saaj winq naxtoch’ li guitarra

27 marzo

Anihin laa’in, ut k’a’ru naraj li Dios choq’ we?

Exodo 1–6

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Chan ru naq yooko chixtawb’al xsahil qach’ool sa’ xtaaqenkil li Jesukristo?

• Rilb’aleb’ li wankeb’ sa’ rajb’al ru. Ani sa’ li qateep malaj qatenamit naraj ru qatenq’? Chan ru taqatenq’a?

• Xb’oqb’aleb’ chixjunil chixk’ulb’al li evangelio. Chan ru taqakawresi qib’ chiqib’il qib’ re xik sa’ mision?

• Xjunajinkileb’ li junkab’al chi junelik. Chan ru tootenq’anq sa’ li teep re xb’aanunkil li k’anjel re li santil ochoch ut li junkab’al?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Nimla sachb’a-ch’oolej jun li toon k’ix naxamnak a’ut ink’a nak’ate’, chi jo’kan naq kichape’ xk’a’uxl laj Moises xb’aan. A’ut nim wi’chik xwankil li kik’ulman chirix a’an. Li Dios kiraatina laj Moises, ut laj Moises kixtzol rilb’al rib’ jo’ chanru naril li Dios. Rik’in li na’leb’ a’an ut rik’in xtenq’ li Qaawa’, laj Moises kixb’aanu jun k’anjel li kixk’oxla naq moko naru ta xb’aanunkil: kixaqli chiru laj Farahon ut kixkol lix tenamit li Dios.

Chiqajunil tento taqanumsi li k’a’ru tixsach li qaxiw ut tixk’e qe xnawom li Dios chirix aniho ut b’ar truuq toowulaq. Eb’ li saaj mas neke’xk’ul li b’alaq’il na’le’b chirix aniheb’ a’an. Ut jo’ laj Moises, “wan jun li k’anjel” naraj li Dios naq te’xb’aanu (Li ch’ol aatin choq’ reheb’ li molam re li Tijonelil re Aaron). Wankeb’ laj Farahon li tento te’xaqliiq chiru, ut li kristiaan li tento te’xkol. Chan ru taantenq’aheb’ chixjultikankil naq raarookeb’ xb’aan lix choxahil na’ xyuwa’, ut naq “wan xchoxahilaleb’ ut lix junelikil eechanihom”? (Li ch’ol aatin choq’ reheb’ li Saaj Ixq). K’oxla a’in naq yookat chirilb’al Exodo 1–6. Naru ajwi’ taawil Tzol’leb’ ut Sumwank 18:10–15 ut li raatin li Awa’b’ej Dieter F. Uchtdorf, “Ustedes son importantes para Él” (Jolomil ch’utub’aj-ib’ re octubre 2011).

eb’ li saaj ixq chirix kab’l

Naru taajalaaq li qayu’am naq naqataw ru aniho jo’ ralal xk’ajol li Dios.

Tzolok sa’ komonil

Eb’ li saaj maare ak xe’ril Exodo 1–6 chiru li xamaan a’in. Re xtenq’ankileb’ chixwotzb’al li xe’xtzol, naru taapatz’ reheb’ k’a’ru kireek’a laj Moises chirix lix b’oqb’al chixkolb’aleb’ lix junkab’al laj Israel (chi’ilmanq Exodo 3:11). K’a’ru kixk’ut li Qaawa’ chiru laj Moises re xjalb’al lix na’leb’? (chi’ilmanq Exodo 3:4–15; 4:10–17; chi’ilmanq ajwi’ Moises 1:3–11). Chan ru naq lix na’leb’ kixtenq’a laj Moises? Chan ru naq tooxtenq’a laa’o? Naru xb’aanunkil a’in re xtenq’ankileb’ li saaj chixtawb’al k’a’ru naxk’ut li Dios chirix aniheb’ a’an, lix loq’aleb’, ut li reechanihomeb’.

• Li Awa’b’ej Dieter F. Uchtdorf kixye, “Li Qaawa’ moko naxb’is ta li aamej jo’ b’isb’il xb’aan li ruchich’och’ ” (“Ustedes son importantes para Él,” 22). Re aatinak chirix a’in, naru taatz’iib’a chiru li pizarron Chan ru naq li ruchich’och’ naxk’ut naq wan xloq’al jun li kristiaan? Patz’ reheb’ li saaj naq te’xsume li patz’om. Wi ta taqab’is li qaloq’al chi jo’kan, chan raj ru naq taajalaaq li taqasik’ ru xb’aanunkil? Toja’ naq taatz’iib’a Chan ru naq li Dios naxk’ut naq wan xloq’al jun li kristiaan? Naq yookeb’ chi sumenk li saaj, ye reheb’ naq te’ril Jwan 3:16; Tzol’leb’ ut Sumwank 18:10–15; Lukas 15:3–6, 11–32. Naru ajwi’ te’ril lix raqik li raatin li Awa’b’ej Uchtdorf. Wi ta taqab’is li qaloq’al chi jo’kan, chan raj ru naq taajalaaq li taqasik’ ru xb’aanunkil?

• Li k’a’ru yeeb’il chiqix wan xwankil sa’ chan ru naqil qib’ ut eb’ li qas qiitz’in. Re xtenq’ankileb’ li saaj chixk’eeb’al reetal li neke’xk’oxla chirixeb’ a’an, naru taak’e junjunq li perel hu reheb’. Chiru li junjunq hu tz’iib’anb’ilaq “Ma sa laa ch’ool? Laa’in …” Patz’ reheb’ naq te’xk’oxla k’a’ru li aatin te’xtz’iib’a re xch’olob’ankil aniheb’ a’an. Wi ta li qaChoxahil Yuwa’ yoo raj chixtz’iib’ankil, k’a’ raj ru tixtz’iib’a? K’a’ raj ru tixtz’iib’a, wi ta tz’iib’anb’ilaq “Ma sa laa ch’ool? Laa’in ninru chi wank jo’ …”? Eb’ li saaj naru te’xk’oxla li na’leb’ a’an naq neke’ril wiib’ oxib’ reheb’ li raqal a’in: 1 Jwan 3:1–3; Moroni 10:32–33; Tzol’leb’ ut Sumwank 76:69–70; 84:37–38.

• Sa’ li aatin re li jolomil ch’utub’aj-ib’ sa’ “Xkomon chik li tenq’ ” wankeb’ li seraq’ chirixeb’ li ke’jala xyu’am xb’aan naq ke’xtzol aniheb’ a’an jo’ ralal xk’ajol li Dios. Eb’ li saaj naru te’rileb’ li seraq’ a’an re te’xwotz k’a’ru xe’xtaw. Naru ajwi’ taaye chan ru naq xjala laa yu’am rik’in xnawb’al naq chiqajunilo ralal xk’ajolo li Dios. Patz’ reheb’ li saaj naq te’xb’aanu ajwi’ a’an.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Joy D. Jones, “Li moko naru ta chi b’ise’k xtz’aq,” Jolomil ch’utub’aj-ib’ re octubre 2017

• Brian K. Taylor, “Ma laa’in jun ralal li Dios?” Jolomil ch’utub’aj-ib’ re abril 2018

• “Nuestra verdadera identidad,” “¿Cómo puedo verme a mí mismo como Dios lo hace?” re li “Cara a Cara con el élder Rasband, la hermana Oscarson y el hermano Owen” (eb’ li video), ChurchofJesusChrist.org

• Li ch’ina k’anjel “Todo sobre mí” sa’ FamilySearch.org/discovery

Li k’utuk jo’ li Kolonel

“Wi eb’ li saaj neke’reek’a naq nakawil xchaab’ilaleb’, taanimanq lix kawilal xch’ooleb’ chirix lix choxahil eechanihom, ut taasachq aach’ool rik’in li k’a’ru neke’ru chixb’aanunkil” (Li k’utuk jo’ li Kolonel, 28).