Mayo 22

Kasano a Maipakitak ti Panagyamanko iti Dios?

Deuteronomio 6–8; 15; 18; 29–30; 34

Agiinnuman

Idauluan ti maysa a miembro ti panguluen ti korum wenno klase; 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano nga agtignay iti no ania ti paglilinnawaganyo.

• Agbiag iti ebanghelio. Ania ti napaglilinnawagantayo itay napalabas, ken ania dagiti naaramid nga awis wenno naidutok nga aramiden? Ania ti naaramidtayo tapno agtignay kadagita nga awis?

• Aywanan dagiti agkasapulan. Ania ti maaramid wenno maisaotayo a makatulong kadagiti mabalin a makarikna iti panagmaymaysa wenno adayo manipud iti Nailangitan nga Ama?

• Awisen ti amin nga umawat iti ebanghelio. Ania dagiti sumagmamano a wagas a pakatulongantayo kadagiti dadduma a makarikna iti ayat ni Jesucristo?

• Pagkaykaysaen dagiti pamilia para iti kinaagnanayon. Ania dagiti kapanunotan a maibinglaytayo iti tunggal maysa a makatulong a mangpapigsa kadagiti pamiliatayo?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti maysa a nataengan a lider wenno agtutubo; 25–35 a minuto

Isaganam ti Bagim a Naespirituan

Kanayon a bambantayannatayo ken bembendisionannatayo ti Dios. Ngem iti amin a pannakasinga ken pannulisog a pakaipasanguantayo, nalaka ti manglipat maipapan Kenkuana. Daytoy ti napasamak kadagiti Israelita iti adu a gundaway, agraman no kabayatan dagiti narigat a panawen a panagallaallada iti let-ang. Ngem siaasi ti Apo a nangiturong kadakuada iti naikari a daga—maysa a lugar nga adda nain-indaklan a liwliwa ken adu a pannulisog, a mabalin a pakasulisoganda a manglipat manen Kenkuana. Naisangrat dagiti pangiturong ti Apo iti Deuteronomio 6 a pangtulong kadagiti Israelita a kanayon a manglaglagip Kenkuana ken dagiti balikasna (kitaen kadagiti bersikulo 6–9).

Kasano a pagtalinaedem ti Apo ken dagiti balikasna iti pusom— “malaksid no lipatem ti Apo”? (Deuteronomio 6:12). Kasano a ti pananglaglagip iti Apo ket makatulong kadatayo a makarikna iti panagyaman iti amin a kasasaad ti biagtayo? Bayat ti panagsaganam a mangisuro, ibilang ti panangrebyu iti Deuteronomio 12:6–9, 12 ken Lucas 17:11–19. Mabalinmo pay nga irebyu ti mensahe ni Presidente Dieter F. Uchtdorf a “Grateful in Any Circumstances” (Liahona, Mayo 2014, 70–77).

Ti pananglaglagip iti Apo ket makatulong kadatayo a makarikna iti panagyaman iti amin a kasasaad ti biag.

Aggigiddan a Masursuruan

Tapno mangirugi iti panaglilinnawag maipapan iti pananglaglagip iti Apo, mabalinmo nga awisen dagiti agtutubo a mangibinglay kadagiti padasda idi nalipatanda ti maysa a banag a napateg. Ania dagiti resulta? Ania ti mapasamak no malipatantayo dagiti naindaklan a banag nga inaramid ti Apo para kadatayo? Awisem ti klasem wenno korummo a mangrebyu iti Deuteronomio 6:4–9, 20–25. Ania ti isuro dagitoy a bersikulo maipanggep iti pananglagip iti kinaimbag ti Dios iti biagtayo? Pumili iti maysa wenno ad-adu pay nga aktibidad iti baba a makatulong kadagiti sursuruam a makasursuro no kasano a makarikna iti ad-adda a panagyaman iti kinaimbag ti Dios ken ipeksa ti panagyamanda Kenkuana.

• Ti aggigiddan a panangbasa iti Lucas 17:11–19 ket makatulong kadagiti agtutubo a mangpanunot no apay a napateg para kadatayo ti mangipakita iti panagyaman iti Dios. Ibilang ti panagdamag kadagiti saludsod a mangtulong kadakuada a mangisarita iti daytoy nga estoria iti biagda. Kas pagarigan, ania dagiti sumagmamano a posible a rason no apay siam kadagiti sangapulo nga agkukutel ti saan a nagyaman iti Mangisalakan? Apay a no dadduma mapaaytayo a mangyebkas iti panagyaman iti Dios? Dawaten kadagiti sursuruanyo a mangpanunot maipapan kadagiti panawen idi nariknada ti pananagyaman, uray no narigat daytoy. Ania ti epekto kadatayo ti panangyebkas iti panagyaman? Apay a napateg ti panangyebkas iti panagyaman iti Dios? (Kitaen kadagiti reperensia iti nasantuan a kasuratan “Dagiti Pangsuporta a Resources” para iti sumagmamano a sungbat.) Ania ti maaramidtayo a mangipakita iti panagyaman iti Dios?

• Adu dagiti himno a pagdaydayaw ken panagyaman kas iti “How Great Thou Art” ken “Count Your Blessings” (Hymns, nos. 86, 241). Mabalinmo nga idawat kadagiti agtutubo a mangsapul kadagiti balikas kadagitoy a himno para kadagiti banag a mariknada a pagyamananda. Awisem ida a mangibinglay kadagiti banag a nasarakanda ken mangilawlawag no apay nga agyamanda para kadagitoy. Mabalinyo nga aggigiddan a kantaen ti sumagmamano kadagitoy a himno.

• Tulongannatayo ti mensahe ni Dieter F. Uchtdorf a “Grateful in Any Circumstances” a makaawat no kasano ti agbalin nga ad-adda a managyaman. Ti maysa a wagas a makatulong kadagiti agtutubo a makasursuro manipud iti daytoy a mensahe ket bingayen ida iti babassit a grupo ket mangted iti tunggal grupo iti maysa a benneg ti mensahe. Kiddawem kadakuada a mangibinglay iti maysa a ragup ti balikas wenno binatog a mariknada a manggupgop no ania ti insuro ni Presidente Uchtdorf. Awisem ida a mangibinglay iti maysa a banag a nasursuroda maipapan ti panagyaman. Mabalin pay a buyaen ti video “President Russell M. Nelson on the Healing Power of Gratitude” (ChurchofJesusChrist.org). Ania ti maaramidtayo tapno agbalin a “managyaman iti ania man a kasasaad,” ania man dagitoy? Ania dagiti pagarigan a nakitatayon kadagiti tao nga agyamyaman iti baet dagiti narigat a kasasaadda?

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Mosiah 2:19–24 (Nasken nga agdayaw ken agyamantayo iti Dios)

• Alma 34:38; 37:37; Doktrina ken Katulagan 46:32; 59: 7, 15–21 (Nasken nga agyamantayo iti amin a banag)

• Salmo 107: 8–9; Taga Filipos 4:6–7; Doktrina ken Katulagan 78:19 (Dagiti bendision ti panagyaman)

• Dale G. Renlund, “Consider the Goodness and Greatness of God,” Liahona, Mayo 2020, 41–44

• “Panagyaman,” iti Para iti Pigsa dagiti Agtutubo (booklet, 2011), 18

Panangisuro iti Wagas ti Mangisalakan

Am-ammo ti Mangisalakan dagiti pasurotna ken no asino ti pakapagbalinda. Inaringan daytoy a pannakaammo ti wagas a panangisurona kadakuada. Kasano a masursurom maipapan kadagiti paggugusto, kasapulan, ken karit dagiti sursuruam tapno makaisuroka kadakuada a nasamsamay?