Re naq lix sahilal eech’ool tz’aqalaq re ru
Li Jesukristo a’an li yo’leb’aal re chixjunil li k’iraak, li tuqtuukilal, ut li k’iijik maak’a’ roso’jik.
Ex was wiitz’in, li wank eerik’in a’an jun sahil ch’oolejil. Ut a’an li nawaj raj aatinak chirix eerik’in sa’ li eq’la a’in—li wank chi tz’aqalaq re ru lix sahilal qach’ool.
Sa’ jun esil toje,’ naxye chi kam’a’in: “Li nimla hiik ut kaq-sut-iq’ neke’xk’e chi chiiq’ank li tenamit [ut] li ruchich’och’.” Rik’in li kaq-sut-iq’ ut li b’uut’iha’, li tiqwal chi numtajenaq ut li chaqi-eel, lix k’atik li k’iche’ ut li hiik, li pleetik, ut li xuwajel yajel, chanchan naq “chixjunil li ruchich’och’ [yoo chi] eek’asiik.”
K’iila millon li kristiaan xe’kana chi maak’a’ wan reheb’, ut ink’a’ naru rajlankileb’ li yu’am xe’ch’a’ajkilo’ xb’aaneb’ li ch’a’ajkilal a’in. Li wech’ok sa’atqeb’ li junkab’al ut li k’aaleb’aal jo’ ajwi’ li yalb’a-ix sa’ qaam xb’aan li xiwak, li wiib’ank ch’oolej, ut li oyb’enihom moko nawulak ta, nokohe’xkanab’ ajwi’ sa’ li choqink. Wan tana’ naq ch’a’aj reek’ankil li sahilal kixk’ut chaq laj Lehi naq a’an rajb’al li qayu’am. Chi jo’q’ehaq chiqajunilo qapatz’om tana’: B’ar wan xhiilal li waam? B’ar xtuqtuukil … ?” Naqapatz’qib’, chan raj ru tintaw li sahil ch’oolejil us ta li ch’a’ajkilal re li yu’am a’in?
Lix sumenkil maare moko nim ta ru, a’b’an yalb’il chaq rix naq yaal chalen chaq xkutankil laj Adan. Li sahil ch’oolejil li ink’a’ na’oso natawman sa’ xjayalinkil qib’ rik’in li Kolonel Jesukristo, ut sa’ xyu’aminikil li evangeio jo’ chanru kixyu’ami ut kixk’ut chaq a’an. A’ yaal chan ru tootzolok chirix li Jesukristo, taqak’anjela qapaab’aal chirix, ut taqab’aanu jo’ kixb’aanu chaq, jwal wi’chik taqataw ru naq a’an li yo’leb’aal re chixjunil li k’iraak, li tuqtuukilal, ut li k’iijik maak’a’ roso’jik.A’an nokoxb’oq chiqajunjunqal re chalk rik’in,jun b’oqok li ch’olob’anb’il xb’aan li Awa’b’ej Henry B. Eyring jo’ “li b’oqok q’axal wi’chik xnimal ru li taaruuq tixk’ulub’a junaq.”
Tzolok chirix li Jesukristo
Chan ru nokochal rik’in li Kristo? Sa’ li po abril xnume’ li Awa’b’ej Russell M. Nelson ut li Elder M. Russell Ballard ke’xwaklesi qach’ool chixtzolb’al “Li Yo’yookil Kristo”jo’ eechej re tzolok chirix li Kolonel.Naab’aleb’ xe’xb’aanu chaq li ke’xye ut xe’osob’tesiik.Moko junxil ta, jun lin raarookil wamiiw kixk’e reheb’ li junjunq li ralal xk’ajol ak ninqeb’ jun reetalil li esil a’in rik’ineb’ jalam-uuch re li evangelio chiru re xk’utb’esinkil li naxye chaq li junjunq chi aatin.Kixwaklesiheb’ xch’ool naq te’xtenq’aheb’ li rimam re te’xtaw ru ut re te’xk’uula sa’ xch’ooleb’.Moqon li wamiiw kixwotz jun li kaxlan mu re li rimam li waqib’ chihab’ xyu’am, xLaynie xk’ab’a’, naq yoo chixyeeb’al li raatinul chi k’uulanb’il sa’ xch’ool. Yoo chixb’aanunkil rik’in sahilal ut chaq’alil ru.Kink’e reatal naq wi jun ch’ina ixqa’al li waqib’ chihab’ xyu’am naru xb’aanunkil , laa’in ajwi’ tinruuq chixb’aanunkil!
Naq nintzolok chaq chirix lix yu’am ut lix k’utum li Jesukristo chi jayalinb’il ink’a’uxl ut nink’uula sa’ inch’ool li raatinul “Li Yo’yookil Kristo,” naniman lin b’antioxihom ut lin rahom choq’ re aj Kolol qe. Li junjunq chi aatin re li musiq’anb’il esil a’an wan jun xk’utum li naxnimob’resi li nintaw ru chirix lix choxahil k’anjel sa’ ruchich’och’. Li xintzol ut xweek’a chaq chiru li hoonal a’in re tzolok ut tz’ilok-ix sa’ ink’a’uxl naxxaqab’ xyaalalil naq li Jesus “a’an lix saqen, lix yu’am, ut lix yo’onihom li ruchich’och’.” Eb’ li najter loq’laj hu ut li raatineb’ li yo’yookil profeet sa’ roso’jikeb’ li kutan li tz’iib’anb’ileb’ malaj yeeb’ileb’ re xnimankil ru a’an neke’xch’olob’ xyaalal naq “Lix b’e a’an, a’an li b’ehil nak’amok sa’ li sahil ch’oolejil sa’ li yu’am a’in, ut sa’ li junelik yu’am sa’ li ruchich’och’ toj chalel.”
Chiwanq li paab’aal chirix li Jesukristo
Naq nakatzol lix yu’am ut lix k’utum li Kristo sa’ naab’al ru chi na’leb’, laa paab’aal chirix taak’ihanq. Tat-ok chixnawb’al naq a’an nakatxra ut naxtaw ru chi tz’aqal anihat. Chiru li 33 chihab’ re xyu’am sa’ ruchich’och’, a’an kixkuy li tz’eqtaanaak; raxiik’; tz’okaak, chaqi-eel, it lub’k; li junataal; hob’e’k ut sak’e’k; ut sa’ xraqb’al ru li rahil kamk sa’ ruq’eb’ winq aj maakeb’.Sa’ li awimq Getsemani ut chriru li krus sa’ Kalvario, kireek’a chixjunileb’ li rahilal, li ch’a’ajkilal, li aaleek, li yajel, ut xmajelal li metz’ew li naqak’ul laa’o.
Maak’a’ naxye li k’a’ru rahob’tesinb’ilo wi’, li Kristo a’an li yo’leb’aal li k’iraak. Chixjunileb’ li nexe’xk’ul li jar paay chi yib’ ru aj na’leb’, xnimal ru tz’eqok, xnimal ru yajel malaj rahilal li nalub’tesin, li jitok moko yaal ta chirixeb’, li xuwajel rahob’tesiik, malaj rahilal sa’ musiq’ej xb’aan li maak malaj li ch’i’ilank, naru te’k’irtesiiq xb’aan laj Kolol re li ruchich’och’. A’b’anan, a’an ink’a’ taa’ok wi ink’a’ nab’oqe’. Tento toochalq rik’in ut taqakanab’ naq a’an tixb’aanu lix sachb’a-ch’oolejil k’anjel.
Sa’ jun saq’ehil kutan kinkanab’ li rokeb’aal wochoch chi teeto re xyalb’al xsahil li iq’. Jun li ch’ina tz’ik ki’ok chaq chiru li teetookil okeb’aal toja’ naq kixk’e reetal naq maawa’ aran b’ar wi’ taaraj wank. Kirupupik sa’ junpaat sa’ xsutam li na’ajej, xko’o chiru xlemul li rilob’aal kab’l re raj taa’eeleliq. Kiwaj raj xb’eresinkil sa’ xyaalal toj reetal li okeb’aal teeto chaq, a’b’an xuwajenaq ut naab’al sut najilok sa’ junpaat. Sa’xlub’ik kixk’ojob’ rib’ sa’ xb’een li t’ikr sa’ xb’een li rilob’aal kab’l chi sachenaq ru. Kinchap jun li mesleb’ ut chi timil timil kinjilosi toj li t’ikr b’ar kitaqe’ wi’ li ch’ina tz’ik sa’ xuwajel. Naq yookin chixchapb’al xjolom li mesleb’ chixk’atq li roq, li tz’ik kixaqli chiru li mesleb’. Chi timil timil kinb’eek toj chire li okeb’aal teeto chaq, ut li tz’ik sa’ junpaat kirupupik chi ach’ab’anb’il chirix kab’l.
Jo’ li tz’ik a’an, wan naq nokoxuwak chixkanab’ankil qib’ xb’aan naq ink’a’ naqataw ru lix tz’aqal rahom ut li ratawal li Dios re qatenq’ankil. A’b’an naq naqatzol lix kuub’anb’il na’leb’ li qaChoxahil Yuwa’ ut lix k’anjel li Jesukristo, naqataw ru naq li k’a’ru neke’raj a’an, a’an li qasahilal ut li qak’iijik maak’a’ roso’jik. Neke’saho’ chiqatenq’ankil naq nokopatz’ok, naq nokosik’ok, ut naq nokob’oqok. Naq wan qapaab’aal ut sa’ tuulanil ch’oolej naqak’ul lix sumehomeb’, noko’ach’ab’aak chiru xmajelal li naqeek’a ut naqak’oxla, ut chi jo’kan taaruuq taak’utmanq chiqu li b’e re xik chi uub’ej.
Li Jesukristo a’an li nayo’la’ wi li tuqtukilal. A’an nokoxb’oq “chixkanab’ankil qib’ sa’ li xnimal ru tel” ut naxyeechi’i li “tuqtuukilal … li nax q’ax ru chixjunil li na’leb’,” jun eek’ahom li nachal naq lix Musiq’ “[naxye] tuqtuukilal re li qaam” chi maak’a’ naxye li yalb’a-ix nasutin qe. Maak’a’ naxye ma a’an li ch’a’ajkilal qe qajunes, re li qajunkab’al, malaj re li qak’aleb’aal, li tuqtuukilal taachalq naq taqapaab’ naq wan xwankil li Ralal Junaj Chirib’il chiru li Dios re xk’irtesinkil li qaam li naraho’.
Li xSnježana Podvinski, jun xkomon laj Santil Paab’anel moko k’iheb’ ta aran Karlovac, Croacia, kixkanab’ rib’ chiru li Kolonel naq lix b’eelom jo’ ajwi’ xna’ xyuwa’ ke’kam chiru waqib’ po sa’ li chihab’ xnume’. Chi rahob’tesinb’il, a’b’an wan xnawom naq li junkab’al maak’a’ roso’jik, kiroksi chixjunil lix tumin kixk’uula chaq re xik sa’ li santil ochoch, b’ar kitz’ape’k wi’ sa’ junajil rik’in lix b’eelom ut lix na’ xyuwa’. A’an kixye naq eb’ li kutan kiwan sa’ li santil ochoch wankeb’ choq’ xjolomil xyu’am. Xb’aan xkawil nawom chirix li Jesukristo ut lix tojb’al rix li maak kixb’aanu, nareek’a chaq li tuqtuukilal ut li k’iraak li nawan ajwi’ choq’ kawilal reheb’ li ani neke’sutink re.
Li paab’aal chirix li Jesukristo naxk’am chaq xkomon li maatan chirix li k’iraak ut li tuqtuukilal. Jo’ kixye li Awa’b’ej Henry B. Eyring: “Ninb’antioxi chanru naq li Qaawa’ na’ula’anink we rik’in laj K’ojob’anel Ch’oolej naq nawaj ru tuqtuukilal. A’ut li qaYuwa’ sa’ Choxa moko ka’aj ta wi’ naxk’oxla lix k’ojk’ookilal qach’ool, q’axal wi’chik naxk’oxla ma yooko chi xik chi uub’ej.”
Xb’aan lix tojb’al rix li maak kixb’aanu li Jesukristo, li naxk’e li maatan re li tojok-ix ut li wakliik chi yo’yo’, nokoru chixjalb’al qak’a’uxl, chi jalok, chi k’iik chi junelik q’e kutan.Xb’aan li metz’ew naxk’e chaq qe naq noko’ab’in chiru, naru toowulaq toj b’ar ink’a’ raj taaruuq toowulaq yal qajunes qib’. Ink’a’ naqataw ru chi tz’aqal chanru, a’b’an chixjunileb’ li neke’reek’a’ xk’iijik lix paab’aal chirix li Kristo neke’xk’ul ajwi’ xkomon chik xtawb’al ru chirix li choxahil ak wan re ut lix choxahil ajom, ut a’an nak’amok qe chixsik’b’al ru li k’a’ru naxchap rib’ rik’in li nawom a’an.
Us ta li ruchich’och narataw qat’anb’al kama’ li “yal xulo,” xnawb’al naq li Dios a’an li qaYuwa’ naxk’ojob’ qach’ool rik’in naq wan qachoxahil eechanihom ut yo’onihom. Us ta li ruchich’och naxye qe naq li yu’am a’in kama’ jun b’e maak’a’ relik, xnawb’al naq li Ralal Junaj Chirib’il chiru li Dios kixk’e naq taatoje’q qix ut naq toowakliiq chi yo’yo’ naxk’e qoyb’enihom re k’iik chi junelik.
Xb’aanunkil jo naxb’aanu li Jesukristo
Naq tootzoloq xkomon chik chirix li Jesukristo, taak’ihanq qapaab’aal chirix ut chi kama’an taqaj xtaaqenkil lix na’leb’. Xkuulankileb’ lix taqlahom taa’ok choq’ xnimal li qajom. Li qaam taarataw xk’osb’al xrahilaleb’ li jun ch’ol chik, jo’ kixb’aanu chaq a’an, ut taqaj naq te’reek’a li tuqtuukilal ut li sahilal li xqataw chaq laa’o.
K’a’ut naq jwal nim xwankil xyalb’al qaq’e chixb’aanunkil li kixb’aanu chaq a’an? Xb’aan naq wi naqak’e qapaab’aal chi k’anjelak, li Santil Musiq’ej naxch’olob’ xyaalal li junelikil yaal. Li Jesus kixk’eheb’ xna’leb’ lix tzolom naq te’xk’uulaheb’ lix taqlahom xb’aan naq a’an naxnaw naq wi naqataaqe lix na’leb’, too’ok chireek’ankil li sahilal, ut wi wanqo sa’ lix b’e, toowulaq sa’ xtz’aqalil li sahil ch’oolejil. A’an kixch’olob’ a’in, “Xinye a’in eere re naq lix sahilal inch’ool chiwanq eerik’in ut lix sahilal eech’ool tz’aqalaq re ru.”
Ma kab’lanb’ileb’ lix nawom qach’ool sa’ xb’een li kawil k’ojleb’aal re li Jesukristo ut lix evangelio? Naq lix nimla kaq-sut-iq’ re li yu’am neke’aalo’ sa’ qab’een, ma naqasik’ chi aajel ru junaq tasal hu malaj junaq li esil sa’ li internet re patz’ok qatenq’ankil? Roksinkil li qahoonal re xkab’lankil ut xkawob’resinkil li qanawom ut lix nawom qach’ool chirix li Jesukristo tixk’e chaq xsahil ru sa’ li hoonal re yale’k ut ch’a’ajkilal. Rilb’aleb’ ru li loq’laj hu ut xtz’ilb’aleb’ rix li raatineb’ li yo’yookil profeet rajlal kutan, okenk sa’ li tijok chi junjunqal ut chi anchal ch’oolej rajlal kutan, okenk chi anchalil ch’oolej sa’ li loq’laj wa’ak rajlal xamaan, tenq’ank jo’ tixb’aanu raj li Kolonel—li junjunq chi kok’ na’leb’ a’an neke’xjal rib’ choq’ saqoonaq re xkab’lankil jun yu’am rik’in sahilal.
K’a’ru naxk’e xsahil aach’ool? Ma rilb’aleb’ laa komon li nakara sa’ xraqik jun nimla kutan? Ma li sahilal naq nakab’aanu chi chaab’il laa k’anjel? Ma li saqen sa’ xnaq’ ru junaq naq nakawotz xk’amb’al li riiq? Ma li raatin junaq li b’ich li na’ok sa’ laa waam? Ma xchapb’al li ruq’ junaq laa wamiiw jwal nach’? Chak’ehaq aahoonal re xk’oxlankil li nakat-osob’tesiik wi’, ut chasik’aq chanru xwotzb’aleb’. Naq nakaye’ aawuq’ re k’anjelak chiru ut xwaklesinkileb’ xch’ool laa was aawiitz’in li wankeb’ sa’ laa wech kab’al malaj wankeb’ yalaq ta b’ar sa’ ruchich’och’, taaweek’a xnimal li tuqtuukilal ut li k’iraak, jo’ ajwi’ li k’iik.
Chalqat rik’in. Ninch’olob’ xyaalal naq wi taak’e li Jesukristo jo’ xch’oolil laa yu’am, taataw li sahilal b’ar wankat wi’, maak’a’ naxye li nak’ulman chasutam. Relik chi yaal, “Junes A’an,” a’an laa sumenkil. Chak’ehaq ut chatawaq aahoonal re xnawb’al ru li Jesukristo rik’in tz’ilok-ix chi anchal aach’ool, xnimob’resinkil laa paab’aal chirix, ut xk’eeb’al aach’ool chi wulak jo’ chanru a’an. Naq naqab’aanu a’in, laa’o ajwi’ too’eek’asiiq chixyeeb’al, jo’ li xLaynie, “B’antioxinb’ilaq taxaq re li Dios li maatan li maak’a’ xjuntaq’eetankil li kixk’e chaq sa’ lix choxahil Alal.” Sa’ lix osob’tesinb’il ut lix loq’laj k’ab’a’ li Jesukristo, amen.