Taqara qib’ chiqib’il qib’ jo’ chanru nokoxra a’an
Naq nokok’anjelak chiruheb’ li qas qiitz’in ut naqakuyeb’ xmaak rik’in yaalil rahok, tooruuq chi k’irtesiik ut kawob’resiik re toonumtaaq sa’ xb’een li qach’a’ajkilal.
Chiru li wa’ak sa’ roso’jik, li Kolonel kixk’e jun ak’ taqlahom reheb’ lix tzolom, xyeeb’al:
“Jun ak’ chaq’rab’ nink’e eere: naq chera eerib’ cherib’il eerib’. Jo’ naq xexinra laa’in, jo’kan ajwi’ naq chera eerib’ cherib’il eerib’.
“Rik’in a’in chixjunileb’ te’nawoq re naq laa’ex intzolom: wi nekera eerib’ cherib’il eerib’.”
Eb’ lix tzolom li Kolonel ke’xk’ul jun ak’ taqlahom re xb’aanunkil b’ayaq chik, q’axal wi’chik xnimal ru ut choxahil. Li ak’ taqlahom ut b’oqom a’in yeeb’il chi k’osb’il ru rik’in li ch’ina aatin “jo’ naq xexinra laa’in.”
Li rahok a’an li yu’amink; li rahok a’an li k’anjelak chiru qas qiitz’in
“Li rahok a’an jun eek’ahom re oxloq’ink, k’oxlank, ut ch’olanink. Li xnimal ru reetalil lix rahom li Dios choq’ reheb’ li ralal xk’ajol natawman sa’ lix junelikil tojb’al rix li maak kixb’aanu li Jesukristo.” “Xb’aan naq li Dios k’a’jo’ naq kixra li ruchich’och’,” kixtz’iib’a laj Jwan, “kixk’e chaq li Ralal jun chirib’il re naq chixjunil li taapaab’anq re, ink’a’ taasachq, wanq b’an xyu’am chi junelik.” “Xraab’al li Dios ut li rech kristiaanil a’an jun xna’leb’ lix tzolom li Jesukristo.”
Junjunqeb’ chihab’ chaq anajwan, naq li xb’eenil qi, laj Jose xk’ab’a’, wan kaahib’ chihab’ xyu’am, yoo chaq chi b’atz’unk rik’in li wixaqil. Naq yookeb’ chi se’ek ut saho’k sa’ xch’ooleb’, li qi kixpatz’, “Na’chin, ma nikinaara?”
A’an kixsume: “Hehe’, Jose, nakatinra.”
Chirix a’an kipatz’ok wi’chik: “Chan ru nakanaw naq nikinaara?”
A’an kixch’olob’ chiru li reek’ahom xch’ool ut kixye ajwi’ chixjunil li k’a’ru ak xb’aanu ut li wan sa’ xch’ool xb’aanunkil choq’ re.
Chixix a’an li wixaqil kixpatz’ ajwi’ li k’a’ru xpatz’om chaq laj Jose, roksinkil ajwi’ li kawil patz’om a’in: “Chan ru nakanaw laa’at naq nikinaara?”
Rik’in jun q’unil sumehom ut chi maak’a’ xb’alaq’il, a’an kixye: “Nakatinra xb’aan naq ninweek’a chi sa’ li waam.” Li kixb’aanu ut kixye laj Jose re lix na’chin sa’ li kutan a’an ut junelik naxk’ut naq li rahok a’an jun xjunajinkileb’ li k’a’ru naqab’aanu jo’ ajwi’ li chamal eek’ahom.
Li rey aj Benjamin kixk’ut: “Ut k’ehomaq reetal, ninye eere li k’a’aq re ru a’in re naq teetzol chaab’il na’leb’; re naq teetzol naq jo’q’e wankex chi k’anjelak chiru lee rech winqilal ka’ajwi’ wankex chi k’anjelak chiru lee Dios.”
Sa’ li ruchich’och anajwan nujenaq rik’in k’iila paay chi rahilal xb’aan k’iila na’leb’, xtaqlankil jun texto tz’iib’anb’il rik’in jun li emoticon re se’ek malaj xpuktesinkil jun ch’ina-usil jalam-uuch rik’in li aatin “nakatinra,” a’an chaab’il ut nim ru. A’b’an li tento taqab’aanu naab’alo a’an xkanab’ankil li qacelular ut, rik’in li quq’ ut qoq, xtenq’ankileb’ li ani wankeb’ sa’ aajeleb’ ru. Li rahok chi maak’a’ li k’anjelak, a’an chanchan li paab’aal chi maak’a’ xb’aanuhom; relik chi yaal, a’an kamenaq.
Li rahok a’an xkuyb’al li maak
Li saq ruhil rahok narahok wi’ li Kristo, a’ li tz’aqal rahok, moko ka’aj ta wi’ nokoxmusiq’a chi k’anjelak ut chi tenq’ank, naxk’e ajwi’ qe li qametz’ew re kuyuk maak, maak’a’ naxye k’a’ru x’uxman. Tinwaj xwotzb’al eerik’in li k’a’ru kinnumsi li kixtoch’ inch’ool ut kixjal lin yu’am. Laj Ted ut li xSharon, xna’ xyuwa’ laj Cooper, li wankeb’ arin anajwan, ke’xk’e inliceens chixwotzb’al k’a’ru kixk’ul lix junkab’al numenaq lajeeb’ chihab’ chaq anajwan. Tinye li esil jo’ chanru naril laj Ted, lix yuwa’ laj Cooper:
Li 21 xb’e li po agosto re 2008, a’an li xb’eenil kutan re tzolok, ut li oxib’ li ras laj Cooper: laj Ivan, laj Garrett, ut laj Logan, wankeb’ b’ar naxaqli wi’ li bus re te’xik chi sa’. Laj Cooper, li wan kaahib’ chihab’ xyu’am, wan sa’ lix b’aqlaq ch’iich’; li wixaqil, li xSharon yoo chi b’eek.
Li wixaqil ak kixq’ax ru li nimb’e ut kixye re laj Cooper naq taachalq rik’in. Sa’ tz’aqal li hoonal a’an, jun li b’eleb’aal ch’iich’ kixq’ot sa’ lix tz’e timil timil ut kinume’ sa’ xb’een laj Cooper.
Xinb’oqe’ xb’aan li wech kab’al, xyeeb’al we naq laj Cooper kitoch’e’ xb’aan jun li b’eleb’aal ch’iich’. Sa’ junpaat xkohin toj b’ar naxxaqab’ wi’ rib’ li bus re rilb’al. Laj Cooper yokyo sa’ xb’een li pach’aya’, ch’a’aj namusiq’ak, a’b’an ink’a’ nak’utun naq toch’enaq.
Kinwiq’ib’ wib’ chixk’atq laj Cooper ut kinyal xwaklesinkil xch’ool rik’in xyeeb’al “Usaq chixjunil. Kuy b’ayaq.” Sa’ li hoonal a’an kiwulak laj Nathan, aj jolominel re li ch’uut reheb’ li taqenaqil aj tij, rochb’een li rixaqil. A’an kixye naj taqak’e jun osob’teisnk rik’in li tijonelil re laj Cooper. Kiqak’e quq’ sa’ xb’een xjolom laj Cooper. Ink’a’ nanaq sa’ inch’ool li k’a’ru kinye sa’ li osob’tesink, a’b’an nanaq sa’ inch’ool chi saqen ru eb’ li ani ke’wan sa’ li qasutam, ut tz’aqal aran kinnaw naq laj Cooper taakamq.
Kik’ame’ laj Cooper sa’ li b’anleb’aal sa’ jun tulux ch’iich’, a’b’an kikam ajwi’. Laa’in kiweek’a naq lin Choxahil Yuwa’ yoo chixyeeb’al we naq lin mertoomil sa’ li ruchich’och’ ak kitz’aqlok ru ut naq anajwan a’an chik laj ilol re laj Cooper.
Kooru chixnumsinkil jun ch’ina hoonal rik’in laj Cooper sa’ li b’anleb’aal. Eb’ li neke’k’anjelak aran ke’xkawresi re naq tooruuq chixq’alunkil ut chixchaq’rab’inkil ut kooru ajwi’ chi kanaak aran li hoonal taqaj rik’in, chixq’alunkil.
Chiru li sutq’iik chaq sa’ li qochoch, li wixaqil ut laa’in, jwal ra qach’ool, ut kiqil qib’ chiqib’il qib’ ut ko’ok chi aatinak chirix li saaj winq li xb’eresi chaq li b’eleb’aal ch’iich’. Ink’a’ naqanaw ru, us ta wan li rochoch sa’ li jun chik b’e ut wan sa’ xsutam li qateep.
Wulajaq chik k’a’jo’ xch’a’ajkilal choq’ qe xb’aan naq koo’aalo’ chi tz’aqal rik’in li rahilal. Kinwiq’la ut kintijok chi anchal inchal inch’ool jo’ maajun wa inb’aanuhom chi rub’elaj a’an. Kinpatz’ re li qaChoxahil Yuwa’ sa’ xk’ab’a’ laj Kolol we naq taarisi li rahilal a’in li na’aalob’resin chaq we. Jo’kan kixb’aanu.
Moqon sa’ li kutan a’an, jun laj tenq’ aj k’ehol na’leb’ sa’ li awa’b’ejil re li oqech wanko wi’ kixkawresi jun ch’utam sa’ li rochoch rik’in li saaj aj winq—li xb’eresi chaq li b’eleb’aal ch’iich’—ut xna’ xyuwa’. Li xSharon ut laa’in xqoyb’eni naq taawulaq li saaj rochb’eeneb’ lix na’ xyuwa’. Naq kitehe’ li okeb’aal, toj aran xqanaw ru. Lin obiisp kihasb’ak sa’ lin xik, “Ayu rik’in.” Li xSharon ut laa’in kiqaq’alu sa’ wiib’al. Kooyaab’ak sa’ komonil chiru naab’al hoonal. Kiqaye re naq naqanaw naq li k’a’ru kik’ulman moko kiraj ta xb’aanunkil.
Choq’ re li xSharon ut laa’in a’an jun sachb’a-ch’oolej, naq sa’ kab’ichal kiqeek’a chi kama’an ut toj naqeek’a chi jo’kan anajwan. Sa’ xk’ab’a’ li rusilal li Dios, kooru chixk’amb’al li nimla b’e, li tz’aqal b’e, li junaj chi b’e, ut xk’eeb’al qarahom re li chaab’il saaj winq a’in.
Chiruheb’ li chihab’, koonach’o’ rik’in a’an ut lix junkab’al. Kixwotz qik’in li xninqal ru xk’ulum sa’ xyu’am. Koowulak ajwi’ sa’ li santil ochoch rik’in naq yoo chixkawresinkil rib’ re taaxik sa’ lix mision.
Ex was wiitz’in, laj Ted naxnaw chi ink’a’ nawiib’an xch’ool naq li qaChoxahil Yuwa’ nokoxra. A’an naxnaw naq nokoru chixkuyb’al li maak, ut risinkil li riiq chi jo’kan, k’a’jo’ xki’il jo’ chanru xk’ulb’al li kuyuk maak. Li ki’il a’in nachal naq naqataaqe xb’aanuhom li qanimla eetalil. Sa’ lix Hu laj Mormon, laj Alma kixye chirix li Kolonel: “Ut a’an taaxik, ut tixnumsi li rahilal ut ch’a’ajkilal ut xyalb’al rix, li jar paay wan, ut a’in re naq taatz’aqloq ru li aatin li naxye, tixk’ul sa’ xb’een lix rahileb’ ut lix yajeleb’ lix tenamit.”
Ex was wiitz’in, k’a’jo’ xnimal ru li esil a’in chirix li yaalil rahok ut kuyuk maak. Laa’o ajwi’ naru taawanq qe xsahil qach’ool naq yooqo chi k’anjelak chiru li qas qiitz’in ut xkuyb’aleb’ xmaak. Laj Georgy, jun chik reheb’ li kaahib’ li qaqi, rajlal naxye, “K’a’ru paay chi junkab’alo laa’o?” Ut naxsume ajwi’, “Laa’o jun junkab’al sa xch’ool!”
Li Awa’b’ej Thomas S. Monson kixk’e qana’leb’, xyeeb’al, “Chiqatz’il rix li qayu’am ut chiqayal qaq’e chixtaaqenkil li k’a’ru kixk’ut qe rik’in li Kolonel rik’in naq naqak’ut xchaab’ilal qach’ool, li qarahom, ut li tz’aqal rahok.”
Laa’in ninnaw naq li qaChoxahil Yuwa’ ut li Ralal, li Jesukristo, nokohe’xra ut wan xch’ooleb’ re qatenq’ankil chi k’anjelak naq naqara qib’ chiqib’il qib’ jo’ chanru nokohe’xra a’an. Ut ninnaw naq rik’in k’anjelak chiruheb’ li qas qiitz’in ut naqakuyeb’ xmaak rik’in yaalil rahok, tooruuq chi k’irtesiik ut kawob’resiik re toonumtaaq sa’ xb’een li qach’a’ajkilal. Jo’kan ninch’olob’ xyaalal sa’ xk’ab’a’ li Jesukristo, amen.