Mi Mi Pikinini blong God

I Kam long Elda Donal L. Holstrom

Blong Presidensi blong Olgeta Seventi

Wan stret save abaot ples blong yumi long heven hem i impoten long fasin blong save kam olsem wan god.

Plante long ol stamba doktrin blong yumi hem i tekem save ia se yumi ol pikinini blong wan God we i stap laef. Taswe, wan long ol tabu nem blong Hem i Papa—Papa long Heven. Doktrin ia, ol profet oli bin stap tijim i klia truaot long histri:

Taem Setan i stap traem hem, Moses i no wantem harem hem, hem i talem: “?Huia yu? From yu luk, mi mi wan pikinini boe blong God”
Man we i raetem sing ia i go long ol man Isrel i bin talemaot: “Yufala evriwan i pikinini blong Mi, God we mi hae we mi hae.””
Pol i bin tijim ol man Aten long Hil ya Mas se olgeta i “ol pikinini blong God.”
Josef Smit mo Sidni Rigdon, tufala i kasem wan visen we tufala i luk Papa mo Pikinini blong Hem, mo wan voes i kamaot long heven i talemaot se ol man long ol wol “oli ol pikinini boe mo gel blong God.”
Long 1995, 15 aposol mo profet we oli stap laef oli talemaot bakegen: Evri famli blong man—man mo woman—oli mekem olgeta folem imej blong God. Wanwan long olgeta hem i wan spirit pikinini boe o spirit pikinini gel blong papa wetem mama long heven.”
Presiden Tomas S. Monson i testifae se: Yumi ol pikinini boe mo pikinini gel blong wan God we i laef. … Yumi no save hang nomo long bilif ia be no kam blong eksperiensem wan niu dip filing blong stap strong mo gat paoa.

Besik doktrin ia, we oli stap talemaot plante taem, i simpol nomo, be rili se hem i wan spesel save we yumi save kasem. Wan stret save abaot ples blong yumi long heven hem i impoten long fasin blong save kam olsem wan god. Hem i fandesen blong andastanem naesfala plan ia blong fasin blong sevem man mo blong kea gud long fet long fasbon blong Papa, Jisas we Hem i Kraes, mo Atonmen blong Hem we i fulap wetem sore. Antap long hemia, hem i gohed blong pusum yumi fored blong mekem mo holemtaet ol kavenan we oli no save finis.

Maet sam bae no save, be, evriwan we i stap tekpat long miting ia naoia bambae oli save singsing “Mi Pikinini Blong God” mo no ridim toktok o miusik blong hem. Hym ia we yumi lavem tumas, i wan we yumi stap singsing long hem oltaem long Jos. Be impoten kwestin se: “?Yumi rili save?” ?Yumi rili save hemia insaed long maen, mo long hat, mo long sol blong yumi? ?Weswe? ?Papa mo mama long heven oli fasfala mo impoten aedentiti blong yumi?

Long wol ia yumi save huia yumi long plante defren wei, yumi save ples we yumi bon long hem, sitisen blong yumi, mo lanwis blong yumi. Samfala oli save huia olgeta tru long wok blong olgeta o ol samting we oli laekem blong stap mekem. Ol aedentiti blong wol ia oli no rong, be nomo oli no mas tekova o blokem yumi long aedentiti blong yumi we i no save finis—hemia we yumi pikinini boe o pikinini gel blong God.

Taem lasbon blong mitufala i gat sikis yia mo i stap long klas wan long skul, tija blong olgeta i givim wan eksasaes long olgeta insaed long klas. Hem i manis Oktoba, manis blong Halowin, wan holidei we sam kantri long wol i stap kipim. Hem i no wan holidei we mi laekem tumas, be ating i gat sam gudfala samting abaot Halowin.

Tija i givimaot pis pepa long ol yangfala studen ia. Antap long pepa ia i gat wan droing blong wan wij (mi bin talem long yu se hemia i no wan holidei we mi laekem tumas) i stap stanap wetem wan bigfala sospen we i stap boel. Kwestin we i stap long pepa ia hem i blong helpem ol pikinini blong save mekemap wan stori long tingting blong olgeta mo testem ol skil blong raet blong olgeta. “Yu jes dring kap meresin blong wij ia. ?Wanem i hapen long yu?” Plis tingbaot se hemia i no blong ol tija i mas mekem semmak.

“Yu jes dring kap meresin blong wij ia. ?Wanem i hapen long yu?” Wetem bes raeting blong hem, smolwan blong mitufala i raetem, “Bae mi ded mo bae mi go long heven. Bae mi laekem heven. Bae mi laekem from se hem i bes ples we yu save stap long hem from se bae yu stap wetem Papa long Heven.” Ating ansa blong hem i sapraesem tija blong hem; be, taem gel blong mitufala i karem skulwok blong hem i kam long haos, mitufala i luk se hem i gat wan sta we hem i wan hae mak.

Long ril laef, yumi stap fesem ol tru, be i no mekap, hadtaem. I gat harem nogud—long saed blong bodi, filing mo spirit. I gat ol hat i brok taem we ol samting i no olsem we yumi bin hop from. I no gat jastis taem we yumi luk se i no nid blong stap long situesen olsem. I gat harem nogud taem se wan we yumi trastem i giaman long yumi. I gat ol helt mo mane problem we i save konfiusum yumi. I gat ol taem blong gat tu tingting long wan doktrin o histri we yumi no save andastanem.

Taem wan had samting i hapen long laef blong yumi, ?wanem ansa nao yumi save givim kwiktaem? ?Hem i blong stap konfius o gat tu tingting o spirit i nomo gat? ?Hem i seksekem fet blong yumi? ?Yumi blemem God o ol narafala man from wanem we i stap hapen long yumi? ?O fas ansa blong yumi hem i blong tingbaot huia yumi mo—se yumi ol pikinini blong wan God we i gat lav? ?Hemia i kam wetem wan bigfala tras se Hem i letem yumi blong safa long wol ia from se Hem i save se bae yumi kasem blesing from, olsem faea we i stap karemaot doti, blong kam olsem Hem mo kasem laef we i no save finis we Hem bae givim?

I no longtaem i pas mi bin stap long wan miting wetem Elda Jefri R. Holan. Taem hem i stap tijim prinsipol ia se laef long wol ia i save soa tumas be ol hadtaem blong yumi i gat ol stamba tingting we i no save finis—iven sapos yumi no save andastanem long taem ia—Elda Holan i talem: “Yu save gat wanem we yu wantem o yu save gat wan samting we i moa gud.”

Faef manis i pas, waef blong mi Daeyan, mo mi i bin go long Afrika wetem Elda mo Sista Deved A. Bedna. Nambasikis mo las kantri we mifala i visitim hem i Liberia. Liberia hem i wan bigfala kantri we i gat ol gudfala pipol mo wan histri we i rij, be oli samting oli no bin isi longwe. Plante blong ol problem blong politik mo sivil wo i mekem problem blong nogat samting i kam moa nogud. Antap long hemia, rabis sik ia Ebola i bin kilim kolosap 5,000 man long taem sik ia i stap spred i no long taem i pas. Mifala i fas grup blong ol Jos lida we i kam aotsaed, blong visitim eria blong Monrovia, we hem i kapitol siti, sins long taem we Wol Helt Oganaesesen i bin diklerem se i no sef blong go folem trabol blong sik Ebola.

Long wan hot Sandei moning, mifala i travel i go long wan miting haos we oli rentem, long medel blong siti. Oli setemap evri jea we i gat, mekem wan totol blong 3,500 jea evriwan. Stret atendens hem i 4,100. Kolosap evriwan we oli kam, oli wokbaot leg, o kam long wan pablik transpot we i no gud tumas; i no isi blong ol Sent oli kam tugeta. Be, oli bin kam. Plante long olgeta i kam sam aoa bifo taem miting i stat. Taem mifala i go insaed long rum ia, !spirit i bin strong tumas! Ol sent oli rere blong kasem tijing.

Taem wan spika i talem wan skripja, bae ol memba oli talemaot ves ia bigwan, I nomata se—sot skripja o longwan, ful kongregesen i ansa tugeta. Nao, i no nid blong yumi mekem olsem, be i gud tumas blong luk se oli save mekem. Mo kwaea ia—oli gat paoa. Wetem wan aktiv kwaea daerekta mo wan yang man blong 14 yia i sidaon long piano, ol memba oli singsing wetem strong tingting mo paoa.

Afta Elda Bedna i toktok. Hemia, hem i haelaet we oli stap wet from miting ia—blong harem wan aposol i tij mo testifae. I klia se wetem daereksen blong Spirit, hafwei long toktok blong hem, Elda Bedna i stop mo i askem, “?Yufala save hym ia ‘Tijing Blong Jisas Oli Stamba blong yumi’?”

Yu harem olsem 4,100 voes oli ansa bigwan, “!YES!”

Afta hem i askem, “?Yufala i save ves 7?”

Bakegen, evriwan i ansa, “!YES!”

Arenjmen blong hym ia blong paoa “Tijing Blong Jisas Oli Stamba blong yumi” we Momon Tabenakol Kwaea i bin stap singsing long hem blong 10 yia we i pas i gat long hem ves 7, we oli no stap singsing tumas long hem bifo. Elda Bedna i givim instraksen se, “Yumi sing ol ves 1,2,3,mo 7.”

Wantaem nomo kwaea daerekta i girap mo Aronik Prishud- we i helpem hem, i stat blong plei ol fasfala tiun. Wetem wan level blong paoa we mi neva filim bifo long wan kongregesen, mifala i sing ol ves 1,2, mo 3. Afta i go moa laod mo paoa blong Spirit i go antap taem 4,100 voes oli singsing nambaseven ves mo talem:

Spos man i putum tras blong hem long Jisas Kraes,
Mi sapotem hem, Mi no save spolem tras,
Spos Setan i traehad tumas blong winim yu,
!Mi neva, no neva, Mi neva no neva,
Mi neva, no neva save ronwe long yu!

Long wan spesel taem ia wetem spirit, mi bin lanem wan impoten lesen long dei ia. Yumi stap laef long wan wol we i save mekem yumi fogetem se huia yumi. Moa yumi gat ol aktiviti blong wol oli raonem yumi, bae hem i moa isi blong yumi tekem i laet nomo, afta no wantem luksave, afta fogetem se yumi joen wetem God. Ol Sent long Liberia oli no gat plante samting tumas, be yet oli gat evri samting long saed blong spirit. Wanem we mifala i witnesem long dei ia long Monrovia hem i wan grup blong ol pikinini boe mo pikinini gel blong God—!we oli save hemia!

Long wol blong yumi tedei, i nomata weaples yumi stap o wanem yumi stap go tru long hem, hem i impoten se fasfala mo impoten aedentiti blong yumi hem i olsem wan pikinini blong God. Blong save hemia bae i mekem fet blong yumi i gro, bae i gohed blong pusum yumi blong sakemaot sin, mo bae i givim paoa blong “stanap strong mo no muvmuv” long wokbaot blong yumi long wol ia. Long nem blong Jisas Kraes, amen.