“Pebrero 13. Kasano a Makapagtalinaedtayo a Napudno iti Mangisalakan iti Nadangkes a Lubong? Genesis 12–17; Abraham 1–2,” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022 (2021)
“Pebrero 13. Kasano a Makapagtalinaedtayo a Napudno iti Mangisalakan iti Nadangkes a Lubong?” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022
Pebrero 13
Kasano a Makapagtalinaedtayo a Napudno iti Mangisalakan iti Nadangkes a Lubong?
Agiinnuman
Idauluan ti maysa a miembro ti panguluen ti korum wenno klase; 10–20 a minuto
Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.
-
Agbiag iti ebanghelio Kasano nga ad-adda nga immasidegtayo iti Mangisalakan? Kasano a padpadasentayo ti agbalin nga ad-adda a kas Kenkuana?
-
Aywanan dagiti agkasapulan. Asino iti adda iti panunottayo itay nabiit? Kasano a matulongantayo dagitoy a tao?
-
Awisen iti amin nga umawat iti ebanghelio. Kasano a masungbatantayo dagiti saludsod dagiti gagayyemtayo maipapan iti Simbaan iti wagas a mangpapigsa iti pammatida iti Mangisalakan?
-
Pagkaykaysaen dagiti pamilia para iti kinaagnanayon. Ania dagiti sumagmamano a wagas a maikonektatayo a nasaysayaat kadagiti kabagyan a miembro ti pamilia, a kas kadagiti lelong ken lelang ken kasinsin?
Iti ungto ti adalen, no maitutop, aramiden dagiti sumaganad:
-
Paneknekam dagiti pagbatayan a naisuro.
-
Palagipam dagiti miembro ti klase wenno korum maipapan kadagiti plano ken awis a naaramid bayat ti miting.
Isuro ti Doktrina
Idauluan ti maysa a nataengan a lider wenno agtutubo; 25–35 a minuto
Isaganam ti Bagim a Naespirituan
Ti panagbiag a sililinteg iti nadangkes a lubong ket saan a nalaka iti kaano man. Para ken ni Abraham, ti pammilit a tumallikud iti Apo saan manipud iti ruar ti lubong—timmallikud uray ti ama ni Abraham iti Apo (kitaen iti Abraham 1:5–12; 2:5). Naipasango da Abraham ken Sara iti rigrigat, ngem nagtalekda kadagiti kari ti Apo “ket linugayanda manipud iti adayo, ken impudnoda nga isuda ganggannaetda ken agpagnapagnada iti rabaw ti daga” (Hebreo 11:13).
Kasano a matulongam dagiti miembro ti klase wenno korum nga agtalinaed a napudno no mariknada a kasla “ganggannaet ken agpagpagnada” iti lubong gapu ta saanda nga agbibiag kadagiti pagrukodan ti Apo? Kasano a maparegtam ida nga agbalin a natured bayat ti panagbiagda a napudno ti Apo? Bayat ti panagsaganam a mangisuro, ibilang ti panangrebyu iti Juan 15:18–20 ken ti mensahe ni Elder Neil L. Andersen “Overcoming the World” (Liahona, Mayo 2017, 58–62).
Makasarak dagiti disipulo ni Jesucristo iti talna no agbiagda a sipupudno iti baet ti pagsusupadian.
Aggigiddan a Masursuruan
Mabalin a naparegta dagiti miembro ti klase wenno korum iti pagwadan ni Abraham iti daytoy a lawas bayat ti panagadalda iti Genesis 12–17 ken Abraham 1–2. Mabalinmo nga awisen ida a mangrebyu iti Abraham 1:1–19 ket mangibinglay no ania ti mangparegta kadakuada maipapan iti pagwadan ni Abraham. Ania dagiti pagpapadaan a makitatayo iti nagbaetan dagiti karit a nakaipasanguan ni Abraham ken dagiti karit a sangsanguentayo iti agdama? Pumili iti maysa wenno ad-adu pay nga aktibidad iti baba tapno makaallukoy iti panaglilinnawag maipapan no kasano a makapagtalinaedtayo a napudno ken ni Jesucristo iti amin a kasasaad.
-
Masansan a ginuyugoy ti Apo ken dagiti propetana dagiti sinuruanda nga agbiag a sipupudno iti baet ti kinadangkes iti aglawlawda. Ania dagiti sumagmamano a wagas a pangsulisogan ni Satanas kadagiti agtutubo nga aglabsing kadagiti bilin ti Dios iti aldawtayo? Mabalin a basaen dagiti sursuruam ti sumagmamano a nasantuan a kasuratan a nailista iti “Dagiti Pangsuporta a Resources.” Awisem ida a mangilawlawag no ania ti masursuroda maipapan iti panagtalinaed a napudno ken ni Cristo no sulisogennatayo ti lubong nga aglabsing wenno laisennatayo. Mabalinda nga ibinglay dagiti wagas a nasarakanda tapno agtungpal a sipupudno no saan nga agtungpal a sipupudno dagiti dadduma. Kaano a kabaelantayo wenno dagiti dadduma nga am-ammotayo nga aramiden daytoy? Mabalinmo met nga ipabuya ti maysa wenno ad-adu pay kadagiti video a masarakan iti “Dagiti Pangsuporta a Resources..”
-
Tapno matulongan ti klasem wenno korummo a makaawat no kasano ti mangparmek iti lubong ken umawat kadagiti bendision a sumangbay manipud iti panangaramid iti daytoy, isurat iti pisarra ti Ti panangparmek iti lubong ket… ken Ti panangparmek iti lubong ket agbanag iti… Kalpasanna mabalinmo nga idawat kadagiti agtutubo a mangrebyu iti mensahe ni Elder Neil L. Andersen a “Panangparmek iti Lubong.” Awisem ida a mangsapul kadagiti wagas a mangileppas kadagitoy a binatog, nga isursurat no ania ti nasursuroda iti pisarra. Paglilinnawagan no ania ti masarakanda. Awisem ti maysa a tao a nasapsapa nga umay a nakasagana a mangibinglay iti maysa nga estoria a mangipakpakita no kasano a nagtalinaed a napudno ni Jesucristo iti Amana iti baet ti pagsusupadian (kitaen, kas pagarigan, iti Mateo 4:1–11; Lucas 22:39–44). Ania ti pagwadan ti Mangisalakan a mangtulong kadatayo a makaawat maipapan iti panangparmek iti lubong? (kitaen iti Juan 16:33).
-
Nasken kadagiti disipulo ni Jesucristo nga “addada iti lubong ngem saanda a taga lubong.” Ti kaadda “iti lubong” mabalin a kayatna a sawen a maipasangotayo iti pagsusupadian no agbiagtayo kadagiti pagrukodantayo. Ngem kayatna pay a sawen a makaimpluensiatayo kadagiti dadduma para iti nasayaat. Tapno maisuro daytoy a prinsipio, mabalinmo nga idawat iti maysa a tao nga umay iti klase a nakasagana a mangibinglay iti maysa wenno ad-adu pay kadagiti estoria iti mensahe ni Presidente Bonnie H. Cordon iti “That They May See” (Liahona, Mayo 2020, 78–80). Ania ti masursurotayo manipud kadagitoy nga estoria maipapan iti panangusar ti silawtayo a mangtulong kadagiti dadduma nga umas-asideg ken ni Jesucristo? Awisem ti klase wenno korum a mangsukisok kadagiti binatog iti mensahe ni Presidente Cordon a mangparegta kadakuada nga agbalin a silaw kadagiti dadduma iti nadangkes a lubong. Awisem ida a mangbasa iti napigsa kadagiti binatog ken mangibinglay no ania ti mariknada a makaparegta nga aramidenda.
Agtignay iti Pammati
Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.
Dagiti Pangsuporta a Resources
-
Mateo 5:14–16; 1 Nephi 15:23–25; Helaman 5:12; Doktrina ken Katulagan 10:5; 27:15–18; 87:8 (No kasano nga agtalinaed a napudno ken ni Jesucristo iti nadangkes a lubong)
-
“Stand Ye in Holy Places—Bloom Where You’re Planted,” “195 Dresses,” “Guided Safely Home” (videos), ChurchofJesusChrist.org
Panangisuro iti Wagas ti Mangisalakan
Inawis ti Mangisalakan ni Pedro nga agpaneknek babaen ti panagsaludsodna, “Siasinoak ti panagkunayo?” (Mateo 16:15). Idi sinungbatan ni Pedro, napapigsa ti pammaneknekna. Ania dagiti saludsod a mangawisto kadagiti sursuruam nga agpaneknek tapno makapapigsa ti Espiritu kadagiti pammaneknekda?