Wan Tabu Tras
Presen ia we i spesel tumas we i prishud paoa, i tekem wetem hem wan tabu responsabiliti, be tu, ol spesel blesing blong yumiwan mo blong ol narawan.
Ol brata we mi laekem. Mi prea se Spirit i lidim toktok blong mi long tedei. I gat wan tred we i joenem yumi tugeta. Oli trastem yumi blong tekem prishud blong God mo blong tekem aksen long nem blong Hem. Yumi kasem wan tabu tras. God i wet se bae yumi mekem fulap samting.
Yumi ridim long Doktrin mo Ol Kavenan, seksen 121, ves 36: “Se ol raet blong prishud, oli joen nomo long ol paoa blong heven be oli no save seperet.” I wan gudfala presen tumas yumi we Hem i bin givim yumi. Responsabiliti blong yumi i blong lukaotem mo protektem prishud ia mo blong stap klin inaf from evri blesing blong glori we Papa we i stap long Heven i gat blong yumi—mo blong ol narawan, tru long yumi.
Long weaples yu go, prishud i go wetem yu. ?Yu yu stap stanap long ol tabu ples? Bifo yu putum yuwan mo prishud blong yu long denja mo stap go long ol ples, o tekpat long ol aktiviti we oli no naf long yu o prishud ia, stop smol taem blong tingting long risal blong hem. Tingbaot huia yu mo wanem God i wantem yu mekem. Yu wan pikinini blong Promes. Yu yu wan man we i gat paoa. Yu yu wan boe blong God.
Presen ia we i spesel tumas we i prishud paoa, i tekem wetem hem wan tabu responsabiliti, be tu, ol spesel blesing blong yumiwan mo blong ol narawan. Bae yumi, long wanem ples we yumi stap long hem, oltaem stap klin inaf blong singaotem paoa blong hem, from yumi neva save taem blong nid blong yumi, mo janis blong save kam.
Long taem blong Wol Wo 2, wan fren blong mi i stap long misin long Saot Pasifik taem we plen i draon ova long bigfala solwota. Hem mo tim blong hem, i gat sakses, mo taem oli stap long plen we i stap bon long faea, oli jiam long parasut, openem laef raf, mo hang long ol raf ia blong trifala dei.
Long nambatri dei, oli luk wanem we oli save se i wan sip blong sevem olgeta. Long nekis moning, i pas i go narasaed. Oli stat blong lusum hop taem oli luk se hemia i las dei we sip blong sevem olgeta bae i stap long eria ia.
Nao Tabu Spirit i toktok long fren blong mi: “Yu gat prishud. Givim oda long ol man blong sevem man blong pikimap yu.”
Hem i mekem olsem hem i harem: “Long nem blong Jisas Kraes, mo tru long paoa blong prishud, tanem raon mo pikimap mifala.”
Long smol taem, sip i stap long saed blong olgeta, i helpem olgeta antap long sip. Wan fetful man blong prishud we i klin inaf, i yusum prishud ia, i blesem laef blong hem mo laef blong ol narawan.
Bae yumi mekem tingting, long ples ia mo naoia, blong stap rere oltaem from taem mo nid blong yumi, taem blong seves blong yumi.
Taem yumi stap endem jeneral prishud miting ia, mi talem long yufala se “yufala i wan jeneresen we God i jusum, wan tabu prishud.”(Fas Pita 2:9). Bae yumi stap klin inaf blong haggem yumi, mi prea olsem long nem blong Jisas Kraes, amen.