“Mayo 8. Kasano nga Ammok a Pinakawannak ti Dios? Exodo 35–40; Levitico 1; 16; 19,” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022 (2021)
“Mayo 8. Kasano nga Ammok a Pinakawannak ti Dios?” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022
Mayo 8
Kasano nga Ammok a Pinakawannak ti Dios?
Agiinnuman
Idauluan ti maysa a miembro ti panguluen ti korum wenno klase; 10–20 a minuto
Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren iti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano nga agtignay iti no ania ti paglilinnawaganyo.
-
Abgiag iti ebanghelio. Kasano a ti yaasideg iti Apo ket makatulong kadatayo a mangsango kadagiti karit ken pannuboktayo?
-
Aywanan dagiti agkasapulan. Asino ti am-ammotayo nga agkasapulan kadagiti kararagtayo ken iti pannakigayyemtayo?
-
Awisen ti amin nga umawat iti ebanghelio. Ania dagiti plano a mangibinglay iti ebanghelio ti napaglilinnawagan kadagiti miting ti youth council iti ward? Kasano a mairaman ti klase wenno korumtayo?
-
Pagkaykaysaen dagiti pamilia para iti kinaagnanayon. Kasano a ti panangitrabaho iti aramid iti family history ket mangpapigsa kadagiti relasiontayo iti Nailangitan nga Ama ken ni Jesucristo?
Iti ungto ti adalen, no maitutop, aramiden dagiti sumaganad:
-
Paneknekam dagiti pagbatayan a naisuro.
-
Palagipam dagiti miembro ti klase wenno korum maipapan kadagiti plano ken awis a naaramid bayat ti miting.
Isuro ti Doktrina
Idauluan ti maysa a nataengan a lider wenno agtutubo; 25–35 a minuto
Isaganam ti Bagim a Naespirituan
No dadduma masdaaw dagiti tao no “inaramidda ti umdas” tapno mapakawan dagiti basbasol. Nupay agkasapulan daytoy iti panagkagumaan nga agbabawi, kangrunaanna a saantayo a mapakawan gapu ta kumpletuentayo ti listaan wenno checklist wenno agaramid iti masinunuo nga aramiden. Mapakawantayo no awatentayo ti asi nga indiaya ni Jesucristo. Iti kastoy a wagas a mabalin nga agbalbaliw dagiti ugalitayo.
Kadagiti nagkauna a panawen, intudo dagiti ritual ken sakripisio ti linteg ni Moises dagiti Israelita iti Pannubbot ti Mangisalakan. Kas iti inlawlawag ti Apo iti Levitico 16:30, “Iti daytoy nga aldaw maaramidto ti pannakaabbongyo, tapno pakadalusanyo, maugasankayonto kadagiti amin a basbasolyo iti saklang ni Jehova.” Kinaagpaysona, ti ritual saan a makaited kadatayo iti pannakapakawan ti basol. Aggapu ti pannakapakawan ken ni Jesucristo. Iti aldawtayo, itudo dagiti ordinansa kas panagbuniag ken ti sakramento dagiti pampanunot ken puspusotayo iti Mangisalakan. Tulongandatayo a makaawat a kanayon a pakawanennatayonto no agbabawitayo.
Kasano a natulongannaka ti Nailangitan nga Ama a mangammo a napakawankan? Mabalinmo nga adalen ti Mosiah 4:1–3 ken ti mensahe ni Presidente Tad R. Callister a “The Atonement of Jesus Christ” (Liahona, Mayo 2019, 85–87). Makatulong daytoy a mensahe kadagiti sursuruam a makaawat a pakawanennatayo ti Nailangitan nga Ama no agbabawitayo.
Mapakawantayo no awatentayo ti asi nga indiaya ni Jesucristo.
Aggigiddan a Masursuruan
Mabalinmo nga irugi babaen ti panangi-display ti ladawan ti Mangisalakan iti Getsemani ken iti krus (kitaen iti Libro ti Arte ti Ebanghelio, dagiti num. 56–57). Awisem dagiti agtutubo nga agsukisok iti Levitico 1:1 9; 16:15–16, 30. Kiddawem kadakuada a mangibinglay kadagiti ragup ti balikas a mangipalagip kadakuada maipapan iti Pannubbot ti Mangisalakan. Kasano a dagiti sakripisio a nailadawan kadagitoy a bersikulo ket nakatulong kadagiti Israelita a mangpaspasungad iti Pannubbot ti Mangisalakan? Ania ti makatulong kadatayo a manglagip iti Pannubbot ti Mangisalakan? Ania ti makatulong kadatayo a mangrikna iti ayat ken pammakawan ti Mangisalakan? Makatulong dagiti aktibidad iti baba a mangipaawat a nasaysayaat kadagiti agtutubo a pakawanennatayonto ti Dios.
-
Sumagmamano a tao kadagiti nasantuan a kasuratan ti nailadawan iti riknada idi pinakawan ida ti Nailangitan nga Ama. Mabalin a basaen dagiti miembro ti klasem wenno korummo ti sumagmamano a pagarigan (kitaen iti “Dagiti Pangsuporta a Resources”). Awisem ida a mangaramid iti listaan dagiti ragup ti balikas manipud kadagitoy a bersikulo a mangiladawan no ania ti rikna ti mapakawan. Mabalinmo a kiddawen kadakuada a mangipeksa iti bukodda a balikas no ania ti rikna ti pannakapakawan kadakuada. Ania ti masursurotayo maipapan iti Dios manipud kadagitoy a bersikulo? Nalabit a mabalinmo nga ibinglay iti bukodmo a rikna maipapan iti pammakawan.
-
No dadduma saan a sigurado dagiti tao no napakawandan gapu ta dida sigurado no pudno a nagbabawidan. Ilawlawag ti mensahe ni Elder Dale G. Renlund a “Repentance: A Joyful Choice” no kasano ti sipupudno nga agbabawi ken umawat iti pammakawan ti Dios (Liahona, Nob. 2016, 121–24). Mabalinmo nga isurat iti pisarra dagiti paulo a Pudno a Panagbabawi ken Dagiti Banag a Maibilang iti Wagas ti Panagbabawi. Dawatem kadagiti sursuruam a mangsapul kadagiti pannursuro iti mensahe a maibilang iti baba ti paulo. Ania ti masursurotayo maipapan ti Mangisalakan ken ti pammakawanna manipud iti maudi a tallo a parapo iti daytoy a mensahe?
-
Mabalin a nagbabawin ti sumagmamano a tao ngem dida marikna a napakawandan. Mabalin a daytoy ket gapu ta saanda a kabaelan a pakawanen ti bagbagida. Ti balakad iti mensahe ni Presidente Tad R. Callister iti “The Atonement of Jesus Christ” ket makatulong kadakuada. Mabalin a basaen ti klase wenno korum ti benneg a mangrugi iti “2. Basol.” Kiddawem kadakuada a mangsarak iti balakad a mabalinda nga ibinglay iti maysa a gayyem wenno miembro ti pamilia a makarikna a nagbasol uray kalpasan ti panagbabawina. Mangted iti oras kadagiti agtutubo a mangiburay kadagiti riknada maipapan iti Mangisalakan, a nangaramid a posible para kadatayo nga agbabawi ken mapakawan.
Agtignay iti Pammati
Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti pannakilangenda iti Nailangitan nga Ama ken ni Jesucristo.
Dagiti Pangsuporta a Resources
-
Enos 1:1–8; Mosiah 4:1–3; Alma 24:7–10; 36:17–21 ((No kasano ti narikna dagiti tao idi napakawanda)
-
Isaias 1:18; Mosiah 26:30; Moroni 6:8; Doktrina ken Katulagan 58: 42–43; 64:10 (Ikari ti Apo a pakawanennatayo)
-
Russell M. Nelson, “We Can Do Better and Be Better,” Liahona, Mayo 2019, 67–69
-
Craig A. Cardon, “The Savior Wants to Forgive,” Liahona, Mayo 2013, 15–18
Panangisuro iti Wagas ti Mangisalakan
Sinuruannatayo ti Mangisalakan nga agusar kadagiti nasantuan a kasuratan a mangsapul kadagiti sungbat dagiti bukodtayo a saludsod. Kasano a matulongam dagiti sursuruam nga agtarigagay a mangusar kadagiti nasantuan a kasuratan ken balikas dagiti propeta bayat ti panagsapulda kadagiti sungbatda?