jun saaj sumal naril li santil ochoch

27 febrero

K’a’ut naq aajel ru li sumlaak chi junelik?

Genesis 24–27

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. K’a’ru xe’aatinak wi’ li obispil sa’ li jolomil ch’utam choq’ reheb’ li saaj sa’ li teep? A’ yaal li xe’aatinak wi’, k’a’ru taqab’aanu?

• Rilb’aleb’ li wankeb’ sa’ rajb’al ru. K’a’ru naru taqab’aanu re xtenq’ankileb’ li qas qiitz’in jo’ naraj li Kristo naq naqil li na’ajman ru a’b’an ink’a’ naqanaw k’a’ru xyeeb’al?

• Xb’oqb’aleb’ chixjunil chixk’ulb’al li evangelio. K’a’ru ak xqataw sa’ lix evangelio li Jesukristo li naxsahob’resi qach’ool? Chan ru taqawotz li sahil ch’oolejil a’an rik’ineb’ li qas qiitz’in?

• Xjunajinkileb’ li junkab’al chi junelik. K’a’ru yooko chixb’aanunkil re xtawb’al xk’ab’a’eb’ li qaxe’ qatoon li neke’raj ru xk’ojob’ankil k’anjel re li santil ochoch? K’a’ru naru taqab’aanu re xtenq’ankileb’ li qas qiitz’in chixtawb’al xk’ab’a’eb’ lix xe’toonil?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Naq kiwulak xhoonal naq taasumlaaq laj Isaak, laj Abraham kixpatz’ re xmoos naq tixtaw jun rixaqil laj Isaak. Laj Abraham ut laj Isaak ke’raj xtawb’al jun ixaqilb’ej choq’ re laj Isaak li tixpaab’eb’ li sumwank rik’in li Qaawa’ ut tixk’uteb’ chiruheb’ lix kok’al. Li xRebeka tiik xpaab’aal ut kisumla rik’in laj Isaak. Naxye sa’ li loq’laj hu naq jwal aajel ru li sumlaak sa’ rilob’aal li Dios, a’b’an yoo chi pleetimank lix na’leb’ li Dios chirix li sumlaak sa’ li qakutan. A’ut eb’ lix profeet neke’xye naq li sumlaak “k’ojob’anb’il xb’aan li Dios” (“Li Junkab’al: Jun Jek’inb’il Aatin choq’ re li Ruchich’och’,” ChurchofJesusChrist.org). Aajel ru naq eb’ li saaj te’xtaw ru li junelikil na’leb’ chirix li sumlaak. A’in tixtenq’aheb’ chixkawresinkil rib’ choq’ re ut chixch’olob’ankil xyaalal li sumlaak jo’ raqal sa’ lix k’uub’anb’il na’leb’ li qaChoxahil Yuwa’.

K’a’ru neke’reek’a li saaj chirix li sumlaak chi junelik? Chan ru taatenq’aheb’ chixk’oxlankil k’a’ut naq aajel ru li sumlaak sa’ lix k’uub’anb’il na’leb’ li Dios? Naq nakakawresi li tzolok, naru taawil li raatin li Elder D. Todd Christofferson, “K’a’ru aj-e li sumlaak, k’a’ru aj-e li junkab’al” (Jolomil ch’utub’aj-ib’ re abril 2015). Naru ajwi’ taawil “Li Junkab’al: Jun Jek’inb’il Aatin choq’ re li Ruchich’och’ ” (ChurchofJesusChrist.org).

jun junkab’al nab’eek sa’ li k’iche’

Aajeleb’ ru li sumlaak chi junelik ut li junkab’al sa’ lix k’uub’anb’il na’leb’ li qaChoxahil Yuwa’.

Tzolok sa’ komonil

Eb’ li saaj maare xe’xk’oxla k’a’ut naq aajel ru li sumlaak naq xe’ril Genesis 24–27 chiru li xamaan a’in. Patz’ reheb’ naq te’ril Genesis 24. Patz’ reheb’ naq te’xwotz li raqal li neke’xk’ut naq aajel ru li sumlaak choq’ reheb’ li kristiaan sa’ li raqal. Patz’ reheb’ naq te’xk’oxla k’a’ut naq aajel ru li sumlaak chi junelik sa’ lix k’uub’anb’il na’leb’ li Dios. Xb’aanunkil a’in naru tixtenq’aheb’ chixtawb’al ru k’a’ut naq aajel ru li sumlaak.

• Maare te’wanq xhoonal li saaj naq tento te’xch’olob’ k’a’ut naq aajel ru li sumlaak choq’ reheb’. Ye reheb’ naq te’xk’oxla naq wankeb’ li ramiiw li naxpaab’ naq junxil na’leb’ li sumlaak ut moko na’ajman ta chik. Naru te’xtz’iib’a jun ch’ina hu re li amiiw a’in re xch’olob’ankil k’a’ut naq aajel ru li sumlaak sa’ lix k’uub’anb’il na’leb’ li qaChoxahil Yuwa’. Waklesi xch’ooleb’ chiroksinkil li na’leb’ li wan sa’ “Li Junkab’al: Jun Jek’inb’il Aatin choq’ re li Ruchich’och’.” Naru ajwi’ te’roksi li raqal re li loq’laj hu sa’ “Xkomon chik li tenq’,” malaj sa’ “Sumlaak” sa’ li K’utul Raqal reheb’ li Loq’laj Hu. Patz’ reheb’ naq te’xwotz li xe’xtz’iib’a.

• Re aatinak chirix li sumlaak, tz’iib’a chiru li pizarron: K’a’ut naq aajel ru li sumlaak chi junelik? K’e xhoonaleb’ li saaj chixtz’iib’ankil xsumenkil li patz’om a’in. Patz’ reheb’ naq te’xwotz li xe’xtz’iib’a. Naru te’xsik’ xkomon chik li na’leb’ sa’ li raatin li Elder D. Todd Christofferson, “K’a’ru aj-e li sumlaak, k’a’ru aj-e li junkab’al” (Jolomil ch’utub’aj-ib’ re abril 2015). Naru ajwi’ te’ril li video “¿Por qué el matrimonio es sagrado para el Padre Celestial?” re li “Cara a Cara con el élder y la hermana Renlund” (ChurchofJesusChrist.org). Patz’ reheb’ naq te’xwotz k’a’ut naq aajel ru li sumlaak.

• Naq naqak’ulub’a lix na’leb’ li Dios chirix li sumlaak ut naqayal xyu’aminkil, too’osob’tesiiq. A’b’anan, wankeb’ li kristiaan li ch’a’aj chiruheb’ xkawresinkil li sahil ch’oolejil sa’ li sumlaak—us ta neke’xyal xq’e chixyu’aminkil li evangelio. Naru taapatz’ reheb’ li saaj k’a’ruheb’ tana li ch’a’ajkilal a’an. K’a’ru naru taqab’aanu re xkawresinkil qib’ choq’ re li ch’a’ajkilal a’an? Naru taapatz’ reheb’ naq te’ril li wiib’ raqal sa’ xraqik li raatin li Elder Neil L. Andersen, “Xsa’ ru li paab’aal” (Jolomil ch’utub’aj-ib’ re abril 2019). Eb’ li saaj naru te’aatinaq chirix li xe’ril sa’ xyu’ameb’ lix xe’toonil rik’ineb’ li ani ke’xnumsi li ch’a’ajkilal rik’in paab’aal, jo’ chanruheb’ li yeeb’ileb’ resil xb’aan li Elder Andersen. Chan ru naq li Kolonel naru tixtenq’a chixjunileb’ li wankeb’ xch’a’ajkilal naq neke’xsik’ li sumlaak chi junelik?

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Tzol’leb’ ut Sumwank 49:16–17 (Li sumlaak natenq’an chixtz’aqob’resinkil ru li rajom li Yo’ob’tesink)

• Tzol’leb’ ut Sumwank 131:1–4; 132:15–21 (Na’ajman ru li sumlaak chi junelik re xk’ulb’al li taqenaqil loq’al)

• “Renacimiento del Matrimonio,” “¿Cómo se conocieron el élder y la hermana Bednar?” re li “Cara a Cara con el élder y la hermana Bednar” (eb’ li video), ChurchofJesusChrist.org

Li k’utuk jo’ li Kolonel

Li Kolonel kixb’oqeb’ lix tzolom chi k’anjelak rik’in xpaab’aaleb’ ut chixyu’aminkil lix tzol’leb’. Chan ru taab’oqeb’ li saaj chixyu’aminkil li tzol’leb’ neke’xtzol?