“22 mayo. Chan ru tink’ut inb’antioxihom chiru li Dios? Deuteronomio 6–8; 15; 18; 29–30; 34,” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li na’leb’ choq’ re 2022 (2021)
“22 mayo. Chan ru tink’ut inb’antioxihom chiru li Dios?” Kim, Taaqehin—Choq’ reheb’ li molam sa’ li Tijonelil re Aaron ut lix tzoleb’aaleb’ li Saaj Ixq: Li na’leb’ choq’ re 2022
22 mayo
Chan ru tink’ut inb’antioxihom chiru li Dios?
Deuteronomio 6–8; 15; 18; 29–30; 34
K’uub’ank na’leb’ sa’ komonil
B’eresinb’il xb’aan jun komon re li awa’b’ejil re li molam malaj tzoleb’aal; 10–20 k’asal
Sa’ xtiklajik li ch’utam, yehomaq sa’ komonil li ch’ol aatin choq’ reheb’ li Saaj Ixq malaj li ch’ol aatin choq’ reheb’ li molam re li Tijonelil re Aaron. Aatinanqex chirix li k’anjel re li kolb’a-ib’ ut li taqenaqil loq’al; naru tex’aatinaq chirix wiib’ oxib’ reheb’ li patz’om li wankeb’ arin malaj lee patz’om laa’ex (chi’ilmanq Manual General: Servir en La Iglesia de Jesucristo de los Santos de los Últimos Días, 10.2, 11.2, ChurchofJesusChrist.org). K’uub’ahomaq chan ru teek’anjela li na’leb’ xex’aatinak wi’.
-
Xyu’aminkil li evangelio. K’a’ru xoo’aatinak wi’ sa’ li ch’utam xnume’, ut k’a’ru li xqaye naq taqab’aanu? K’a’ru ak qab’aanuhom re xk’anjelankil li na’leb’ xqak’uub’?
-
Rilb’aleb’ li wankeb’ sa’ rajb’al ru. K’a’ru naru taqaye malaj taqab’aanu re xtenq’ankileb’ li neke’reek’a naq xjunes wankeb’ malaj naq najt wan li qaChoxahil Yuwa’?
-
Xb’oqb’aleb’ chixjunil chixk’ulb’al li evangelio. K’a’ru naru taqab’aanu re xtenq’ankileb’ li qas qiitz’in chireek’ankil lix rahom li Jesukristo?
-
Xjunajinkileb’ li junkab’al chi junelik. Kʼaʼru chi naʼlebʼ naru taqawotz chiqibʼil qibʼ re xkawob’resinkileb’ li qajunkab’al?
A’ yaal jo’ na’ajman, b’aanu a’in sa’ xraqik li tzolok:
-
Ch’olob’ xyaalaleb’ li na’leb’ li xe’k’utman.
-
Ye wi’chik reheb’ li saaj k’a’ru li xeye sa’ li ch’utam a’in naq teeb’aanu.
Xkʼutbʼal li tzolʼlebʼ
B’eresinb’il xb’aan jun aj jolominel malaj jun li saaj; 25–35 k’asal
Xkawresinkil aawib’ sa’ musiq’ej
Li Dios junelik yoo chiqilb’al ut chiqosob’tesinkil. A’b’an, rik’in chixjunil li nokojalb’ehiik ut noko’aleek wi’, wan naq sa’ junpaat nasach a’an sa’ qach’ool. Kisach li Dios sa’ xch’ooleb’ laj Israelita k’iila sut, jo’ sa’ xyi lix ch’a’ajkilaleb’ naq ke’b’eek sa’ li yamyookil ch’och’. A’b’an, li Qaawa’ toj kixk’ameb’ xb’e toj sa’ li yeechi’inb’il ch’och’—jun na’ajej jwal chaab’il a’b’an wan ajwi’ li aaleek, b’ar wi’ maare te’aaleeq wi’chik chixsachb’al a’an sa’ xch’ooleb’. Li raatin li Qaawa’ sa’ Deuteronomio 6 kik’eeman re xtenq’ankileb’ laj Israelita chixjultikankil junelik a’an ut li raatin (che’ilmanq li raqal 6–9).
Chan ru naq nakak’uula li Qaawa’ ut li raatin sa’ laa ch’ool—re naq ink’a’ “taasachq sa’ laa ch’ool li Qaawa’ ”? (Deuteronomio 6:12). Chan ru naq xjultikankil li Qaawa’ nokoxtenq’a chi b’antioxink, maak’a’ naxye li yooko chi nume’k wi’? Naq nakakawresi li tzolok naru taawil Deuteronomio 12:6–9, 12 ut Lukas 17:11–19. Naru ajwi’ taawil li raatin li Awa’b’ej Dieter F. Uchtdorf, “Agradecidos en cualquier circunstancia” (Liahona, mayo 2014, 70–77).
Tzolok sa’ komonil
Re aatinak chirix xjultikankil li Qaawa’, naru taapatz’ reheb’ li saaj naq te’xye resil jun hoonal naq xsach sa’ xch’ooleb’ jun na’leb’ aajel ru. K’a’ru xk’ulman? K’a’ru nak’ulman naq nasach sa’ qach’ool li xninqal ru xb’aanuhom li Qaawa’ choq’ qe? Patz’ reheb’ li saaj naq te’ril Deuteronomio 6:4–9, 20–25. K’a’ru neke’xk’ut li raqal a’in chirix xjultikankil lix chaab’ilal li Dios sa’ li qayu’am? Naru xb’aanunkil wiib’ oxib’ reheb’ li k’anjel a’in re xtenq’ankileb’ li saaj chixnawb’al chan ru naq te’xb’antioxi re li Qaawa’ lix chaab’ilal.
-
Rilb’al Lukas 17:11–19 sa’ komonil naru tixtenq’aheb’ li saaj chixk’oxlankil k’a’ut naq aajel ru li b’antioxink chiru li Dios. Oksiheb’ li patz’om li te’xtenq’aheb’ chixjuntaq’eetankil li seraq’ rik’ineb’ lix yu’am. K’a’ut naq beleeb’ reheb’ li lajeeb’ chi saqlep rix ink’a’ ke’xb’antioxi re li Kolonel li kixb’aanu choq’ reheb’? K’a’ut naq wan naq nasach sa’ qach’ool b’antoxink chiru li Dios? Patz’ reheb’ li saaj naq te’xk’oxla hoonal naq xe’raj b’antioxink, us ta ch’a’aj li xe’wan wi’. K’a’ru nak’ulman sa’ li qayu’am naq nokob’antioxink? K’a’ut naq nim xwankil li b’antioxink chiru li Dios? (Che’ilmanq li raqal re li loq’laj hu sa’ “Xkomon chik li tenq’ ” re xsumenkileb’ li patz’om.) K’a’ru taqab’aanu re xk’utb’al qab’antioxihom chiru li Dios?
-
Wankeb’ k’iila b’ich chirix li nimank-u ut li b’antioxink, wiib’ reheb’ a’an “Jwal nim aawu” ut “K’e sa’ ajl li k’iila usilal” (Eb’ li B’ich, 46, 153). Naru taapatz’ reheb’ li saaj naq te’ril raatinuleb’ li b’ich re xtawb’al k’a’aq re ru neke’xb’antioxi. Patz’ reheb’ naq te’xwotz k’a’ru xe’xtaw ut naq te’xch’olob’ k’a’ut naq neke’xb’antioxi a’an. Naru teeb’icha wiib’ oxib’ li b’ich sa’ komonil.
-
Li raatin li Awa’b’ej Dieter F. Uchtdorf, “Agradecidos en cualquier circunstancia,” nokoxtenq’a chixtawb’al ru chan ru toob’antioxinq rajlal sa’ li qayu’am. Re xtenq’ankileb’ li saaj chixtz’ilb’al rix li aatin a’in, naru taak’eheb’ sa’ kok’ ch’uut ut taak’e jun raqal re li junjunq ch’uut re te’ril. Patz’ reheb’ naq te’xwotz jun aatin li naxch’olob’ chi k’osb’il ru li yoo chixk’utb’al li Awa’b’ej Uchtdorf. Patz’ reheb’ naq te’xwotz k’a’ru xe’xtzol chirix li b’antioxink. Naru ajwi’ te’ril li video “Presidente Russell M. Nelson - El poder sanador de la gratitud” (ChurchofJesusChrist.org). K’a’ru taqab’aanu re “toob’antioxinq sa’ chixjunil hoonal”? Ma naqanaw ru junaq kristiaan li junelik nab’antioxin us ta wan xch’a’ajkilal?
K’anjelak rik’in paab’aal
Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’ anajwan. Wi te’raj, naru te’xwotz xna’leb’. Ye reheb’ naq te’xk’oxla chan ru naq xb’aanunkil li k’a’ru x’ok sa’ xk’a’uxleb’ tixkawob’resi li komonil wankeb’ wi’ rik’in li qaChoxahil Yuwa’ ut li Jesukristo.
Xkomon chik li tenq’
-
Mosiah 2:19–24 (Tento taqanima ru ut toob’antioxinq chiru li Dios)
-
Alma 34:38; 37:37; Tzol’leb’ ut Sumwank 46:32; 59:7, 15–21 (Tento toob’antioxinq chirix chixjunil li k’a’aq re ru)
-
Salmos 107:8–9; Filipenses 4:6–7; Tzol’leb’ ut Sumwank 78:19 (Li osob’tesiik li nachal rik’in li b’antioxink)
-
Dale G. Renlund, “Considerad la bondad y la grandeza de Dios,” Liahona, mayo 2020, 41–44
-
Li b’antioxink,” sa’ Choq’ re Xkawilaleb’ li Saaj (hu, 2011), 18
Li k’utuk jo’ li Kolonel
Li Kristo kixnaweb’ ru lix tzolom, ut kixnaw chan raj ru toj te’wanq. Li nawom a’in kiwan xwankil sa’ chan ru kixtzoleb’. Chan ru taatzoleb’ li rajomeb’ ut lix ch’a’ajkilaleb’ li saaj re naq truuq taatenq’aheb’ rik’in li nakak’ut?