“Hunio 12. Kasano a Mangngegko ti Timek ti Apo? Ruth; 1 Samuel 1–3,” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022 (2021)
“Hunio 12. Kasano a Mangngegko ti Timek ti Apo?” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022
Hunio 12
Kasano a Mangngegko ti Timek ti Apo?
Agiinnuman
Idauluan ti maysa a miembro ti panguluen ti korum wenno klase;10–20 a minuto
Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.
-
Agbiag iti ebanghelio. Ania dagiti nabiit pay a padas a nangpapigsa kadagiti pammaneknektayo?
-
Aywanan dagiti agkasapulan. Asino ti agkasapulan iti tulong ken karkararagtayo? Ania ti mariknatayo a nakaawisan ti riknatayo nga aramiden a makatulong kadakuada?
-
Awisen ti amin nga umawat iti ebanghelio. Kasano a makapagbalintayo a silaw kadagiti miembro ti pamilia wenno gagayyem a saantayo a kapada iti pammati?
-
Pagkaykaysaen dagiti pamilia para iti kinaagnanayon. Kasano a maipakitatayo ti ad-adda pay nga ayat ken suporta para kadagiti pamiliatayo ken makaaramid iti positibo a pakaidumaan kadagiti pagtaengantayo?
Iti ungto ti adalen, no maitutop, aramiden dagiti sumaganad:
-
Paneknekam dagiti pagbatayan a naisuro.
-
Palagipam dagiti miembro ti klase wenno korum maipapan kadagiti plano ken awis a naaramid bayat ti miting.
Isuro ti Doktrina
Idauluan ti maysa a nataengan a lider wenno agtutubo; 25–35 a minuto
Isaganam ti Bagim a Naespirituan
Mabalin a kabaelan ti adu a miembro ti klasem wenno korummo ti mangisarita iti agtutubo a ni Samuel. Idi nagsao ti Apo kenkuana, awan pay ti umdas a padas ni Samuel iti paltiing tapno mangilasin iti timek ti Apo. Ti mannursuro ni Samuel, ni Eli, nakatulong ken ni Samuel a nangsursuro a mangilasin iti daytoy a timek. Kas ken ni Eli, addaanka iti gundaway nga agpaneknek kadagiti sursuruam a kayat ti Apo a makisao kadakuada. Mabalinmo a tulongan ida a mangsursuro a mangilasin iti timek ti Apo, a kas met iti panangsursurom a dumngeg Kenkuana. Sangkamaysa, a makapagadalkayo no ania ti insuro dagiti propeta maipapan iti bukod a paltiing. Ket masursurom nga isao iti Apo, a kas iti inaramid ni Samuel, “Agsaoka; ta ti adipenmo denggenna” (1 Samuel 3:10).
Kas nayon iti panangbasam iti 1 Samuel 3 iti daytoy a lawas, mabalinmo ti agsagana a mangisuro babaen ti panangbasa iti mensahe ni Presidente Russell M. Nelson “Hear Him” (Liahona, Mayo 2020, 88–92).
Indawat ni Presidente Russell M. Nelson kadatayo a “mangpadur-as iti naespirituan a kabaelan[tayo] nga umawat iti paltiing.”
Aggigiddan a Masursuruan
Tapno mangisagana kadagiti sursuruam para iti panaglilinnawag ita nga aldaw, ibilang ti panangidawat kadakuada a mangrebyu iti 1 Samuel 3:1–14. Awisem ida a mangibinglay no ania ti masursuroda manipud iti daytoy a pakaammuan maipapan iti pannakangngegda iti timek ti Apo. Ania dagiti sumagmamano a nayon a wagas a makisao ti Apo kadatayo? Makatulong dagiti sumaganad nga aktibidad kadagiti agtutubo a mangpauneg iti pannakaawatda maipapan iti bukod a paltiing.
-
Adtoy ti maysa a wagas a makatulong kadagiti sursuruam a nasaysayaat a makaawat no kasano ti umawat iti paltiing. Mabalinmo nga isurat iti pisarra dagiti reperensia ti nasantuan a kasuratan a naisingasing iti “Dagiti Pangsuporta a Resources” wenno dadduma pay nga ammom). Awisem dagiti agtutubo a mangbasa iti tunggal nasantuan a kasuratan. Kalpasanna mabalinda nga isurat iti pisarra iti abay ti tunggal reperensia ti nasantuan a kasuratan no ania ti isuro dayta a nasantuan a kasuratan maipapan iti panangawat iti bukod a paltiing. Awisem ida a mangibinglay kadagiti padasda iti panagkalikagum a manggun-od ken panangawat iti paltiing. No maitutop, ibinglaymo dagiti bukodmo a padas.
-
Umawattayo kadagiti naindaklan a bendision no masursurotayo ti dumngeg iti timek ti Apo. Mabalinmo nga irugi ti panaglilinnawag maipapan iti daytoy babaen ti panangidawat kadagiti agtutubo a mangibinglay kadagiti gapu ti mabalin a panagkasapulanda iti paltiing. Kalpasanna kiddawem kadakuada a mangsukisok iti mensahe ni Presidente Russell M. Nelson iti “Hear Him.” Awisem ida a mangsapul iti balakad a makatulong kadakuada a makaawat no kasano ti dumngeg iti timek ti Apo. Mabalinmo pay nga ipabuya ti maysa wenno ad-adu pay a video manipud iti “Hear Him” collection (ChurchofJesusChrist.org/media). Apay a napateg unay nga agsursurotayo a dumngeg iti timek ti Apo? Allukoyem dagiti agtutubo a mangisurat no ania ti nasursuroda kadagiti diurnalda wenno iti papel nga i-display iti pagtaenganda.
-
Mabalin a kayat dagiti agtutubo a sursuruam no kasano a maammuan no makisasao kadakuada ti Espiritu Santo. Ibilang ti panangipabuya kadagiti video a “How Can I Tell the Difference between the Holy Ghost and My Emotions?” ken “How Can I Feel the Holy Ghost More Often?” manipud iti “Face to Face with President Eyring and Elder Holland” (ChurchofJesusChrist.org). Ania ti masursurotayo manipud kadagitoy a video maipapan iti panangrikna kadagiti pannignay ti Espiritu ken ti pampanunottayo? Mabalin nga ibinglay dagiti miembro ti klase wenno korum no kasano ti isusungbatda iti maysa a gayyem nga addaan kadagiti saludsod a maipada kadagiti nailawlawag kadagitoy video.
Agtignay iti Pammati
Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.
Dagiti Pangsuporta a Resources
-
1 Ar-ari 19:9–12; Helaman 5:29–31; Doktrina ken Katulagan 6:14–16, 21–23; 8:2–3; 11:12–14 (Dagiti wagas a pannakisao kadatayo ti Apo)
-
Doktrina ken Katulagan 9:7–9 (Agkasapulan ti paltiing iti bukod a panunot ken panagadaltayo)
-
Ronald A. Rasband, “Let the Holy Spirit Guide,” Liahona, Mayo 2017, 93–96
-
Insuro ni Presidente Russel M. Nelson: “Kadagiti umay nga aldaw, saanto nga agbalin a posible ti agbiag a naespirituan no awan ti pangiwanwan, pangiturong, pangliwliwa, ken agtultuloy nga impluensia ti Espiritu Santo. Patpatgek a kakabsat, ipakaasik kadakayo a padur-asenyo ti naespirituan a kabaelanyo nga umawat iti paltiing” (“Revelation for the Church, Revelation for Our Lives,” Liahona, Mayo 2018, 96).