Marso 27

Asinoak, ken Asino ti Kayat ti Dios a Pagbalinak?

Exodo 1–6

Agiinnuman

Idauluan ti maysa a miembro ti panguluen ti korum wenno klase; 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren iti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano nga agsapsapultayo iti rag-o iti panangsurot ken ni Jesucristo?

• Aywanan dagiti agkasapulan. Asino iti ward wenno komunidadtayo ti agkasapulan iti tulongtayo? Kasano a makatulongtayo?

• Awisen ti amin nga umawat iti ebanghelio. Kasano a matulongantayo ti tunggal maysa nga agsagana para iti serbisio ti misionario?

• Pagkaykaysaen dagiti pamilia para iti kinaagnanayon. Kasano a makatulongtayo kadagiti panagkagumaan ti wardtayo nga agtrabaho iti aramid iti family history ken templo?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipan dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti maysa a nataengan a lider wenno agtutubo; 25–35 a minuto

Isaganam ti Bagim a Naespirituan

Ti maur-uram a babassit a mulmula a saan a nadadael ti mabalin koma a makaawis iti imatang, ken daytoy ti nakaawisan iti atension ni Moises. Ngem ti ad-adda pay a nakaawis ket ti simmaruno a napasamak. Kinasao ti Dios ni Moises, ken naammuan ni Moises a makitana ti bagina kas iti panangkita ti Dios kenkuana. Iti dayta a pannirigan, impatungpal ni Moises ti maysa a banag babaen ti tulong ti Apo nga imbilangna nga imposible: sinangona ni Faraon ken insalakanna dagiti tao ti Dios.

Kasapulantayo amin dagiti padas a mangtulong kadatayo a mangsukat kadagiti panagduadua iti bagi iti pannakaawat ti Dios no asinotayo ken asino ti mabalin a pagbalinantayo. Maipasango, nangnangruna dagiti agtutubo, kadagiti ulbod a mensahe maipapan iti bukodda a pateg. Ket kas ken ni Moises, ti Dios “adda paaramidna [kadakuada]” (Tema ti Korum ti Aaronic Priesthood). Addaanda iti bukodda a Faraon a sarangten ken bukodda a tao nga ispalen. Kasano a matulongamto ida a manglagip a maipatpategda a babbai ken lallaki nga annak ti nailangitan a nagannak nga “addaan iti nadiosan a kababalin ken agnanayon a pagtungpalan”? (Tema ti Young Women). Utobem daytoy bayat ti panangbasam iti Exodo 1–6. Ibilangmo pay ti panagadal iti Doktrina ken Katulagan 18:10–15 ken ti mensahe ni Presidente Dieter F. Uchtdorf iti “You Matter to Him” (Liahona, Nob. 2011, 19–22).

Makapagbalbaliw ti biagtayo no maawatantayo ti pudno a kinasiasinotayo kas annak ti Dios.

Aggigiddan a Masursuruan

Mabalin a nabasan dagiti miembro ti klasem wenno korummo ti Exodo 1–6 iti daytoy a lawas. Tapno maguyugoyda a mangibinglay no ania ti nasursuroda, mabalinmo a saludsoden kadakuada no kasano ti narikna ni Moises maipapan iti pagrebbenganna a mangispal kadagiti annak ti Israel (kitaen iti Exodo 3:11). Ania dagiti kinapudno nga insuro ti Apo ken ni Moises a makatulong a mangbalbaliw iti panniriganna? (kitaen iti Exodo 3:4–15; 4:10–17; kitaen met iti Moises 1:3–11). Kasano a nakatulong dagitoy a kinapudno ken ni Moises? Kasano a makatulongda kadatayo? Agusar iti maysa nga aktibidad kas iti maysa kadagiti sumaganad a mangtulong kadagiti miembro ti klase wenno korum a mangtakuat no ania ti impalgak ti Dios maipapan iti pudno a kinasiasino, pateg, ken potensialda.

• Kinuna ni Presidente Dieter F. Uchtdorf, “Agusar ti Apo iti maysa a timbangan a maigiddiat iti timbangan ti lubong a mangtimbang iti pateg ti maysa a kararua” (“You Matter to Him,” 22). Tapno ilawlawag daytoy a kapanunotan, mabalinmo nga isurat iti pisarra Kasano nga ipakita ti lubong iti maysa a tao a maipatpateg isuna? Awisenyo dagiti sursuruanyo a mangisingasing kadagiti sungbat. No inkeddengtayo ti pategtayo iti kastoy a wagas, kasano a makaapekto dagitoy a rikna kadagiti pilitayo? Kalpasanna mabalinmo nga isurat iti pisarra Kasano nga ipakita ti Dios iti maysa a tao a maipatpateg isuna? No ibinglay dagiti agtutubo dagiti sungbat, allukoyem ida a mangbasa iti Juan 3:16; Doktrina ken Katulagan 18:10–15; Lucas 15:3–6, 11–32. Mabalinda pay a basaen ti maudi a benneg ti mensahe ni Presidente Uchtdorf. No inkeddengtayo ti pategtayo iti kastoy a wagas, kasano a makaapekto dagitoy a rikna kadagiti pilitayo?

• Dagiti panangnagan ti mangapekto no kasano ti panagrikna ken panangtratotayo iti bagbagitayo ken iti dadduma. Tapno matulongan dagiti miembro ti klase wenno korum a mangibilang no kasano a nagananda ti bagbagida, mabalinmo nga ikkan ti tunggal maysa kadakuada iti sumagmamano a blangko a name tag. Mabalin nga addan ti tunggal tag iti “Hello, siak ni …” naisurat iti ngato. Awisem ida a mangpanunot iti sumagmamano a nadumaduma a balikas wenno ragup ti balikas a mabalinda nga isurat kadagiti name tagda. No punpunuen ti Nailangitan nga Ama dagiti name tag para kadatayo, ania koma ti mabalin nga isuratna? Ania koma ti maisuratmo no kinuna dagiti tag “Hello, makapagbalinak a …”? Mabalin nga utoben dagiti miembro ti klase wenno korum dagitoy a saludsod bayat ti panangbasa iti sumagmamano kadagiti sumaganad a nasantuan a kasuratan: 1 Juan 3:1–3; Moroni 10:32–33; Doktrina ken Katulagan 76:69–70; 84:37–38.

• Naglaon dagiti mensahe ti sapasap a komperensia iti “Dagiti Pangsuporta a Resources” kadagiti pagarigan dagiti tao a nagbalbaliw ti biagda gapu ta naammuanda ti pudno a kinasiasinoda kas annak ti Dios. Ibilangmo ti panangted iti tunggal miembro ti klase wenno korum iti maysa kadagitoy a pagarigan nga utoben ken ibinglayda iti grupo. Mabalin a kayatmo pay nga isarita maipapan no kasano nga inapektuan ti biagmo ti pannakaammom nga annaknatayo amin ti Dios. Awisem dagiti miembro ti klase wenno korum a mangaramid met iti kastoy.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Joy D. Jones, “Value beyond Measure,” Liahona, Nob. 2017, 13–15

• Brian K. Taylor, “Am I a Child of God?” Liahona, Mayo 2018, 12–14

• “Our True Identity,” “How Can I See Myself as God Does?” manipud iti “Face to Face with Elder Rasband, Sister Oscarson, and Brother Owen” (videos), ChurchofJesusChrist.org

• “All About Me” padas iti FamilySearch.org/discovery

Panangisuro iti Wagas ti Mangisalakan

No marikna dagiti agtutubo nga adda panagtalekmo kadakuada, dumur-asto ti panagtalekda iti nadiosan a potensialda, ket pagsiddaawendakanto iti no ania ti kabaelanda nga ipatungpal” (Panangisuro iti Wagas ti Mangisalakan, 28).