“Hulio 24. Ania dagiti Bendision nga Umay manipud iti Panangawat kadagiti Ordinansa iti Templo? Esdras 1; 3–7; Nehemias 2; 4–6; 8,” Umaykayo, Sumurot Kaniak—Para kadagiti Korum ti Aaronic Priesthood ken dagiti Klase ti Young Women: Dagiti Topiko a Mainaig iti Doktrina 2022 (2021)
“Hulio 24. Ania dagiti Bendision nga Umay manipud iti Panangawat kadagiti Ordinansa ti Templo?” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022
Hulio 24
Ania dagiti Bendision nga Umay manipud iti Panangawat kadagiti Ordinansa iti Templo?
Esdras 1; 3–7; Nehemias 2; 4–6; 8
Agiinnuman
Idauluan ti maysa a miembro ti panguluen ti korum wenno klase; 10–20 a minuto
Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.
-
Agbiag iti ebanghelio. Kasano a naimatangantayon ti ima ti Apo iti biagtayo?
-
Aywanan dagiti agkasapulan. Kasano makapagtitinnulongtayo kadagiti banag a mapaspasarantayo?
-
Awisen ti amin nga umawat iti ebanghelio. Kasano a nasaysayaat a mausartayo ti teknolohia kas maysa a ramit a mangibinglay iti ebanghelio?
-
Pagkaykaysaen dagiti pamilia para iti kinaagnanayon. Ania dagiti ar-aramidentayo a mangtulong kadagiti pamiliatayo nga umasideg ken ni Jesucristo?
Iti ungto ti adalen, no maitutop, aramiden dagiti sumaganad:
-
Paneknekam dagiti pagbatayan a naisuro.
-
Palagipam dagiti miembro ti klase wenno korum maipapan kadagiti plano ken awis a naaramid bayat ti miting.
Isuro ti Doktrina
Idauluan ti maysa a nataengan a lider wenno agtutubo; 25–35 a minuto
Isaganam ti Bagim a Naespirituan
Idi nagsubli dagiti Judio manipud iti pannakapapanaw iti Babilonia, nasarakanda ti Jerusalem ken ti templona a nadadaelen (kitaen iti 2 Ar-ari 25:1–10; 2 Cronicas 36:17–19). Tinarigagayan dagiti tao a mangbangon manen iti templo. Iti kasta, iti uneg ti ababa a panawen, inrugida ti proseso ti panangbangon manen ket nagrag-oda idi malpas ti templo (kitaen iti Esdras 3:8–13; 6:16–22). Ita, kas natulagan a tattao ti Dios, mangbangontayo kadagiti templo ket agrag-otayo no mabangon ti maysa a baro a templo. Apay? Gapu ta dagiti ordinansa iti templo ti mangiturong kadagiti kaindaklanan a bendision ti Nailangitan nga Ama. Mangisangbayda iti naespirituan a bileg. Mangtedda kadatayo iti pangiturong. Ken tulongandatayo nga agbalin a kas iti Dios ken umawat iti amin nga adda Kenkuana. (Kitaen iti Doktrina ken Katulagan 84:19–22; 109:22–26.)
Kasano a matulongamto dagiti agtutubo nga agtarigagay para iti templo kas iti inaramid dagiti Israelita? Kasano a matulongamto ida nga agtarigagay iti amin a pusoda nga agaramid kadagiti katulagan iti Dios iti nasantuan a balayna? Bayat ti panagsaganam a mangisuro, ibilang ti panangrebyu iti mensahe ni Presidente Thomas S. Monson iti “Blessings of the Temple” (Liahona, Mayo 2015, 91–93) ken ti artikulo a “Why Ordinances and Covenants Matter” iti temples.ChurchofJesusChrist.org.
Tulongannatayo dagiti ordinansa ti templo nga agbalin a kas iti Dios ken umawat iti amin nga adda Kenkuana.
Aggigiddan a Masursuruan
Tapno matulongan dagiti miembro ti klase wenno korum a mangpasungad kadagiti bendision a mabalin nga awatenda manipud kadagiti ordinansa iti templo, mabalinmo nga awisen ida a mangrebyu iti Esdras 3:10–13; 6:16, 21–22. Kiddawem kadakuada a mangibinglay kadagiti balikas wenno ragup ti balikas a mangipakpakita no kasano ti narikna dagiti nagkauna a Judio maipapan iti panangbangon manen iti temploda. Apay a ti panangbangon manen iti maysa a templo ket maysa a banag a rambakan? Kasano a mangtulong kadatayo nga umasideg iti Mangisalakan dagiti templotayo iti agdama ken ti trabaho nga aramidentayo idiay? Dagitoy ti daddumaa pay a sumagmamano a kapanunotan a mangtulong kadagiti agtutubo a makaawat kadagiti bendision a maawatda iti templo.
-
Idi indaton ni Joseph Smith ti Templo iti Kirtland, intedna ti kararag a pangidaton a masarakan iti Doktrina ken Katulagan 109. Iladawan daytoy a kararag ti adu kadagiti bendision a maawattayo babaen kadagiti ordinansa ti templo. Mabalin a sukisoken dagiti miembro ti klase wenno korum dagiti paset daytoy a kararag, nangnangruna kadagiti bersikulo 12–26, a mangsapsapul kadagiti bendision nga inkararagan ni Joseph Smith. Mabalinda nga ilista dagitoy a bendision iti pisarra. Mabalinmo nga idawat kadagiti agtutubo a mangilawlawag no kasano a papigsaen ida ti tunggal maysa kadagitoy a bendision ita ken iti masakbayan. Ibinglaymo ti pamaneknekmo maipapan kadagiti bendision a naawatmon babaen kadagiti ordinansa iti templo.
-
Tapno matulongan dagiti miembro ti klase wenno korum a mangibinglay iti riknada maipapan iti templo, kiddawem kadakuada a mangileppas iti daytoy a binatog: “No panunotek maipapan iti templo, mariknak …” mabalinmo nga awisen ida a mangbasa iti umuna a lima a parapo ti mensahe ni Elder Kent F. Richards a “The Power of Godliness” (Liahona, Mayo 2016, 118–20). Apay a kasapulantayo ti templo nga ad-adda pay ngem iti ania man a sabali pay a banag? Ania ti masursurotayo maipapan iti bileg nga ited ti Dios kadatayo babaen kadagiti ordinansa iti templo? Kalpasanna mabalin a sukisoken dagiti agtutubo ti nabati pay iti mensahe ni Elder Richards, a mangsapsapul kadagiti bendision a sumangbay kadatayo bayat ti pannakiramantayo kadagiti ordinansa iti templo. Wenno mabalinda a saraken dagitoy a bendision iti mensahe ni Presidente Thomas S. Monson a “Blessings of the Temple.”
-
Tapno matulongan dagiti miembro ti klase wenno korum a mangutob kadagiti sakripisio a natallugod nga inaramid ti sumagmamano tapno umawat kadagiti bendision ti templo, mabalinmo nga ipabuya ti video a “Temples Are a Beacon” (ChurchofJesusChrist.org). Apay a natallugod ti pamilia a Mou Tham nga agaramid kadagiti kasta a naindaklan a sakripisio a mapan iti templo? (Kitaen met iti Thomas S. Monson, “The Holy Temple—a Beacon to the World,” Liahona, Mayo 2011, 90–94.) Ania dagiti sakripisio a nasken nga aramidentayo tapno umawat kadagiti bendision iti templo? Nalabit a maysa a tao a napan iti templo itay nabiit ti mabalin a makikadua iti miting ken mangibinglay iti padasna. Mabalinmo nga awisen dagiti agtutubo a mangsukisok iti mensahe ni Elder Ronald A. Rasband a “Recommended to the Lord” (Liahona, Nob. 2020, 22–25) ken mangibinglay kadagiti bendision ti kaadda iti maysa a rekomenda iti templo. Mabalinyo pay nga aggigiddan a mangrebyu kadagiti saludsod iti rekomenda iti templo (kitaen iti Russell M. Nelson,“Closing Remarks,” Liahona, Nob. 2019, 120–22).
Agtignay iti Pammati
Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.
Dagiti Pangsuporta a Resources
-
Quentin L. Cook, “See Yourself in the Temple,” Liahona, Mayo 2016, 97–100
Panangisuro iti Wagas ti Mangisalakan
“Bayat ti panangisurom, imbes a mangiburay laeng iti gagangay nga impormasion, tulongam dagiti agtutubo a mangtakuat kadagiti kinapudno ti ebanghelio para iti bagbagida kadagiti nasantuan a kasuratan ken balikas dagiti propeta” (Panangisuro iti Wagas ti Mangisalakan,28).