“Enero 9. Kasano ti Kayat ti Dios a Panangaywanko kadagiti Pinarsuana, Agraman ti Bagik? Genesis 1–2; Moses 2–3; Abraham 4–5,” Umaykayo, Sumurot Kaniak—Para kadagiti Korum ti Aaronic Priesthood ken dagiti Klase ti Young Women: Mainaig a Topiko 2022 (2021)
“Enero 9. Kasano ti Kayat ti Dios a Panangaywanko kadagiti Pinarsuana, Agraman ti Bagik?” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022
Enero 9
Kasano ti Kayat ti Dios a Panangaywanko kadagiti Pinarsuana, Agraman ti Bagik?
Agiinnuman
Idauluan ti maysa a miembro ti panguluen ti klase wenno korum; 10–20 a minuto
Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.
-
Agbiag iti ebanghelio. Ania ti napaglilinnawagantayo iti napalabas, ken ania dagiti naaramid a pangawis wenno naidutok nga aramiden? Ania ti inaramidtayo tapno agtignay kadagita a pangawis wenno naidutok nga aramiden?
-
Agaywan kadagiti agkasapulan. Ania ti mabalin nga isao wenno aramidentayo a tumulong kadagiti mabalin a makarikna nga agmaymaysa wenno adayo iti Nailangitan nga Ama?
-
Awisen ti amin nga umawat iti ebanghelio. Ania dagiti sumagmamano a wagas a pakatulongantayo kadagiti dadduma a makarikna iti ayat ni Jesucristo?
-
Pagkaykaysaen dagiti pamilia para iti kinaagnanayon. Ania dagiti kapanunotan a maibinglaytayo iti tunggal maysa a mangtulong kadatayo a mangpapigsa kadagiti pamiliatayo?
Iti ungto ti adalen, no maitutop, aramiden dagiti sumaganad:
-
Paneknekam dagiti pagbatayan a naisuro.
-
Palagipam dagiti miembro ti klase wenno korum maipapan kadagiti plano ken awis a naaramid bayat ti miting.
Isuro ti Doktrina
Idauluan ti maysa a nataengan a lider wenno agtutubo; 25–35 a minuto
Aggigiddan a Masursuruan
Tapno matulongan dagiti agtutubo a mangibilang no ania ti maaramidda tapno nasaysayaat a mangaywan kadagiti pinarsua ti Dios, isurat dagiti sumaganad a paulo iti pisarra: Ti Namarsua, Ti Panagparsua, ken Dagiti Pagrebbengantayo. Kiddawem kadakuada a mangrebyu iti Genesis 1–2 ket mangisurat no ania ti masursuroda maipapan ti Namarsua ken ti Panagparsua. Ania ti masursurotayo maipapan kadagiti pagrebbengantayo? (kitaen nangnangruna iti Genesis 1:26–28; 2:15). Makatulong dagiti sumaganad a kapanunotan kadagiti agtutubo a mapaglilinnawagan ti pagrebbengantayo a mangaywan kadagiti pinarsua ti Dios.
-
Kasano a matulongam dagiti sursuruam a makaawat a sagrado a pinarsua ti Dios dagiti bagida? Kas pagarigan, mabalinmo a kiddawen kadakuada no ania ti masursurotayo maipapan kadagiti bagitayo iti 1 Taga Corinto 6:19–20; Moises 2:26–27; Abraham 4:26–27. Ania ti kayat a sawen dagiti balikas a “kalanglanga” ken “kaing-ingas”? Agtitinnulong nga agaramid iti listaan ti sumagmamano a banag a maaramidtayo a mangaywan kadagiti bagitayo. (Kitaen iti “Salun-at iti Bagi ken Rikna,” iti Para iti Pigsa dagiti Agtutubo [booklet, 2011), 25–27.)
-
Masansan a maipasango dagiti agtutubo kadagiti mensahe a mangigapu iti pannakariknada iti panagduadua maipapan kadagiti bagida. Awisem dagiti agtutubo a mangbuya iti video “God’s Greatest Creation” (ChurchofJesusChrist.org). Kiddawem kadakuada a mangsapul kadagiti mensahe a mangtulong kadakuada a makarikna ti panagyaman para kadagiti bagida (kitaen met iti Russell M. Nelson, “Your Body: A Magnificent Gift to Cherish,” New Era, Ago. 2019, 2–7). Ania ti maibinglaytayo a makatulong iti maysa a gayyem wenno miembro ti pamilia a makarikna iti panagduadua maipapan iti bagina?
-
Awisem dagiti agtutubo a siuulimek a mangbasa iti maysa wenno ad-adu pay kadagiti sumaganad a bersikulo, a mangsapsapul kadagiti nalawag a pannakaammo ken pannakaawat maipapan no apay a pinarsua ti Dios iti daga ken no kasano ti kayatna a panangaywantayo iti daytoy: Genesis 1:26–28; 2:15; 1 Nephi 17:36; Doktrina ken Katulagan 49:19–21; 59:15–20; 104:13–18; Moises 2:26–31; 3:15. Idawatmo kadakuada a mangibinglay kadagiti kapanunotanda maipapan iti tunggal binatog ti nasantuan a kasuratan. Kalpasanna awisem ida nga agtitinnulong a mangaramid iti listaan dagiti banag a mabalinda nga aramiden kas indibidual wenno kas grupo a mangipatungpal iti pagrebbenganda a mangaywan iti daga (kitaen dagiti kapanunotan iti “Dagiti Pangsuporta a Resources”). Ania dagiti panagbalbaliw a kasapulantayo nga aramiden iti panunot ken tignaytayo tapno nasaysayaat ti panangaywan iti daga?
-
Ibilangmo ti panangawis kadagiti miembro ti klase wenno korum nga umay iti miting nga addaan iti maysa a banag a mangipakita iti kinapintas ti daga a pinarsua ti Dios, kas iti maysa a drowing, ladawan, wenno daniw. Awisem ida a mangibinglay no ania ti intugotda ken dagiti riknada para kadagiti pinarsua ti Dios. Ipabuya ti video “Our Home” (ChurchofJesusChrist.org), ket kiddawem kadakuada a dumngeg kadagiti banag a mangipakita no kasano ti marikna ti Dios maipapan iti daga ken mangparegta kadakuada a mangtaripato iti daytoy.
Agtignay iti Pammati
Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.
Dagiti Pangsuporta a Resources
Dagiti wagas a pakaaywanantayo iti daga:
-
Agmula iti sumagmamano a bukbukel, kaykayo, wenno maysa a minuyongan.
-
Pidutem ti basura iti komunidadyo.
-
Mangbukel iti sangakaarrubaan a panagdalus wenno proyekto iti panag-recycle.
-
Mapanka agpagnapagna ket utobem dagiti banag a pagyamyamanam.
-
Mangparnuayka iti arte manipud kadagiti aytem nga ibellengmo koma, ket ibinglay daytoy iti maysa a grupo wenno pabuya iti arte.
-
Ikeddengmo dagiti wagas a makapagin-inutka iti koriente ken danum.
Panangisuro iti Wagas ti Mangisalakan
Ikkam dagiti miembro ti klase wenno korum iti adu a gundaway a mangisuro iti tunggal maysa iti klase, gapu ta masansan a kasayaatan a makasursuroda manipud iti tunggal maysa ken manipud iti padasda iti panangisuro.