Agosto 28

Kasano a Matulongannak ti Mangisalakan kabayatan dagiti Pannubokko?

Dagiti Salmo 102–103; 110; 116–119; 127–128; 135–139; 146–150

Agiinnuman

Idauluan ti maysa a miembro ti panguluen ti korum wenno klase; 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren iti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania dagiti kaudian a padas nga ad-adda a nangyasideg kadatayo iti Nailangitan nga Ama ken ni Jesucristo?

• Aywanan dagiti agkasapulan. Adda kadi maysa a tao a kaak-kar iti wardtayo wenno nabiit pay a nagkameng iti Simbaan? Kasano a matulongantayo ida a makarikna iti nabara a pannakapasangbay?

• Awisen ti amin nga umawat iti ebanghelio. Ania dagiti aktibidad a sumangbay a mabalin a pangawisan kadagiti gagayyemtayo a dumar-ay?

• Pagkaykaysaen dagiti pamilia para iti kinaagnanayon. Ania dagiti panagkagumaan a maaramidtayo a mangisurat kadagiti bukodtayo a pakasaritaan?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti maysa a nataengan a lider wenno agtutubo; 25–35 a minuto

Isaganam ti Bagim a Naespirituan

Mabalin nga aramiden dagiti karit a pakaipasanguantayo a makarikna iti pannakabannog, pannakapaay, pannakaabak, ken panagmaymaysa. Naawatan dagiti mannurat iti Dagiti Salmo dagita a rikna ken impeksada kadakuada a sibibileg: “Ti pusok makeltay,ket malaylay a kasla ruot; …Agpuyatak, ket agbalinak a kas mammendita nga agwaywayas iti tuktok ti balay” (Salmo,102:4, 7). Ngem addaan laeng iti dakkel a pannakabalin, pinaneknekanda a ti yaasideg iti Mangisalakan ket mangisangbay iti gin-awa: “Bendisionan ni Jehova, O kararuak, ket dika lipaten dagiti amin a paraburna: Isu a mamakawan kadagiti amin a kinadangkesmo; isu a mamapia kadagiti amin a masaksakitmo; isu a manubbot ita biagmo iti pannakadadael; isu a mangbalangat kenka iti kinamanagayat ken kadagiti nadungngo nga as-asi” (Salmo 103:2– 4).

Panunotem ti maipapan kadagiti bendision a sumangbayto kadagiti miembro ti klasem wenno korummo bayat ti naan-anay a pannakaawatda no kasano a makatulong ti Mangisalakan kadakuada kadagiti pannubokda. Kasano a natulongannaka ti Mangisalakan? Bayat ti panagsaganam a mangisuro, mabalinmo nga irebyu ti mensahe ni Henry B. Eyring a “Tested, Proved, and Polished” (Liahona, Nob. 2020, 96–99) ken “Adversity” iti Gospel Topics (topics.ChurchofJesusChrist.org).

Tulongan ken liwliwaennatayonto ti Mangisalakan kadagiti pannuboktayo.

Aggigiddan a Masursuruan

Mabalinmo a rugian babaen ti panangidawat kadagiti miembro ti klase wenno korum a mangrebyu iti Dagiti Salmo 102, 103, ken 116, a mangsapsapul iti no kasano a tulongannatayo ti Mangisalakan kadagiti panagkagumaantayo a mangparmek kadagiti pannubok. Mabalinda ti agtrabaho a saggaysa wenno kas maysa a grupo a mangisurat iti sumagmamano a binatog maipapan iti no ania ti nasarakanda ket kalpasanna ibinglayda no ania ti insuratda. Pumili iti maysa wenno ad-adu pay kadagiti sumaganad nga aktibidad a makatulong kadakuada a makaawat a naun-uneg iti daytoy a topiko.

• Mabalin dagiti himno ti mangyawis iti Espiritu ken mangisuro iti doktrina iti nabileg a wagas. Ibilang ti panangrebyu iti maysa a himno maipapan iti no kasano a tulongannatayo ti Mangisalakan kadagiti pannuboktayo, a kas “How Firm a Foundation” (Hymns, no. 85). Ania ti isuro ti himno maipapan iti tulong a maited ti Mangisalakan kadatayo? Kalpasanna mabalin nga irebyu dagiti agtutubo dagiti binatog iti nasantuan a kasuratan iti “Dagiti Pangsuporta a Resources.” Mabalin a mairanudda manipud iti panangisurat iti maysa a ragup ti balikas manipud iti himno wenno maysa kadagiti nasantuan a kasuratan a mangipalagip kadakuada a mangsapul iti Mangisalakan kadagiti rigatda.

• Makatulong ti mensahe ni Presidente Henry B. Eyring a “Tested, Proved, and Polished” kadagiti sursuruam a nasaysayaat a makaawat kadagiti saludsod kas iti sumaganad: Ania dagiti sumagmamano a panggep dagiti mortal a pannuboktayo? Kasano a tulongannatayonto ti Mangisalakan kadagiti karittayo? Ania ti maaramidtayo tapno makagun-od iti tulong ken bileg ti Mangisalakan? Ibilangmo ti panangisurat kadagitoy a saludsod iti pisarra. Mabalin a sapulen dagiti miembro ti klase wenno korum dagiti sungbat iti mensahe ni Presidente Eyring. Kas pagarigan, ania ti masursurotayo manipud kadagiti estoria maipapan iti ina ni Presidente Eyring iti rugi ken gibus ti mensahe? Mabalinmo nga idawat iti tunggal tao a mangutob no kasano a mayaplikarda no ania ti nasursuroda kadagiti bukodda a pannubok. Mabalin nga agtallugod ti sumagmamano nga agtutubo a mangibinglay kadagiti kapanunotanda.

• Insarita ni Sister Lisa L. Harkness ti pakaammuan maipapan iti Mangisalakan a mangpatpatalna iti bagyo tapno isurona a kabaelanna ti mangpatalna kadagiti bagyo iti biagtayo (kitaen iti Marcos 4:35–41; “Peace, Be Still,” Liahona, Nob. 2020, 80–82). Mabalinmo nga awisen ti maysa a miembro ti klase wenno korum nga umay a nakasagana a mangibinglay no ania ti nasursurona maipapan iti Mangisalakan manipud ti pakaammuan iti nasantuan a kasuratan. Mabalin a mangipakita pay daytoy a tao ti maysa a ladawan (kitaen iti Libro ti Arte ti Ebanghelio, p.40). Kalpasanna mabalin nga irebyu dagiti agtutubo no ania ti insuro ni Sister Harkness maipapan no kasano nga adda ti Mangisalakan iti ”bilog” no maipasangotayo kadagiti pannubok. Mabalinmo nga awisen dagiti indibidual a mangibinglay no kasano a tinulongan ida ti Mangisalakan kadagiti pannubokda, agraman no kasano a nakatulong kadakuada babaen ti sabali a tao. Allukoyem dagiti agtutubo a mangibinglay kadagiti padasda iti maysa a tao nga am-ammoda nga agkasapulan iti kappia iti Mangisalakan.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti pannakilangenda iti Nailangitan nga Ama ken ni Jesucristo.

Dagiti Pangsuporta a Resources

• Isaias 53:3–5; Hebreo 2:17–18; Alma 7:11–13; 36:3; Ether 12:27 (Tulongannatayto ti Mangisalakan kadagiti pannuboktayo)

• Dieter F. Uchtdorf, “God Will Do Something Unimaginable,” Liahona, Nob. 2020, 51–54

• Cristina B. Franco, “The Healing Power of Jesus Christ,” Liahona, Nob. 2020, 60–62

• “Mountains to Climb” (video), ChurchofJesusChrist.org

Panangisuro iti Wagas ti Mangisalakan

“Ti panagdamag kadagiti saludsod a mangallukoy kadagiti agad-adal nga agpaneknek maipapan kadagiti pagbatayan a maisursuro ket mabalin a maysa a nabileg a wagas tapno maawis ti Espiritu. … Dagiti pammaneknekda—ken dagiti pammaneknek dagiti dadduma iti klase—dumakkelto bayat ti panangipaneknek ti Espiritu iti kinapudno” (Panangisuro iti Wagas ti Mangisalakan,32.)