Luk Yuwan Insaed long Tempol
Mi prea se wanwan long yumi bae i ona long Sevya mo i mekem ol jenis we i nid blong luk yumiwan insaed long ol tabu tempol blong Hem.
Wei we plan blong Lod blong sevem ol man long dispensesen blong taem blong evri wok blong God i kamtru, i stap go, i bitim save blong man. Eksampol ia i kamaot long anaonsmen blong Presiden Tomas S. Monson blong 4 niu tempol long konfrens sesen ia. Taem oli singaotem Presiden Monson olsem Aposol long 1963, i gat 12 tempol we i open long wol. Wetem dedikesen blong Provo Siti Senta Tempol, i gat naoia 150, mo bae i gat 177 taem bae oli dediketem evri tempol we oli bin anaonsem. Hem i gud risen blong stap glad wetem tingting we i stap daon.
Wan handred eiti yia i pas, long dei ia, 3 Epril 1836, wan bigfala visen i open long Profet Josef Smit mo Oliva Kaodri long Ketlan Tempol. Hemia i hapen jes wan wik afta long dedikesen blong tempol ia. Long visen ia, oli luk Lod i stanap long pulpit blong tempol. Sevya i talem sam samting mo tu i talem:
“Hat blong evri pipol blong mi oli mas stap glad, yes olgeta ia we oli bin bildim haos ia long nem blong mi wetem strong paoa blong olgeta.
“From luk, mi akseptem haos ia, mo nem blong mi bae i stap long ples ia; mo bae mi kamaot long ol pipol blong mi wetem sore insaed long haos ia.”
Long tabu taem ia, ol profet blong bifo oli kamkamaot, wetem Elaeja, we i givim ol ki we i nid blong ol odinens blong tempol.
Yumi save filim glad ia we i stap hapen long Kito, Ekuado, Harare long Simbabwe, Belem long Brasil mo wan nambatu tempol long Lima, Peru; yumi glad tugeta wetem ol memba mo ol misinari folem wanem i hapen long Bangkok, Taelan, wan yia i pas taem oli anaonsem tempol ia. Sista Seli Senia, waef blong misin presiden tetaem ia, Deved Senia, we i bin misin presiden blong Taelan Bangkok Misin we i imelem ol famli mo fren blong talem se afta hem i lisin long Presiden Monson i anaonsem tempol, i bin gat “12 aoa we man i no slip mo wota blong ae i ron from glad.” Oli ringim ol asisten blong misin presiden long haf pas leven naet mo talem olgeta. Ol asisten oli ringim evri misinari. Ripot i kambak se “ful misin i wekap long medel naet, oli jiamjiam long bed.” Sista Senia i tok fani mo talem ol famli mo fren: “!Plis yufala i no talem long Misinari Dipatmen!”
Dip ansa long spirit blong ol memba blong Taelan i bin strong semmak. Mi trastem se oli bin rere long hat, long ol hom, mo wok blong heven i mekem ol Sent oli rere long ol ples ia we oli anaonsem ol niu tempol ia.
Sista Senia, long Taelan, i oda long sam spesel han mira we bae hem i yusum taem i tijim ol sista. I gat wan tempol we oli droem long mira, wetem ol toktok ia: Luk yuwan insaed long tempol. Taem ol pipol oli lukluk long mira ia, oli stap luk olgetawan long tempol. Ol Senia oli tijim ol investigeta mo ol memba blong luk olgetawan insaed long tempol, mo mekem ol jenis we i nid, mo rere long spirit blong kasem gol ia.
Jalenj blong mi, long tedei, i blong wanwan long yumi, weaples yu stap long hem, blong yu luk yuwan insaed long tempol. Presiden Monson i se: “Sapos yu no go insaed long haos blong Lod mo kasem evri blesing we i stap insaed ia, yu no kasem evri samting we Jos i gat blong givim. Ol blesing we oli moa impoten mo moa hae blong stap memba blong Jos, oli ol blesing we yumi kasem long ol tempol blong God.”
Nomata se wol tedei i no gat tumas stret mo gud fasin, yumi laef long wan tabu, holi taem. Ol profet wetem lav mo gudfala hat, oli tokbaot taem blong yumi tedei, blong plante handred yia.
Profet Josef Smit, we i tokbaot Obadaea long OlTesteman mo Fas Pita long Niu Testeman, i luksave bigfala stamba tingting blong God blong putum baptaes blong ol dedman mo givim janis long yumi blong stap ol sevya long Hil Saeon.
Lod i mekem ol pipol blong yumi oli kam antap, mo givim ol risos mo kaonsel blong profet blong yumi wok strong blong go mekem tempol responsabiliti blong yumi blong olgeta we oli laef mo olgeta we oli ded.
From gospel we i kambak blong Jisas Kraes, yumi andastanem stamba tingting blong laef, plan blong fasin blong sevem man we Papa i gat long ol pikinini blong Hem, sakrifaes blong Sevya blong pemaot man, mo stamba rol blong famli long oganaesesen blong heven.
Namba blong ol tempol we i go antap mo teknoloji we i muv bigwan we i stap blong yumi mekem tabu famli histri responsabiliti blong ol bubu blong yumi, i mekem se taem tedei i gat moa blesing long ful histri. Mi glad long bigfala fetful fasin blong ol yut blong mekem indeksing, mo faenem ol bubu mo afta, mekem ol baptaes mo konfemesen wok long tempol. Yufala i ol sevya long Hil Saeon we i stap long profesi.
?Olsem Wanem Yumi Rere from Tempol?
Yumi save se stret mo gud fasin mo blong kam tabu, oli ol pat we i nid blong rere from tempol.
Long Doktrin mo Kavenan, seksen 97, i go olsem: “Mo folem hamas ol pipol blong mi oli bildim wan haos long mi long nem blong Lod, mo oli no letem eni samting we i no klin i kam insaed long hem, blong oli no spolem, bambae glori blong mi bae i stap long hem.”
Kasem 1891, Presiden blong Jos nao i stap saenem ol tempol rekomen blong protektem tempol olsem tabu ples. Responsabiliti ia i go naoia long ol bisop mo ol stek presiden.
Hem i bigfala tingting long hat blong mifala se ol memba blong Jos bae oli laef klin inaf blong kasem tempol rekomen. Plis, yu no luk tempol se i wan gol we i longwe mo no save kasem. Taem memba i wok wetem bisop, plante memba oli save kasem evri stret mo gud samting blong mekem long wan sot taem, sapos oli gat strong tingting blong kwalifae mo sakem sin fulwan. Hemia i minim blong fogivim yumiwan, mo no lukluk long ol samting we i no stret, o sin se bae oli mekem yumi no kwalifae blong go insaed long tabu tempol.
Atonmen blong Sevya i hapen from evriwan long ol pikinini blong God. Sakrifaes blong Hem blong pemaot man i pem wanem we jastis i askem, hemia long evriwan we i tru blong sakem sin. Ol skripja oli tokbaot hemia long wan moa naes wei:
“Nating we ol sin blong yufala i mekem yufala i doti gud, be bambae mi mekem we yufala i klin we i klin. Naoia yufala i doti we i doti be bambae yufala i kam klin olgeta.”
“Mi nomo save tingbaot olgeta bakegen.”
Mifala i save talem stret long yu se taem yu laef folem ol stret mo gud prinsipol, bae i tekem long yu mo famli, hapines, glad tingting mo pis. Ol memba, ol adalt mo yut, oli save talem olgetawan se, yes, oli klin inaf taem oli ansarem ol kwestin blong tempol rekomen. Stamba kondisen i blong kam antap long testemoni abaot God we i Papa; Pikinini blong Hem, Jisas Kraes; mo restoresen blong gospel blong Hem mo gat eksperiens long givhan blong Tabu Spirit.
The Blessings of the Temple Are Numerous
Ol fas blesing blong tempol oli ol odinens blong kam olsem wan god. Gospel plan i abaot fasin blong kam olsem god, mo i minim blong mekem mo kipim ol tabu kavenan wetem God. Baptaes mo konfemesen nomo oli no mekem long tempol, be ol odinens mo kavenan ia oli mekem mo kasem insaed long tempol blong olgeta we oli laef. Long olgeta we oli ded, evri odinens mo kavenan we i sevem man, oli mekem insaed long tempol.
Brigham Yang i tijim: “I no gat wan samting we Lod i save mekem long fasin blong sevem famli blong man we Hem i minim blong no mekem; evri samting we i save hapen blong sevem olgeta, we i no kasem help long olgeta, Sevya i bin mekem mo i kamtru long Hem.”
Ol lida blong Jos oli oganaesem ol stek, wod, kworom, ol Jos okseleri, ol misin mo ol narawan moa insaed long ol japel mo ol nara bilding blong yumi. Lod i oganaesem ol famli we oli no save finis insaed long ol tempol nomo.
Hem i klia se olgeta wetem hat we i stap daon mo spirit we i wantem sakem sin, oli bin tru blong sakem sin, bae Lod i akseptem olgeta insaed long tabu haos blong Hem. Yumi save se “God i lukluk long evri man i semmak nomo.” Wan impoten samting mi laekem abaot tempol, i we, bitwin olgeta we oli stap go long tempol, oli no save luksave mane, rank, o posisen blong man. Yumi evriwan i ikwol long fes blong God. Evriwan i dresap waet blong talem se yumi wan pipol we i klin gud mo stret mo gud. Evriwan i sidaon saedsaed wetem wan filing long hat blong stap ol klin inaf boe mo gel blong Papa long Heven.
Jes tingting. Raon long ful wol, ol woman mo man oli save, tru long “ol tabu odinens mo kavenan insaed long tempol, gobak stap wetem God mo joen wan ples blong taem we i no save finis.” Oli mekem hemia long wan naes siling rum we i stap, we i blong evri memba we i klin inaf blong go long tempol. “Tugeta, ol mira long tempol oli soem bakegen mo bakegen ol pikja we oli go kasem taem we i no save finis.” Ol pikja ia oli helpem yumi blong lukluk i go long papa, mama, bubu, mo evri jeneresen bifo olgeta. Oli helpem yumi luksave ol tabu kavenan we i joenem yumi long evri jeneresen we bae i kam afta. Hemia i impoten tumas, mo i stat taem yu luk yuwan insaed long tempol.
Presiden Howod W. Hanta i givim kaonsel blong tingting long ol bigfala tijing long dedikesen prea blong Ketlan Tempol, wan prea we Profet Josef Smit i talem se hem i kasem tru long revelesen. Hem i wan prea we i gohed blong stap antap long wanwan long yumi, antap long wanwan famli mo yumi olsem wan pipol from prishud paoa we Lod i bin givim long yumi blong yusum insaed long ol tabu tempol ia. I moa gud yumi stadi long namba 109 seksen blong Doktrin mo Ol Kavenan mo folem singaot blong Presiden Hanta blong “setemap tempol blong Lod olsem bigfala saen blong membasip blong yumi.”
Tempol i wan ples tu blong haed, blong talem tangkyu, blong kasem tijing, blong kasem andastaning, “blong yumi save kam stret gud evriwan long saed blong evri samting long saed blong kingdom blong God long wol ia.” Truaot long laef blong mi, hem i wan ples blong kwaet, mo pis long wan wol we i stap muvmuv oltaem. Hem i gud tumas blong livim ol wari blong wol i stap taem yu stap insaed long tempol.
Plante taem, insaed long tempol mo taem yumi stap mekem wok blong lukaotem famli histri, yumi filim kwaet toktok mo tingting we i kam long Tabu Spirit. Wanwan taem, insaed long tempol, vel bitwin yumi mo olgeta long narasaed i kam tingting evriwan. Yumi kasem sam moa help blong kam Sevya long Hil Saeon.
Sam yia i pas, long wan tempol long Medel Amerika, waef blong wan Jeneral Atoriti i helpem wan papa, mama, mo pikinini blong kasem kavenan we i no save finis long siling rum, mo oli putum tempol mira i stap. Taem oli finis, mo fesem ol mira ia, hem i luk se i gat wan fes long mira we i no stap long rum. Hem i askem mama ia mo lanem se wan gel i ded mo i no stap. Gel we i ded ia, oli mekem proksi blong hem long odinens ia. Neva ting daon long help insaed long tempol we i kam narasaed long vel.
Plis, yufala i mas save se mifala i wantem tumas se evriwan i mekem jenis we i nid blong kwalifae from tempol. Prea mo luklukbak se yu stap wea long laef; lukaotem help blong Spirit, mo toktok long bisop blong yu blong rere from tempol. Presiden Tomas S. Monson i talem: “I no gat wan gol i moa impoten bitim blong yu wok blong stap klin inaf blong go long tempol.”
Sevya I “Jif Konaston we I No Save Muvmuv blong Fet blong Yumi mo blong Jos blong Hem”
Mi bin glad tumas blong tekpat wetem Presiden Henri B. Aering long nambatu dedikesen blong Suva Fiji Tempol, tu manis i pas. I wan spesel mo tabu taem. Strong paoa long tingting mo strong filing blong Presiden Aering i mekem se dedikesen ia i gohed nomata long bigfala nogud hariken we i hapen long Saot Pat blong wol ia. Oli givim proteksen long bodi mo spirit long ol yut, ol misinari, mo ol memba. Han blong Lod i bin kamaot klia. Fiji Suva Tempol dedikesen i bin wan ples blong haed long hariken ia. Plante taem, taem yumi gotru long ol hariken blong laef, yumi stap witnesem han blong Lod blong protektem yumi blong taem we i no save finis.
Fas dedikesen blong Fiji Suva Tempol long 18 Jun 2000, i bin spesel. Taem tempol i kam kolosap blong finis, grup blong rebel i tekem ol memba blong palamen olsem prisena. Taon blong Suva, Fiji, oli stil long hem mo oli bonem. Ami i putum se olgeta nao bae oli rul.
Olsem Eria Presiden, mi bin go wetem ol fofala stek presiden long Fiji mo mitim ol ami lida long Kwin Elisabet barak. Afta we mifala i eksplenem dedikesen we bae i tekples, oli sapotem be oli wari long sefti blong Presiden Godon B. Hinkli. Oli letem smol dedikesen nomo, no aktiviti aotsaed long tempol olsem konaston seremoni. Oli talem gud se eniwan aotsaed long tempol bae i save stap long denja blong man i atakem hem.
Presiden Hinkli i apruvum wan smol dedikesen sesen wetem niufala tempol presidensi, mo samfala lokol lida; i no gat wan moa oli invaetem from denja we i stap. Be, hem i talem: “Sapos yumi dediketem tempol, bae yumi gat konaston seremoni from se Jisas Kraes i jif konaston, mo hemia i Jos blong Hem.”
Taem mifala i go aotsaed from konaston seremoni, i no bin gat eni man, pikinini media o narawan i stap. Be wan fetful profet i soem strong paoa long tingting mo komitmen we i no muv long Sevya.
Afta, Presiden Hinkli, taem i tokbaot Sevya, i talem: “I no gat wan i ikwol long Hem. I neva bin gat. Bambae i neva gat. Tangkyu long God from presen we i Pikinini blong Hem we Hem i Lavem Tumas, we i givim laef blong Hem blong yumi save laef, mo we i jif konaston we i no save muvmuv blong fet blong yumi mo Jos blong Hem.”
Ol brata mo sista. Mi prea se wanwan long yumi bae i ona long Sevya mo i mekem ol jenis we i nid blong yumi luk yumiwan insaed long ol tabu tempol blong Hem. Taem yumi mekem olsem, yumi save mekem ol tabu stamba tingting blong Hem mo mekem yumi mo famli i rere from evri blesing we Lod mo Jos blong Hem i save givim long laef ia mo taem we i no save finis. Mi talem stret witnes blong mi se Sevya i stap laef. Long nem blong Jisas Kraes, amen.