“Abril 10. Kasano a Mapapigsak ti Pammatik ken ni Jesucristo Iti Inaldaw? Exodo 14–17,” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022 (2021)
“Abril 10. Kasano a Mapapigsak ti Pammatik ken ni Jesucristo Iti Inaldaw?” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022
Abril 10
Kasano a Mapapigsak ti Pammatik ken ni Jesucristo Iti Inaldaw?
Agiinnuman
Idauluan ti maysa a miembro ti panguluen ti korum wenno klase; 10–20 a minuto
Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna, kas nayon iti panaggiinnuman maipapan kadagiti naipangruna nga aramiden ti klase wenno korum, mabalin a kayatmo nga ilawlawag dagiti impresion ken tema manipud iti sapasap a komperensia. Makatulong dagiti sumaganad a saludsod.
-
Ania dagiti tema wenno mensahe a napateg kadatayo? Ania ti nangpapigsa iti pammatitayo ken ni Jesucristo?
-
Ania ti nangpatibker kadagiti pammaneknektayo kadagiti sibibiag a propeta? Ania ti nariknatayo a makaguyugoy nga aramiden gapu iti no ania ti nasursuro wenno nariknatayo?
-
Ania ti kasapulantayo nga aramiden kas klase wenno korum a manglagip ken agtignay a mayannurot iti balakad a nangngegantayo iti sapasap a komperensia?
Iti ungto ti adalen, no maitutop, aramiden dagiti sumaganad:
-
Paneknekam dagiti pagbatayan a naisuro.
-
Palagipam dagiti miembro ti klase wenno korum maipapan kadagiti plano ken awis a naaramid bayat ti miting.
Isuro ti Doktrina
Idauluan ti maysa a nataengan a lider wenno agtutubo; 25–35 a minuto
Isaganam ti Bagim a Naespirituan
Tapno makapagbiag iti let-ang, kinasapulan dagiti annak ti Israel nga agsursuro no kasano ti agpannuray iti Apo. Dida nagpannuray Kenkuana para kadagiti panangispal iti biag a milagro, kas iti panagsinada iti Nalabaga a Baybay, ken kasta met kadagiti pangtulong iti biag a milagro, kas iti manna a naggapu iti langit. Pudno met ti kastoy para kadagiti sursuruam. No nasken a makapagbiagda iti naespirituan a panagdaliasatda iti let-ang ti mortalidad, nasken nga aramatenda ti pammati ken ni Jesucristo. Ken nasken nga aramatenda dayta a pammati iti inaldaw, saan laeng a sagpaminsan. Sumagmamano kadagiti sursuruam ti mabalin a saan a makarikna a naipangpangruna a napigsa ti pammatida. Mabalinmo a tulongan ida a mangkita iti pammati nga in-inut a dumakkel, iti inaldaw. Mataraken daytoy babaen dagiti babassit ken gagangay a banag nga aramidentayo a saan nga agbalbaliw. Utobem dagitoy a banag bayat ti panangadalmo iti Exodo 14–17 iti daytoy a lawas. Mabalin met nga adalem ti mensahe ni Presidente Dallin H. Oaks a “Dagiti Babassit ken Gagangay a Banag” (Liahona, Mayo 2018, 89–92).
Mapapigsatayo ti pammatitayo iti inaldaw kadagiti babassit ken gagangay a wagas.
Aggigiddan a Masursuruan
Tapno mairugi ti panaglilinnawag, mabalinmo nga idawat kadagiti agtutubo a mangibinglay iti sumagmamano kadagiti inaldaw nga ugalida a makatulong kadakuada nga agaramid iti nasayaat a banag. Iraman dagitoy a banag ti panangpatalinaed a nasayaat ti salun-at wenno panangpapigsa kadagiti pammaneknekda. Ania ti mabalin a mapasamak no saantayo a pinagtalinaed dagitoy nga ugali? Kasano a ti inaldaw a panagkagumaantayo nga agaramid kadagiti nasayaat a banag ket maipada ti panangiwanwan nga inted ti Apo kadagiti Israelita a mangummong iti manna? (kitaen iti Exodo 16:16–21). Mabalinmo a tulongan ti klase wenno korum a mangidilig iti padas dagiti Israelita kadagiti panagkagumaantayo a mangpapigsa iti pammatitayo ken ni Jesucristo iti inaldaw. Kas pagarigan, ania ti ited ti Apo kadatayo a maipada iti inaldaw a manna nga intedna kadagiti Israelita? Ania ti maaramidtayo a maipada iti panangummong iti manna? Tapno agtultuloy ti panaglilinnawagyo, usarem ti maysa wenno ad-adu pay nga aktibidad iti baba wenno maysa a bukodmo.
-
Aggigiddan a basaen ti Alma 37:6–7. Kas maysa a klase wenno korum, mangilista iti pisarra ti sumagmamano kadagiti “babassit ken gagangay a banag” nga inyawis ti Apo kadatayo nga aramiden iti tunggal aldaw nga umasideg Kenkuana. Mabalin nga irebyu dagiti sursuruam kalpasanna ti mensahe ni Presidente Dallin H. Oaks a “Dagiti Babassit ken Gagangay a Banag” a mangsapul kadagiti nayon pay a babassit a banag a mabalin nga adda dakkel nga impluwensiana iti biagtayo. Ania ti adda a mabalin nga epekto dagitoy a banag? Ania dagiti nakaparegtaantayo nga aramiden a mangaramid kadagitoy a banag iti ad-adda nga agtultuloy a paset ti inaldaw a panagbiagtayo?
-
Apay a kasapulan ti pammati ken ni Jesucristo a mataraonan iti inaldaw? Tapno matulongan dagiti miembro a maawatanda a nasaysayaat daytoy, mabalinmo nga ipakita iti maysa wenno ad-adu pay kadagiti video a nailista iti baba ti “Dagiti Pangsuporta a Resources.” Kadagitoy a video, insuro ni Elder D. Todd Christofferson maipapan iti panagkasapulan para kadagiti inaldaw a panagkagumaan a mangsustena iti pammatitayo. Awisem dagiti sursuruam a mangibinglay kadagiti banag a nasursuroda a mangparegta kadakuada a mangpapigsa iti pammatida ken ni Jesucristo iti inaldaw.
-
Ti agtultuloy nga inaldaw a panagkagumaan ti kasayaatan a wagas tapno mapapigsa ti pammatitayo ken ni Cristo. Tapno mailawlawag daytoy a kapanunotan, aggigiddan a mangbasa iti maikatlo a singasing ni Elder David A. Bednar iti mensahena a “More Diligent and Concerned at Home” (Liahona, Nob. 2009, 17–20). Ania dagiti adalen a masursurotayo manipud iti panangiladawanna ti maysa a naipinta a ladawan iti opisinana? Kasano a maaramat dagitoy nga adalen kadagiti panagkagumaantayo a mangbangon iti pammatitayo ken ni Jesucristo? Ti panaggigiddan a panangbasa iti Alma 32:21, 26–43 ket mabalin a mangnayon iti panaglilinnawagyo. Ania dagiti kapanunotan a masarakantayo maipapan iti no kasano ti mangpapigsa iti pammatitayo ken ni Jesucristo?
-
Mabalintayo a papigsaen ti pammatitayo babaen ti panangpilitayo a masursuruan manipud kadagiti padas a mangsubok iti daytoy. Mabalinmo nga ipabuya ti video a “Spiritual Whirlwinds” (ChurchofJesusChrist.org). Paglilinnawagan a sangkamaysa no ania ti maaramidtayo kabayatan ti maysa a pannubok tapno mapapigsa ti pammatitayo. (Kitaen met iti Neil L. Andersen, “Spiritual Whirlwinds,” Liahona, Mayo 2014, 18–21.) Mabalinmo nga idawat kadagiti miembro ti klase wenno korum a mangibinglay kadagiti panawen idi nariknada a nasubok ti pammatida ken ni Cristo ken no ania ti inaramidda a mangpapigsa iti pammatida iti dayta a panawen. Ilawlawag a ti Exodo 14–17 ket mangiladawan ti masansan a panagdayamudom, wenno panagreklamo, dagiti Israelita idi nakapadasda kadagiti pannubok. Kasano a mangpakapsut iti pammatitayo ti panagdayamudom kabayatan dagiti pannuboktayo? Ania ti pagdumaan ti panagdayamudom ken panangyebkas kadagiti pakaseknantayo iti Nailangitan nga Ama kabayatan dagiti narigat a panawen?
Agtignay iti Pammati
Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.
Dagiti Pangsuporta a Resources
-
“Daily Bread: Pattern,” “Daily Bread: Change,” “Daily Bread: Experience” (videos), ChurchofJesusChrist.org
Panangisuro iti Wagas ti Mangisalakan
Tulongam dagiti miembro ti klase wenno korum a makaawat no kasano a maawisda ti Espiritu nga adda kadagiti panaglilinnawagda. Mabalinda nga aramiden daytoy babaen ti “ugalida… , iti wagas a panangtratoda iti tunggal maysa, ken ti wagas a panagriknada maipapan iti ebanghelio” (Panangisuro iti Wagas ti Mangisalakan, 15).