dagiti agtutubo a lallaki nga umis-isem

Marso 13

Kasano a Makapagrespondeak iti Rigat nga Addaan Pammati?

Genesis 37–41

icon ti panagiinnuman

Agiinnuman

Idauluan ti maysa a miembro ti panguluen ti korum wenno klase; 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren iti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Planuen dagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano a nakitatayon ti ima ti Apo iti biagtayo?

• Agaywan kadagiti agkasapulan. Kasano makapagtitinnulongtayo iti tunggal maysa kadagiti banag a mapaspasarantayo?

• Awisen ti amin nga umawat iti ebanghelio. Kasano a nasaysayaat a mausartayo ti teknolohia kas maysa a ramit iti panangibinglay iti ebanghelio?

• Pagkaykaysaen dagiti pamilia para iti kinaagnanayon. Ania dagiti ar-aramidentayo a mangtulong kadagiti pamiliatayo nga umasideg ken ni Cristo?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti korum wenno klase maipapan kadagiti plano ken awis a naaramid kabayatan ti miting.

Isuro ti Doktrina

Idauluan ti maysa a nataengan a lider wenno agtutubo; 25–35 a minuto

Isaganam ti Bagim a Naespirituan

Idi maysa a barito, napasaran ni Jose iti Egipto iti adu a kita ti rigat. Naipasango iti sinnupanget iti pamiliana ken minaltrato dagiti kakabsatna a lallaki. Naipasango iti sulisog a manglabsing iti linteg ti kinadalus ti dayaw. Ngem imbes a marespeto para iti integridadna, naipisok daytoy iti pagbaludan. Mabalin a maipasango dagiti miembro ti klase wenno korum kadagit kastoy met la a pannubok ken adu a dadduma pay. Bayat ti panagadalmo kadagiti padas ni Jose iti Genesis 37–41, panunotem maipapan kadagiti sursuruam. Utobem no ania a napapateg nga adalen a mabalin nga adda iti biag ni Jose para kadakuada (kitaen met iti Ether 12:27; Henry B. Eyring, “Try, Try, Try,” Liahona, Nob. 2018, 90–93). Mabalin a mangparegta ti pakaammuan ni Jose kadagiti miembro ti klase wenno korum nga agsaludsod iti, “Kasano a makapagrespondeak kadagiti rigattayo nga addaan iti pammati, ken kasano a tulongannakto ti Dios?”

klase dagiti agtutubo a babbai

Babaen iti panangipamaysa iti pammatitayo ken ni Jesucristo, makasaraktayo iti pigsa kadagiti rigattayo.

Aggigiddan a Masursuruan

Ibilang ti panangidawat kadagiti miembro ti klase wenno korum a mangilista iti pisarra ti sumagmamano a pasamak manipud iti biag ni Jose iti Egipto, kas nailadawan iti Genesis 37 ken 39–41. Ti panangipakita iti sumagmamano a ladawan, kas kadagiti adda iti Umaykayo, Sumurot Kaniak—Para kadagiti Indibidual ken Pamilia, makatulong kadakuada a mangipalagip kadagitoy a pasamak. Kasano a maipada dagiti pannubok ni Jose kadagiti karit a pakaipaspasanguan dagiti agtutubo iti agdama? No sibibiag ni Jose ita, ania a balakad ti maitedna kadatayo maipapan iti panagresponde iti rigat? Ania ti mabalin nga isaona maipapan no kasano a nakatulong kenkuana ti relasionna iti Apo? Usarem dagiti aktibidad a kas iti sumaganad a mangtulong kadagiti agtutubo a mangpanunot maipapan no kasano a masungbatanda dagiti karit nga addaan iti pammati ken ni Jesucristo.

• Ti panangadal no kasano ti panagresponde ti Mangisalakan iti rigat ket makatulong kadatayo a mangsango kadagiti rigrigattayo nga addaan iti pammati. Mabalin nga isingasing dagiti agtutubo ti sumagmamano a pagarigan ti rigat a nakaipasanguan ti Mangisalakan ket aggigiddan nga irebyu dagitoy (kitaen iti “DagitiPangsuporta a Resources” para iti sumagmamano a kapanunotan). Ania ti nakaawisantayo maipapan iti no kasano a nagresponde ti Mangisalakan kadagiti panawen ti rigat? Kasano a masurottayo ti pagwadanna bayat ti panangsangotayo iti bukodtayo a rigat?

• No dadduma nalaklaka ti agresponde iti rigat no padasentayo a kitaen daytoy manipud iti pannirigan ti Apo. Tapno matulongan dagiti sursuruam a makaawat iti daytoy, kiddawem kadakuada a mangsapul kadagiti pagarigan ti naidumduma a mabalin nga aramiden ti pannirigan babaen ti panangrebyu iti mensahe ni Elder Rafael E. Pino iti mensahena a “The Eternal Perspective of the Gospel” (Liahona, Mayo 2015, 117–19). Awisem ida a mangibinglay no ania ti nasarakanda. Ania ti isingasing dagitoy a pagarigan maipapan no kasano a mabalintayo ti kumita ken agresponde kadagiti rigattayo? No makasaritanatayo ti Mangisalakan maipapan kadagiti karittayo, ania koma iti panagkunatayo nga isaona? Tapno makatulong a mangsungbat iti daytoy a saludsod, mabalin nga irebyu dagiti agtutubo dagiti nasantuan a kasuratan iti “Dagiti Pangsuporta a Resources.”

• Ibilang ti panagsaludsod kadagiti agtutubo a mangibinglay iti maysa a pagwadan ti maysa a tao a (nalabit maysa a kapuonanna) a nangparegta kadakuada babaen ti wagas a nakaipasanguanna iti narigat a pannubok. Wenno mabalinmo nga ibinglay dagiti makaparegta a pagwadan dagiti tao nga am-ammom. Masansan nga iraman dagiti mensahe iti sapasap a komperensia dagiti estoria dagiti tao a nagresponde iti rigat nga addaan iti pammati (kitaen iti sumagmamano a pagarigan iti “Dagiti Pangsuporta a Resources”). Ibilangmo no ania ti mabalinmo nga ibinglay manipud kadagiti kasta a mensahe a mabalin a napnuan kaipapanan kadagiti sursuruam. Bayat ti panaglilinnawagyo a sangkamaysa kadagitoy a pagarigan, isingasingmo nga agpokus dagiti miembro ti klase wenno korum iti no kasano a nangtulong kadagiti tao ti pammati ken ni Jesucristo kabayatan dagiti rigatda. Mabalinmo pay nga ibinglay ti listaan ni W. Christopher Waddell iti resources nga impaay ti Apo a mangtulong kadatayo kadagiti karittayo, a masarakan iti asideg ti gibus ti mensahena a “Turn to the Lord” (Liahona, Nob. 2017, 94–96).

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Mateo 4:1–11 (Adda pammati ti Mangisalakan kabayatan ti rigat)

• Mateo 14:10–21; Lucas 23:33–34; Juan 19:25–27 (Nagserbi ti Mangisalakan kadagiti dadduma kabayatan ti panagrigatna)

• Mateo 27:45–46; Lucas 23:44–46 (Narikna ti Mangisalakan ti panagmaymaysa kabayatan ti rigat ngem nagtalek iti Dios)

• Mateo 5:38–45; Mosiah 24:8–15; Doktrina ken Katulagan 121:1–8; 122:5–9 (Dagiti pannursuro ti Mangisalakan maipapan iti panangsango iti rigat)

• Neil L. Andersen, “Wounded,” Liahona, Nob. 2018, 83–86

• L. Todd Budge, “Consistent and Resilient Trust,” Liahona, Nob. 2019, 47–49

• Jean B. Bingham, “That Your Joy Might Be Full,” Liahona, Nob. 2017, 85–87

Panangisuro iti Wagas ti Mangisalakan

“No agsaganaka, bay-am a ti pannakaawatmo kadagiti tao a sursuruam ti mangtarabay kadagiti planom” (Panangisuro iti Wagas ti Mangisalakan,7). Kas pagarigan, nainkararagan a planuen dagiti aktibidad nga us-sarem dagiti nasantuan a kasuratan ken dadduma pay a resources a makatulong kadagiti karit a pakaipasanguan dagiti miembro ti klase wenno korum.