Go Sevem Man: Yumi Save Mekem
Lod i givim evri tul we i nid blong yumi go sevem ol fren blong yumi we oli lesaktiv mo ol fren blong yumi we oli no memba.
Sevya i andastanem klia misin blong Hem blong sevem evriwan long ol pikinini blong Papa long Heven, from hem i talem:
“Mo mi mi Pikinini blong Man, mi kam blong sevem olgeta we oli lus.
“Papa blong yufala long heven, hem i no wantem we bambae wan long ol pikinini ia i lus.”
Enjel mama blong mi, Jasmin Benion Arnold, i andastanem klia rol blong hem blong help long wok blong God blong sevem ol sipsip we oli gat kil mo oli lus, we insaed long grup ia, i gat ol pikinini mo ol apupikinini blong hem bakegen. Ol bubu oli gat impoten pat blong plei insaed long laef blong ol apupikinini.
Plante taem, oli stap putum mama blong mi i visitim olgeta we oli traehad wetem bilif blong olgeta, olgeta lesaktiv mo haf memba famli; be, grup blong sipsip blong hem i gat olgeta i no pat blong lis. Plante taem, hem i stap visit moa long wan taem long manis, mo long kwaet fasin, i stap lukaot long ol sikman, i givim lav mo toktok blong leftemap tingting. Long ol las manis blong laef blong Mama, hem i no save aot long hom, mekem se hem i spendem plante aoa blong raetem ol leta long olgeta, i talem lav blong hem, i serem testemoni, mo i leftemap tingting blong olgeta we oli kam visit.
Taem yumi stap go sevem man, God i givim yumi paoa, gud toktok mo ol blesing. Taem Hem i givim oda long Moses blong sevem ol pikinini blong Isrel, Moses i fraet, semmak olsem plante long yumi i stap fraet. Moses i talem sore, i se: “Mi mi no man long givim gudfala toktok, … Taem mi traem toktok long fes blong ol haeman, be mi no save toktok gud.”
Lod i talem gud bakegen long Moses:
“?Hu i mekem maot blong man? !Mi mi Hae God!
“!Yu go naoia! Bambae mi mi givhan long yu long toktok blong yu, mo bambae mi talem long yu wanem we yu yu mas talemaot.”
Long nara wei, Lod i talem long Moses: “!Yu save mekem!” ?Mo yufala i save wanem? !Yumi tu i save mekem!
Bae mi serem fofala prinsipol we bae i help long wok blong sevem man.
Prinsipol 1: Yumi No Mas Pusumbak Wok blong Sevem Man
Elda Alejandro Patania, wan foma Eria Seventi, i talem stori blong smol brata blong hem, Daniel, we i go aot long solwota blong go pulum fis wetem tim blong hem. Afta smol taem, Daniel i kasem strong woning se bigfala win i stap kam kwiktaem. Wantaem nomo, Daniel mo tim blong hem oli tanem bak i go long wof.
Taem win ia i stap kam strong moa, enjin blong wan fising bot i nomo wok. Tim blong Daniel i hukum wan rop long bot ia mo stat pulum i go long sef ples. Oli toktok long redio mo askem help, from oli save se, wetem strong win we i stap kam, bae oli nidim kwik help.
Taem famli i wari mo wet, ol ripresentativ blong patrol, asosiesen blong ol fisaman, mo ami blong solwota oli mit blong tokbaot bes wei blong help. Sam, oli wantem aot naoia, be oli talem long olgeta: wet long plan. Olgeta insaed long strong win oli askem help, ol ripresentativ oli gohed blong miting, oli traem agri long stret fasin blong wok mo agri long wan plan.
Taem oli oganaesem grup blong go givhan, wan las singaot i kam. Strong win i brekem rop bitwin tufala sip, mo tim blong Daniel i stap gobak blong luk sapos oli save sevem ol fren blong olgeta. Long en, tufala sip i draon, mo ol wokman blong sip, wetem brata blong Elda Patania, Daniel, evriwan oli lus, oli ded.
Elda Patania i komperem prapa nogud taem ia long strong tok blong Lod taem Hem i talem se: “Olgeta we oli no strong, be yufala i no stap lukaot gud long olgeta … olgeta we oli mestem rod, mo olgeta we oli lus, neva yufala i go lukaot long olgeta blong oli kambak … be mi bambae mi jajem yufala evriwan.”
Elda Patania i eksplenem se, nomata yumi mas oganaes long ol kaonsel, kworom, okseleri mo iven wanwan man o woman, yumi no mas wet longtaem tumas blong go sevem man. Samtaem, plante wik i pas taem be yumi stap tokbaot yet hao blong helpem ol famli, wanwan man, woman, we oli stap long spesel nid. Yumi toktok raon long huia bae yumi go visitim mo hao blong go visit. Be, ol brata mo sista we oli lus, oli gohed blong stap long nid mo samtaem oli iven stap singaot mo plis blong kasem help. Yumi no mas wet longtaem o stap pusumbak taem.
Prinsipol 2: Yumi Neva Mas Givap
Presiden Tomas S. Monson, we i singaot finis blong go sevem man, i se: “Ol memba blong yumi, oli mas save se i neva let tumas taem yumi stap tokbaot ol lesaktiv memba blong yumi we yumi ting se i no nid nomo blong traehad from olgeta.”
Olsem plante long yufala, sam we mi bin serem gospel wetem olgeta bae oli baptaes i no longtaem o oli jes kambak long jos mo sam narafala bakegen moa—olsem fren blong mi, Tim mo lesaktiv waef blong hem, Sarlen— we i tekem moa taem.
Blong moa long 25 yia, mi storian abaot gospel long Tim, mo tekem Tim mo Sarlen i go long ol open haos blong tempol. Ol narawan oli joen long wok blong sevem tufala, be Tim i no akseptem invitesen blong toktok wetem ol misinari.
Wan wiken, oli givim wok long mi blong mi prisaed long wan stek konfrens. Mi bin askem stek presiden blong livim kakae mo prea se bae mi visitim hu. Mi sek taem hem i talem nem blong fren blong mi, Tim. Taem bisop blong Tim, we i stek presiden, mo mi i noknok long doa, Tim i openem doa, i lukluk mi, i lukluk bisop, mo i talem: “!Bisop, mi ting se yu talem se bae yu kam wetem wan spesel man!”
Nao Tim i laf mo talem: “Kam insaed Mev.” Wan merikel i hapen long dei ia. Tim i baptaes finis naoia, mo hem mo Sarlen i sil finis long tempol. Yumi neva mas givap.
Prinsipol 3: Bambae Glad blong Yu I Bigwan Sapos Yu Tekem Wan Sol Nomo I Kam long Kraes
Plante yia i pas, long wan jeneral konfrens, mi tokbaot olsem wanem Rose de Susa Markes i andastanem ol toktok blong Sevya we i talem se : “Mo sapos eni man, long medel blong yufala, i strong long Spirit, hem i mas tekem wetem hem, … blong hem tu, i kam strong.”
Brata Markes i save nem blong evri sipsip insaed long pris kworom blong hem mo luksave se Fernando i no stap. Hem i lukaotem Fernando long haos blong hem, afta i go lukaotem hem long haos blong wan fren, mo i go tu long solwota.
Nao i faenem Fernando we i serf long solwota. Hem i no wet se sip i draon, olsem long stori blong Daniel. Wantaem hem i go insaed long wota blong sevem sipsip blong hem we i lus, i tekem hem i gobak hom, i glad.
Afta, tru long fasin blong tij oltaem, hem i meksua se Fernando i neva aot long grup bakegen.
Bae mi talem yufala wanem i hapen afta we oli sevem Fernando, mo mi serem glad we i kam blong sevem wan sipsip we i lus. Fernando i maredem switat blong hem, Maraea, long tempol. Naoia, tufala i gat 5 pikinini mo 13 apupikinini, evriwan oli aktiv long Jos. Plante nara famli mo famli blong olgeta oli kam joenem Jos tu. Tugeta, oli sendem plante taosen nem blong ol bubu i go kasem tempol odinens, mo ol blesing oli stap gohed blong kam nomo.
Fernando i stap naoia olsem bisop blong nambatri taem, mo hem i gohed blong sevem man, semmak olsem we oli bin sevem hem. Hem i bin serem i no longtaem: “Long wod blong mifala, mifala i gat 32 aktiv yang man blong Aronik Prishud, 21 long olgeta, oli sevem olgeta long ol las 18 manis.” Olsem wanwan man, woman, famli, kworom, okseleri, klas, mo hom mo visiting tija, !yumi save mekem hemia!
Prinsipol 4: Nomata Yia blong Yumi, God I Singaotem Yumi blong Sevem Man
Presiden Henri B. Aering i se: “Nomata wanem yia, paoa, Jos koling, o ples blong yu, God i singaotem yumi olsem wan pipol blong wok blong helpem Sevya blong pikimap ol sol kasem taem Hem i kambak bakegen.”
Evri dei, plante moa pikinini blong yumi, ol yut, ol yang singgel adalt mo ol adalt memba blong yumi nomata oli gat hamas yia, oli stap mekem folem singaot blong Sevya blong go sevem man. !Tangkyu long hadwok blong yufala! Bae mi serem sam eksampol:
Emi, we i gat 7 yia, i invaetem fren blong hem Ariana mo famli blong hem long yia Praemeri sakramen miting program. Sam manis afta, Ariana mo famli blong hem i kasem baptaes.
Alan, wan yang singgel adalt i filim insperesen blong serem ol Jos video, Ol Momon Mesej, mo ol ves blong skripja wetem evri fren blong hem mo yusum sosol media.
Sista Rivs i stat blong serem gospel wetem wanwan wokman blong salem samting tru long telefon we i bin stap ringim hem.
Jemes i invaetem fren blong hem we i no memba, Sen, long baptaes blong gel blong hem.
Spensa i sendem lesaktiv sista blong hem wan adres blong luk toktok blong Presiden Rasel M. Nelson mo ripotem se: “Hem i ridim toktok mo wan windo i open.”
Lod i givim evri tul we i nid blong yumi go sevem ol lesaktiv mo ol fren we oli no memba. !Yumi evriwan i save mekem hemia!
Mi invaetem wanwan long yufala blong mekem folem singaot blong Sevya blong go sevem man. !Yumi save mekem hemia!
Mi testifae tru se mi save se Jisas i Gudfala Man blong Lukaot long Sipsip, se Hem i lavem yumi mo bae Hem i blesem yumi taem yumi go stap sevem man. Mi save se Hem i stap laef; mi save hemia. Long nem blong Jisas Kraes, amen.