Pebrero 27

Apay a Napateg ti Agnanayon a Kallaysa?

Genesis 24–27

Agiinnuman

Idauluan ti maysa a miembro ti panguluen ti korum wenno klase; 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren iti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania dagiti topiko nga inlawlawag ti bishopric kadagiti mitingtayo iti ward youth council? Ania ti mabalintayo nga aramiden kas maysa a klase wenno korum maibatay kadagita a panaglilinnawag?

• Aywanan dagiti agkasapulan. Kasano a makatulongtayo kadagiti tao iti wagas a kas ken ni Cristo no makitatayo ti panagkasapulan ken ditayo ammo no ania ti sawentayo?

• Awisen ti amin nga umawat iti ebanghelio. Ania ti nasarakantayo iti ebanghelio ni Jesucristo a mangisangbay kadatayo iti rag-o? Kasano a maibinglaytayo ti ayatna kadagiti dadduma?

• Pagkaykaysaen dagiti pamilia para iti kinaagnanayon. Ania ti ar-aramidentayo a mangsapul iti nagnagan dagiti kapuonantayo nga agkasapulan kadagiti ordinansa ti templo? Ania ti maaramidtayo a mangtulong kadagiti dadduma a mangsapul iti nagnagan dagiti kapuonanda?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid kabayatan ti miting.

Isuro ti Doktrina

Idauluan ti maysa a nataengan a lider wenno agtutubo; 25–35 a minuto

Isaganam ti Bagim a Naespirituan

Idi dumteng ti panawen a panagkallaysa ni Isaac, indawat ni Abraham iti katulonganna a mangsarak iti maysa nga asawa para ken ni Isaac. Tinarigagayan da Abraham ken Isaac a mangsarak iti maysa nga asawa para ken ni Isaac a mabalin nga agaramid ken agtungpal kadagiti katulagan iti Apo ken maisurona dagitoy kadagiti annakna. Ni Rebeca ti napudno a babai a simrek iti katulagan ti kallaysa ken ni isaac. Idinto nga ilawlawag dagiti nasantuan a kasuratan a napateg unay ti kallaysa iti Dios, maipaspasango iti karit dagiti pannursuro ti Dios maipapan iti kallaysa iti aldawtayo. Ngem impakdaar dagiti propetana nga “inordenan ti Dios” ti kallaysa” (“Ti Kaamaan: Maysa a Waragawag iti Lubong,” ChurchofJesusChrist.org). Napateg a maawatan dagiti sursuruam a makaawat kadagiti agnanayon a kinapudno maipapan iti kallaysa. Ti panangaramid iti daytoy ti mangtulongto kadakuada nga agsagana ken paneknekan daytoy napateg a paset ti plano ti Nailangitan nga Amatayo.

Kasano ti rikna dagiti agtutubo a sursuruam maipapan iti agnanayon a kallaysa? Kasano a matulongam ida a mangibilang no apay a ti agnanayon a kallaysa ti sentro iti plano ti Nailangitan nga Ama? Bayat ti panagsaganam a mangisuro, mabalinmo nga irebyu ti mensahe ni Elder D. Todd Christofferson iti “Why Marriage, Why Family” (Liahona, Mayo 2015, 50–53). Mabalinmo met nga irebyu ti “Ti Kaamaan: Maysa a Waragawag iti Lubong” (ChurchofJesusChrist.org).

Ti agnanayon a kallaysa ken pamilia ti sentro iti plano ti Nailangitan nga Ama.

Aggigiddan a Masursuruan

Mabalin nga inutoben dagiti agtutubo a sursuruam ti kinapateg ti kallaysa bayat ti panangbasada iti Genesis 24–27 iti daytoy a lawas. Awisem ida a mangrebyu iti Genesis 24. Kiddawem kadakuada a mangibinglay kadagiti bersikulo a mangipakpakita a napateg ti kallaysa kadagiti tao a nailadawan iti daytoy a kapitulo. Awisem ida a mangpanunot no apay a ti agnanayon a kallaysa ti sentro iti plano ti Dios. Makatulong kadakuada dagiti aktibidad iti baba a makaawat a nasaysayaat iti kinapateg ti kallaysa.

• Mabalin nga addaan dagiti miembro ti klase wenno korum kadagiti gundaway a mangilawlawag no apay a napateg kadakuada ti kallaysa. Awisem ida a mangipapan nga adda maysa a gayyemda a mamati a nalausen ti kallaysa ken saan a kasapulan. Mabalinda a suratan daytoy a gayyem a mangilawlawag iti kinapateg ti kallaysa iti plano ti Nailangitan nga Ama. Allukoyem ida a mangiraman kadagiti kinapudno a masarakan iti “Ti Kaamaan: Maysa a Waragawag iti Lubong.” Mabalinda pay nga usaren dagiti nasantuan a kasuratan a masarakan iti “Pangsuporta a Resources” wenno “Kallaysa, Agkallaysa” iti Pangiwanwan iti Nasantuan a Kasuratan (scriptures. ChurchofJesusChrist.org). Awisem ida a mangibinglay iti klase no ania ti insuratda.

• Tapno mangirugi iti panaglilinnawag maipapan iti kinapateg ti kallaysa, isurat iti pisarra ti Apay a napateg ti agnanayon a kallaysa? Ikkam dagiti agtutubo iti sumagmamano a minuto a mangisurat kadagiti sungbat iti saludsod. Awisem ida a mangibinglay kadagiti sungbatda. Mabalinda a sapulen dagiti nayon a sungbat iti mensahe ni Elder D. Todd Christofferson iti “Why Marriage, Why Family” (Liahona, Mayo 2015, 50–53). Mabalinda pay a buyaen ti video “Why Is Marriage Sacred to Heavenly Father?” from “Face to Face with Elder and Sister Renlund” (ChurchofJesusChrist.org). Awisem ida a mangibinglay kadagiti pammaneknekda maipapan iti no apay a napateg ti kallaysa.

• No awatentayo dagiti pannursuro ti Dios maipanggep iti kallaysa ken agkagumaan nga agbiag kadagitoy, umawattayo iti adu a bendision. Ngem sumagmamano a tao—agraman dagiti agar-aramid iti kasayaatan nga agbiagda iti ebanghelio—maipasangoda kadagiti karit iti panangipasdek iti naragsak, agnanayon a kallaysa. Mabalinmo nga idawat kadagiti agtutubo nga agsarita maipapan kadagita a sumagmamano a karit. Ania ti maaramidtayo tapno agsagana para kadagiti kasta a karit? Mabalin pay nga awisem ida a mangbasa iti maudi a dua a benneg ti mensahe ni Elder Neil L. Andersen iti “The Eye of Faith” (Liahona, Mayo 2019, 34–38). Mabalin a paglilinnawagan dagiti miembro ti klasem wenno korummo dagiti pagwadan a nakitadan iti biagda wenno dagiti pakasaritaan iti pamilia dagiti tao a sipupudno a maipaspasango kadagiti karit kas kadagiti dinakamat ni Elder Andersen. Kasano a makatulong ti Mangisalakan iti amin a maipaspasango kadagiti karit bayat ti panagkalikagumda a manggun-od kadagiti bendision ti agnanayon a kallaysa?

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Doktrina ken Katulagan 49:16–17 (Makatulong ti kallaysa a mangipatungpal iti panggep ti Panagparsua)

• Doktrina ken Katulagan 131:1–4; 132:15–21 (Kasapulan ti agnanayon a kallaysa para iti pannakaitan-ok)

• “Renaissance of Marriage,” “How Did Elder and Sister Bednar Meet?” from “Face to Face with Elder and Sister Bednar” (videos), ChurchofJesusChrist.org

Panangisuro iti Wagas ti Mangisalakan

Inawis ti Mangisalakan dagiti pasurotna nga agtignay iti pammati ken agbiag kadagiti kinapudno nga insurona. Kasano a maawismo dagiti sursuruam nga agbiag iti kinapudno a masursuroda?