sangapulo a bilin

Abril 24

Apay nga Ikkannatayo ti Dios kadagiti Bilin?

Exodo 18–20

icon ti panagiinnuman

Agiinnuman

Idauluan ti maysa a miembro ti panguluen ti korum wenno klase; 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren iti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania dagiti kaudian a padas nga ad-adda a nangyasideg kadatayo iti Nailangitan nga Ama ken ni Jesucristo?

• Aywanan dagiti agkasapulan. Adda kadi maysa a tao a kaak-akar iti ward wenno nabiit pay a nagkameng iti Simbaan? Kasano a makatulongtayo kadakuada a makarikna iti nabara a pannakapasangbay?

• Awisen ti amin nga umawat iti ebanghelio. Adda kadi ania man nga aktibidad a sumangbay a mabalintayo a pangawisan kadagiti gagayyemtayo a dumar-ay?

• Pagkaykaysaen dagiti pamilia para iti kinaagnanayon. Ania dagiti panagkagumaan a maaramidtayo a mangisurat kadagiti bukodtayo a pakasaritaan?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti maysa a nataengan a lider wenno agtutubo; 25–35 a minuto

Isaganam ti Bagim a Naespirituan

Ti panangbasa iti Exodo 20 mabalin a mangguyugoy kenka a mangpanunot maipapan no apay nga addaantayo kadagiti bilin. Makita ti sumagmamano a tao a naiget dagiti bilin wenno manggandat a mangkontrol kadatayo. Ngem gapu ta ammotayo a ti Dios ti managayat nga Ama, makapagtalektayo kadagiti paglinteganna a para iti pagimbagantayo, uray pay no kanayon a ditayo ammo dagiti gapu para kadagitoy. Inkarina kadatayo a mabalintayo a maammuan a pudno dagiti bilinna no agbiagtayo kadagitoy (kitaen iti Juan 7:17).

Insuro ni Presidente Russell M. Nelson: “Gapu ta ay-ayatendatayo ti Ama ken ti Anak iti agnanayon, naan-anay nga ayat ken gapu ta ammoda a saantayo a makita ti amin a banag a makitada, inikkandatayo kadagiti paglintegan a mangiwanwan ken mangsaluadto kadatayo. Adda napigsa a pagnaigan ti ayat ti Dios ken dagiti paglintegananna” (“The Love and Laws of God” [Brigham Young University devotional, Sept. 17, 2019], 2, speeches.byu.edu).

Apay a pagyamyamananyo dagiti bilin? Ania ti kayatmo a maawatan dagiti miembro ti klasem wenno korummo a maipapan no apay nga inikkannatayo ti Dios kadagiti bilin? Mabalinmo ti agsagana a mangisuro babaen ti panangrebyu iti Exodo 20 ken ti mensahe ni Dallin H. Oaks iti “Loving Others and Living with Differences” (Liahona, Nob. 2014, 25–28).

agtutubo a lalaki nga agad-adal iti nasantuan a kasuratan

Maammuantayo a pudno dagiti bilin ti Dios no agbiagtayo kadagitoy.

Aggigiddan a Masursuruan

Tapno matulongan dagiti miembro ti klase wenno korum irebyu ti Sangapulo a Bilin, mabalinmo nga idawat kadakuada a mangilista kadagitoy a bilin agingga a kabaelanda manipud iti memoria. No kasapulanda ti tulong, mabalinda a kitaen iti Exodo 20:3–17. Apay a mangted kadatayo ti Dios kadagiti bilin? Tapno makatulong a mangsungbat iti daytoy a saludsod, mabalinda nga ilawlawag ti sumagmamano kadagiti Sangapulo a Bilin iti babassit a grupo. Kasano a ti panagtungpal kadagitoy a bilin ket makatulong kadatayo a mangsapul iti ragsak ken umas-asideg iti Dios? Makatulong dagiti sumaganad a kapanunotan kadagiti sursuruam a makasursuro iti ad-adu pay maipapan no apay nga inikkannatayo ti Dios kadagiti bilin.

• Naglaon dagiti nasantuan a kasuratan kadagiti sungbat iti saludsod “Apay nga ikkannatayo ti Dios kadagiti bilin?” Mabalinmo nga awisen dagiti miembro ti klase wenno korum a mangsapul kadagiti sungbat iti maysa wenno ad-adu pay kadagiti nasantuan a kasuratan a masarakan iti “Dagiti Pangsuporta a Resources” Kalpasanna idawatmo kadakuada a mangibinglay iti maysa a banag a nasarakanda. Mabalin met a buyaenda dagiti sumaganad a video a mangsapsapul kadagiti nalawag a pannakaammo ken pannakaawat a nairaman iti “Instructions Included,” “Why Does God Give Us Commandments?” (ChurchofJesusChrist.org

• Tapno makatulong kadagiti miembro iti klase wenno korum a maawatanda no apay a mangted ti Dios kadatayo kadagiti bilin, mabalinmo nga idilig ti kaadda dagiti bilin ti Dios kadagiti padas a mabalinda nga inaig. Kas pagarigan, mabalinmo nga idawat kadakuada a mangipapan nga addada iti lugan iti kalsada iti bantay nga asideg iti nateppang a rangkis ket adda maysa nga alad iti bangir ti kalsada. Kiddawem kadakuada a mangilawlawag iti sabali a tao kadagiti saludsod kas iti sumaganad: Kasano a maipada dagiti bilin ti Dios iti alad? Kasano a binendisionannatayo ti panagtungpal kadagiti bilin? Ania dagiti dadduma pay a panangidilig a makatulong kadatayo a makaawat no apay nga ikkannatayo ti Dios kadagiti bilin ken no apay a nasken nga agtungpaltayo kadagitoy? Para iti sumagmamano a pagarigan, mabalinmo nga awisen ida a mangrebyu iti maysa kadagiti mensahe wenno video a masarakan iti “Dagiti Pangsuporta a Resources.” Kiddawem kadakuada a mangibinglay kadagiti panangidilig a masarakanda ken pailawlawag no ania ti masursuroda.

• Mabalin a ti panaglilinnawagyo ti mangiturong kadagiti miembro ti klase wenno korum tapno paglilinnawagan no kasano ti nasken a panangtratotayo kadagiti saan a mamati wenno agtungpal iti sumagmamano a bilin. Mabalinmo nga awisen ida a mangsapul iti balakad iti mensahe ni Presidente Dallin H. Oaks a “Loving Others and Living with Differences.” Mabalinmo ti agdamag kadagiti saludsod kas kadagitoy: Kasano ti nasken a panangtratotayo kadagiti mangpili nga agbiag a maiduma iti aramidentayo? Kasano a makitatayo ti nasayaat kadagiti dadduma no agaramidda kadagiti sabali a pili ngem iti aramidentayo?

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Deuteronomio 10:12–13; Alma 36:30; Doktrina ken Katulagan 1:24–28; 82:8–10; 93:20, 28; 130:18–21 (No apay a mangted ti Dios kadatayo iti bilin)

• Jeffrey R. Holland, “We Are All Enlisted” (Liahona, Nob. 2011, 44–47; kitaen met iti video “Stay within the Lines”); Richard G. Scott, “The Atonement Can Secure Your Peace and Happiness” (Liahona, Nob. 2006, 40–42; kitaen met iti video “A Secure Anchor”); Von G. Keetch, “Blessed and Happy Are Those Who Keep the Commandments of God” (Liahona, Nob. 2015, 115–17; kitaen met iti video a kapada ti paulona)

Panangisuro iti Wagas ti Mangisalakan

“Kadagiti panagkagumaam nga agbiag ken mangisuro nga ad-adda a kas iti Mangisalakan, saanmonto a maliklikan nga agkurangka sagpaminsan. Saanka a mapukawan iti namnama; ketdi, bay-am a dagiti biddut ken pagkapsutam ti mangyasideg kenka iti Nailangitan nga Ama ken iti Mangisalakan” (Panangisuro iti Wagas ti Mangisalakan, 14).