Bred blong Laef, i kam long Chris Young

14–20 Novemba

Amos; Obadaea

“!Yufala I Mas Kambak long Mi! Mi Mi Hae God, Mo Hemia Tok blong Mi”

Tabu Spirit i save givim openem maen mo hat blong yu blong yu harem ol mesej insaed long ol toktok blong God, mo ol mesej ia oli jes blong yu nomo. ?Wanem nao yu filim se Lod i wantem yu blong lanem long wik ia?

Raetemdaon Ol Filing mo Tingting blong Yu

God i bin jusum laen blong Ebraham blong i ol kavenan pipol blong Hem, blong mekem se bae i wan blesing long evri pipol (luk long Jenesis 12:2–3). Be, long taem blong seves blong Amos, plante long ol kavenan pipol ia oli bin stap mekem nogud long olgeta we oli pua mo oli no wantem save long ol profet, oli mekem se wosip blong olgeta i emti mo i no gat mining (luk long Amos 2:6–16). I tru, ol nesen we oli stap raonabaot long olgeta, olgeta tu oli bin gat rong ia blong gat ol bigfala sin (luk long Amos 1; 2:1–5), be, hemia i neva bin wan eskius long ol pipol blong God (luk long Amos 3:2). Mekem se God i sendem wan man aot long Juda, we nem blong hem Amos, blong i prijim fasin blong sakem sin long Kingdom blong Isrel. Afta, God i bin talemaot tu, tru long profet Obadaea se, nomata Kingdom blong Juda i lus evriwan, bae Lod i mekem ol pipol blong Hem oli kam tugeta wanples bakegen. Ol kavenan pipol oli bin go longwe long Lod, tufala profet i testifae long hemia, be Lod i no sakemaot olgeta blong oltaem. Taem we God i soemaot ol sikret blong hem long ol wokman blong Hem, ol profet, (luk long Amos 3:7), yumi save tekem se i wan saen se Hem i stil wantem helpem yumi blong laef folem ol kavenan we yumi mekem wetem Hem.

Blong save moa abaot Ol Buk blong Amos mo Obadaea, luk long “Amos” mo “Obadaea” long Gaed long Ol Skripja.

Ol Aedia blong Skripja Stadi blong Yuwan

Amos 3:1–8; 7:10–15

Lod i talemaot ol trutok tru long ol profet blong Hem.

Long Amos 3:3–6, profet Amos i presentem plante eksampol blong samting we i hapen mo risal: from laeon i lukaotem kaekae blong hem, nao laeon i save singaot strong; from se oli putum sling blong wan pijin, nao pijin i nogud. (Tekem not se long Josef Smit Translesen blong ves6, toktok ia “mekem finis” oli jenisim i kam “save” [long Amos 3:6, futnot b].) Long ol ves 7– 8, Amos i yusum tingting ia long ol profet. ?Wanem i stap mekem wan profet blong i talemaot profesi? ?Wanem moa yu lanem abaot ol profet taem yu stap ridim Amos 7:10–15? Tingting hevi long hamas yu talem tangkyu se Lod i stap talemaot yet ol sikret blong hem long ol wokman blong hem, ol profet. (Amos 3:7). Trutok ia, ?hem i talem wanem long yu abaot God?

Luk tu long Doktrin mo Ol Kavenan 1:38; 21:4–8; 35:13–14.

Amos 4–5

“Sapos yufala i kambak long mi, bambae yufala i save stap gud.”

Taem yu stap ridim Amos 4:6–13, teknot long ol jajmen we Lod i sendem long ol pipol blong Isrel. ?Wanem ol ves ia oli talem abaot wanem we Lod i bin hop se bae i hapen afta long wanwan long ol eksperiens ia? (luk tu long Hileman 12:3). Tingabaot wan las tes blong we yu jes gotru long hem. Maet God i no sendem tes ia i kam long yu, be tingting hevi long wei we i bin givim yu janis blong lukaotem Hem.

Ridim Amos 5:4, 14–15, mo tingting hevi long wei we Lod i bin gat gladhat (ves 15) long yu taem yumi bin wantem faenem Hem, iven long ol taem blong tes blong yu.

Luk tu long Donald L. Hallstrom, “Turn to the Lord,” Ensign o Liahona, Mei 2010, 78–80.

Amos 8:11–12

Toktok blong Lod i save mekem man i nomo hanggri mo i nomo tosta.

Yumi evriwan i gotru long ol taem blong hanggri mo tosta long saed blong spirit, be i no gat nid blong yumi “go olbaot” (Amos 8:12) we bae yumi lukaotem wan samting we bae i mekem yumi glad long hem. Yumi save wanem bae i stretem hanggri blong yumi long saed blong spirit, mo yumi bin gat blesing ia blong gat toktok blong Lod we i fulap we i fulap. Taem yu stap ridim Amos 8:11–12, tingting abaot, from wanem, fasin blong stap hanggri, i wan gudfala wei blong komperem fasin blong stap laef we yumi no gat toktok blong God. ?Wanem sam moa niu tingting we yu faenem insaed long Matiu 5:6; Jon 6:26–35; 2 Nifae 9:50–51; 32:3; Inos 1:4–8?

Luk tu long Jeffrey R. Holland, “He Hath Filled the Hungry with Good Things,” Ensign, Nov. 1997, 64–66; Gospel Topics, “Apostasy,” topics.ChurchofJesusChrist.org.

Yumi save kam ol sevya long Hil Saeon taem yumi mekem wok blong tempol mo famli histri.

Obadaea 1:21

?Huia oli ol sevya long Hil ia, Saeon?

Presiden Gordon B. Hinckley i bin givim wan wei blong talem mining blong sentens ia “ol sevya long hil Saeon,” mo i joenem sentens ia i go long tempol mo wok blong famli histri: “Insaed long tempol, yumi rili kam ol sevya long Hil ia, Saeon.” “?Hemia i minim wanem?” Semmak olsem we Ridima i givim laef blong hem olsem wan sakrifaes blong evri man, mo taem Hem i bin mekem hemia, Sevya blong yumi, mo yumi tu, we i kasem wan smol mak, taem yumi mekem ol wok blong proksi long tempol, yumi kam olsem ol sevya long olgeta ia long narasaed we oli no gat wei blong progres sapos i no gat wan samting i hapen long bihaf blong olgeta, long wol ia (“Closing Remarks,” Ensign o Liahona, Nov. 2004,105).

Ol Aedia blong Famli Skripja Stadi mo Haos Naet

Amos 3:7Yu save luklukbak long samfala las mesej blong Presiden blong Jos, mo toktok raon long wanem we Lod i stap talemaot long famli blong yu tru long Hem. ?From wanem i impoten blong gat wan profet we i stap lidim Jos tedei? ?Long wanem wei nao yumi kam blong save se hem i wan tru profet? ?Wanem nao yumi stap mekem blong folem kaonsel blong hem?

Amos 5:4.Maet famli blong yu i wantem mekem wan posta blong hangem insaed long hom wetem ves ia long hem. ?I minim wanem blong wantem faenem Lod? ?Olsem wanem nao yumi stap lukaotem Hem? ?Wanem blesing bae yumi kasem taem yumi mekem hemia? Yu save invaetem ol memba blong famli blong oli serem mo toktok raon long ol nara skripja we oli stap tij abaot fasin blong wantem faenem Lod, olsem Matiu 7:7–8; Ita 12:41; mo Doktrin mo Ol Kavenan 88:63.

Amos 8:11–12.Maet ol pikinini oli laekem blong mekemap ol aksen we oli go wetem ol sentens insaed long ol ves ia. Taem we bodi blong yumi i hanggri mo i tosta, ?yumi mekem wanem? ?Taem we spirit blong yumi i hanggri mo i tosta, ?yumi mekem wanem? Yufala i save wajem vidio ia, “The Great Apostasy” (ChurchofJesusChrist.org) mo tokbaot olsem wanem Restoresen blong gospel i stretem hanggri blong yumi long saed blong spirit.

Obadaea 1:21.“Wanem nao mining blong stap olsem ol sevya long hil ia, Saeon? (Blong kasem wan moa eksplenesen, luk long toktok blong Presiden Gordon B. Hinckley we i stap long Ol Aedia blong Skripja Stadi blong Yuwan.) ?Wijwan long ol bubu blong yu we i nidim ol odinens blong sevem laef? ?Wanem nao yumi save mekem blong helpem olgeta?

Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.

Wan singsing: “Tangkyu Papa God Yu Givim Profet,” STSP, pej 36.

Stap Kam Antap long Stadi blong Yuwan

Yusum miusik blong invaetem Spirit mo lanem doktrin. Lisin long wan hym, o ridim wan hym we i save helpem yu blong lanem ol prinsipol blong gospel. Eksampol: yu save lisin o ridim “Tangkyu Papa God Yu Givim Profet” (STSP, pej 36) blong yu save gat insperesen blong gat moa bigfala fet long ol profet we oli stap laef. (Luk long Teaching in the Savior’s Way, 22.)

Santo Domingo Dominik Ripablik Tempol