“Septiembre 25. Ania dagiti Pagrebbengantayo iti Aramid ti Pannakaisalakan ken Pannakaitan-ok? Isaias 40–49,” Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022 (2021)
“Septiembre 25. Ania dagiti Pagrebbengantayo iti Aramid ti Pannakaisalakan ken Pannakaitan-ok? Umaykayo, Sumurot Kaniak—Para Kadagiti Korum ti Aaronic Priesthood ken Klase ti Young Women: Dagiti Topiko a Mainaig iti Doktrina 2022
Septiembre 25
Ania dagiti Pagrebbengantayo iti Aramid ti Pannakaisalakan ken Pannakaitan-ok?
Agiinnuman
Idauluan ti maysa a miembro ti panguluen ti korum wenno klase; 10–20 a minuto
Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Hanbuk, 10.2, 11.2, ChurchofJesusChrist.org). Mangplano kadagiti wagas nga agtignay iti no ania ti paglilinnawaganyo.
-
Agbiag iti ebanghelio. Ania ti napaglilinnawagantayo itay napalabas, ken ania dagiti awis wenno naidutok nga aramiden a naaramid? Ania ti naaramidtayo tapno agtignay kadagita nga awis ken naidutok nga aramiden?
-
Aywanan dagiti agkasapulan. Ania ti maaramid wenno maisaotayo a makatulong kadagiti mabalin a makarikna nga agmaymaysa wenno adayo iti Nailangitan nga Ama?
-
Awisen ti amin nga umawat iti ebanghelio. Ania dagiti sumagmamano a wagas a pakatulongantayo kadagiti dadduma a makarikna iti ayat ni Jesucristo?
-
Pagkaykaysaen dagiti pamilia para iti kinaagnanayon. Ania dagiti kapanunotan a maibinglaytayo iti tunggal maysa a makatulong a mangpapigsa kadagiti pamiliatayo?
Iti ungto ti adalen, no maitutop, aramiden dagiti sumaganad:
-
Paneknekam dagiti pagbatayan a naisuro.
-
Palagipam dagiti miembro ti klase wenno korum maipapan kadagiti plano ken awis a naaramid bayat ti miting.
Isuro ti Doktrina
Idauluan ti maysa a nataengan a lider wenno agtutubo; 25–35 a minuto
Isaganam ti Bagim a Naespirituan
Nalawag manipud kadagiti nasantuan a kasuratan a ti panangtulong iti aramid ti Apo saan a para kadagiti nataengan laeng. Maysa nga ubing ni Samuel idi damo a nakisao ti Apo kenkuana. Kasla maysa a balasitang ni Maria idi sinarungkaran ti maysa nga anghel, a mangipakpakaammo kenkuana nga isunto ti agbalin nga ina ti Mangisalakan. Ken agtawen ni Joseph Smith iti 14 idi inawagan ti Apo isuna a mangisubli iti ebanghelio. Itay nabiit pay, inawis ni Presidente Russell M. Nelson ti amin nga agtutubo nga “agpailista iti youth battalion ti Apo tapno tumulong a mangummong iti Israel (“Hope of Israel” [worldwide youth devotional, June 3, 2018], ChurchofJesusChrist.org). Awan duadua, idi kinuna ti Apo, “Sika, Israel, nga adipek” (Isaias 41:8), iraman daytoy amin a natulagan a tattaona, agraman dagiti miembro ti klasem wenno korummo.
Nupay nakitulagtayo amin nga agserbi iti Dios no mabuniagantayo, saan a makita ti amin nga agtutubo ti bagbagida kas katulongan ti Apo. Mabalin a saanda a mailasin dagiti naidumduma a wagas a pakatulonganda iti aramidna. Sapulem dagiti binatog iti Isaias 41–44 ken benneg 1.2 ti Sapasap a Hanbuk: Panagserbi iti Ti Simbaan ni Jesucristo dagiti Santo iti Ud-udina nga Aldaw a makatulong kadagiti agtutubo a makaawat no ania ti kaipapanan ti agbalin a katulongan ti Apo.
Naidumduma a kabaelan ti tunggal agtutubo ti tumulong iti aramid ti pannakaisalakan ken pannakaitan-ok.
Aggigiddan a Masursuruan
Makatulong tiIsaias 41–44 kadagiti agtutubo a makaawat no ania ti kaipapanan ti agbalin a maysa a katulongan ti Apo. Tapno mangirugi iti panaglilinnawag, mabalinmo nga isurat dagiti reperensia kas kadagitoy iti pisarra: Isaias 41:8–10; 42:6–7; 43:9–12; 44:21. Mabalin a mangala ti tunggal tao iti maysa a binatog, mangbasa iti daytoy, ken mangibinglay no ania ti masursurona maipapan iti no ania ti kaipapanan ti agbalin a maysa a katulongan ti Apo. Iti ania a wagas a datayo dagiti katulongan ti Apo? Ania dagiti bendision a sumangbay no addatayo iti serbisiona? Adtoy dagiti dadduma pay a wagas a pakatulongan kadagiti sursuruam a mangyeg kadagiti tao ni Cristo kas aktibo a makiramraman iti aramidna.
-
Maawatan kadi dagiti sursuruam no ania ti “aramid ti pannakaisalakan ken pannakaitan-ok”? Tapno matulongan ida, mabalinmo a dutokan ida nga agadal (saggaysa wenno iti babassit a grupo) iti maysa kadagiti uppat a subsection ti benneg 1.2 ti Sapasap a Hanbuk. Mangiladawan ti tunggal subsection iti aspekto ti aramid. Idawat kadagiti agtutubo a mangutob kadagiti saludsod kas kadagitoy: Ania dagiti nalawag a banag a maaramid ti maysa a tao a kaedadko a makiraman iti daytoy nga aspekto ti aramid ti pannakaisalakan? Ania ti mabalin nga aramiden ti klase wenno korumtayo? Mabalin a mangibinglay ti tunggal tao wenno grupo no ania ti nasursuroda, karaman dagiti sungbat kadagiti saludsod.
-
Mabalin a mairanud dagiti sursuruam babaen ti panagsursuroda maipapan iti uppat nga aspekto ti aramid ti pannakaisalakan ken pannakaitan-ok—panagbiag iti ebanghelio ni Jesucristo, panangaywan kadagiti agkasapulan, panangawis iti amin nga umawat iti ebanghelio, ken panagkaykaysa dagiti pamilia iti kinaagnanayon. Mabalinda a pilien ti maysa nga aspekto a paggugustoda ket sukisokenda ti sumagmamano a banag a mainaig iti daytoy iti babaen ti “Dagiti Pangsuporta a Resources.” Paibinglay kadagiti agtutubo no ania ti nasarakanda a mangparegta kadakuada nga agbalin nga ad-adda pay a napasurot wenno nakumbert iti Apo ket mangtulong kadagiti dadduma a mangaramid met iti kastoy. Mabalinda kalpasanna nga agaramid kadagiti plano iti maysa a banag a makatulong a mangipatungpal iti daytoy nga aramid. Mabalin nga idauluan ti presidente ti klase wenno korum daytoy a panaglilinnawag.
-
Tapno matulongan dagiti agtutubo a mangutob no kasano a mausarda dagiti talentoda a mangisangbay kadagiti kararua ken ni Cristo, mabalinmo nga idawat iti tunggal maysa kadakuada a mangadal iti maysa a benneg ti mensahe ni Elder John C. Pingree Jr. nga “I Have a Work for Thee” (Liahona, Nob. 2017, 32–35). Mabalinda nga ibinglay no kasano a makatulong ti nasursuroda iti maysa a tao a saan a sigurado a makatulong iti aramid ti Apo. Mabalinyo pay nga aggigiddan a mangrebyu iti benneg a “Discover and Develop Spiritual Gifts” iti mensahe ni Elder Pingree. Kasano a tulongannatayo ti Apo a mangtakuat ken mangpadur-as kadagiti talentotayo?
Agtignay iti Pammati
Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.
Dagiti Pangsuporta a Resources
-
Agbiag iti ebanghelio ni Jesucristo: 2 Nephi 31:17–21; 3 Nephi 27:13–21; “Following God” (video), ChurchofJesusChrist.org
-
Aywanan dagiti agkasapulan: Mateo 25:34–40; Mosiah 18:8–9; “You Are the Gift” (video), ChurchofJesusChrist.org
-
Awisen ti amin nga umawat iti ebanghelio: Mateo 5:14–16; 1 Pedro 3:15; “Sharing Your Beliefs” (video), ChurchofJesusChrist.org
-
Pagkaykaysaen dagiti pamilia para iti kinaagnanayon: Doktrina ken Katulagan 2; 128:18; “Because of James” (video), ChurchofJesusChrist.org
Panangisuro iti Wagas ti Mangisalakan
“No marikna dagiti agtutubo nga adda panagtalekmo kadakuada, dumakkelto ti panagtalekda iti nadiosan a potensialda” iPanangisuro iti Wagas ti Mangisalakan, 28).