Praes blong Prishud Paoa
I Kam long Presiden Rasel M. Nelson
Presiden blong Kworom blong Olgeta Twelef Aposol
?Weswe? ?Yumi, yumi wantem blong prea, livim kakae, stadi, luklukgud, wosip mo givim seves olsem ol man blong God blong mekem se yumi save gat kaen prishud paoa ia?
Sikis manis i pas, long Oktoba 2015 jeneral konfrens, mi bin toktok long ol sista blong Jos abaot tabu wok blong olgeta olsem ol woman blong God. Naoia, mi wantem toktok long yufala, ol brata, abaot tabu wok blong yufala olsem ol man blong God. Taem mi stap travel raon long wol, mi glad tumas long paoa mo klin gud wok blong ol man mo ol boe blong Jos ia. I no gat wei nomo blong kaontem hamas hat we yufala i hilim mo hamas laef yufala i leftemap. !Tangkyu!
Long las konfrens mesej blong mi, mi tokbaot nogud eksperiens blong mi plante yia i pas, taem we, olsem dokta blong hat, mi no save sevem laef blong tu smol sista. Wetem raet blong papa blong tufala, mi wantem tokbaot moa abaot famli ia.
Sik blong hat i kasem trifala pikinini blong Rut mo Jimi Hatfil. Fas boe blong tufala, Jimi Senia i ded we mifala i no save stret from wanem. Mi kam long laef blong olgeta taem papa mo mama i lukaotem help from tufala gel blong tufala, Loral An mo yangfala sista blong hem, Gei Lin. Hat blong mi i brok taem tufala gel i ded afta we mi operetem tufala.1 I klia tu se Rut mo Jimi, tufala i harem nogud long spirit.
Wetem taem, mi lanem se tufala i holem filing blong agensem mi mo Jos. Blong kolosap siksti yia, situesen ia i trabolem mi, mo mi krae sore from famli Hatfil. Mi bin traem plante taem blong kontaktem olgeta, be nogat.
Long wan naet, long las manis Mei, mi wekap; tufala gel long narasaed long vel i wekemap mi. Mi no bin luk tufala o harem tufala wetem pat blong bodi blong mi, be mi filim se tufala i stap. Long spirit, mi harem tufala i plis long mi. Mesej i sot mo klia: “Brata Nelson, !mitufala i no sil long eniwan yet! ?Yu save helpem mitufala?” I no longtaem afta, mi lanem se mama blong tufala i ded, be papa mo yangfala brata, tufala i laef i stap yet.
Wetem insperesen blong ol toktok blong Lorol An mo Gay Lin, mi traem kontaktem papa blong tufala bakegen, we mi kasem toktok se hem i stap wetem boe blong hem, Son. Nao, tufala i glad blong mitim mi.
Long manis Jun, mi nildaon long fored blong Jimi, we i gat 88 yia nao, mo mi toktok hat i fesem hat wetem hem. Mi tokbaot krae blong tufala gel blong hem mo talem hem se bae mi gat ona blong mekem siling odinens blong famli ia. Mi eksplenem tu se bae i tekem taem mo plante wok long hem mo Son blong rere mo stap klin inaf blong go long tempol, from i no gat wan long tufala we i endao.
Spirit blong Lod i strong long miting ia. Mo taem Jimi mo Son, tufala i talem yes, !glad blong mi bigwan tumas! Tufala i bin wok had wetem stek presiden blong tufala, wetem bisop, hom tija mo wod misin lida, mo tu, ol yang misinari mo wan senia misinari kapol. Mo afta, i no longtaem i pas, long Peison Yuta Tempol, mi bin gat bigfala janis blong silim Rut long Jimi, mo tufala long ol fofala pikinini blong olgeta. Wendi mo mi i krae taem mifala i tekpat long gudfala eksperiens ia. !Plante hat i kam oraet long dei ia!
Taem mi tingtingbak, mi glad tumas long Jimi mo Son mo wanem tufala i glad blong mekem. Tufala i kam hiro long mi. Sapos tingting blong hat blong mi i save kamtru, i blong wanwan man mo yang man insaed long Jos ia bae i soem strong paoa long tingting, paoa long bodi, mo tingting i stap daon we papa mo pikinini ia, tufala i bin soem. Tufala i glad blong fogiv mo lego fogud ol olfala harem nogud, mo fasin. Tufala i glad blong folem kaonsel blong prishud lida blong tufala blong mekem se Atonmen blong Jisas Kraes i save mekem tufala i kam klin mo kam antap. Wanwan i bin glad blong kam wan man we i klin inaf blong tekem prishud folem oda blong God we i moa tabu long evriwan.2
Blongtekem, i minim blong karem hevi wok blong wanem oli stap holem. Hem i wan tabu tras blong tekem prishud, we i olgeta paoa mo atoriti blong God. Tingting long hemia: prishud we oli pasem long yumi i semmak paoa mo atoriti we God i yusum blong krietem wol ia mo ol nara wol, blong rulum ol heven mo wol, mo blong mekem ol pikinini blong Hem we oli stap obei oli kam olsem wan god.3
I no longtaem i pas, Wendi mo mi i stap long wan miting we man we i plei piano i rere i stap, i rere blong plei piano long fas hym. Ae blong hem i stap long miusik, fingga blong hem long ol ki. Hem i stat prestem ki, be i no gat saon. Mi talem slo long Wendi, “Paoa i no gat.” Mi talem se i gat wan samting we i stopem lektrik paoa blong kasem piano.
Ol brata. I semmak. Mi fraet se i gat plante man tumas we oli givimatoriti blong prishud long olgeta, be oli no gat prishud paoa from se paoa i stop samples from fasin blong stap les, no stap ones, gat hae tingting, gat o mekem rabis samting, o stap wari tumas from ol samting blong wol.
Mi fraet se i gat tumas man we i kasem prishud we oli mekem smol wok nomo o no gat wok nating blong developem paoa blong kasem ol paoa blong heven. Mi wari long evriwan we oli no klin long tingting blong olgeta, filing o aksen blong olgeta, o oli daonem waef o pikinini blong olgeta, nao oli katemaot paoa blong prishud.
Mi fraet se plante tumas oli salem fridom blong joes blong olgeta long enemi, mo oli stap talem tru long aksen blong olgeta: “Mi kea moa blong lukluk long wanem mi wantem bitim blong tekem paoa blong Sevya blong blesem ol narawan.”
Mi fraet, ol brata, se sam long yumi, wan dei bae oli wekap mo luksave wanem nao stret paoa long prishud, mo fesem bigfala rigret se oli stap spendem plante taem tumas blong lukaotem blong gat paoa ova long ol narawan, o paoa long wok, be i no blong lanem blong praktisim fulwan paoa ia blong God.4 Presiden Joj Albert Smit i tijim se : “yumi no stap ia blong westem ol aoa blong laef ia, mo afta, pas i go long wan wol blong kam olsem wan god; be yumi stap ia blong yumi kwalifae, dei afta dei, from ol posisen we Papa i wantem luk yumi stap long olgeta.”5
?From wanem nao wan man bae i westem dei blong hem mo agri blong kakae supsup6 blong Esao taem we oli trastem hem se hem i gat paoa blong kasem evriwan long ol blesing blong Ebraham?7
Mi askem strong long wanwan long yufala blong laef long level blong ol spesel janis we yufala i gat olsem man we i kasem prishud. Long wan dei we i stap kam, oli olman ia nomo we oli bin tingting strong long prishud blong olgeta, mo oli bin wok strong blong lukaotem se Lod Hemwan i tijim olgeta, olgeta nao, bae oli save blesem, lidim, protektem, mekem i kam strong, mo hilim ol narafala man. Wan man nomo i bin pem praes from prishud paoa, mo bae Hem i save mekem ol merikel oli hapen long olgeta we Hem i lavem, mo i stap holemtaet mared mo famli blong hem i sef, naoia mo long taem we i no save finis.
?Wanem nao praes blong developem kaen paoa ia? Senia Aposol blong Sevya, Pita—semfala Pita we, wetem Jemes mo Jon, oli bin pasem Melkesedek Prishud long Josef Smit mo Oliva Kaodri8—i talemaot ol kwaliti we yumi sapos blong lukaotem blong stap pat blong tabu fasin.9
Hem i talem, fet, klin fasin, save, save gat kontrol, save wet, kaen fasin olsem wetem wan brata, jareti, mo strong fasin blong wok.10 !Mo no fogetem tingting i stap daon!11 Mekem se mi askem, ?hao nao bae ol memba blong famli, ol fren, ol wokfren bae oli talem se mi mo yu i stap mekem blong developem olgeta ia mo samfala presen long spirit?12 Moa ol fasin ia oli kam antap, moa bae prishud paoa blong yumi bae i kam bigwan.
?Olsem wanem yumi save mekem paoa long prishud i kam antap moa? Yumi nid blong prea wetem hat blong yumi. Blong tokbaot ol aktiviti we i pas o stap kam antap, mo long en askem samfala blesing, i no save stap olsem kaen toktok wetem God we bae i tekem paoa we i stap oltaem. ?Yu yu glad blong prea blong save hao blong prea from moa paoa? Lod bae i tijim yu.
?Yu yu wantem luklukgud long ol skripja mo kakae gud long ol toktok blong Kraes? 13—?blong stadi strong blong save gat moa paoa? !Sapos yu wantem tajem hat blong waef blong yu, bae yu letem hem i faenem yu long Intanet we yu stap stadi long doktrin blong Kraes14, o stap ridim ol skripja blong yu!
?Yu yu wantem wosip insaed long tempol oltaem? Lod i laekem blong stap tij insaed long tabu haos blong Hem. Traem tingting hamas bae Hem i glad sapos yu askem Hem blong tijim yu abaot ol prishud ki, atoriti mo paoa blong yu stap gotru long ol odinens blong Melkesedek Prishud insaed long tempol.15 Traem tingting hamas moa paoa blong prishud bae i blong yu.
?Yu yu glad blong folem eksampol blong Presiden Tomas S. Monson blong stap givim seves long ol narawan? Blong plante yia hem i tekem longfala rod i go hom, i stap folem ol kwaet toktok blong Spirit blong kasem doa blong haos blong wan, mo harem toktok olsem: “?Hao nao yu save se aniveseri blong ded blong gel blong mifala?” o “?Hao nao yu save se i betdei blong mi?” Mo sapos i tru se yu wantem moa prishud paoa, bae yu lukaotgud mo kea long waef blong yu, akseptem tugeta, hem mo advaes blong hem.
Nao. Sapos evri samting ia, yu luk se i tumas, plis tingting hamas nao bae rilesensip blong yumi wetem waef, pikinini mo fren long wok bae i defren sapos yumi stap wari fulap blong kasem moa prishud paoa semmak olsem yumi stap wari blong progres long wok, o mekem balens blong bank akaon i go antap. Sapos yumi putum tingting blong yumi i stap daon long fored blong Lod, mo askem Hem blong tijim yumi, bae Hem i soem long yumi olsem wanem blongyumisave yusum paoa blong Hem plante moa.
Long ol las dei ia, yumi save se bae i gat graon i seksek long ol defren ples.16 Maet wan long ol ples ia, i stret hom blong yumi, we graon i seksek long saed blong filing, faenens, o spirit. Paoa blong prishud i save mekem solwota i kwaet mo sarem ol hol long graon. Prishud paoa i save mekem ol maen oli kam kwaet mo i save sarem soa long hat blong olgeta we yumi lavem.
?Yumi, yumi wantem blong prea, livim kakae, stadi, luklukgud, wosip mo givim seves olsem ol man blong God blong mekem se yumi save gat kaen prishud paoa ia? From se tu smol gel i wantem tumas blong sil wetem famli blong tufala, papa mo brata blong tufala i glad blong pem praes blong kasem mo tekem tabu Melkesedek Prishud.
Ol dia brata blong mi. Oli givim wan tabu samting blong yumi tekem—atoriti blong God blong blesem ol narawan. Bae wanwan long yumi i girap olsem wan man blong God we oli bin odenem finis yumi long hem—yumi rere blong tekem prishud blong God wetem strong paoa, we yumi wantem tumas blong pem eni praes we i nid blong mekem paoa long prishud blong yumi i kam bigwan moa. Wetem paoa ia, yumi save help blong mekem wol i rere from Seken Kaming blong Sevya blong yumi, Jisas Kraes. Hemia i Jos blong Hem, we profet blong Hem tedei i lidim, we i Presiden Tomas S. Monson we mi lavem mo sastenem. Mi testifae olsem long nem blong Jisas Kraes, amen.