“13 marzo. Chan ru naq tinnumsi li ch’a’ajkilal rik’in paab’aal? Genesis 37–41,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li na’leb’ choq’ re 2022 (2021)
“13 marzo. Chan ru naq tinnumsi li ch’a’ajkilal rik’in paab’aal?” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li na’leb’ choq’ re 2022
13 marzo
Chan ru naq tinnumsi li ch’a’ajkilal rik’in paab’aal?
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. B’ar ak xqil li ruq’ li Qaawa’ sa’ li qayu’am?
-
Rilb’aleb’ li wankeb’ sa’ rajb’al ru. Chan ru naq taqatenq’a qib’ chiqib’il qib’ sa’ li naqanumsi?
-
Xb’oqb’aleb’ chixjunil chixk’ulb’al li evangelio. Chan ru naq taqoksi li tecnologia re xwotzb’al li evangelio?
-
Xjunajinkileb’ li junkab’al chi junelik. K’a’ru yooko chixb’aanunkil re xtenq’ankil li qajunkab’al chi chalk rik’in li Kristo?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutbʼal li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
Naq toj saaj, laj Jose re Egipto kiwan k’iila xch’a’ajkilal. Eb’ li ras ke’xwech’i rix ut ke’xrahob’tesi. Ki’aaleek chixq’etb’al li chaq’rab’ re saq ru ch’oolej. Us ta kixb’aanu li k’a’ru tiik, kitz’ape’ sa’ tzalam. Eb’ li saaj maare neke’xk’ul xkomon li ch’a’ajkilal a’an. Naq nakawil li kixk’ul laj Jose sa’ Genesis 37–41, k’oxlaheb’ li saaj sa’ laa tzoleb’aal. K’oxla k’a’ru li chaab’il na’leb’ naru te’xtzol rik’in laj Jose (chi’ilmanq ajwi’ Eter 12:27; Henry B. Eyring, “Yal, yal, yal aaq’e,” Jolomil ch’utub’aj-ib’ re octubre 2018). Lix seraq’ laj Jose maare tixmusiq’aheb’ li saaj chixpatz’b’al, “Chan ru naq tinnumsi lin ch’a’ajkilal rik’in paab’aal, ut chan ru naq li Dios tinixtenq’a?”
Tzolok sa’ komonil
Naru taapatz’ reheb’ li saaj naq te’xtz’iib’a chiru pizarron li k’a’ru kixk’ul laj Jose re Egipto sa’ xyu’am, jo’ tz’iib’anb’il sa’ Genesis 37 ut 39–41. Wi taak’uteb’ li jalam-uuch, jo’ li wankeb’ sa’ Kim, Taaqehin—Choq’ reheb’ li komon ut li junkab’al, naru tixtenq’aheb’ chi jultiko’k reheb’ k’a’ru kixk’ul. Chan ru naq lix ch’a’ajkilal laj Jose chanchan li ch’a’ajkilal neke’xk’ul li saaj sa’ li kutan a’in? Wi ta yo’yo laj Jose anajwan, k’a’ raj ru tixye qe chirix xnumsinkil li ch’a’ajkilal? K’a’ raj ru tixye chirix lix wanjik rik’in li Qaawa’ ut chan ru naq kitenq’aak xb’aan a’an? Naru xb’aanunkil a’in re xtenq’ankileb’ li saaj chixk’oxlankil chan raj ru naq te’xnumsi lix ch’a’ajkilaleb’ rik’in paab’aal chirix li Jesukristo.
-
Xtzolb’al chan ru naq li Kolonel kixnumsi li ch’a’ajkilal naru tooxtenq’a chixnumsinkil li qach’a’ajkilal rik’in paab’aal. Eb’ li saaj naru te’xye k’a’ru li ch’a’ajkilal kixk’ul li Kolonel ut te’xseraq’iheb’ sa’ komonil (chi’ilmanq “Xkomon chik li tenq’ ” re xk’ulb’al li na’leb’). K’a’ru kixb’aanu li Kolonel sa’ xyi lix ch’a’ajkilal li naxtoch’ qach’ool? Chan ru naru taqab’aanu li kixb’aanu a’an naq naqanumsi li qach’a’ajkilal?
-
Wan naq nokoru chixnumsinkil li ch’a’ajkilal chi chaab’il wi taqayal rilb’al jo’ naxb’aanu li Qaawa’. Re xtenq’ankileb’ li saaj chixtawb’al ru a’in, patz’ reheb’ naq te’xsik’ li na’leb’ chirix xb’aanunkil a’an sa’ li raatin li Elder Rafael E. Pino, “Li junelikil ilok re li evangelio” (Jolomil ch’utub’aj-ib’ re abril 2015). Patz’ reheb’ naq te’xwotz li k’a’ru xe’xtaw. K’a’ru neke’xk’ut li na’leb’ a’an chirix rilb’al ut xnumsinkil li qach’a’ajkilal? Wi ta li Kolonel taa’aatinaq qik’in chirix li qach’a’ajkilal, k’a’ raj ru tixye? Re xsumenkil li patz’om a’in, li saaj naru te’rileb’ li raqal re li loq’laj hu sa’ “Xkomon chil li tenq’.”
-
Naru taapatz’ reheb’ li saaj naq te’xye resil li ani (maare jun lix xe’toonil) namusiq’ank reheb’ xb’aan lix na’leb’ sa’ xnumsinkil xch’a’ajkilal. Malaj laa’at naru taaye resil li ani nakanaw ru. Naru xtawb’al resileb’ li kristiaan li ke’xnumsi li ch’a’ajkilal rik’in paab’aal sa’ li aatin re li jolomil ch’utub’aj-ib’ (wankeb’ junjunq sa’ “Xkomon chik li tenq’ ”). K’oxla k’a’ru naru taawotz li taatenq’anq reheb’ li saaj. Naq nekex’aatinak chirix a’in, patz’ reheb’ li saaj naq te’xk’e reetal chan ru naq li paab’aal chirix li Jesukristo kixtenq’aheb’ li kristiaan sa’ xch’a’ajkilaleb’. Naru ajwi’ taawotz lix na’leb’ li Obiisp aj W. Christopher Waddell chirix li k’a’ru naxk’e li Qaawa’ re qatenq’ankil sa’ li qach’a’ajkilal, li naxye sa’ xraqik li raatin, “Xsutq’isinkil qib’ rik’in li Qaawa’ ” (Jolomil ch’utub’aj-ib’ re octubre 2017).
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
Mateo 4:1–11 (Kiwan xpaab’aal li Kolonel sa’ xyi li ch’a’ajkilal)
-
Mateo 14:10–21; Lukas 23:33–34; Jwan 19:25–27 (Li Kolonel kik’anjelak chiru li ras riitz’in sa’ xyi lix ch’a’ajkilal)
-
Mateo 27:45–46; Lukas 23:44–46 (Xjunes rib’ kireek’a li Kolonel sa’ xch’a’ajkilal, a’ut kixpaab’ li Dios)
-
Mateo 5:38–45; Mosiah 24:8–15; Tzol’leb’ ut Sumwank 121:1–8; 122:5–9 (Lix na’leb’ li Kolonel chirix xk’ulb’al li ch’a’ajkilal)
-
Neil L. Andersen, “Eb’ li rahob’tesinb’il,” Jolomil ch’utub’aj-ib’ re octubre 2018
-
L. Todd Budge, “Li kanab’ank-ib’ rajlal ut rik’in kawilal,” Jolomil ch’utub’aj-ib’ re octubre 2019
-
Jean B. Bingham, “Re naq lix sahilal eech’ool tz’aqalaq re ru,” Jolomil ch’utub’aj-ib’ re octubre 2017
Li k’utuk jo’ li Kolonel
“Naq yookat chixkawresinkil aawib’, k’uub’ aana’leb’ a’ yaal jo’ li nakataw ru chirixeb’ li ani tzolb’ileb’ aab’aan” (Li k’utuk jo’ li Kolonel, 7). Kawresiheb’ li kok’ k’anjel rik’in tijok; taawoksiheb’ li loq’laj hu ut xkomon chik li k’anjeleb’aal li naru te’tenq’anq rik’in lix ch’a’ajkilaleb’ li saaj.