?Bambae Yumi Mekem Wanem?
Yumi bildimap kingdom ia taem yumi stap kea gud ol narafala man. Yumi bildimap kingdom ia tu taem yumi tokaot mo testifae long trutok.
Stret afta long taem we Jisas i Laef Bakegen long Ded mo I Go Bak Antap, Aposol Pita i bin tijim, “Yumi ol laen blong Isrel evriwan … yumi mas savegud se Jisas ia we yufala i nilim hem long kros, hem nao God i mekem hem i Masta blong yumi, mo i Mesaea tu”. Taem ol man oli harem tok ia, oli harem we i stikim gud olgeta. Nao oli askem long Pita mo ol narafala, “Ol brata. ?Bambae mifala i mekem olsem wanem?” Nao olgeta i obei long tijing blong Pita wetem gladhat.
Tumoro hem i Ista Sandei, mo mi hop se bae i stikim gud hat blong yumi tu blong luksave Sevya, sakem sin, mo obei wetem gladhat.
Long jeneral konfrens ia bae yumi harem ol tijing we i bin kam tru long insperesen we bae ol Jos lida i givimaot, tugeta ol man wetem ol woman. Mi save se bae ol toktok blong olgeta i tajem ol hat blong yumi, mi stap askem yumi long naet ia, “Ol woman mo ol sista, ?bae yumi mekem wanem?”
Taem hem i stap olsem Rilif Sosaeti jeneral presiden, Eliza R. Snow i bin talemaot kolosap 150 yia i pas, “Lod i bin givim ol impoten wok long yumi.” Mi testifae se toktok blong hem i stap tru yet kasem tedei.
Jos mo kingdom blong Lod i nidim ol woman we spirit i stap lidim olgeta blong yusum ol spesel talen blong olgeta blong kea gud mo talemaot mo testifae long ol trutok blong gospel. Ol talen mo ol tingting blong yumi oli ol impotem samting blong bildimap kingdom blong God, we hem i minim se yumi mas mekem wok blong yumi blong sevem ol pikinini blong God.
Stap Bildim Kingdom taem yumi Stap Kea Gud Long Ol Narafala Man
Yumi stap bildim kingdom taem yumi stap kea gud long ol narafala man. Be, fasfala pikinini blong God we yumi mas bildimap long gospel ia we i kambak hem i yumiwan. Emma Smit i bin talem se, “Mi wantem gat Spirit blong God blong save mo andastanem miwan, blong mi save winim wanem kaen samting blong kastom o neja we bae i blokem mi blong kam olsem wan god.”Yumi mas bildimap wan fandesen blong fet long gospel blong Sevya mo muv fored wetem paoa blong ol tempol kavenan blong save kam olsem wan god.
?Olsem wanem sapos samfala kastom blong yumi i nogat ples insaed long gospel blong Jisas Kraes we i bin kambak? Blong lego ol samting ia bae i nidim sapot mo fasin blong stap kea gud long wanwan long yumi, olsem we i hapen long mi.
Taem mi bon, mama papa blong mi i bin planem wan magnolia tri blong bae i gat flaoa blong magnolia long mared seremoni blong mi, we bae i stap long jos blong ol bubu blong mi. Be, long dei blong mared blong mi, i nogat papa mo mama long saed blong mi mo i nogat flaoa blong magnolia. Olsem wan konvet we i bin stap wan yia long Jos, mi travel i go long Sol Lek Siti, Yuta, blong kasem tempol endaomen blong mi mo sil i go long Deved, boefren blong mi.
Taem mi aot long Luisiana mo stap go kolosap long Yuta, wan filing i kam long mi se mi lusum hom blong mi. Bifo mared i tekem ples, bae mi mi stap wetem step-bubuwoman blong Deved, we oli save long hem olsem Anti Karol.
Mi bin stap long ples ia, olsem wan strenja long Yuta, bae mi stap long haos blong wan strenja bifo mi sil— blong taem we i no save finis— long wan famli we mi no save gud. (!Gud samting se mi lavem fiuja hasban blong mi mo Lod!)
Taem Deved mo mi i stap wokbaot from do blong haos blong Anti Karol, mi wantem haed nomo. Do i open—mi stanap ia olsem wan rabet we i fraet tumas—mo Anti Karol, nogat toktok, i openem ol han blong hem mo haggem mi. Hem, we i nogat pikinini blong hemwan, i bin save—hat ia we i kea tumas i bin save—se mi nid blong filim se mi stap long stret ples. !O, gudfala mo swit filing blong taem ia! Fraet blong mi i bin lus, mo wan filing i kam long mi se spirit blong mi stap long wan sef ples.
Lav hem i blong mekem rum blong wan narafala man long laef blong yu, olsem we Anti Karol i bin mekem long mi.
Ol mama oli mekem rum long ol bodi blong olgeta blong kea gud long wan bebi we i no bon yet, be blong kea gud i no minim nomo se blong bonem mo lukaotem ol pikinini. Iv i bin kasem koling blong kam wan “mama” bifo hem i gat pikinini. Mi biliv se blong “stap wan mama” i minim se “blong givim laef.” Tingbaot sam wei we yu save givim laef. I save minim blong givim gudfala filing abaot laef long wan we i lusum hop o laef we i gat spirit long hem we i gat tu tingting. Wetem help blong Tabu Spirit yumi save krietem wan ples blong stap hilim ol filing blong olgeta we oli tok nogud long olgeta, no wantem olgeta, mo ol strenja. Long ol kaen be yet paoaful fasin ia, yumi stap bildim kingdom blong God. Ol sista, yumi evriwan i kam long wol ia wetem ol presen ia blong ol mama blong givim laef mo kea gud long ol narafala man, from se hemia nao plan blong God.
Blong folem plan blong Hem mo kam olsem wan man blong bildimap kingdom i nidim blong mekem sakrifaes blong narafala man. Oson F. Witni i bin raetem: “Ol samting we yumi safa from mo ol samting we yumi stanap strong from, speseli nao taem yumi stanap strong wetem fasin blong save wet longtaem, … i klinim hat blong yumi…mo i mekem yumi kam kaen moa mo gat bigfala lav…Hem i tru long …hadwok mo hadtaem, we yumi kasem edukesen …we i save mekem yumi kam moa olsem Papa mo Mama blong yumi long heven.” Ol had taem ia we i klinim yumi i karem yumi kam long Kraes, we I save hilim yumi mo mekem yumi tek pat long wok blong sevem man.
Stap Bildimap Kingdom tru long Toktok mo Testifae
Yumi stap bildimap kingdom tu taem yumi stap talemaot mo testifae long tru tok. Yumi folem fasin blong Lod. Hem i tij wetem paoa mo atoriti blong God. Ol sista, yumi tu i save mekem olsem. !Ol woman oli laekem blong stori mo kam tugeta! Taem yumi wok wetem prishud atoriti we oli givim long yumi, fasin blong stap stori mo kam tugeta i save lid i go blong tij mo lid folem gospel.
Sista Juli B. Bek, Rilif Sosaeti Presiden blong bifo, i bin tijim: “Fasin blong kwalifae from, kasem mo mekem folem ol revelesen blong yuwan, hem i wan impoten skil we yu save kasem long laef ia. …I nidim blong yu mas wekap oltaem.”
Revelesen blong yuwan we i kam long Tabu Spirit bae i oltaem helpem yumi blong lanem, toktok mo ak folem trutok ia we i no save finis—trutok blong Sevya. Moa yumi folem Kraes, moa bae yumi filim lav mo daereksen blong hem, moa yumi filim lav mo daereksen blong Hem, moa bae yumi wantem tijim trutok olsem we hem i bin mekem, iven long taem we oli agensem yu.
Sam yia i pas, mi bin pre blong kasem revelesen blong save sapotem fasin blong save stap olsem wan mama, long taem ia mi kasem wan fon kol i kam long wan woman we mi no save long hem.
Hem i askem se, “?Yu nao Nil Mariot, mama blong wan bigfala famli?”
Mi ansa wetem glad, “!Yes!” mi stap ting se bae mi harem hem i talem se, “!O, i gud!
!Be no! Bae mi neva fogetem ansa blong hem taem voes blong hem i stap toktok tru long fon: “!Mi mi harem nogud tumas se yu yu mas karem ol pikinini i kam long wol ia we i fulap tumas i nomo gat ples!”
“O,” mi talem, “Mi save olsem wanem yu filim.”
Hem i ansa wetem kros, “!No—yu no save!
Afta mi ansa sloslo, “O, ating mi no save.”
Hem i stat blong toktok kros long krangke joes blong mi blong kam wan mama. Taem hem i stap go hed, mi bin pre from help mo wan kwaet tingting i kam long maen blong mi: “?Wanem nao bae Lod i talem long hem?” Mi gat wan filing se mi gat moa paoa mo mi no mo fraet taem mi tingbaot Jisas Kraes.
Mi harem miwan mi talem se, “Mi mi glad se mi mi wan mama blong wan bigfala famli, mo mi promes long yu se bae mi mekem evri samting long paoa blong mi blong kea long ol pikinini blong mi long wan fasin we bae i mekem wol ia wan gudfala ples.”
Hem i ansa, “O, mi hop se bae yu mekem olsem! Afta hem i sarem fon.
Hem i no wan bigfala samting—!laki se mi bin stap sef insaed long kijin blong mi nomo! Be long wan smol wei blong miwan, mi save tok aot blong sapotem ol famli from tu samting: (1)mi andastanem mo biliv long doktrin blong God abaot famli, mo (2) mi bin pre from ol toktok blong talemaot ol tru tok ia.
Blong stap defren mo no semak long ol woman blong wol bae i mekem oli agensem yu, be yumi mas stap sef long ol prinsipol blong taem we i no save finis mo testifae long ol prinsipol ia, i no mata wanem ansa blong wol.
Taem yumi askem long yumiwan, “?Bambae yumi mekem olsem wanem?” tingting hevi long kwestin ia: “?Wanem nao Sevya i stap go hed blong mekem?” Hem i stap kea. Hem i stap krietem. Hem i stap sapotem yumi blong gro mo gat gud fasin. Ol woman mo ol sista, !yumi save mekem olsem! Ol Praemeri gel, ?i gat wan man long famli blong yu we i nidim lav mo kaen fasin blong yu? Yu tu yu save bildim kingdom taem yu stap kea from ol narafala man.
Wol ia we Sevya I krietem, wetem daereksen blong Papa blong Hem, hem i wan bigfala fasin blong stap kea gud. Hem i givim wan ples we yumi save gro mo leftemap fet long paoa blong Hem we i pem praes blong ol sin blong yumi blong bae yumi save kam olsem Hem wan dei. Fet long Jisas Kraes mo Atonmen blong Hem hem i stret ples blong kasem hiling mo hop, gro kam antap mo faenem stamba tingting. Yumi evriwan i nid blong filim se yumi stap long stret ples, long saed blong spirit mo long saed blong bodi. Yumi, ol sista blong ol defdefren yia, i save kiretem ples ia, iven wan tabu ples.
Impoten wok blong yumi hem i blong kam ol woman blong folem Sevya, kea wetem insperesen, mo no fraet blong laef folem trutok. Taem yumi askem Papa long Heven blong mekem yumi ol man blong bildimap kingdom blong Hem, paoa blong Hem bae i kam insaed long yumi mo bae yumi save hao blong kea from ol narafala mo long en, bae yumi save kam olsem papa mo mama blong yumi long heven. Long nem blong Jisas Kraes, amen.