Septiembre 11

Kasano a Makapagbalinak a Nadalus ken Naragsak Manen kalpasan nga Agbasolak?

Isaias 1–12

Agiinnuman

Idauluan ti maysa a miembro ti panguluen ti korum wenno klase; 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti ti Korum ti Aaronic Priesthood. Kalpasanna iturong iti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano a ti yaasideg iti Apo makatulong kadatayo a mangsango kadagiti karit ken pannubok?

• Aywanan dagiti agkasapulan. Asino ti ammotayo nga agkasapulan kadagiti kararagtayo ken pannakigayyemtayo?

• Awisen ti amin nga umawat iti ebanghelio. Ania dagiti plano a mangibinglay iti ebanghelio a napaglilinnawagan kadagiti miting iti youth council iti ward? Kasano a mairaman ti klasem wenno korummo?

• Pagkaykaysaen dagiti pamilia para iti kinaagnanayon. Kasano a ti panangitrabaho iti aramid iti family history ket makapapigsa iti relasiontayo iti Nailangitan nga Ama ken ni Jesus?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti maysa a nataengan a lider wenno agtutubo; 25–35 a minuto

Isaganam ti Bagim a Naespirituan

No mariknatayo a nagbasoltayo, addaantayo iti pili. Dagitoy a rikna, idinto a nasaem, mabalin a maysa a bendision no iturongdatayo iti panagbabawi. Ngem ibaga ni Satanas kadatayo a kayat a sawen dagitoy a rikna a dinatayo ay-ayaten ti Dios ket padasenna nga iparikna kadatayo ti pannakaupay ken awanan iti namnama. Mabalin nga adda dagiti tao a sursuruam ti madagensenan iti kasta a rikna. Mabalin a masdaawda no makapagbalinda a nadalus ken naragsak manen. Kasano a matulongam ida a makasarak iti namnama iti Pannubbot ti Mangisalakan?

Sibabatad a kinastigo ni propeta Isaias dagiti tao gapu iti basbasolda. Ngem pinaneknekanna met a gapu ti Mangisalakan, “uray no dagiti basbasolyo kasda la koma iti eskarlata, mapapudawdanto a kasla niebe” (Isaias 1:18). Utobem daytoy bayat ti panangbasam iti Isaias 1–12 iti daytoy a lawas. Ania ti mabalin a mangparegta kadagiti sursuruam nga umasideg ken ni Jesucristo nga addaan iti pammati a mabalin a maikkat dagiti dagensen dagiti basolda? Mabalinmo met nga adalen ti pammaneknek ni Sister Sharon Eubank maipapan ken ni Cristo iti mensahena a “Christ: The Light That Shines in Darkness” (Liahona, Mayo 2019, 73–76).

Gapu ken ni Jesucristo, mabalin a maikkat dagiti dagensentayo iti basol.

Aggigiddan a Masursuruan

Tapno agsagana para iti panaglilinnawag a maparnuay iti Isaias 1–12, mabalinmo a kiddawen iti tunggal agtutubo a mangitugot iti miting iti maysa a banag a nalabaga ken maysa a banag a puraw. Mabalinmo nga ipakita dagitoy a banag bayat ti aggigiddan a panangbasa iti Isaias 1:16–18. Kalpasanna mabalin nga ibinglay dagiti agtutubo iti bukodda a balikas no ania ti masursuroda manipud kadagitoy a bersikulo. (Kitaen iti panangilawlawag ni Sharon Eubank iti bersikulo 18 iti “Christ: The Light That Shines in Darkness.”) Dagitoy ti sumagmamano a dadduma pay nga aktibidad a makaparegta iti pammati iti bileg ti Mangisalakan a mangaramid kadatayo a naespirituan a nadalus.

• Ti panangrebyu kadagiti pagarigan iti nasantuan a kasuratan ti panagbabawi ket makatulong kadagiti sursuruam a mangpapigsa iti pammatida a maaramid ida ni Jesucristo a naespirituan a nadalus. Mabalinmo nga isurat iti pisarra dagiti nagnagan kas ni Saul (Pablo idi agangay), ni Alma nga Ub-ubing, ni Zeezrom, ken dagiti Anti-Nephi-Lehi. Mabalin pay nga isurat ti dua a grupo dagiti reperensia iti nasantuan a kasuratan: Dagiti Aramid 8:3; Mosiah 27:8–10; Alma 11:21–23; Alma 17:12–15 (adda dagitoy a tao iti kinamanagbasol a kasasaadda) ken Dagiti Aramid 9:13–20; Alma 36:17–24; Alma 15:5–12; Alma 23:6–12 (kalpasan nga immasideg dagitoy a tao iti Mangisalakan ken nagbabawi). Mabalin dagiti agtutubo a mangiparis iti tunggal nagan iti nasantuan a kasuratan a mangiladladawan iti dayta a tao. Ania ti inaramid dagitoy a tao tapno agbabawi? Ania ti isuro dagitoy a pakaammuan maipapan ti kinaayat ti Mangisalakan a mamakawan? Makitatayo kadi ti sumagmamano a pagtuladan a mabalintayo a suroten?

• Tapno matulongan dagiti sursuruam a nasaysayaat a maawatanda ti pannakapakawan iti basol, mabalinmo nga ikkam ti tunggal tao ti analohia wenno pangngarig nga adalenna. Mabalin nga iraman dagitoy ti nayaw-awan nga anak (kitaen iti Lucas 15:11–24); ti Mangisalakan a kas Pastortayo (dagiti parapo 5–8 ti mensahe ni Elder Dale G. Renlund “Our Good Shepherd” [Liahona, Mayo 2017, 29–32]); ken ti nadadael a piano (ti rugi ti mensahe ni Sister Cristina B. Franco “The Healing Power of Jesus Christ” [Liahona, Nob. 2020, 60–62]). Mabalin a gupgopen dagiti agtutubo ti tunggal analohia wenno pangngarig ken paglilinnawagan no ania ti isursuro daytoy maipapan iti ayat ken bileg ti pannubbot ti Mangisalakan.

• Ti pannakarikna iti panagladingit a nagbasoltayo ket makatulong ken mangiturong kadatayo iti panagbabawi. Ti pannakarikna iti kinaawan namnama wenno kinaawan pateg gapu kadagiti basbasoltayo ket saan a makatulong ken mangyadayo kadatayo iti panagbabawi. Mabalin nga aggigiddan a basaen ti klase wenno korum ti benneg a napauluan iti“Godly Sorrow” iti mensahe ni Presidente Dieter F. Uchtdorf a “You Can Do It Now!” (Liahona, Nob. 2013, 55–57). Ania ti pagdumaan ti panagladingit para iti basol nga agturong iti panagbabawi ken panagliday nga agturong iti pannakauppapay? (kitaen met iti 2 Taga Corinto 7:9–10; Mormon 2:12–14). No marikna ti maysa a tao a marimbawan dagiti rikna ti basol ken pannakapaay gapu iti basol, ania ti mabalin a sawentayo a makatulong kenkuana nga umasideg iti Mangisalakan? Awisem dagiti agtutubo a mangibinglay kadagiti pammaneknekda maipapan iti Mangisalakan ken iti asina.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Dallin H. Oaks, “Cleansed by Repentance,” Liahona, Mayo 2019, 91–94

• “Repentance through the Atonement of Jesus Christ,” iti kapitulo 3 ti Preach My Gospel (2019), 62–63.

• “Repentance: A Joyful Choice” (video), ChurchofJesusChrist.org

Panangisuro iti Wagas ti Mangisalakan

“Ti personal a pammaneknek ti Mangisalakan ti nangted iti turay kadagiti balikasna. … Kabayatan ti panagpaneknekmo maipapan ti pudno a doktrina, ipatalgedto ti Espiritu kenka ti kinapudno ti doktrina iti puspuso dagiti sursuruam” (Panangisuro iti Wagas ti Mangisalakan 21).