agtutubo nga agay-ayam iti ruar

Agosto 14

Kasano a Masarakak ti Rag-o iti Panangsurot iti Mangisalakan?

Dagiti Salmo 1–2; 8; 19–33; 40; 46

icon ti panagiinnuman

Agiinnuman

Idauluan ti maysa a miembro ti panguluen ti korum wenno klase; 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano ti panagsapultayo iti rag-o iti panangsurot ken ni Jesucristo?

• Aywanan dagiti agkasapulan. Asino iti ward wenno komunidadtayo ti agkasapulan iti tulongtayo? Kasano a makatulongtayo kadakuada?

• Awisen ti amin nga umawat iti ebanghelio. Kasano a matulongantayo ti tunggal maysa nga agsagana para iti serbisio ti misionario?

• Pagkaykaysaen dagiti pamilia para iti kinaagnanayon. Kasano a makatulongtayo kadagiti panagkagumaan ti wardtayo a mangitrabaho iti aramid iti family history ken templo?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti maysa a nataengan a lider wenno agtutubo; 25–35 a minuto

Isaganam ti Bagim a Naespirituan

Ania ti isangbay ti rag-o kadakayo? Mabalin nga isao dagiti tao a masarakanda ti rag-o iti dayta a kanito kadagiti gagayyem ken pamilia, iti paggugusto nga aramiden, wenno iti uray maysa laeng nga aldaw nga awan dagiti pannubok. Insuro ni Presidente Russell M. Nelson: “Ti rag-o a mariknatayo ket bassit ti pakainaiganna kadagiti pasamak iti biagtayo ken amin a banag nga adda pakainaiganna iti panangipokus iti biagtayo. No ti pokus ti biagtayo ket ti plano ti Dios iti pannakaisalakan … ken ni Jesucristo ken ti ebangheliona, mariknatayo ti rag-o ania man ti mapaspasamak—wenno saan a mapaspasamak—iti biagtayo. Umay ti rag-o manipud ken gapu Kenkuana”“Joy and Spiritual Survival,” Liahona, Nob. 2016, 82). Yallingag ti adu kadagiti Salmo daytoy isu met laeng a mensahe: “Ipakitamto kaniak ti dana ti biag ita sanguanam adda ti naan-anay a rag-o” (Salmo 16:11).

Panunotem ti sumagmamano a karit a mabalin a sangsanguen dagiti miembro ti klasem wenno korummo. Kasano a matulongamto ida a makaawat a sumangbay iti pudno a rag-o manipud iti panangaramat iti pammati iti Mangisalakan—uray kabayatan dagiti narigat a panawen? Utobem daytoy a saludsod bayat ti panagsaganam a mangisuro. Sapulem dagiti mainaig a binatog a maibinglaymo iti klasem wenno korummo kadagiti Salmo wenno iti mensahe ni Presidente Nelson “Joy and Spiritual Survival.”

klase dagiti agtutubo a lallaki

Aggapu ti pudno a rag-o a sumangbay manipud iti panangaramat iti pammati iti Mangisalakan, uray kabayatan dagiti narigat a panawen.

Aggigiddan a Masursuruan

Ibilangmo ti panangawis kadagiti miembro ti klasem wenno korummo nga irebyu ti sumagmamano kadagiti sumaganad: Dagiti Salmo 1; 8; 19; 23; 27. Ania ti masursurotayo manipud kadagitoy a Salmo maipanggep iti no ania ti mangisangbay kadatayo iti rag-o? Kalpasanna mabalinmo nga usaren ti maysa wenno ad-adu pay kadagiti sumaganad nga aktibidad a makatulong kadagiti sursuruam a makaawat a nasaysayaat nga aggapu ti pudno a rag-o manipud iti panangsurot ken ni Jesucristo.

• Kayattayo amin ti mangsapul iti rag-o, ngem nasken a maawatantayo no ania ti mangisangbay iti pudno a rag-o ken no ania a talaga ti mangiturong iti liday. Idawat kadagiti agtutubo a mangibinglay iti sumagmamano kadagiti banag a a mangisangbay kadakuada iti rag-o ken no apay a mangparag-o dagitoy a banag. Isurat iti pisarra “Ti panggep dagiti tao, ket tapno maaddaanda iti rag-o” (2 Nephi 2:25). Kalpasanna awisem dagiti agtutubo, a saggaysa wenno babassit a grupo, a mangrebyu iti maysa wenno ad-adu pay kadagiti nasantuan a kasuratan iti “Dagiti Pangsuporta a Resources” ken ilista no ania ti nasarakanda a mangiturong iti rag-o. Mabalinmo pay nga ipabuya ti video “We Can Find Happiness” (ChurchofJesusChrist.org). Ania dagiti sumagmamano a wagas a pangpadasan dagiti tao a mangsapul iti rag-o a talaga a mangiturong iti liday? Kasano nga insangbayannatayo ti Mangisalakan iti rag-o?

• Ammotayo amin nga adda dagititao a naipasango kadagiti karit uray no inkarkarigatanda iti amin a kabaelanda nga agbiag iti ebanghelio. Kasano a matulongam dagiti sursuruam a makaawat a makasaraktayo iti rag-o uray no mapannubok ti biagtayo? Mabalinmo nga idawat kadakuada a mangrebyu iti mensahe ni Presidente Russell M. Nelson a “Joy and Spiritual Survival” wenno ti mensahe ni Presidente Steven J. Lund a “Finding Joy in Christ” (Liahona, Nob. 2020, 35–37). Ania dagiti pagarigan a makitatayo kadagiti tao a nakasarak iti rag-o ken ni Cristo iti baet dagiti karitda? Ania ti masursurotayo manipud kadagitoy a padas? Ania dagiti padas a maibinglaytayo?

• Nalakatayo la a makarikna iti panagdandanag ken depresion no maipasangotayo kadagiti karit ti biag. Para iti dadduma, pannakidangadang iti tungpal biag dagitoy a rikna. Mabalin a mairanud ti klasem wenno korummo manipud iti panaglilinnawag maipapan kadagitoy a karit ken maipapan iti no kasano a makatulong ti Mangisalakan kadagiti agkarkarigatan iti panagdandanag ken depresion. Iti panangrugi daytoy a panaglilinnawag, mabalinmo nga idawat kadagiti agtutubo a mangrebyu iti mensahe ni Elder Jeffrey R. Holland a “Like a Broken Vessel,” nangruna iti maudi nga uppat a parapo (Liahona, Nob. 2013, 40–42), wenno ti mensahe ni Sister Reyna I. Aburto “Thru Cloud and Sunshine, Lord, Abide with Me!” (Liahona, Nob. 2019, 57–59). Awisem dagiti miembro ti klase wenno korum nga agsapul kadagiti kinapudno a napateg kadakuada ket ibinglay no ania ti nasarakanda. Allukoyem dagiti agtutubo a makasarita iti maysa a mapagtalkan a nagannak wenno lider wenno bisitaen ti mentalhealth. ChurchofJesusChrist.org no mariknada a kasapulanda ti tulong.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Mateo 5:1–12; 1 Pedro 4:12–13; 2 Nephi 2:25–27; Mosiah 2:41; 3:3–7; 4:2–3; Alma 36:16–22; 4 Nephi 1:15–16 ((No kasano ti mangsarak iti rag-o)

• D. Todd Christofferson, “The Joy of the Saints,” Liahona, Nob. 2019, 15–18

• “Suicide Prevention and Ministering,” ChurchofJesusChrist.org

Panangisuro iti Wagas ti Mangisalakan

Am-ammo ti Mangisalakan mismo dagiti sinuruanna—ken no asino ti mabalin a pagbalinanda. Idi nagkarigatanda, intuloyna nga inayat ida. Kasano a maipakitam nga ay-ayatem ken suportaram dagiti sursuruam?