jun saaj winq nab’eek chire li ha’

9 enero

Chan ru naraj li Dios naq tinwil lix yo’ob’tesihom, jo’ lin junxaqalil?

Genesis 1–2; Moises 2–3; Abraham 4–5

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru xoo’aatinak wi’ sa’ li ch’utam xnume’, ut k’a’ru li xqaye naq taqab’aanu? K’a’ru ak qab’aanuhom re xk’anjelankil li na’leb’ xqak’uub’?

• Rilb’aleb’ li wankeb’ sa’ rajb’al ru. K’a’ru naru taqaye malaj taqab’aanu re xtenq’ankileb’ li neke’reek’a naq xjunes wankeb’ malaj naq najt wan li qaChoxahil Yuwa’?

• Xb’oqb’aleb’ chixjunil chixk’ulb’al li evangelio. K’a’ru naru taqab’aanu re xtenq’ankileb’ li qas qiitz’in chireek’ankil lix rahom li Jesukristo?

• Xjunajinkileb’ li junkab’al chi junelik. Kʼaʼru chi naʼlebʼ naru taqawotz chiqibʼil qibʼ re xkawob’resinkileb’ li qajunkab’al?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Tzolok sa’ komonil

Re xtenq’ankileb’ li saaj chixk’oxlankil k’a’ru naru te’xb’aanu re rilb’al chi us lix yo’ob’tesihom li Dios, tz’iib’a a’in chiru li pizarron: Aj Yo’ob’tesinel, Li Yo’ob’tesink, ut Li qateneb’ankil. Patz’ reheb’ naq te’ril Genesis 1–2 ut te’xtz’iib’a k’a’ru neke’xtzol chirix laj Yo’ob’tesinel ut li Yo’ob’tesink. K’a’ru naqatzol chirix li qateneb’ankil? (chi’ilmanq Genesis 1:26–28; 2:15). Xb’aanunkil a’in naru tixtenq’aheb’ li saaj chi aatinak chirix li qateneb’ankil re rilb’al chi us lix yo’ob’tesihom li Dios.

• Chan ru taatenq’aheb’ li saaj chixtawb’al ru naq lix junxaqalileb’ loq’eb’ xyo’ob’tesihom li Dios? Naru taapatz’ reheb’ k’a’ru naqatzol chirix li qajunxaqalil sa’ 1 Korintios 6:19–20; Moises 2:26–27; Abraham 4:26–27. K’a’ru naraj naxye “jalam-uuch” ut “ilob’aal” arin? Sa’ komonil, tz’iib’ahomaq k’a’ru naru taqab’aanu re rilb’al chi us li qajunxaqalil. (Chi’ilmanq “Li kawilal sa’ tib’elej ut sa’ musiq’ej,” sa’ Choq’ re Xkawilaleb’ li Saaj [hu, 2011], 25–27.)

• Eb’ li saaj rajlal neke’xk’ul li na’leb’ li naxk’eheb’ chi xutaanak chirixeb’ lix junxaqalil. B’oqeb’ li saaj chirilb’al li video “La más grande creación de Dios” (ChurchofJesusChrist.org). Ye reheb’ naq te’xsik’ li aatin li tixtenq’aheb’ chixb’antioxinkileb’ lix junxaqalil (chi’ilmanq ajwi’ Russell M. Nelson, “El cuerpo: Un don magnífico que debemos apreciar,” Liahona, agosto 2019, 50–55). K’a’ru taqawotz re xtenq’ankil jun qamiiw malaj qakomon li naxutanaak chirix lix junxaqalil?

• Patz’ reheb’ li saaj naq te’ril chi ch’anch’o jun reheb’ li raqal a’in, ut naq te’xsik’ k’a’ut naq li Dios kixyo’ob’tesi li ruchich’och’ ut k’a’ru naraj naq taqab’aanu re rilb’al chi us: Genesis 1:26–28; 2:15; 1 Nefi 17:36; Tzol’leb’ ut Sumwank 49:19–21; 59:15–20; 104:13–18; Moises 2:26–31; 3:15. Patz’ reheb’ naq te’xye k’a’ru neke’xk’oxla chirixeb’ li raqal a’an. Patz’ ajwi’ reheb’ naq teetz’iib’a k’a’ru naru taqab’aanu sa’ junesal malaj sa’ komonil re rilb’al chi us li ruchich’och’ jo’ teneb’anb’il sa’ qab’een (chi’ilmanq li na’leb’ sa’ “Xkomon chik li tenq’ ”). K’a’ru tento taqajal sa’ li qak’oxlahom ut li qab’aanuhom re naq taqil chi us wi’chik li ruchich’och’?

• Naq maji’ nekextzolok, naru taapatz’ reheb’ li saaj naq te’xk’am chaq li k’a’aq re ru naxk’utb’esi xchaq’alil ru li ruchich’och’ li kixyo’ob’tesi li Dios, maare jun li jalam-uuch malaj utz’u’ujinb’il aatin. Patz’ reheb’ naq te’xch’olob’ k’a’ru xe’xk’am chaq ut naq te’xye k’a’ru neke’reek’a chirix lix yo’ob’tesihom li Dios.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

Chan ru naq taqil chi us li ruchich’och’:

• Rawb’al li iyaj, li toon che’, malaj jun li awimq.

• Xxokb’al li mul sa’ li tenamit.

• Xk’uub’ankil jun ch’ina k’anjel re saab’esink tenamit.

• B’eek chi tzuul ut xk’oxlankil li nakatb’antioxin wi’.

• Xyiib’ankil k’a’ruhaq rik’in li k’a’aq re ru taatz’eq raj, ut xk’utb’al chiruheb’ jun siiraq kristiaan.

• Xk’oxlankil chan ru roksinkil chi us li luz ut li ha’.

Li k’utuk jo’ li Kolonel

K’e xhoonaleb’ li saaj chixtzolb’aleb’ rib’ chirib’ileb’ rib’ sa’ li tzolok, xb’aan naq wan naq q’axal chaab’il wi’chik neke’tzolok rik’ineb’ li rech saajil, malaj naq eb’ a’an neke’k’utuk.