Hem I Askem Yumi blong Stap Olsem Ol Han blong Hem
Tru seves semmak olsem hemia blong Kraes, i wan we i no selfis mo i lukluk nomo long ol narawan.
“Lavem ol narafalawan semmak olsem we mi lavem yufala.” Ol toktok ia we kwaea i singsing long hem, Jisas nao i talem bifo Hem i mekem bigfala sakrifaes we i pem praes from yumi—wan sakrifaes we Elda Jefri R. Holan i tokbaot se “hem i aksen we i moa hae we i soem klin lav we neva man i bin soem long ful histri blong wol ia.”
Jisas i no bin tijim yumi blong lavem man nomo, be Hem tu, i laef folem tijing blong Hem. Truaot long seves blong Hem, Jisas i bin “mekem ol gudfala samting” mo i askem evriwan blong folem eksampol blong Hem. Hem i tijim: “Man we i wantem sevem laef blong hem, hem bambae i lusum laef blong hem; be man we i lusum laef blong hem from mi, hem bambae i sevem laef blong hem.”
Presiden Tomas S. Monson, we i andastanem mo i stap laef folem toktok ia blong lavem man, i bin talem: “Mi biliv se Sevya i stap talem long yumi se sapos yumi givim yumi fulwan blong givhan long ol narawan, bae i no gat stamba tingting long laef blong yumi. Olgeta we oli stap tingbaot olgetawan nomo, oli no kam antap mo oli lusum laef blong olgeta; be olgeta se oli givim olgeta fulwan blong wok blong ol narawan, oli stap gro mo oli stap kam antap—mo oli stap sevem laef blong olgeta.”
Tru seves we i olsem hemia blong Kraes, i no selfis mo i lukluk nomo long ol narawan. Wan woman we i lukaot gud long hasban blong hem we i handikap i eksplenem: “Yu no tingting long wok blong yu olsem wan hevi samting; tingting long hemia olsem wan janis blong lanem wanem ia, tru lav.”
Taem hem i toktok long BYY divosen, Sista Sontra D. Histon i askem: “?Bae i olsem wanem sapos yumi rili save luk insaed long hat blong wanwan long yumi? ?Bae yumi andastanem gud yumi moa? Sapos yumi filim wanem oli filim, luk wanem oli luk, harem wanem oli harem, ?bae yumi tekem taem blong givhan long ol narawan, bae yumi mekem i defren long olgeta? ?Bae yumi save wet longtaem moa long olgeta, tritim olgeta i kaen moa mo wetem gud fasin?
Sista Histon i serem wan eksperiens long taem we hem i givim seves long Yang Woman kamp. Hem i se:
“Wan long ol fo divosen spika oli tijim mifala abaot ‘fasin blong kam wan man.’ Wan toktok blong hem se: ‘Yu kam wan we i go aot blong save mo givhan long ol narawan—sakem ol mira i go, mo lukluk tru long windo.’
“Blong soem hemia, hem i singaotem wan long ol yang woman, mo askem yang woman ia blong stanap fesem hem. Afta, hem i pulumaot wan mira mo putum bitwin yang woman ia mo hem, blong mekem se hem, spika, i stap lukluk long mira mo semtaem traem toktok wetem yang woman ia. I no wan sapraes we tufala i no save storian gud. Hem i wan gudfala lesen we i soemaot se i had blong toktok mo givim seves long ol narawan sapos yumi wari tumas long yumiwan mo stap luk yumiwan nomo mo nid blong yumi bakegen. Afta, hem i sakem mira long saed, i pulum wan windo frem, mo i putum bitwin fes blong hem mo yang woman ia. Mifala i luksave se yang woman ia, i wan samting nomo we hem i lukluk mo, tru seves, i minim blong lukluk long nid mo filing blong nara man. Plante taem tumas yumi wari long yumiwan mo bisi laef blong yumi—semmak olsem yumi luk long mira mo traem faenem janis blong givhan—mekem se yumi no luk klia gud tru long ol windo blong seves.”
Presiden Monson i mekem yumi stap tingbaot se “raon long yumi, i gat olgeta long nid blong yumi lukluk olgeta, leftemap tingting, sapotem, kamfotem, mo mekem gud olgeta—blong yumi ol memba blong famli, ol fren, o ol strenja.” Hem i se: “Yumi nao ol han blong Lod long wol ia, wetem wok blong givim seves mo blong leftemap ol pikinini blong Hem. Hem i stap dipen long wanwan long yumi.”
Las Jenuware, Friend mo Liahona magasin i invaetem ol pikinini raon long wol blong folem kaonsel blong Presiden Monson—blong stap ol han blong Lod. Oli invaetem ol pikinini blong mekem seves—bigwan mo smolwan. Oli askem olgeta blong raetem han blong olgeta long wan pis pepa, katemaot mo raetem seves we oli bin mekem, mo afta, sendem i go long ol magasin ia. Plante long yufala we i stap lisin tedei, i wan long ol taosen pikinini we i bin mekem wan seves mo sendem i kam.
Taem ol pikinini oli lanem olsem wanem blong lavem mo givim seves long ol man taem oli yangfala, oli stap putum wan paten blong seves i stap blong ful laef blong olgeta. Plante taem, ol pikinini oli tijim yumi we i stap se blong soem lav mo seves, i no nid blong i bigwan, mo flas tumas blong i gat mining mo mekem samting defren i hapen.
Wan Praemeri tija i serem eksampol ia: “Tedei, ol faef mo sikis yia pikinini oli mekem ol lav salusalu. Wanwan pikinini i droem ol pikja long pis pepa: oli droem olgeta, Jisas mo sam memba blong famli mo olgeta we oli laekem. Mifala i mekem sekol mo joenem ol pepa ia blong mekem wan jen we oli kam salusalu. Taem oli stap dro, ol pikinini oli tokbaot ol famli blong olgeta.
Heta i talem: “Mi no ting sista blong mi i lavem mi. Mitufala i faet oltaem. … Mi no laekem miwan tu. Laef blong mi nogud. Mo i haedem fes long han blong hem.
Mi tingting long famli situesen blong hem mo filim se maet hem i gat wan had laef. Be afta we Heta i talem hemia, Alisa, long nara en blong tebol i ansa: ‘Heta, mi stap putum yu long salusalu blong mi, bitwin mi mo Jisas, from se Hem i lavem yu mo mi lavem yu.’
“Taem Ana i talem hemia, Heta i wokbaot fo leg andanit long tebol i go kasem Ana mo i haggem hem.
“Long en blong klas, taem bubuwoman blong hem i kam pikimap hem, Heta i talem: ‘?Yu save wanem bubuwoman? Jisas i lavem mi.’”
Taem yumi go aot wetem lav mo seves, iven long smol wei, hat i jenis, i kam sofsof taem ol narawan oli filim lav blong Lod.
Samtaem, from plante pipol tumas raon long yumi oli nidim help mo givhan long ol trabol, i had blong lukluk long ol bigfala nid.
Ol sista. Sam long yufala i filim se yu stap yusum las paoa blong yu blong lukluk long ol nid blong ol memba blong famli. Tingbaot. Long ol wok ia mo bigbigfala wok ia, “yu stap mekem wok blong God blong yu.”
Sam long yufala i filim emti, mo yu save fulumap ples ia taem yu lukluk raon long ples yu slip long hem, o long komuniti blong kasem janis blong helpem trabol blong wan man.
Yumi evriwan i save yusum sam seves long evri dei laef blong yumi. Yumi laef long wol blong raorao. Yumi givim seves taem yumi no poenem fingga long man, taem yumi no tokbaot man, taem yumi no stap jajem man, taem yumi smael, taem yumi talem tangkyu, mo taem yumi wet longtaem mo stap kaen.
Ol nara kaen seves oli tekem taem, gudfala plan, mo moa paoa. Be i inaf blong yumi wok from. Maet yumi save stat blong askem yumiwan ol kwestin ia:
-
?Huia raon long mi bae mi save helpem tedei?
-
?Wanem taem mo risos nao mi gat i stap?
-
?Long wanem wei nao mi save yusum ol tale mo skil blong mi blong blesem ol narawan?
-
?Wanem nao bae yumi mekem olsem wan famli?
Presiden Dita F. Ukdof i tijim:
“Yu mas mekem wanem we ol disaepol blong Kraes oli bin mekem long evri dispensesen; toktok tugeta, yusum evri risos we i stap, lukaotem insperesen blong Tabu Spirit, askem Lod blong i konfemem, mo afta, pulum han blong sot i go antap mo go wok.
“Mi promesem yufala. Sapos yufala i folem paten ia, bae yufala i kasem stret wei we i kam long Lod long saed blong hu, wanem, wetaem mo weaples blong mekem samting long wei blong Lod.
Taem mi askem miwan se bae i olsem wanem taem Sevya i kam bakegen, mi tingting long visit blong Hem i go long ol man blong Nifae taem hem i askem:
“Yufala i gat eniwan we i sik long medel blong yufala? Karem olgeta i kam long ples ia. Yufala i gat eniwan we bodi blong olgeta i nogud, o oli blaen, o we leg blong olgeta i nogud, o we i handikap, o we i gat leprosi, o we haf bodi blong olgeta i ded, o we sora blong olgeta i fas, o we oli gat hadtaem long eni fasin? Karem olgeta i kam long ples ia mo bae mi mekem olgeta i oraet, from mi mi gat sore long yufala; ol insaed blong mi i fulap wetem sore. …
“… [Sevya] i bin mekem olgeta evriwan i kam oraet”
Be naoia i stap, Hem i askem yumi blong stap olsem ol han blong Hem.
Mi kam blong save se hem i lav we God mo neiba i gat we i givim mining long laef. Bae yumi folem eksampol blong Sevya mo folem toktok blong Hem blong go aot long ol narawan wetem lav.
Mi testifae se promes blong Presiden Henri B. Aering i tru, se, “sapos yumi yusum ol talen blong yumi blong givhan long wan narawan, bae yumi filim lav we Lod i gat long man o woman ia. Mo tu, bae yumi filim lav we Hem i gat long yumi.” Long nem blong Jisas Kraes, amen.