Hinckley, “The Stone Cut Out of the Mountain,” Ensign o Liahona, Nov. 2007, 83–86; L.Whitney Clayton, “The Time Shall Come,” Ensign o Liahona, Nov. 2011, 11–13.

Daniel 3:19–28

Sevya bae i sapotem mi tru long ol tes blong mi.

?Wanem niu tingting i kam long yu taem yu stap ridim abaot nambafo man we i stap kamaot long bigfala faea wetem Sadrak, Mesak, mo Abednego? ?Olsem wanem stori ia i save helpem yu blong gotru ol tes we yu stap fesem? Yu save faenem sam moa niu tingting long Mosaea 3:5–7; Alma 7:11–13; Doktrin mo Ol Kavenan 61:36–37; 121:5–8.

Pikja

famli stadi pikja aekon

Ol Aedia blong Famli Skripja Stadi mo Haos Naet

Daniel 1–2.Taem yufala i stap ridim Daniel1 mo 2 tugeta, yu save lukaotem blesing ia we Daniel mo ol fren blong hem oli bin kasem from se oli no bin wantem kaekae mit, mo dring waen blong king. (Luk vidio ia “God Gave Them Knowledge,” ChurchofJesusChrist.org.) Yu save komperem ol blesing ia wetem ol promes we Lod i mekem long yumi taem yumi stap kipim ol komanmen blong Hem, olsem Tok blong Waes (luk long Doktrin mo Ol Kavenan 89:18–21). ?Olsem wanem nao Lod i blesem yumi from se yumi stap laef folem Tok blong Waes?

Daniel 3.?Olsem wanem yu save helpem famli blong yu blong lanem abaot stori we i stap long Daniel 3? “Sadrak, Mesak, mo Abednego” insaed long Ol Stori long OlTesteman i save help. ?Wanem nao i tajem yumi abaot Sadrak, Mesak, mo Abednego? ?Wanem situesen nao yumi stap fesem we i givim jalenj long fet blong yumi mo i askem yumi blong soem se yumi mas trastem God?

Daniel 6:1–23.Maet bae famli blong yu i save laekem blong aktem ol pat blong stori ia we i stap long Daniel 6:1–23 (eksampol, ol ves 10–12 o 16–23). ?Wanem nao yumi save lanem aot long eksampol blong Daniel? ?Olsem wanem nao yumi save kam moa olsem hem?

Daniel 6:25–27.Folem olgeta ves ia, ?olsem wanem nao tingting blong King Darias i jenis taem we Lod i bin mekem Daniel i fri, i aot long ol laeon ? Yu save ridim long Daniel 2:47; 3:28–29 abaot wei we tingting King Nebukadnesa i bin jenis tu long semfala wei. ?Wanem janis i stap blong yumi save lidim tingting blong ol narafala man? Toktok raon long ol eksampol we yu bin luk abaot wei we bilif blong ol nara pipol, wetem hemia blong ol memba blong famli, i bin lidim tingting blong ol narawan blong mekem gud samting.

Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.

Wan singsing: “I Want to Live the Gospel,” Children’s Songbook,148.

Kam Antap long Fasin blong Yumi blong Stap Tij

Tijim doktrin. Gospel blong Lod i naes tumas from se hem i simpol (luk long Doktrin mo Ol Kavenan133:57). Ol simpol aktiviti mo toktok storian we oli lukluk nomo long doktrin, bae i save invaetem Tabu Spirit blong tekem mesej blong gospel i go long hat blong ol famli blong yu.