nab’eek li Jesukristo rochb’eeneb’ li tenamit

23 enero

Chan ru naq li Qaawa’ tinixtenq’a chi k’anjelak chi tiik wi’chik inpaab’aal?

Genesis 5; Moises 6

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru toje’ xqanumsi li xkawob’resi lix nawom qach’ool?

• Rilb’aleb’ li wankeb’ sa’ rajb’al ru. Ani taaraj ru qatenq’ ut qatij? K’a’ru naqeek’a naq tento taqab’aanu choq’ re?

• Xb’oqb’aleb’ chixjunil chixk’ulb’al li evangelio. Chan ru naq toowanq jo’ saqen chiruheb’ li qakomon ut li qamiiw li ink’a’ neke’xpaab’ li naqapaab’ laa’o?

• Xjunajinkileb’ li junkab’al chi junelik. K’a’ru taqab’aanu re xk’utb’al xkomon chik li rahok ut li tenq’ choq’ re li qajunkab’al ut re xb’aanunkil li us sa’ li qochoch?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Naq kib’oqe’ laj Enok chi k’anjelak chiru li Qaawa’, kireek’a naq numtajenaq xmajelal (chi’ilmanq Moises 6:31). A’b’an li Qaawa’ ink’a’ yal kixtaqla laj Enok chi k’anjelak; kixyeechi’i ajwi’ re naq tixkol rix ut tixtenq’a (chi’ilmanq Moises 6:32–34).

Maare laa’at ajwi’ nakaweek’a li kireek’a laj Enok chirix laa majelal chi k’anjelak. Wan naq patz’b’il qe naq took’anjelaq sa’ li qab’oqb’al sa’ Iglees. Ut wan naq yal naqil jun li na’ajman ut nokomusiq’aak xb’aan li Musiq’ej chi rahok ut chi tenq’ank. A’ut, naq nachal li k’anjel, naru kawaq qach’ool, jo’ laj Enok, xb’aan naq li Qaawa’ tooxtenq’a naq taqak’ulub’ lix b’oqom chi “b’eek rik’in” (Moises 6:34).

Naq nakakawresi aawib’ chi k’utuk chirix li tenq’ naru tixk’e li Qaawa’ qe naq yooko chi k’anjelak chiru li qas qiitz’in, il Moises 6 ut k’oxla li ak xak’ul laa’at sa’ xtenq’ankileb’ laa was aawiitz’in. Chan ru naq li Qaawa’ xatxtenq’a? K’a’ru nakawaj naq li saaj te’xtzol rik’in li kixb’aanu laj Enok ut xkomoneb’ chik li kristiaan? Naru ajwi’ taawil jun reheb’ li aatin a’in xb’aan li Awa’b’ej Henry B. Eyring: “Chatb’eeq wik’in” (Jolomil ch’utub’aj-ib’ re abril 2017) malaj “Eb’ li ixq re li sumwank jo’ rech aj k’anjel li Dios” (Jolomil ch’utub’aj-ib’ re octubre 2019).

jun na’b’ej ut lix ko’ sa’ li cocina

Naru taqataaqe li Kolonel wi took’anjelaq chiru li qas qiitz’in wulaj wulaj.

Tzolok sa’ komonil

Naq nokok’anjelak chiru li qas qiitz’in, yooko chi “b’eek rik’in [li Dios],” ut a’an tooxtenq’a sa’ li k’anjel a’an (Moises 6:34). Re xtenq’ankileb’ li saaj chi aatinak chirix a’in, patz’ reheb’ naq te’ril Moises 6:32–39 re xtawb’al chan ru naq li Qaawa’ kiwan rik’in laj Enok sa’ xk’anjel. Chan ru naq nokoxtenq’a li Qaawa’ naq nokok’anjelak chiru? Xb’aanunkil a’in naru texxtenq’a chi aatinak chirix li choxahil tenq’ naru naqak’ul naq nokok’anjelak chiru li qas qiitz’in.

• Naab’aleb’ li raqal sa’ li loq’laj hu neke’aatinak chirix li k’anjelak chiru li qas qiitz’in (chi’ilmanq Mateo 25:31–40; Lukas 10:25–37; Mosiah 2:17). Patz’ reheb’ li saaj naq te’xwotzeb’ li raqal neke’reek’asiheb’ chi k’anjelak. Naru taapatz’ naq te’chalq chi kawresinb’il chixwotzb’al li raqal sa’ li loq’laj hu malaj li seraq’ chirix li tenq’ank. Wi te’raj xtenq’, ye reheb’ naq te’ril “K’anjelak chiru” sa’ li K’utul Raqal reheb’ li Loq’laj Hu. K’a’ru nokomusiq’aak chixb’aanunkil xb’aan li k’a’ru xqil?

• Li Kolonel kik’anjelak chiru li ras riitz’in. K’a’ru naru naqatzol rik’in lix b’aanuhom a’an li tooxtenq’a chi k’anjelak? Re xsumenkil li patz’om a’in, eb’ li saaj naru te’rileb’ li raqal a’in re xtawb’al k’a’ru k’utb’il chirix li k’anjel kixb’aanu li Kolonel: Mateo 14:13–21; Jwan 9:1–11, 35–38; 13:4–5, 12–17; 3 Nefi 17:5–9. Patz’ reheb’ chixjunil naq te’xwotz li k’a’ru xe’xtaw. K’e xhoonaleb’ chixk’oxlankil ani te’k’anjelaq wi’ ut chan ru naq te’xtaaqe li Kolonel sa’ xk’anjeleb’.

• Wan naq naqak’oxla naq nimaq raj li k’anjel tento taqab’aanu. Maare chi jo’kan naq nokob’ay chi k’anjelak chiru li qas qiitz’in. Naru taaye reheb’ naq li Kolonel kik’anjelak chiruheb’ li kristiaan kixtaw sa’ xb’e wulaj wulaj (chi’ilmanq Mateo 12:9–13; Markos 5:21–34; Lukas 19:1–10; Jwan 4:3–26). Re xtenq’ankileb’ li saaj chixk’oxlankil chan ru te’kanjelaq chiru li ras riitz’ineb’ wulaj wulaj, naru taak’ut jun reheb’ li video a’in: “Cuando os halláis al servicio—Hombres Jóvenes” malaj “Cuando os halláis al servicio—Hombres Jóvenes” (ChurchofJesusChrist.org). Patz’ reheb’ li saaj naq te’xwotz xna’leb’. K’a’ru li kok’ k’anjel naqileb’ jalan chik li kristiaan chixb’aanunkil? K’a’ru musiq’anb’ilo chixb’aanunkil? Patz’ reheb’ naq te’xtz’aqob’resi ru li ch’ol aatin a’in: “Naru nink’anjelak chiru li was wiitz’in naq …” ut “Tinsik’ xtenq’ li Qaawa’ sa’ li k’anjelak rik’in …” Toja’ naq taapatz’ reheb’ k’a’ru xe’xtz’iib’a.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• “Oportunidades para hacer el bien,” “Las enseñanzas de Thomas S. Monson: Rescatar a los necesitados” (eb’ li video), ChurchofJesusChrist.org

• Bonnie L. Oscarson, “Li na’ajman ru chiqu laa’o” (Jolomil ch’utub’aj-ib’ re octubre 2017)

Li k’utuk jo’ li Kolonel

“Tenq’aheb’ li komon chixnawb’al ru li Santil Musiq’ej sa’ xch’ool jo’ ajwi’ chixyu’aminkil li k’a’ru naxye” (Li k’utuk jo’ li Kolonel [2016], 10).