jun saaj ixq yoo chi tzolok

13 febrero

Chan ru naq tookanaaq rik’in li Qaawa’ sa’ jun ruchich’och’ aj maak?

Genesis 12–17; Abraham 1–2

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Chan ru naq xoonacho’ rik’in li Kolonel? K’a’ru yooko chixb’aanunkil re wank jo’ a’an?

• Rilb’aleb’ li wankeb’ sa’ rajb’al ru. Ani wan sa’ qak’a’uxl? Chan ru naq taqatenq’a?

• Xb’oqb’aleb’ chixjunil chixk’ulb’al li evangelio. Chan ru naq taqasume lix patz’omeb’ li qamiiw chirix li Iglees?

• Xjunajinkileb’ li junkab’al chi junelik. K’a’ru naru taqab’aanu re aatinak chi kok’ aj xsa’ rik’in li qajunkab’al ut li qech alal?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Chalen chalen ch’a’aj li wank chi tiik qach’ool sa’ jun ruchich’och’ aj maak. Choq’ re laj Abraham, maawa’ ka’ajwi’ li ruchich’och’ li naxtz’eqtaana li Dios—lix yuwa’ ajwi’ laj Abraham kixtz’eqtaana li Qaawa’ (chi’ilmanq Abraham 1:5–12; 2:5). Ke’yale’ rix chi numtajenaq laj Abraham ut li xSara, a’ut ke’xpaab’ lix yeechi’ihom li Qaawa’ ut “ke’saho’ sa’ xch’ool ut ke’xye naq li ruchich’och’ a’in maawa’ tz’aqal lix na’ajeb’, yal aj numeleb’ b’an arin” (Hebreos 11:13).

Chan ru taatenq’aheb’ li saaj chi kanaak chi tiikeb’ xpaab’aal naq neke’reek’a naq “yal aj numeleb’ arin” sa’ li ruchich’och’ xb’aan naq neke’xpaab’ li Qaawa’? Chan ru taamusiq’aheb’ chixyu’aminkil li raatin li Qaawa’ chi kaweb’ xch’ool? Naq nakakawresi li tzolok, naru taawil Jwan 15:18–20 ut li raatin li Elder Neil L. Andersen “Numtaak sa’ xb’een li ruchich’och’ ” (Jolomil ch’utub’aj-ib’ re abril 2017).

jun saaj winq naril li ha’

Eb’ lix tzolom li Jesukristo naru te’xtaw tutquukilal naq tiikeb’ xpaab’aal us ta li ka’pak’alink.

Tzolok sa’ komonil

Maare xe’musiq’aak li saaj chiru li xamaan a’in xb’aan lix b’aanuhom laj Abraham sa’ Genesis 12–17 ut Abraham 1–2. Naru taapatz’ reheb’ naq te’ril Abraham 1:1–19 ut te’xwotz k’a’ru nawulak chiruheb’ chirix lix b’aanuhom laj Abraham. Chan ru naq lix yalb’al rix laj Abraham chanchan wi’ lix yalb’al qix laa’o sa’ li kutan a’in? Naru xb’aanunkil wiib’ oxib’ reheb’ li na’leb’ a’in re tex’aatinaq chirix li kanaak chi tiik qapaab’aal chiru li Jesukristo sa’ chixjunil hoonal.

• Li Qaawa’ ut eb’ lix profeet rajlal neke’xpatz’ naq toowanq chi tiik qapaab’aal us ta li maa’usilal li wan chiqasutam. Chan ru naq laj Satanas naraaleheb’ li saaj re te’xq’et lix taqlahom li Dios sa’ li qakutankil? Eb’ li saaj naru te’ril wiib’ oxib’ reheb’ li raqal sa’ “Xkomon chik li tenq’.” Patz’ reheb’ naq te’aatinaq chirix li kanaak rik’in li Kristo naq li ruchich’och’ nokoraale chi maakob’k malaj naq nokoreetz’u. Naru te’xwotz chan ru naq tiik neke’wan us ta li maa’usilal chixsutameb’. Chan ru naq laa’o malaj anihaq chik nokoru chixb’aanunkil a’in? Naru ajwiʼ taak’utebʼ li video li wankeb’ saʼ “Xkomon chik li tenq’.”

• Re xtenq’ankileb’ li saaj chixtawb’al ru chan ru te’numtaaq sa’ xb’een li ruchich’och’ ut te’osob’tesiiq xb’aan a’an, tz’iib’a a’in chiru li pizarron: Numtaak sa’ xb’een li ruchich’och’ naraj naxye … ut Naq nokonumta sa’ xb’een li ruchich’och’, laa’o … Toja’ naq taapatz’ reheb’ li saaj naq te’ril li raatin li Elder Neil L. Andersen, “Numtaak sa’ xb’een li ruchich’och’.” Patz’ reheb’ naq te’xtaw chan ru xtz’aqob’resinkileb’ ru li ch’ol aatin a’an, ut naq te’xtz’iib’a chiru li pizarron. Aatinanqex chirix li na’leb’ neke’xtaw. Patz’ re jun li saaj naq taachalq sa’ li tzolok chi kawresinb’il re xseraq’inkil chan ru naq li Jesukristo kikana chi tiik chiru lix Yuwa’ us ta li yale’k-ix (chi’ilmanq Mateo 4:1–11; Lukas 22:39–44). K’a’ru naxk’ut lix b’aanuhom li Kolonel chiqu chirix numtaak sa’ xb’een li ruchich’och’? (chi’ilmanq Jwan 16:33).

• Eb’ lix tzolom li Jesukristo wankeb’ “sa’ li ruchich’och’, a’ut moko reheb’ ta li ruchich’och’.” Li wank “sa’ li ruchich’och’ ” naraj naxye naq wan naq nayale’ qix naq tiik wanko. A’b’an naraj ajwi’ naxye naq naru naqak’e chi uxk li chaab’ilal. Re xk’utb’al a’in, naru taapatz’ re jun li saaj naq taachalq chi kawresinb’il re xseraq’inkil jun reheb’ lix seraq’ li Awa’b’ej Bonnie H. Cordon sa’ “De modo que vean” (Liahona, mayo 2020, 78–80). K’a’ru naqatzol sa’eb’ li seraq’ a’an chirix roksinkil li qasaqen re xtenq’ankileb’ li qas qiitz’in chi chalk rik’in li Jesukristo? Ye reheb’ li saaj naq te’xsik’ li na’leb’ sa’ li raatin li Awa’b’ej Cordon li naxwaklesi xch’ooleb’ chi wank jo’ saqen sa’ jun ruchich’och’ aj maak. Patz’ reheb’ naq te’ril ru li na’leb’ xe’xtaw chi kaw xyaab’ xkux, ut naq te’xowtz li neke’musiq’aak chixb’aanunkil.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Mateo 5:14–16; 1 Nefi 15:23–25; Helaman 5:12; Tzol’leb’ ut Sumwank 10:5; 27:15–18; 87:8 (Chan ru kanaak rik’in li Jesukristo sa’ jun ruchich’och’ aj maak)

• “Permaneced en lugares santos - Florece donde te encuentres,” “195 Vestidos,” “Guiados a salvo a casa” (eb’ li video), ChurchofJesusChrist.org

Li k’utuk jo’ li Kolonel

Li Kolonel kixb’oq laj Pedro chixch’olob’ankil xyaalal naq kixpatz’, “Anihin laa’in naq nakaye?” (Mateo 16:15). Naq kisumen laj Pedro, kikawu xnawom xch’ool. K’a’ru taapatz’ reheb’ li saaj naq te’xch’olob’ re naq li Musiq’ej naru tixkawob’resi xnawomeb’ xch’ool?