Hulio 10

Apay a Napateg ti Mangsurot kadagiti Sibibiag a Propeta ti Dios?

2 Ar-ari 2–7

Agiinnuman

Idauluan ti maysa a miembro ti panguluen ti korum wenno klase; 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap,a Hanbuk 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania ti napaglilinnawagan ti bishopric kadagiti miting iti youth council iti ward? Ania dagiti maaramidtayo a tignay a maibatay iti dayta a panaglilinnawag?

• Aywanan dagiti agkasapulan. Kasano a makatulongtayo kadagiti tao iti wagas a kas ken ni Cristo no makitatayo ti panagkasapulan ket ditayo ammo no ania ti isaotayo?

• Awisen ti amin nga umawat iti ebanghelio. Ania ti maysa a banag nga adda a masarakan iti ebanghelio ni Jesucristo a mangisangbay kadatayo iti rag-o? Kasano a maibinglaytayo dayta a rag-o kadagiti dadduma?

• Pagkaykaysaen dagiti pamilia para iti kinaagnanayon. Ania dagiti sumagmamano a wagas a nasaysayaat a maikonektatayo kadagiti miembro a kabagyan ti pamilia, a kas kadagiti lelang ken lelong ken kasinsin?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti maysa a nataengan a lider wenno agtutubo; 25–35 a minuto

Isaganam ti Bagim a Naespirituan

Mabalin nga adda bassit ni Naaman nga agkukutel iti amin kadatayo (kitaen iti 2 Ar-ari 5:1–15). Kas ken ni Naaman, a nakagura idi imbaga kenkuana ni propeta Eliseo nga agbuggo iti maysa a karayan tapno maagasan, saantayo kanayon a maawatan dagiti gapu iti balakad dagiti propeta. Mabalin nga ipagaruptayo nga awan kaes-eskan kadatayo ti sumagmamano a balakadda ket ngarud saanda a maaramat kadatayo. Ngem ikari ti Dios dagiti naindaklan a bendision no napakumbabatayo a mangsurot iti propeta (kitaen iti Doktrina ken Katulagan 21:4–7). Kasano a nakatulong kenka nga umas-asideg iti Apo ti panangsurot iti propeta? Ania dagiti dadduma pay a pagarigan manipud iti 2 Ar-ari 4–6 a mangipakita no kasano a mabendisionantayo no surotentayo dagiti sibibiag a propeta?

Bayat ti panagsaganam a mangisuro maipapan kadagiti bendision a sumangbay manipud iti panangsurot iti sibibiag a propeta, panunotem maipapan kadagiti karit a pakaipasanguan dagiti agtutubo. Kasano a ti panangsurot kadagiti propeta ti makatulong kadakuada kadagitoy a karit? Mabalinmo met a basaen ti mensahe ni Elder Neil L. Andersen a “The Prophet of God” (Liahona, Mayo 2018, 24–27) wenno ti mensahe ni Elder L. Whitney Clayton a “Whatsoever He Saith unto You, Do It” (Liahona, Mayo 2017, 97–99).

Ti panangsurot iti propeta ti makatulong kadagiti agtutubo kadagiti karit a pakaipasanguanda.

Aggigiddan a Masursuruan

Tapno mangirugi iti panaglilinnawag, mabalinmo a saludsoden iti tunggal miembro ti klase wenno korum (wenno babassit a grupo) a mangrebyu iti maysa kadagiti sumaganad a pakaammuan: 2 Ar-ari 4:1–7; 5:6–14; 6:8, 13–17. Kiddawem kadakuada a mangsapul iti maysa a banag a mangparegta kadakuada nga agbasa ken mangsurot kadagiti pannursuro dagiti propeta ken apostol iti agdama. Kalpasan a mangibinglay ti tunggal grupo iti maysa a banag a nasarakanda, mabalinmo a kiddawen ti sumagmamano nga agtutubo a mangileppas iti daytoy a binatog: “No surotek dagiti sibibiag a propeta ken apostol, Siak …” Tapno agtultuloy ti panaglilinnawag maipapan iti panangsurot kadagiti propeta, pumilika iti maysa wenno ad-adu pay kadagiti sumaganad a kapanunotan.

• Gapu ta masarakan laeng dagiti sibibiag a propeta iti naisubli a Simbaan ti Apo, mabalin nga addaan dagiti miembro ti klasem wenno korummo kadagiti gundaway a mangsungbat iti dadduma pay a saludsod maipapan kadagiti sibibiag a propeta. Mabalinmo nga isurat iti pisarra dagiti sumaganad a saludsod a mabalin nga adda kadagiti tao maipapan kadagiti sibibiag a propeta: Apay nga addaankayo iti maysa a propeta? Kasano a mapili ti maysa a propeta? Kasano nga ammom a talaga nga agsao ti propeta para iti Dios? Mabalin a sukisoken dagiti agtutubo dagiti sungbat kadagitoy a saludsod iti resources iti babaen ti “Dagiti Pangsuporta a Resources.” Mabalinda ti mangsanay a mangsungbat kadagitoy a saludsod ken dagiti dadduma pay nga adda kadakuada nga us-usaren dagiti kinapudno a nasarakanda ken dagiti kapanunotan ken padasda.

• Kasano a matulongandatayo dagiti balikas ti sibibiag a propetatayo no maipasangotayo kadagiti bukodtayo a karit? Tapno matulongan dagiti agtutubo a mangsungbat iti daytoy a saludsod, mabalinmo nga awisen ida a mangilista iti pisarra ti sumagmamano a balakad ken awis nga inted ti propeta iti kaudian unay a sapasap a komperensia. Ania ti naaramidtayo tapno agtignay iti daytoy a balakadna ken dagiti awisna? Ania dagiti panagbalbaliw a nakitatayon iti biagtayo gapu kadagitoy a panagkagumaan? Mabalinmo nga awisen ti maysa a tao a mangibinglay iti bukod a padas a nakatulongan kenkuana ti balakad ti propeta iti bukod a karit.

• Kasano a matulongam dagiti sursuruam a makaawat a ti panangsurot iti propeta ti makatulongto kadakuada nga umas-asideg iti Mangisalakan? Maysa a wagas ket ti panangted iti tunggal maysa kadakuada iti babassit a kard ket awisem ida a mangbasa kadagiti paset ti mensahe ni Elder Neil L. Andersen a “Dagiti Propeta ti Dios.” Mabalinda nga isurat iti maysa a bangir ti kard ti maysa a banag a nasursuroda maipapan iti no kasano a makatulong ti propeta kadakuada nga umas-asideg ken ni Cristo. Iti sabali a bangir ti kard, mabalinda nga isurat ti maysa a banag a makaparegta nga aramidenda a mangsurot iti propeta. Awisen ida a mangibinglay no ania ti insuratda.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Amos 3:7; Doktrina ken Katulagan 1:4, 37–38; Moises 6:26–27, 32–36; Gospel Topics, “Prophets,” topics.ChurchofJesusChrist.org; “Why Do We Have Prophets?” (video), ChurchofJesusChrist.org (No apay nga addaantayo kadagiti propeta)

• Gary E. Stevenson, “The Heart of a Prophet,” Liahona, Mayo 2018, 17–20 (No kasano a mapili ti maysa a propeta)

Panangisuro iti Wagas ti Mangisalakan

“Ti pudno a pannakapasurot wenno kumbersion ket saan laeng a panangrikna iti Espiritu a mangpatpatalged iti kinapudno kadagiti kararuatayo: nasken pay nga agtignaytayo a maibatay kadagita a kinapudno. Malaksid iti panangisuro kadagiti agad-adal a mangrikna ken mangbigbig iti Espiritu, tulongan ida nga agtignay a maibatay kadagiti pannignay nga awatenda” (Panangisuro iti Wagas ti Mangisalakan, 10).