“Hunio 26. Apay a Napateg iti Plano ti Dios ti Kinadalus ti Dayaw? 2 Samuel 5–7; 11–12; 1 Ar-ari 3; 8; 11,” Umaykayo, Sumurot Kaniak — Para kadagiti Korum ti Aaronic Priesthood ken dagiti Klase ti Young Women: Dagiti Topiko a Mainaig iti Doktrina 2022 (2021)
“Hunio 26. Apay a Napateg iti Plano ti Dios ti Kinadalus ti Dayaw?” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022
Hunio 26
Apay a Napateg iti Plano ti Dios ti Kinadalus ti Dayaw?
2 Samuel 5–7; 11–12; 1 Ar-ari 3; 8; 11
Agiinnuman
Idauluan ti maysa a miembro ti panguluen ti korum wenno klase; 10–20 a minuto
Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.
-
Agbiag ti ebanghelio. Kasano nga immas-asidegtayo iti Mangisalakan? Kasano a padpadasentayo ti agbalin nga ad-adda pay a kas Kenkuana?
-
Aywanan dagiti agkasapulan. Asino ti adda iti panunottayo itay laeng? Kasano a matulongantayo dagitoy a tao?
-
Awisen ti amin nga umawat iti ebanghelio. Kasano a masungbatantayo dagiti saludsod dagiti gagayyemtayo maipapan iti Simbaan iti wagas a mangpapigsa iti pammatida iti Mangisalakan?
-
Pagkaykaysaen dagiti pamilia para iti kinaagnanayon. Ania dagiti sumagmamano a wagas a mabalin a maikonektatayo a nasaysayaat kadagiti miembro a kabagyan ti pamilia, a kas kadagiti lelang ken lelong iti tumeng ken kakasinsin?
Iti ungto ti adalen, no maitutop, aramiden dagiti sumaganad:
-
Paneknekam dagiti pagbatayan a naisuro.
-
Palagipam dagiti miembro ti klase wenno korum maipapan kadagiti plano ken awis a naaramid bayat ti miting.
Isuro ti Doktrina
Idauluan ti maysa a nataengan a lider wenno agtutubo; 25–35 a minuto
Isaganam ti Bagim a Naespirituan
Ti Nailangitan nga Amatayo, nga agtarigagay nga agbalintayo a naragsak, nangted kadatayo iti linteg ti kinadalus ti dayaw. Ket ni Satanas, nga agtarigagay nga agbalintayo a naay-ay, isurona a saan a napateg daytoy a linteg. Aramidenna ti amin a kabaelanna a mangsulisog kadatayo nga agaramid iti seksual a basol. Mabalin a maimpluensiaan dagiti agtutubo babaen dagiti imahe ken mensahe a mangsuppiat iti no ania ti isursuro ti Dios maipapan iti seksualidad. Kasapulan ti tunggal maysa kadatayo ti agannad kadagiti kasta a pannulisog ken ikarigatantayo ti mangpatalinaed a nadalus dagiti pampanunot, balikas, ken tignaytayo iti unos ti panagbiagtayo. Masursurotayo daytoy nga adalen manipud iti naliday a padas ni Ari David. Isu ti pagwadan ti naindaklan a kinapudno. Ngem nagpasulisog ket naglabsing iti linteg ti kinadalus ti dayaw (kitaen iti 2 Samuel 11:1–5).
Mabalinmo ti agsagana a mangisuro babaen ti panangbasam iti 2 Samuel 11, mensahe ni Elder David A. Bednar iti “We Believe in Being Chaste” (Liahona, Mayo 2013, 41–44), ken dadduma pay a resources maipapan iti kinadalus ti dayaw. Ania ti mabalin a mangparegta kadagiti miembro ti klase wenno korum a mangkita iti kinadalus ti dayaw iti wagas a panangkita ti Dios iti daytoy? Ania ti makatulong kadakuada a mangsupring iti wagas a panangkita ni Satanas iti daytoy?
Tapno agtalinaed a napudno iti linteg ti Dios iti kinadalus ti dayaw, nasken nga ikarigatantayo iti inaldaw ti mangpatalinaed a natarnaw kadagiti pampanunot, balikas, ken tignaytayo.
Aggigiddan a Masursuruan
Daytoy ti maysa a wagas a mangyam-ammo iti topiko maipapan iti kinadalus ti dayaw bayat ti panangtulong kadagiti sursuruam a mangrebyu no ania ti nabasada kadagiti nasantuan a kasuratan. Isurat dagiti balikas a David ken Jose iti pisarra. Kalpasanna aggigiddan nga irebyu ti 2 Samuel 11:1–5 ken Genesis 39:7–12. Kasano a nagresponde da David ken Jose iti sulisog nga agaramid iti seksual a basol? Ania ti masursurotayo manipud kadagiti pagwadanda? Usarem dagiti sumaganad nga aktibidad wenno sumagmamano iti bukodmo a mangparegta iti panaglilinnawag maipapan no apay a napateg ti kinadalus ti dayaw iti plano ti Dios.
-
Mabalin a mairanud dagiti agtutubo a sursuruam manipud iti panangilawlawag iti kaipapanan ti pagrukodan ti Apo iti kinadalus iti seks. Awisem ida a mangrebyu iti “Kinadalus iti Seks” iti Para iti Pigsa dagiti Agtutubo ([buklet, 2011], 35–37) wenno ti uppat a parapo ti “Ti Kaamaan: Maysa a Waragawag iti Lubong” (ChurchofJesusChrist.org). Kasano a maigiddiat dagiti pannursuro ti Apo maipapan iti seksualidad iti no ania ti kayat ni Satanas a patientayo? Mabalin nga irebyu dagiti agtutubo “Ti Kaamaan: Maysa a Waragawag iti Lubong,” a mangsapsapul kadagiti palawag a mangilawlawag no apay a napateg ti kinadalus iti seks iti plano ti Nailangitan nga Ama iti kinaragsak. Ania ti masursurotayo manipud kadagitoy a palawag a makatulong kadatayo nga agbiag a sililinteg iti agdama a lubong?
-
No dadduma saan a maawatan dagiti dadduma dagiti pagrukodantayo iti moralidad, nangnangruna a gapu ta maigiddiat unay dagitoy a pagrukodan iti no ania ti patpattien dagiti adu a tao. Kasano a masungbatantayo dagiti saludsodda? Ania ti masursurotayo manipud kada Elder ken Sister Renlund iti video “Why Is It Important to Live the Law of Chastity?” manipud iti “Face to Face with Elder and Sister Renlund” (ChurchofJesusChrist.org). Mabalin met a sukisoken dagiti agtutubo ti nasantuan a kasuratan iti “Dagiti Pangsuporta a Resources” para kadagiti palawag a mangiladawan kadagiti bendision ti kinadalus ti dayaw. Mabalinmo nga idawat kadakuada a mangibinglay kadagiti kapanunotanda maipapan iti no apay a pilienda ti agtungpal iti pagrukodan ti Apo iti moralidad iti seks.
-
Masansan nga isuro ti nalatak a kultura a saan a kasapulan ti agbalin a nadalus iti seks. Ngem saan nga ikaskaso ti kultura dagiti kinapudno maipapan kadagiti bendision ti kinadalus ti dayaw ken dagiti pagpeggadan ti imoralidad. Tapno masursuro ti ad-adu pay maipapan kadagitoy a kinapudno, mabalin nga adalen dagiti agtutubo ti mensahe ni Elder David A. Bednar a “We Believe in Being Chaste.” Mabalin nga adalen ti sumagmamano daytoy a benneg ti “The Intent of the Adversary,” ken mabalin nga adalen dagiti dadduma ti “The Blessings of Being Chaste.” Kalpasanna mabalinda nga ibinglay iti tunggal maysa no ania ti nasursuroda. Allukoyem ida a mangisurat iti ragup ti balikas manipud iti daytoy a mensahe a kayatda a malagip iti sumaruno a gundaway a maipasangoda kadagiti ulbod a mensahe maipapan iti seksualidad. Mabalin met nga iturongmo ida iti benneg a napauluan iti “The Principle of Repentance.” Paglilinnawagan no kasano a mapaimbag ti Mangisalakan dagiti amin nga agtarigagay nga agbabawi iti basol a seksual. Ipalagip kadagiti sursuruam a mabalinda a kasarita dagiti nagannak kadakuada wenno ti bishop no adda dagiti saludsodda wenno nasken nga agbabawi.
Agtignay iti Pammati
Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.
Dagiti Pangsuporta a Resources
-
1 Taga Corinto 6:19–20 (Templo dagiti bagitayo)
-
Alma 38:12 (No pengdantayo dagiti nasged a tarigagaytayo, mapnuantayo iti ayat)
-
Doktrina ken Katulagan 25 2; 121:45– 46 (Dagiti bendision ti saguday)
-
“Chastity: What Are the Limits?” “True Confidence,” “I Choose to Be Pure” (videos), ChurchofJesusChrist.org
Panangisuro iti Wagas ti Mangisalakan
Iti tunggal pasamak, ti Mangisalakan ti pagwadan ken mannursuro. Insurona dagiti disipulona nga agkararag babaen ti pannakipagkararagna kadakuada. Sinuruanna ida nga agayat ken agserbi iti wagas nga inayat ken pinagserbianna ida. Sinuruanna ida no kasano nga isuroda ti ebangheliona babaen ti wagas a panangisurona iti daytoy.