Jesukristo

10 abril

Chan ru naq tinkawob’resi inpaab’aal chirix li Jesukristo wulaj wulaj?

Exodo 14–17

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Rochb’een li aatinak chirix li na’ajman sa’ lee tzoleb’aal malaj molam, naru tex’aatinaq chirix li xeril ut xerab’i sa’ li jolomil ch’utub’aj-ib’. Naru roksinkileb’ li patz’om a’in.

• Ma wankeb’ li na’leb’ malaj esil li xe’xtoch’ qach’ool? K’a’ru xnimob’resi li qapaab’aal chirix li Jesukristo?

• K’a’ru xnimob’resi lix nawom qach’ool chirixeb’ li yo’yookil profeet? K’a’ru nokomusiq’aak chixb’aanunkil xb’aan li k’a’ru xqatzol malaj xqeek’a?

• Ma wan k’a’ruhaq tento taqab’aanu sa’ komonil re xjultikankil ut xb’aanunkil li xqab’i sa’ li jolomil ch’utub’aj-ib?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Re naq ink’a’ te’kamq sa’ li yamyookil ch’och’, ki’ajman naq eb’ li ralal xk’ajol laj Israel te’xkanab’ rib’ sa’ ruq’ li Qaawa’. A’an kixkol xyu’ameb’ rik’in sachb’a-ch’oolej, jo’ xjachb’al xha’il li Kaqi Palaw, ut kixch’olaniheb’ rik’in li mana li kichal chaq sa’ choxa. Yaal ajwi’ a’an choq’ reheb’ li saaj sa’ li tzoleb’aal. Re naq ink’a’ te’kamq sa’ lix musiq’ejil b’ehil chiru li yu’am a’in, tento te’xk’anjela li paab’aal chirix li Jesukristo. Ut tento te’xk’anjela li paab’aal a’an wulaj wulaj. Maare wankeb’ li saaj li neke’reek’a naq q’uneb’ xpaab’aal. Naru taatenq’aheb’ chixk’eeb’al reetal naq timil timil nak’i li paab’aal, wulaj wulaj. Nach’olaniik rik’in li k’a’ru ka’ch’in ut moko nimob’resinb’il ta naqab’aanu chi kok’ aj xsa’. K’oxla li na’leb’ a’in naq nakawil Exodo 14–17 chiru li xamaan a’in. Naru ajwi’ taawil li raatin li Awa’b’ej Dallin H. Oaks, “Li k’a’ru ka’ch’in ut moko nimob’resinb’il ta” (Jolomil ch’utub’aj-ib’ re abril 2018).

eb’ li saaj ixq sa’ li tzoleb’aal

Naru taqakawob’resi li qapaab’aal wulaj wulaj rik’in li k’a’ru ka’ch’in ut moko nimob’resinb’il ta.

Tzolok sa’ komonil

Re aatinak chirix a’in, naru taapatz’ reheb’ li saaj naq te’xwotz k’a’ru li us neke’xyal xb’aanunkil wulaj wulaj. Maare a’an rilb’al lix kawilal li roq ruq’eb’ chi us, malaj xkawob’resinkil lix nawomeb’ xch’ool. K’a’ raj ru taak’ulmanq wi ta te’xkanab’ xyalb’aleb’ xq’e? Chan ru naq li qachaab’il b’aanuhom wulaj wulaj naru taajuntaq’eetaaq rik’in li na’leb’ kixye li Qaawa’ reheb’ laj Israelita chirix xxokb’al li mana? (chi’ilmanq Exodo 16:16–21). Naru taatenq’aheb’ li saaj chixjuntaq’eetankil lix numsihomeb’ laj Israelita rik’in lix yalb’al qaq’e chixkawob’resinkil li qapaab’aal chirix li Jesukristo wulaj wulaj. K’a’ru naxk’e li Qaawa’ qe li chanchan li mana kixk’e reheb’ laj Israelita wulaj wulaj? K’a’ru naru taqab’aanu li chanchan xxokb’al li mana? Re aatinak chirix a’in, b’aanu li na’leb’ tz’iib’anb’il arin malaj jun laa na’leb’ laa’at.

• Ilomaq sa’ komonil Alma 37:6–7. Sa’ komonil, tz’iib’ahomaq chiru li pizarron “li k’a’ru ka’ch’in ut moko nimob’resinb’il ta” naxpatz’ li Qaawa’ naq taqab’aanu wulaj wulaj re toochalq rik’in. Eb’ li saaj naru te’ril li raatin li Awa’b’ej Dallin H. Oaks, “Li k’a’ru ka’ch’in ut moko nimob’resinb’il ta,” re te’xtaw li k’a’ru ka’ch’in a’ut li naxjal li qayu’am. K’a’ru naru te’xk’e chi uxmank li k’a’aq re ru a’an? K’a’ru nokomusiq’aak chixb’aanunkil re naq te’qoksi li k’a’aq re ru a’an sa’ li qayu’am wulaj wulaj?

• K’a’ut naq tento taqach’olani li qapaab’aal chirix li Jesukristo wulaj wulaj? Re xtenq’ankileb’ li saaj chixtawb’al ru a’in, naru taak’uteb’ li video sa’ “Xkomon chik li tenq’.” Sa’eb’ li video a’an, li Elder D. Todd Christofferson naxk’ut naq tento taqach’olani li qapaab’aal wulaj wulaj. Patz’ reheb’ li saaj naq te’xwotz k’a’ru li xe’xtzol li namusiq’ank reheb’ chixnimob’resinkil lix paab’aaleb’ chirix li Jesukristo wulaj wulaj.

• Na’ajman naq took’anjelaq wulaj wulaj re xkawob’resinkil li qapaab’aal chirix li Jesukristo. Re aatinak chirix a’in, ilomaq sa’ komonil li rox na’leb’ naxye li Elder David A. Bednar sa’ “Más diligentes y atentos en el hogar” (Liahona, noviembre 2009, 17–20). K’a’ru naqatzol rik’in lix na’leb’ chirix li jalam-uuch sa’ lix oficiin? Chan ru naq li na’leb’ a’an nokoxtenq’a chixkawob’resinkil li qapaab’aal chirix li Jesukristo? Naru ajwi’ teeril Alma 32:21, 26–43 ut tex’aatinaq chirix. K’a’ru naqataw chirix xkawob’resinkil li qapaab’aal chirix li Jesukristo?

• Naru taqanimob’resi li qapaab’aal wi taqasik’ xtawb’al li qana’leb’ rik’in li k’a’ru naxyal rix li qapaab’aal. Naru taak’ut li video “Torbellinos espirituales” (ChurchofJesusChrist.org). Aatinanqex chirix li tento taqab’aanu naq wan li qach’a’ajkilal re xkawob’resinkil li qapaab’aal. (Chi’ilmanq ajwi’ Neil L. Andersen, “Eb’ li musiq’ejil sut-iq’,” Jolomil ch’utub’aj-ib’ re abril 2014.) Naru taapatz’ reheb’ li saaj naq te’xye jo’q’e xyale’ rix lix paab’aaleb’ chirix li Kristo, ut k’a’ru xe’xb’aanu re xkawob’resinkil lix paab’aaleb’ sa’ li hoonal a’an. Ye reheb’ naq ch’olob’anb’il sa’ Exodo 14–17 li wech’ok-ib’ ke’xb’aanu laj Israelita chi kok’ aj xsa’ naq ke’wan xch’a’ajkilal. Chan ru naq li wech’ok-ib’ sa’ xyi li ch’a’ajkilal naxq’unob’resi li qapaab’aal? Chan ru naq jalan li wech’ok-ib’ rik’in xch’olob’ankil li na’ok wi’ qak’a’uxl chiru li qaChoxahil Yuwa’ naq ch’a’aj li qayu’am?

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• “El pan de cada día: Modelo,” “El pan de cada día: Cambio,” “El pan de cada día: Experiencia” (eb’ li video), ChurchofJesusChrist.org

Li k’utuk jo’ li Kolonel

Tenq’aheb’ li saaj chixtawb’al ru chan ru naq te’xb’oq li Musiq’ej sa’ li aatinak. Naru te’xb’aanu a’in rik’in “lix na’leb’eb’ … , chan ru neke’xk’am rib’, ut k’a’ru neke’reek’a chirix li evangelio” (Li k’utuk jo’ li Kolonel, 15).