jun saaj ixq nase’ek

8 mayo

Chan ru tinnaw naq kuyb’il inmaak xb’aan li Dios?

Exodo 35–40; Levitico 1; 16; 19

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.

• Xyu’aminkil li evangelio. Chan ru naq xsik’b’al li Qaawa’ naru tooxtenq’a rik’in li qach’a’ajkilal ut lix yalb’al qix?

• Rilb’aleb’ li wankeb’ sa’ rajb’al ru. Ani naqanaw li naraj ru li qatij ut li qamiiwil?

• Xb’oqb’aleb’ chixjunil chixk’ulb’al li evangelio. Ma wan li na’leb’ chirix xwotzb’al li evangelio li xe’aatinak wi’ sa’ jolomil ch’utam reheb’ li saaj? Jo’ tzoleb’aal malaj molam, chan ru naq tootenq’anq?

• Xjunajinkileb’ li junkab’al chi junelik. Chan ru naq xsik’b’al xk’ab’a’eb’ li qaxe’ qatoon naxkawob’resi li qakomonil rik’in li qaChoxahil Yuwa’ ut li Jesukristo?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.

Xkʼutbʼal li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Wan naq naqapatz’ ma tz’aqal li qab’aanuhom re naq taakuye’q li qamaak. Us ta na’ajman naq taqayal qaq’e re taakuye’q li qamaak, ink’a’ na’ux a’an rik’in k’iila b’aanuhom. Taakuye’q b’an qamaak naq taqak’ulub’ li uxtaan naxyeechi’i li Jesukristo. Chi jo’ka’in naq toojalaaq.

Sa’ najter kutan, eb’ li b’aanuhom ut mayej re lix chaq’rab’ laj Moises ke’xjayaliheb’ laj Israelita rik’in lix tojb’al rix li maak xb’aan li Kolonel. Li Qaawa’ kixye sa’ Levitico 16:30, “Sa’ li kutan a’an taawanq xtojb’al rix lee maak, ut saqaq chik eeru chiru li Qaawa’.” Yaal naq maajun k’anjel xjunes rib’ naru tixkuy qamaak. A’an li Jesukristo li naxkuy qamaak. Sa’ li qakutankil, eb’ li k’ojob’anb’il k’anjel jo’ li kub’iha’ ut li loq’laj wa’ak neke’xjayali li qak’a’uxl ut li qach’ool rik’in li Kolonel. Nokohe’xtenq’a chixtawb’al ru naq a’an junelik tixkuy qamaak wi taqajal qak’a’uxl.

Chan ru naq li qaChoxahil Yuwa’ katxtenq’a chixnawb’al naq kuyb’il laa maak? Naru taawil Mosiah 4:1–3 ut li raatin li Awa’b’ej Tad R. Callister, “Lix tojb’al rix li maak xb’aan li Jesukristo” (Jolomil ch’utub’aj-ib’ re abril 2019). Li raatin naru tixtenq’aheb’ li saaj chixtawb’al ru naq li qaChoxahil Yuwa’ naxkuy qamaak naq naqajal qak’a’uxl.

jun saaj natijok

Nakuye’ qamaak naq naqak’ul li uxtaan naxyeechi’i li Jesukristo.

Tzolok sa’ komonil

Naru taatikib’ li tzolok rik’in xk’utb’al xjalam-uuch li Jesukristo sa’ Getsemani ut chiru li krus (chi’ilmanq Hu reheb’ li Jalam-uuch re li Evangelio, 56–57). Ye reheb’ li saaj naq te’ril Levitico 1:1–9; 16:15–16, 30. Patz’ reheb’ naq te’xwotz li aatin li naxjultika reheb’ lix tojb’al rix li maak xb’aan li Kolonel. Chan ru naq eb’ li mayej sa’ li raqal a’in ke’xtenq’aheb’ laj Israelita chixyo’oninkil lix tojb’al rix li maak xb’aan li Kolonel? K’a’ru nokoxtenq’a laa’o chixk’oxlankil lix tojb’al rix li maak xb’aan li Kolonel? K’a’ru nokoxtenq’a chireek’ankil li rahok ut li kuyuk maak naxyeechi’i li Kolonel? Xb’aanunkil a’in naru tixtenq’aheb’ li saaj chixtawb’al ru naq li Dios tixkuy qamaak.

• Wankeb’ li kristiaan sa’ li loq’laj hu li ke’xch’olob’ li ke’reek’a naq li qaChoxahil Yuwa’ kixkuy xmaakeb’. Eb’ li saaj naru te’ril resil junjunq reheb’ (chi’ilmanq “Xkomon chik li tenq’ ”). Patz’ reheb’ naq te’xtz’iib’a li aatin sa’eb’ li raqal a’in li naxch’olob’ li naru naqeek’a naq nakuye’ qamaak. Naru taapatz’ reheb’ naq te’xch’olob’ k’a’ru neke’reek’a naq neke’kuye’ xmaak a’an. K’a’ru naqatzol chirix li Dios sa’eb’ li eek’ahom a’in? Naru taawotz li nakaweek’a laa’at chirix li kuyuk maak.

• Wan naq ink’a’ naqanaw ma kuyb’il qamaak xb’aan naq ink’a’ naqanaw ma tz’aqal xqajal qak’a’uxl. Li Elder Dale G. Renlund naxch’olob’ sa’ “Li jalb’a-k’a’uxlej: jun sahil ch’oolejil” chan ru naq taqajal qak’a’uxl chi yaal ut taakuye’q qamaak xb’aan li Dios (Jolomil ch’utub’aj-ib’ re octubre 2016). Naru taatz’iib’a chiru li pizarron Li tz’aqal jalb’a-k’a’uxlej ut Li k’a’ru nokoxram chixjalb’al qak’a’uxl. Patz’ reheb’ li saaj naq te’xtaw li na’leb’ li naru te’xtz’iib’a rub’eleb’ li ch’ol aatin a’an. K’a’ru naqatzol sa’ xraqik li raatin li Elder Renlund chirix li Kolonel ut lix kuyb’al qamaak?

• Wankeb’ li neke’xjal xk’a’uxl a’ut ink’a’ neke’reek’a naq kuyb’ileb’ xmaak. Maare nak’ulman a’an xb’aan naq ink’a’ neke’xkuy xmaak xjuneseb’ rib’. Li raatin li Awa’b’ej Tad R. Callister sa’ “Lix tojb’al rix li maak xb’aan li Jesukristo” naru tixtenq’aheb’. Eb’ li saaj naru te’ril li raqal li natikla rik’in “2. Li maak.” Patz’ reheb’ naq te’xtaw li na’leb’ li truuq raj te’xwotz rik’in jun ramiiw malaj xkomon li ra nareek’a us ta xjal xk’a’uxl. K’e xhoonaleb’ li saaj chixwotzb’al li neke’reek’a chirix li Kolonel, li naxk’e chi uxmank li jalb’a-k’a’uxlej ut lix kuyb’al qamaak.

K’anjelak rik’in paab’aal

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.

Xkomon chik li tenq’

• Enos 1:1–8; Mosiah 4:1–3; Alma 24:7–10; 36:17–21 (Li ke’reek’a li kristiaan naq kikuye’ xmaak)

• Isaias 1:18; Mosiah 26:30; Moroni 6:8; Tzol’leb’ ut Sumwank 58:42–43; 64:10 (Li Qaawa’ naxye naq tixkuy qamaak)

• Russell M. Nelson, “Naru taqab’aanu li chaab’il wi’chik ut toowanq chi chaab’il wi’chik,” Jolomil ch’utub’aj-ib’ re abril 2019

• Craig A. Cardon, “El Salvador desea perdonar,” Liahona, mayo 2013, 15–18

Li k’utuk jo’ li Kolonel

Li Kolonel kixye qe naq taqoksiheb’ li loq’laj hu re xtawb’al xsumenkileb’ li qapatz’om. Chan ru taatenq’aheb’ li saaj chirajb’al roksinkileb’ li loq’laj hu ut li raatineb’ li profeet naq neke’xsik’ xsumenkil lix patz’omeb’?