lajeeb’ chi taqlahom

24 abril

K’a’ut naq li Dios naxk’e lix taqlahom qe?

Exodo 18–20

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Ma wan li toje’ xqak’ul li xooxnach’ob’resi rik’in li qaChoxahil Yuwa’ ut li Jesukristo?

• Rilb’aleb’ li wankeb’ sa’ rajb’al ru. Ma wan ani toje’ x’ok sa’ li qateep malaj x’ok sa’ li Iglees? Chan ru taqak’e xsahileb’ xch’ool?

• Xb’oqb’aleb’ chixjunil chixk’ulb’al li evangelio. K’a’ruheb’ li kok’ k’anjel chalkeb’ re, b’ar wi’ naru taqab’oqeb’ li qamiiw chi tz’aqonk?

• Xjunajinkileb’ li junkab’al chi junelik. K’a’ru naru taqab’aanu re xtz’iib’ankil resil li qayu’am?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Rilb’al Exodo 20 maare tatxk’e chixk’oxla k’a’ut naq wankeb’ li taqlahom. Wankeb’ li neke’xk’oxla naq eb’ li taqlahom nokohe’xram ut neke’xmin qu. A’b’anan, naqanaw naq li Dios Yuwa’b’ej nokoxra, jo’kan naq naqapaab’ naq eb’ lix chaq’rab’ nokohe’xtenq’a, us ta ink’a’ junelik naqanaw k’a’ruheb’ aj-e. A’an kixyeechi’i qe naq naru taqanaw naq yaaleb’ lix chaq’rab’ wi te’qayu’ami (chi’ilmanq Jwan 7:17).

Li Awa’b’ej Russell M. Nelson kixye: “Li Yuwa’b’ej ut li K’ajolb’ej nokohe’xra chi junelik ut chi tz’aqal, ut neke’xnaw naq ink’a’ naqil chixjunil li neke’ril a’an, jo’kan naq ke’xxaqab’eb’ li chaq’rab’ li te’xk’am qab’e ut te’xkol qix. Lix rahom li Dios naxk’am rib’ chi tz’aqal rik’ineb’ lix chaq’rab’ ” (“The Love and Laws of God” [aatin yeeb’il sa’ Brigham Young University, 17 septiembre, 2019], 2, speeches.byu.edu).

K’a’ut naq nakatb’antioxin chirixeb’ li taqlahom? K’a’ru nakawaj naq eb’ li saaj te’xtaw ru chirixeb’ lix taqlahom li Dios? Naru taakawresi li tzolok rik’in rilb’al Exodo 20 ut li raatin li Awa’b’ej Dallin H. Oaks “Xraab’al qib’ naq jalan jalanq li qana’leb’ ” (Jolomil ch’utub’aj-ib’ re octubre 2014).

jun saaj winq natzolok sa’ li loq’laj hu

Naru taqanaw naq yaaleb’ lix taqlahom li Dios wi te’qayu’ami.

Tzolok sa’ komonil

Re xtenq’ankileb’ li saaj chixtz’ilb’aleb’ rix li Lajeeb’ chi Taqlahom, naru taapatz’ reheb’ naq te’xye chixjunileb’ li neke’jultiko’ reheb’. Wi neke’raj xtenq’, naru te’xtaweb’ sa’ Exodo 20:3–17. K’a’ut naq li Dios naxk’eheb’ li taqlahom qe? Re xsumenkil li patz’om a’in, li saaj naru te’aatinaq sa’ kok’ ch’uut chirixeb’ li Lajeeb’ chi Taqlahom. Chan ru naq xyu’aminkileb’ li taqlahom a’an nokoxtenq’a chi saho’k sa’ qach’ool ut chi nach’ok rik’in li Dios? Naru xb’aanunkil a’in re xtenq’ankileb’ li saaj chixtawb’al ru k’a’ut naq li Dios naxk’eheb’ li taqlahom qe.

• Li loq’laj hu naxsume li patz’om “K’a’ut naq li Dios naxk’eheb’ li taqlahom qe?” Naru taaye reheb’ li saaj naq te’xsik’ xsumenkil sa’ jun reheb’ li raqal sa’ “Xkomon chik li tenq’.” Chirix aʼan, patzʼ rehebʼ naq teʼxwotz li kʼaʼru xeʼxtzol. Naru ajwi’ te’rileb’ li video a’in re xtawb’aleb’ xna’leb’: “Instrucciones,” “¿Por qué nos da mandamientos Dios?” (ChurchofJesusChrist.org).

• Re xtenq’ankileb’ li saaj chixtawb’al ru k’a’ut naq li Dios naxk’eheb’ li taqlahom qe, naru taajuntaq’eeta li na’leb’ a’an rik’in li na’leb’ ak neke’xtaw ru. Naru taaye reheb’ naq te’xk’oxla naq wankeb’ sa’ jun li b’e sa’ tzuul ut naq wan jun li ramleb’ chire chixjunil li b’e. Patz’ reheb’ naq te’aatinaq chirixeb’ li patz’om a’in: Chan ru naq eb’ lix taqlahom li Dios chanchan li ramleb’ a’an? Chan ru naq noko’osob’tesiik rik’in xpaab’ankileb’ li taqlahom? K’a’ chik ru li na’leb’ naru tooxtenq’a chixtawb’al ru k’a’ut naq li Dios naxk’eheb’ li taqlahom qe ut k’a’ut naq tento te’qapaab’? Re te’xtaw xna’leb’, naru taapatz’ reheb’ naq te’ril jun reheb’ li aatin malaj video sa’ “Xkomon chik li tenq’.” Patz’ reheb’ naq te’xwotz li na’leb’ xe’xtaw ut te’aatinaq chirix li xe’xtzol.

• Maare tex’aatinaq chirix rilb’aleb’ chi us li ani ink’a’ neke’xpaab’ chi moko neke’xyu’ami junjunq reheb’ li taqlahom. Naru taapatz’ reheb’ naq te’xsik’ li na’leb’ kixye li Awa’b’ej Dallin H. Oaks sa’ “Xraab’al qib’ naq jalan jalanq li qana’leb’.” Naru taapatz’ a’in: Chan ru taqileb’ li ani ink’a’ neke’xyu’ami li na’leb’ naqayu’ami laa’o? Chan ru naq taqil lix chaab’ilaleb’ us ta jalan jalanq lix b’aanuhomeb’ rik’ineb’ li qe?

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Deuteronomio 10:12–13; Alma 36:30; Tzol’leb’ ut Sumwank 1:24–28; 82:8–10; 93:20, 28; 130:18–21 (K’a’ut naq li Dios naxk’eheb’ li taqlahom qe)

• Jeffrey R. Holland, “Somos los soldados” (Liahona, noviembre 2011, 44–47; chi’ilmanq ajwi’ li video “Mantente dentro de los límites”); Richard G. Scott, “La Expiación puede asegurar tu paz y tu felicidad” (Liahona, noviembre 2006, 40–42; chi’ilmanq ajwi’ li video “Un anclaje seguro”); Von G. Keetch, “Osob’tesinb’ileb’ ut saheb’ xch’ool li ani neke’xk’uula xtaqlahom li Dios” (Jolomil ch’utub’aj-ib’ re octubre 2015; chi’ilmanq ajwi’ li video juntaq’eet xk’ab’a’)

Li k’utuk jo’ li Kolonel

“Sa’ xyalb’al aaq’e chi wank ut chi k’utuk jo’ li Kolonel, wan naq tatpalto’q. Mika’ch’ino’ aach’ool; kanab’ b’an naq laa maak ut lix q’unil aametz’ew tatxsutq’isi rik’in laa Choxahil Yuwa’ ut li Kolonel” (Li k’utuk jo’ li Kolonel, 14).