“Enero 23. Kasano a Matulongannak ti Apo nga Agserbi a Napudpudno? Genesis 5; Moises 6,” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022 (2021)
“Enero 23. Kasano a Matulongannak ti Apo nga Agserbi a Napudpudno?” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022
Enero 23
Kasano a Matulongannak ti Apo nga Agserbi a Napudpudno?
Agiinnuman
Idauluan ti maysa a miembro ti panguluen ti korum wenno klase; 10–20 a minuto
Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren iti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas a pakapagtignayan no ania ti paglilinnawaganyo.
-
Agbiag iti ebanghelio. Ania dagiti nabiit pay a padas a nangpapigsa kadagiti pammaneknektayo?
-
Aywanan dagiti agkasapulan. Asino ti agkasapulan iti tulong ken karkararagtayo? Ania ti mariknatayo a nakaawisan ti riknatayo a mangtulong kadakuada?
-
Awisen iti amin nga umawat iti ebanghelio. Kasano a makapagbalintayo a silaw kadagiti miembro ti pamilia wenno gagayyem a saan a kapada iti pammatitayo?
-
Pagkaykaysaen dagiti pamilia para iti kinaagnanayon. Kasano a maipakitatayo ti ad-adda pay nga ayat ken suporta para kadagiti pamiliatayo ken maaramid ti nasayaat a pakaidumaan kadagiti pagtaengantayo?
Iti ungto ti adalen, no maitutop, aramiden dagiti sumaganad:
-
Paneknekam dagiti pagbatayan a naisuro.
-
Palagipam dagiti miembro ti klase wenno korum maipapan kadagiti plano ken awis a naaramid bayat ti miting.
Isuro ti Doktrina
Idauluan ti maysa a nataengan a lider wenno agtutubo; 25–35 a minuto
Isaganam ti Bagim a Naespirituan
Idi naawat ni Enoc ti awagna nga agserbi iti Apo, nakarikna iti naan-anay a pagkurangan (kitaen iti Moises 6:31). Ngem ti Apo saan laeng a nangibaon ken ni Enoc a mangaramid iti trabahona; inkarina ken ni Enoc a salakniban ken tulonganna daytoy (kitaen iti Moises 6:32–34).
Nalabit a mariknam ti panagrikna ni Enoc iti kinakurang kadagiti bukodmo a panagkagumaan nga agserbi. Maited ti sumagmamano iti serbisiotayo babaen kadagiti takem [calling] iti Simbaan. Kadagiti sabali a panawen, makitatayo ti panagkasapulan ket mariknatayo a naparegta babaen ti Espiritu tapno mangipakita iti ayat ken suporta. Nupay kasta umay ti gundaway, makapagturedtayo, kas iti inaramid ni Enoc, nga ammotayo a tulongannatayonto ti Apo no awatentayo ti awisna a “makipagna kaniak” (Moises 6:34).
Bayat ti panagsaganam a mangisuro maipapan iti tulong a maawattayo manipud iti Apo bayat ti panagserbitayo kadagiti dadduma, sublien nga adalen iti Moises 6 ket mangpanunot kadagiti padasmo iti panagserbi kadagiti dadduma. Kasano a tinulongannaka ti Apo kadagiti panagkagumaanmo? Ania ti namnamaem kadagiti miembro ti klasem wenno korummo a masursurodanto manipud kadagiti pagwadan ni Enoc ken dagiti dadduma? Mabalinmo pay a basaen ti maysa kadagitoy a mensahe ni Presidente Henry B. Eyring: “Walk with Me” (Liahona, May 2017, 82–85) wenno “Covenant Women in Partnership with God” (Liahona, Nob. 2019, 70–73).
Mabalintayo a suroten ti pagwadan ti Mangisalakan bayat ti panagserbitayo kas paset ti inaldaw a panagbiagtayo.
Aggigiddan a Masursuruan
Ti panagserbi kadagiti dadduma ket mangipaay iti gundaway kadatayo a “makipagna iti [Dios],” ken maawattayto ti tulongna bayat ti panagserbitayo (Moises 6:34). Tapno matulongan dagiti miembro ti klase wenno korum a mangrugi iti panangilawlawag iti daytoy, mabalinmo nga idawat kadakuada a mangsukisok iti Moises 6:32–39 kadagiti wagas ti Apo ken ni Enoc iti panagserbina. Kasano a bendisionannatayo ti Apo no agserbitayo Kenkuana? Makatulong kenka dagiti sumaganad a kapanunotan a mangidaulo iti panaglilinnawag maipapan iti nadiosan a tulong a maawattayo bayat ti panagserbitayo kadagiti dadduma.
-
Napno dagiti nasantuan a kasuratan kadagiti pannursuro maipapan iti panagserbi (kas pagarigan, kitaen iti Mateo 25: 31–40; Lucas 10:25–37; Mosiah 2:17). Ibilang ti panangawis kadagiti sursuruam a mangibinglay kadagiti binatog ti nasantuan a kasuratan a mangparegta kadakuada nga agserbi kadagiti dadduma. Mabalinmo nga idawat kadakuada a nasapsapa nga umay a nakasagana a mangibinglay kadagiti binatog ti nasantuan a kasuratan maipapan iti panagserbi wenno dagiti pagwadan ti panagserbi. No kasapulanda ti tulong, allukoyem ida nga agsapul iti “Panagserbi” iti Pangiwanwan iti Nasantuan a Kasuratan (scriptures. ChurchofJesusChrist.org). Ania ti mariknatayo a makaparegta nga aramiden gapu iti nabasatayo?
-
Nagserbi ti Mangisalakan kadagiti dadduma iti unos ti panagministrona. Ania ti masursurotayo manipud iti pagwadanna a makatulongto kadatayo no agserbitayo? Tapno masungbatan daytoy a saludsod, mabalin a basaen ti tunggal miembro ti klase wenno korum ti maysa kadagiti sumaganad a nasantuan a kasuratan, nga agsapsapul iti maysa a banag nga isuro daytoy maipapan iti pagwadan ti Mangisalakan iti panagserbi: Mateo 14:13–21; Juan 9:1–11, 35–38; 13:4–5, 12–17; 3 Nephi 17:5–9. Awisem ti tunggal maysa a mangibinglay iti maysa a banag a nasarakanda. Mangted iti oras para iti tunggal maysa a mangpanunot iti maysa a tao a mabalinda a pagserbian ken no kasano a sumurotdanto iti pagwadan ti Mangisalakan iti panagserbida.
-
No dadduma panunotentayo a ti serbisio kaipapananna ti panagaramid iti maysa a banag a dakkel ken panangbubos iti panawen. Mabalin a dayta ti maysa a gapu a saan unay a makapagserbi ti sumagmamano kadatayo agingga a kabaelantayo. Mabalinmo nga ilawlawag a masansan a nagserbi ti Mangisalakan kadagiti tao a nakitana iti unos ti inaldaw a panagbiagna (kitaen, kas pagarigan, iti Mateo 12:9–13; Marcos 5:21–34; Lucas 19:1–10; Juan 4:3–26). Tapno makatulong kadagiti miembro ti klase wenno korum a mangpanunot kadagiti simple a wagas a pakapagserbianda iti inaldaw a biagda, mabalinmo nga ipabuya ti maysa kadagiti sumaganad a video: “When Ye Are in the Service—YM” or “When Ye Are in the Service—YW” (ChurchofJesusChrist.org). Idawatmo kadagiti agtutubo a mangibinglay kadagiti kapanunotanda. Ania dagiti babassit nga aramid ti serbisio a nakitamon nga ar-aramiden dagiti dadduma? Ania ti makaparegta nga aramidentayo? Awisen ti tunggal tao a mangisurat kadagiti wagas a mangileppas kadagiti sumaganad a palawag: “Makapagserbiak kadagiti dadduma babaen ti…” ken “Agpatulongakto iti Apo kadagiti panagkagumaanko nga agserbi babaen ti …” Kalpasanna kiddawem iti sumagmamano a mangibinglay no ania ti insuratda.
Agtignay iti Pammati
Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti parikna nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.
Dagiti Pangsuporta a Resources
-
“Opportunities to Do Good,” “Teachings of Thomas S. Monson: Rescuing Those in Need” (videos), ChurchofJesusChrist.org
-
Bonnie L. Oscarson, “The Needs before Us” (Liahona, Nob. 2017, 25–27)
Panangisuro iti Wagas ti Mangisalakan
“Malaksid iti panangtulong kadagiti agad-adal a mangrikna ken mangbigbig iti Espiritu, tulongan ida nga agtignay a maibatay kadagiti pannignay nga awatenda” (Panangisuro iti Wagas ti Mangisalakan, [2016], 10).