Tabu Ples Blong Restoresen
Palmira hem i ples blong Restoresen, ples we oli harem voes blong Papa kolosap tu milian yia i pas.
Wan gud fren blong mi we hem i wan memba blong Jos i bin traem blong, plante yia, blong tijim mi gospel blong famli we i no save finis. Be i no kasem taem we mi bin atendem Sao Paolo Tempol open haos long Oktoba 1978, taem we mi go insaed long rum blong sil, doktrin ia blong famli we i no save finis i kam insaed long hat blong mi, mo blong plante dei mi bin pre blong save sapos hemia i tru Jos.
Mi no bin stap go long jos tumas be mi bin groap wetem papa mo mama we oli bin stap go plante long jos mo mi bin luk sam gud samting long ol nara relijin. Long taem ia, mi ting se God i akseptem evri jos.
Afta long fas visit blong mi long tempol open haos, mi bin lukaotem wan ansa, wetem fet mo wan strong tingting se bae God i ansarem mi, wij wan nao hem i Jos blong Hem long wol ia.
Afta we mi faet wetem plante tingting long saed blong spirit, mi bin kasem wan klia ansa, mo mi kasem invitesen blong kasem baptaes, we i tek ples long Oktoba 31, 1978, wan naet bifo dedikesen blong Sao Paolo Tempol.
Mi bin luksave se Lod i save mo lavem mi tumas blong save ansarem ol pre blong mi.
Long nekis moning, waef blong mi mo mi i bin go long Sao Paolo blong atendem wan dedikesen sesen blong tempol.
Mitufala i stap long we, be mi no save yet mining blong naesfala janis ia we mitufala i gat. Long nekis dei mitufala i atendem wan eria konfrens.
Mifala i statem laef blong mifala olsem ol memba blong Jos, mo mitufala i faenem ol gudfala fren we oli welkamem mifala long taem ia we laef blong mifala i stat blong jenis.
Ol klas blong ol niufala memba we mitufala i tekpat long hem long Sandei miting evri wik, oli naes tumas. Oli givim plante save long mitufala mo i mekem se mifala i wantem se bae wik i finis kwik blong mifala i save go bak bakegen blong kasem sam moa kakae long saed blong spirit.
Waef blong mi mo mi i luk fored blong go insaed long tempol mo silim famli blong mifala blong taem we i no save finis. Hemia i happen afta wan yia mo seven dei afta long baptaes blong mi, hem i wan gudfala taem. Mi bin filim olsem we mi stap insaed finis long taem ia we i no save finis.
Mi bin stap laef long Is Kos blong Yunaeted Stets blong sam yia, olsem we loa i letem mi, mo mi bin save gud ol siti long we, plante oli smolsmol nomo.
Taem mi stap ridim o harem abaot wanem we i bin stap happen bifo Fas visen, oli tokbaot ol grup blong ol man, mo mi konfius long hemia.
Ol kwestin i stat blong kam long maen blong mi. ?From wanem nao Jos i mas kambak long Yunaeted Stets be i no long Brasil o Itali, graon blong ol bubu blong mi?
?Wea nao grup blong ol man we oli stap tokbaot ia, olgeta ia we oli karem ol narafala relijin i kam mo stap konfius long ol relijin—ol samting ia oli stap hapen long wan pisful mo kwaet ples olsem?
Mi bin askem samting ia long plante man finis be mi no kasem wan ansa. Mi bin ridim evri samting ia long lanwis blong Potugal mo bakegen long Inglis be mi no faenem wan samting we i mekem mi harem gud. Mo mi gohed blong lukaotem.
Long Oktoba 1984, mi atendem wan jeneral konfrens olsem wan kaonsela long stek presidensi. Afta long hem, mi bin go miwan long Palmira, mi wantem tumas blong faenem wan ansa.
Taem mi kasem long we, mi traem blong andastanem, ?from wanem nao Restoresen i mas hapen long ples ia?, ?from wanem i gat tumas konfius? ?ol man ia oli kam wea?. ?From wanem long we?
Long taem ia, ansa we mi ting se i stret hem i from we Konstitusen blong Y.S i givim raet.
Long moning ia mi bin visitim Krandin Bilding, ples we oli printim fas Buk Blong Momon. Mi bin go long Tabu Bus, mi bin pre plante long we.
I no gat man nating long ol rod blong smol taon ia. ?Wea nao ol grup blong ol ma we Josef i bin tokbaot?
Long aftenun ia mi disaed blong go long fam blong Pita Witma mo taem mi go long we mi faenem wan olfala man we i stap sidaon long windo blong wan smol haos. Ae blong hem i saen. Mi talem alo long hem mo stat blong askem ol semak kwestin ia.
Hem i askem long mi, “?Yu gat smol taem?” Mi talem yes,
Hem i eksplenem se ol Lek Eri mo Ontario mo, i go moa daon, Riva Hadson oli stap long eria ia.
Long stat blong ol yia 1800, olgeta i disaed blong bildim wan pasis, we bae pas tru long eria ia, bae i longfala kasem 300 mael (480 km) blong kasem Hadsen Riva. Hem i wan bigfala bisnis long taem ia, mo oli dipen nomo long paoa blong ol man mo animol blong mekem wok ia.
Palmira hem i senta blong sam long ol konstraksen wok ia. Ol bilda oli nidim ol man we oli gat skil, ol man blong fiksim samting, ol famli, mo ol fren blong olgeta. Plante man long ol taon kolosap mo long we, oli stat blong kam, blong wok long pasis ia.
Hem i wan taem we spirit i strong from se mi jes faenem grup blong ol man ia nao. Oli bin kam wetem ol kastom mo bilif blong olgeta. Taem hem i tokbaot bilif blong olgeta, tingting blong mi i open mo God i openem ol ae blong mi long ol samting long saed blong spirit.
Long taem ia mi andastanem olsem wanem han blong God, Papa blong yumi, long bigfala waes blong hem, i bin rere long wan ples insaed long plan blong Hem, blong karem yangfala Josef Smit i kam mo putum hem long medel blong ol defren relijin ia, from se long we, long Kumora, oli bin haedem ol plet blong Buk Blong Momon.
Hemia hem i taem blong Restoresen, ples we tu taosen yia i pas oli bin harem voes blong Papa, long wan naesfala visen, i toktok long smol boe ia Josef Smit, taem hem i go long Tabu Bus blong pre mo i harem: “Hemia boe blong mi we mi lavem. !Lesen long Hem!”
Long we hem i bin luk tu Man, we laet mo glori blong tufala i bitim eni narafala. Yes, God i soemaot Hemwan long man bakegen. Tudak we i kavremap wol ia i stat blong lus.
Ol profesi blong Restoresen i stat blong fulfil. “Nao mi luk we wan nara i stap flae antap long skae, i stap talemaot gud niu ia we i blong stap oltaem nomo, gogo i no save finis. Enjel ia i stap talemaot gud nius ia long olgeta man long wol, long olgeta blong evri kala, mo kantri, mo laen mo lanwis.”
Long smol taem nomo Josef i bin kasem ol rekod blong ol profesi, ol kavenan, mo ol odinens we ol profet blong bifo oli bin livim biaen, Buk Blong Momon we yumi lavem tumas.
Jos blong Jisas Kraes bae i no save kam bak long wol ia sapos i nogat gospel blong taem we i no save finis, we i stap insaed long Buk blong Momon olsem wan narafala testemoni blong Jisas Kraes, iven Pikinini Boe blong God, Smol Sipsip blong God, we i karemaot ol sin blong wol
Kraes i talem long ol man blong Hem long Jerusalem:
“Mo mi gat ol narafala sipsip bakegen we oli no blong yad ia.”
“Mi nao gudfala man ya blong lukaot sipsip. Olsem we Papa blong mi i save mi, mo mi mi save hem, oraet long sem fasin, mi mi save ol sipsip blong mi, mo ol sipsip blong mi oli save mi.”
Taem mi stap lego fam blong Witma, mi nomo tingbaot se mi bin talem tata. Mi tingbaot nomo se wota blong ae i bin foldaon long fes blong mi. San i bin stap go daon long skae we i naes tumas.
Insaed long hat blong mi i gat bigfala glad mo pis we i mekem sol blong mi harem gud. Mi fulap wetem tangkyu.
Naoia mi luksave from wanem. Wan moa taem bakegen, Lod i givim mi save mo laet.
Taem mi stap go bak hom, ol skripja i gohed blong kam insaed long maen blong mi. Ol promes we oli bin mekem wetem Papa Ebraham se tru long sid blong hem, bae evri famli long wol i kasem blesing.
Mo from hemia, bae oli bildim ol tempol blong tabu paoa ia i save kam long ol man long wol ia bakegen blong ol famli oli save stap wan, i no kasem taem we ded bae seraotem, be blong taem we i no save finis.
“Olgeta, i gat taem i stap kam we hil *ya we haos* blong mi i stap long hem bambae i kam hae moa bitim ol narafala hil. Mo ol man blong ol narafala kantri bambae oli save wokbaot blong kam long hem.”
Sapos yu stap lesen long mi mo yu gat sam kwestin long hat blong yu, !no givap!
Mi invaetem yu blong folem eksampol blong Profet Josef Smit taem hem i ridim Jemes 1:5 “Sapos wan long yufala i no gat waes, hem i mas askem long God …we hem i stap givim samting long man long gladhat blong hem.”
Wanem we i hapen long Kumora hem i wan impoten pat blong Restoresen, taem Josef Smit i bin kasem ol plet we Buk blong Momon i stap insaed long hem. Buk ia i helpem yumi blong kam kolosap moa long Kraes bitim eni narafala buk long wol ia.
Mi talemaot witnes blong mi se Lod i bin singaotem ol profet, ol sia, mo ol reveleta blong gaedem kingdom blong Hem long ol las dei ia mo long plan blong Hem we i no save finis, we oli famli bae oli stap tugeta foreva. Hem i stap kea from ol pikinini blong Hem mo i stap ansarem ol prea blong yumi.
From bigfala lav blong Hem, Jisas Kraes i pem praes blong ol sin blong yumi. Hem i Sevya blong wol. Mi testifae long hemia long nem blong Jisas Kraes, amen.