Oktubre 9

Apay a Nasken a ni Jesucristo ti Agbalin a Sentro ti Biagko?

Isaias 58–66

Agiinnuman

Idauluan ti maysa a miembro ti panguluen ti korum wenno klase; 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood Kalpasanna, kas nayon iti panagiinnuman maipapan iti naipangruna a pakaseknan ti klase wenno korum, mabalin a kayatmo nga ilawlawag dagiti impresion ken tema manipud iti sapasap a komperensia. Makatulong dagiti sumaganad a saludsod.

• Ania dagiti tema wenno mensahe a napateg kadatayo? Ania ti nangpapigsa iti pammatitayo ken ni Jesucristo?

• Ania ti nangpatibker kadagiti pammaneknektayo maipapan kadagiti sibibiag a propeta? Ania ti nariknatayo a makaparegta nga aramiden gapu iti no ania ti nasursuro wenno nariknatayo?

• Ania ti kasapulantayo nga aramiden kas maysa a klase wenno korum tapno malagip ken agtignay a mayannurot iti balakad a nangngegantayo iti sapasap a komperensia?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti maysa a nataengan a lider wenno agtutubo; 25–35 a minuto

Isaganam ti Bagim a Naespirituan

“Siak agragsakakto unay ken ni Jehova, ti kararuak agrag-onto iti Diosko,” kinuna ni Isaias, “ta isu kinawesannak kadagiti pagan-anay ti pannakaisalakan, isu inabbongannak iti lambon ti kinalinteg” (Isaias 61:10). Apay nga “agrag-okayo iti Apo”? Kas ken ni Isaias, no bigbigentayo ti inaramid ti Apo para kadatayo, agrag-otayo, ket saritaentayo a masansan dagiti “kinamanagayat ni Jehova, ken dagiti kinadayaw ni Jehova” (Isaias 63:7).

Kasano ti rikna dagiti sursuruam maipapan iti Mangisalakan? Ania ti makatulong kadakuada a makarikna iti dakdakkel a panagayat ken panagdayaw para Kenkuana? Ania ti makatulong kadakuada a makarikna Iti ayatna? Utobem dagitoy a saludsod ket basaem ti Isaias 58–66, mabalin met nga irebyum ti mensahe ni Elder Matthew S. Holland iti “The Exquisite Gift of the Son” (Liahona, Nov. 2020, 45–47) ken Sister Cristina B. Franco “The Healing Power of Jesus Christ” (Liahona, Nob. 2020, 60–62).

Bayat ti panagsursurotayo iti ad-adu pay maipapan iti Mangisalakan, naparegtatayo a mangaramid Kenkuana a sentro ti biagtayo.

Aggigiddan a Masursuruan

Kas dagiti miembro ti klase wenno korum nga agsursuro maipapan iti mision a nakaibaonan ni Jesucristo nga ipatungpal, ad-adda a maparegtadanto a mangaramid iti Mangisalakan a sentro ti biagda. Nalabit a mabalinda a sukisoken ti Isaias 61:1–3 ken mangilista iti pisarra no ania ti nakatudingan ti Mangisalakan nga aramidenna (kitaen iti Lucas 4:16–20). Kasano nga impatungpal ti Mangisalakan dagitoy nga aspekto ti misionna? Kasano nga ipatungpalna dagitoy iti biagtayo ita? Makatulong dagiti kapanunotan iti baba iti klasem wenno korummo nga agtultuloy iti panaglilinnawag maipapan no apay a nasken a ni Jesucristo ti sentro ti biagtayo.

• Kanayon nga addaan ti sapasap a komperensia kadagiti mensahe a mangipaneknek maipapan ken ni Jesucristo. Mabalinmo nga awisen ti sumagmamano a miembro ti klase wenno korum a mangibinglay iti maysa a banag a nasursuroda maipapan iti Mangisalakan kabayatan ti sapasap a komperensia. Allukoyem ida a mangibinglay no kasano ti panagriknada maipapan iti Mangisalakan gapu iti nasursuroda.

• Makatulong dagiti nasantuan a kasuratan kadagiti agtutubo a nasaysayaat a makaawat no apay a ti Mangisalakan ti nasken a sentro ti biagda. Mabalinmo nga isurat iti pisarra ti Apay a nasken a ni Jesucristo a sentro ti biagko? Idawatmo kadagiti agtutubo a mangibinglay kadagiti kapanunotanda. Kalpasanna mabalinmo nga idawat kadakuada (tunggal maysa wenno kada grupo) tapno mangsukisok kadagiti nasantuan a kasuratan iti baba ti “Dagiti Pangsuporta a Resources” tapno mangsapul kadagiti nayon pay a sungbat. Awisem dagiti agtutubo a mangibinglay no ania ti masursuroda ken no apay a napateg kadakuada daytoy.

• Ibilang ti panangidawat kadagiti sursuruam a mangiladawan iti kapatgan nga aldaw ti biagda. Ania ti mabalin a kapatgan nga aldaw iti pakasaritaan? Awisem ida a mangtakuat iti no ania ti kinuna ni Elder Dieter F. Uchtdorf a kapatgan nga aldaw babaen ti panangrebyu iti mensahena a “Behold the Man!” (Liahona, Mayo 2018, 117–10). Allukoyem dagiti agtutubo a mangsapul kadagiti bendision nga inkari ni Elder Uchtdorf kadagiti “nakakita” ken ni Jesucristo. Mabalinda pay nga ibinglay no ania ti ar-aramidenda tapno mapagbalin a ti Mangisalakan ti sentro ti inaldaw a biagda. Mabalinmo nga allukoyen ida a mangibilang no ania ti mabalinda nga aramiden nga umas-asideg ken ni Jesucristo ket mangituding iti maysa a panggep a tun-oyen a mangaramid iti daytoy.

• No maysa a tao ti agsaludsod kadatayo no apay a mamatitayo ken ni Jesucristo, ania koma ti sawentayo? Allukoyem dagiti agtutubo a mangibinglay kadagiti kapanunotanda ken mangisurat kadagitoy iti pisarra. Mabalinmo pay nga awisen ida a mangrebyu iti “Ti Sibibiag a Cristo: Ti Pammaneknek dagiti Apostol“ (ChurchofJesusChrist.org) wenno “The Divine Mission of Jesus Christ” iti kapitulo 3 ti Preach My Gospel ([2019], 60–61). Allukoyem ida a mangsapul kadagiti simple a kinapudno a mabalinda nga ibinglay a mangilawlawag no apay a napateg kadakuada ti Mangisalakan. Mabalinda nga inayon dagiti kinapudno a masarakan iti listaan iti pisarra ket paglilinnawagan no kasano a maibinglayda kadagitoy a kinapudno kadagiti tao nga am-ammoda.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Juan 8:12; 14:6; Taga Roma 8:35–39; 2 Nephi 2:3–9; 9:5–10; Alma 36:3, 27; 3 Nephi 27:14–16, 27; Ether 12:27 (Apay a ni Jesucristo ti nasken a sentro ti biagtayo)

• Becky Craven, “Keep the Change” (Liahona, Nob. 2020, 58–60)

• “I Believe in Christ,” “I Stand All Amazed” (Hymns, nos. 134, 193)

• “Why We Need a Savior—A Christmas Message about Our Savior Jesus Christ,” “Because of Him” (videos), ChurchofJesusChrist.org

Panangisuro iti Wagas ti Mangisalakan

“Tunggal tao iti klasem ket nabaknang a paggapuan ti pammaneknek, nalawag a pannakaammo ken pannakaawat, ken padpadas iti panagbiag iti ebanghelio. Awisem ida nga agbibinninglay ken agpipinnaregta iti tunggal maysa” (Panangisuro iti Wagas ti Mangisalakan, 5).